15 كتاب لازم تقراهم لو كنت مصمم جرافيك

اللي بيميز المجتمعات الغريبة هو أنهم بيفكروا بمبدأ “الاعتماد بالتبادل” وهي فكرة تبادل المعرفة والمصادر وحتى الأدوات أو تبادل الأدوار في الشغل طالما في دا منفعة للجميع والكل مستفاد، على العكس تماماً في مجتمعاتنا العربية واللي للأسف كتير بيدايقني إننا كمجتمع -تصميم- عربي بنفتقر لبعض العادات دي!

من فترة أنخرطّ أكتر وبشكل كبير مع مصممين من أماكن كتير من العالم وكونت علاقات مع نسبة كبيرة منهم ولاحظت الفكرة دي كل يوم بشكل أوضح وأوضح، وبقينا دايماً من وقت للتاني بنتكلم بهدف تبادل المعرفة والثقافة وحتي الأدوات والمصادر وحقيقي الموضوع مفيد جداً بالنسبة لكل الأطراف، من المرات اللي فعلاً كان جميل هو أن مصمم فرنسي اتعرف عليا وبدأنا نتبادل المصادر والأدوات وكان كل واحد فينا بيضيف للتاني أكتر فا بقي مجموع اللي عند كل واحد فينا يساوي مجموع الأتنين “1+1=2” وأعتقد دي أفضل حاجة ممكن نحققها كأفراد أو حتي مجتمعات.

من الحاجات اللي عملناها أنه طلب مني أبعتله الكتب اللي عندي وأعمله ريفيو عنها وأنصحه يقرا إيه وهو هيعمل المثل باستثناء الكتب اللي عندي فعلاً، والنتيجة أنه بعتلي 15 كتاب معظمهم كان صعب أوصله والغريب إني لما قريت معظمهم لقيت إن بقي ليهم تأثير كبير على تفكيري كمصمم بشكل عام بعيداً عن تخصصي إيه! ودا اللي متأكد أنه هيحصل معاك لما تقرا أي كتاب فيهم، علشان وقتك مهم ومش لسا هتقرا هنا أو حتى تستكشف الكتب وتاخد وقت أطول، هتكلم عن نبذة بسيطة من واقع قراءتي لمعظم الكتب علشان تعرف بالظبط انت محتاج تقرأ إيه والأهم كالعادة ليه:

1. 100 Things Every Designer Needs To Know About People

الكتاب دا وصلت فيه لجزء How People Decide وبصراحة انا مش متخيل إزاي مقريتش الكتاب دا من 4 سنين مثلا! الكتاب فعلاً بيحقق وصفه في البداية وهو الربط بين علم النفس والتصميم (واللي دايماً كنت بأكد على أهميتهم) ببساطة الكتاب دا هتعرف منه إزاي الناس بتفكر، بتشوف، بتقرأ، بتفتكر، بتحس وحتى بتقرر وإيه علاقة دا بالتصميم وإزاي ممكن تحقق نتيجة أفضل سواء كان اللي بتصممه ورقة أو حتى أدق المجالات تخصصاً في التصميم، لو هتقرا الكتاب دا (ولازم تقراه) عايزك لما توصل جزء How People Feel متخليش أي حاجة تقاطعك أو تمنعك من إنك تقراه بنسبة تركيز 200% وهتشوف نتيجة دا على شغلك بشكل سحري. مش هتكلم عنه أكتر من كدا لأني عايزك تستكشفه بنفسك.

2. Brand Intervention

الكتاب دا عبقري وواحد من أمتع الكتب في قراءتها، بيبدأ كل شابتر بحكمة وقاعدة أساسيه وبعده شرحها، الكتاب دا Must Read لأي حد بيشتغل في مجال الـ Branding من كل جوانبه مش بس التصميمية، كمان التسويقية والجوانب المتعلقة بالشركات نفسها، هتكتشف منه إن الموضوع أكبر مما تتخيل ولما تقراه هيغير نظرتك لفكرة الـ Branding بالكامل!

من الحاجات اللي حبيتها على الرغم من إنها أصغر جزء في الكتاب كان شابتر 23 بعنوان Tell a story لأن الموضوع بيجمع مابين التسويق والتصميم، بس لو حابب تعرف أكتر عن الفكرة التسويقية للموضوع أنصحك تقرا كتاب All Marketers are Liars واللي Seth Godin ناقش فيه الفكرة كلها بتفصيل أشمل.

3. Design by Nature

دا مش كتاب! دا حاجة أكبر من أنه يتقال عليه كتاب بصراحة.

منصحكش إطلاقاً تقرأه لو كنت مبتدأ أو الإنجلش بتاعك مش هيساعدك لأنه متعمق بشكل غريب ونظري جداً بس مفيد فوق الوصف، شخصياً مقدرتش أقرا فيه أكتر من أول شابتر وقررت أسيبه للآخر عشان محتاج تفرغ تام من كل وأي حاجة! بس كمصمم مهتم بتصميم الشعارات والهويات البصرية أنصحك تقرا Simplicity من ص28-ص31 الجزء دا مهم جداً، والجزء دا تحديداً جدير بالاقتباس ” simplicity is a different concept than emptiness.”  الجملة دي بس بالنسبالى أهم من بعض الكتب!

4. Design Matters Logos 01

الكتاب دا كل اللي هقوله عنه هو أنه مهما كان مستواك في التصميم لو مهتم بتصميم الشعارات والهويات البصرية لو مقريتش الكتاب دا فا أنت عندك مشكلة كبيرة جداً!

برشحه يكون أول حاجة تقراها وحتى لو مش هتقرا غيره يكفي إنك تقراه لأنه شامل كل حاجة في تصميم الشعارات والهويات من الألف للياء من أول ليه محتاج تصمم شعار مروراً بازاي تعمل أفضل بريف وكل حاجة حرفياً وأقدر أأكدلك إنك لو قريته مش هتحتاج تقرا أي مصدر تاني في الموضوع دا. الكتاب ببساطة بيجاوب على كل أسئلة التصميم اللي بتشوفها وبتسألها كل يوم وأكتر بمراحل.

5. Designing for Emotion

الكتاب مشابه جداً لأول كتاب 100 Things Every Designer Needs To Know About People بس حسيته متجه ناحية تصميم المواقع أكتر من أول كام صفحة فا مكملتوش، ياريت لو حد قرأه أو قرر يقرأه يبقي يكلمنا أكتر عنه في التعليقات.

 6. Atomic Design

برضه اقريت أول 10 صفحات على الرغم من إن أسلوب الكاتب جميل إلا إن الكتاب موجه بشكل كبير لتصميم المواقع فا مكملتوش.

7. Graphic Design Solutions

الكتاب قديم وقوي جداً بس مشكلته أنه متعمق ونظري بشكل رهيب -بحكم إن المؤلفة دكتور جامعية- ملقتش حاجة أقراها في الكتاب باستثناء جزء About Visuals اللي لما تقراه هتحس إنك مكنتش تعرف حاجات كتير جداً! الكتاب بشكل عام مستخدمتوش للقراءة بقدر ما استخدمته للاستلهام، من أكتر الكتب اللي قريتها عن التصميم غنية بكم رهيب من الصور والـ Showcases العبقرية اللي أنصحك جداً تشوفها، حقيقي من أفضل مصادر التغذية البصرية وأكيد ممكن تلاقي حاجة تجذب انتباهك أكتر إنك تقرا عنها، هو بشكل كبير ملهم أكتر للرسامين بس في المطلق الكتاب دا كنز.

8. Icon Handbook

الكتاب دا بقي بصنفه أفضل كتاب من حيث تجربة القراءة!

مش بس كتاب بتقراه دا كتاب بتقراه وتتعلم منه بشكل عملي وكمان بتستلهم منه أفكار وبتعرف أكتر! في مقابلات في وسط الكتاب ومصادر مختلفة حتي في كل شابتر بشكل منفصل وأجمل حاجة فيه هو أنه متخصص في حاجة واحدة بشكل دقيق ومبهر، الفترة الأخيرة انا شخصياً كنت مهتم بالـIcons Design وعن تجربة الكتاب دا ساعدني جداً فعلاً أعمل حاجة انا سعيد بيها وعجبت كتير من اللي شافوها تقدروا تشوفوها من هنا، طبعاً مخلصتش لسا قراءته بس شبه أخدت اللي محتاجه منه لأن في حاجات كتير مرتبطة بالمواقع فا تقدر تقرا الأجزاء اللي محتاج تعرفها بس زي جزء How I Started لو حابب تعرف إزاي تبدأ في مجال الـIcon Design

9. Work for Money Design for Love

الكتاب أشهر وأجمل من أني أوصفه أو حتى أتكلم عنه، والحقيقة أن دا مش الكتاب كامل دا بس جزء بسيط منه شابتر 16 واللي كله 19 صفحة بعنوان Pricing Your Work واللي أقدر أقولك بكل ثقة سيبك من أي حاجة قريتها أو سمعتها عن “تسعير شغلك” وأقرا الجزء دا من تجارب Alina Wheeler هتعرف منه إزاي فعلاً تحدد القيمة المادية لأي حاجة هتشتغل عليها. وطبعاً أنصحك تقرا باقي الكتاب جداً.

10. Universal Principles of Design

انا فضلت أختم بالكتاب دا، هو مش كتاب بقدر كونه أهم مرجع ممكن تحتاجه في أي حاجة ليها علاقة بالتصميم، الكلام نظري جداً بطبيعة الحال بس كم معرفة رهيب في كل حاجة تخص التصميم بشكل منفصل ومتصل، الكتاب متقسم ومترتب بطريقة هتخليك تقدر بسهولة توصل للي عايزه منه بأقل مجهود، للمرة التانية لو مش هتقرا الكتاب دا على الأقل أقرا منه صفحتين بس 48/49 بعنوان Color أو أياً كان اللي محتاجة، الكتاب دا هيغنيك عن إنك تسأل أي حد في أي حاجة بكل بساطة.

باقي الكتب

عن تصميم المواقع والطباعة ومنها كتاب Ornaments دا فرنسي بس محسيتش أنه مفيد علي كل حال، لكن كتب تصميم المواقع مفيدة جداً بس بالتأكيد مقريتهاش علشان مش تخصصي، أتمنى تفيدك لو كنت مهتم بتصميم المواقع أكيد.

علشان أكون صريح أكتر انا لما لقيتهم مفيدين بشكل رهيب وفرقوا معايا جداً رجعت طلبت منه أشاركهم بشكل عام كان رده أنها المفروض كتب بفلوس، وفكرة أنه يتم مشاركتهم بشكل مجاني مش مريحة بالنسباله

 well, these are supposed to be paid books, not really comfortable sharing them for free (I actually already got them illegally)

ولكن وضحتله إني متفق معاه، وإني شخصياً ضد فكرة مشاركة المحتويات المدفوعة بشكل مجاني، بس الاستثناء الوحيد هو الكتب، لأن ببساطة استحالة إننا نشتريهم (بحكم إننا في مصر) لأننا هندفع ضعف سعرهم الفعلي جمارك وشحن فا إحنا في مطلق الأحوال صعب نشتريهم على الرغم من أنهم مهمين جداً.

I totally agree with you on this, I myself forbid sharing anything that’s not free or have no royalty-free commercial license publicly, but the only exception here is books, simply because in Egypt it’s like impossible to get them and they will cost you like 4 times their price so we can’t buy them anyway and they’re important that’s why we share them for free

وهنا تفهم ووافق على الفكرة.

تحميل الكتب