دليلك الشامل لتصبح مصمم جرافيك ناجح
تصميم
63 تعليق
21,952

14 دقيقة

دليلك الشامل لتصبح مصمم جرافيك ناجح

د دليلك الشامل لتصبح مصمم جرافيك ناجح، سواء كنت بتفكر تغير مهنتك الحالية Career shift أو مهتم بالتصميم بس مش عارف تبدأ إزاي أو إيه الحاجات اللي المفروض تعملها علشان تقدر تبقي في مستوي أحسن فيه، أو حتى بتحب التصميم وحابب تتعلمه بشكل أفضل، المقال دا أوعدك إنه هيكون أفضل مسار تعليمي في مجال التصميم.

 

دا لإن هتكلم فيه عن حاجات كنت أتمنى أعرفها وانا في المرحلة اللي أنت فيها دلوقتي.. وأيوة كلنا مرينا بالمرحلة دي، مستعد؟ يلا بينا ?

المقال بيتكون من 8 أجزاء رئيسية مختلفة، لتسهيل الوصول للمعلومة اللي بتدور عليها دي قائمة بأقسام المقال، بالضغط على أياً منها سيتم تحويلك مباشرة للجزء دا في المقال بدون الحاجة لقراءته بالكامل:

  1. ما هو تصميم الجرافيك؟
  2. عناصر التصميم الأساسية.
  3. مبادئ وقواعد التصميم الأساسية.
  4. إزاي أختار التخصص المناسب في تصميم الجرافيك.
  5. إزاي أطور نفسي عشان أكون مصمم جرافيك؟
  6. أهم مصادر التغذية البصرة والإستلهام.
  7. إزاي تطور أسلوبك الخاص  بعد كونك مصمم جرافيك؟
  8. الخلاصة.

دليلك الشامل لتصبح مصمم جرافيك ناجح 1

ليه عايز تكون مصمم جرافيك؟

من ناحيتي أوعدك إنك بنهاية المقال تكون جاهز تماماً لبدء رحلتك كمصمم جرافيك ولكن في المقابل هطلب منك تعمل حاجة بسيطة، وهي إنك تحدد هدفك من تعلمك تصميم الجرافيك، ليه؟

لإن لو هدفك مكنش واضح أو كان الدافع هو حماس زيادة مثلاً، هتلاقي نفسك مع الوقت بتفقد شغفك تجاه التصميم ومش بعيد يكون دا نفس السبب اللي خلاك فقدت شغفك تجاه حاجة تاني كنت بتعملها واتجهت لتعلم التصميم، هل هتحب دا يحصلك مرة تانية؟ بالتأكيد لأ.

لذلك عايزك قبل ما تاخد أي خطوة فعلية في تكملة الكلام اللي جاي أقف دقيقة وفكر فعلياً وبشكل جدي في رغبتك في تعلم التصميم، وإيه الهدف النهائي اللي عايز تحققه؟ ويفضل لو تكتبه في ورقة وتحتفظ بيها أو حتى النوت بتاعتك، واسأل نفسك هل الهدف دا قوي كفاية؟

بعد ما تخلص التجربة البسيطة دي دلوقتي هبدأ أشارك معاك أكتر من سبب لتعلم التصميم ممكن يساعدوك.

أول وأكتر حاجة بتميز مجال التصميم هو إنه أي حد خياله واسع وبيفكر بالشق الأيمن من دماغه -تفكيره شمولي وإبداعي مش تحليلي يعني- يقدر جداً يبقي مصمم جرافيك، وكمان مش لازم تكون موهوب أو بتعرف ترسم او حاجة علشان تكون مصمم جرافيك ناجح علي عكس ما كتير من الناس متخيلة!

دا لإن التصميم ببساطة عملية عقلية بشكل كبير، لما بشتغل على تصميم أو فكرة ما انا بعملها في خيالي بالكامل وبعدها ببدأ أنفذها، يعني لو عملناها في صورة نسبة مئوية ممكن تكون 70% خيال وتفكير و30% بس مهارة في التعامل مع برامج التصميم المختلفة.

تعلم أن تفكر كمصمم جرافيك قبل أن تتعلم برامج التصميم!

ودا بيوضح حاجة مهمة أغلب اللي بيبدأوا في مجال التصميم بيقعوا فيها وغالباً بتكون السبب الأكبر في عدم قدرتهم علي الاستمرار.

وهي إنك تبدأ تتعلم برامج التصميم قبل ما تتعلم التفكير كمصمم أصلاً، وطبعاً دا غلط كبير جداً، لإن ببساطة وظيفة برامج التصميم الأساسية هي مساعدتك في تحويل الأفكار اللي في خيالك لحقيقة ملموسة أو مرئية بشكل سريع وسهل مش أكتر ولا أقل.

اتعلم التصميم بشكل عام وإزاي تفكر كمصمم لإنك لو خبير في الفوتوشوب لكن معندكش أفكار مش هتنتج حاجة!

والسبب التاني إننا لو هنتكلم بلغة الـ Marketing ونقول:

“Content is The King” يبقي من حيث الشغل انا مقتنع تماماً إن

The Designer is the King

لسبب بسيط جداً إن المصمم يقدر يشتغل بشكل منفرد ومش لازم يكون مرتبط بفريق عمل كامل وحتى دوره في الفريق بيكون غالباً آخر وأهم حاجة، وفي الحقيقة دي نقطة قوة جداً في التصميم.

والسبب التالت إنه -بالتأكيد- واحد من أكتر المجالات اللي عليها طلب في مواقع الفريلانسينج المختلفة، وتقدرك تبدأ بيه طريقك كفريلانسر بشكل سلس وجميل.

ممكن أكتب من الأسباب مقال كامل، ولكن هكتفي بالقدر دا من الأسباب لإتاحة الفرصة لما هو قادم.

 

دليلك الشامل لتصبح مصمم جرافيك ناجح 2

إيه هو تصميم الجرافيك؟

بعد ما عرفت أسباب كافية تخليك شغوف أكتر إنك تكون مصمم جرافيك، لازم تعرف إيه هو التصميم أصلاً، وفقاً لـ Wikipedia

التصميم الجرافيكي هو عملية الاتصال المرئي وحل المشكلات من خلال استخدام الكتابة والصور والرسم التوضيحي.

قد يكون الكلام دا معقد وغير مفهوم بعيداً عن الكلام الأكاديمي، تعريفي الشخصي للتصميم هو ببساطة “عملية نقل رسالة” أنت كمصمم دورك الأساسي هو إنك توصل رسالة معينة وبتستخدم في توصيلها عناصر التصاميم المختلفة ودا قد يكون شرح أكثر بساطة للموضوع.

ولكن حاليا أنت المفروض تكون بتسأل سؤالين مهمين:

إيه هي عناصر التصميم المختلفة؟ وإزاي أقدر أستخدمها في توصيل رسالة مرئية؟

السؤالين دول بالتأكيد من الأسئلة اللي هيتم مناقشتها في الجزء دا من المقال.

بعد ما عرفت ليه تبقي مصمم وعرفت إيه هو التصميم أصلاً، دلوقتي أنت مستعد تعرف مبادئ وأساسيات بسيطة تخليك تقدر فعلاً تبدأ في مجال التصميم حتى لو مكنش عندك أي خبرة فيه قبل كدا.

 

دليلك الشامل لتصبح مصمم جرافيك ناجح 3

1- عناصر التصميم الأساسية

1. الألوان

الألوان بعتبرها أهم عنصر في التصميم وهي أهم عنصر في حياتنا بشكل عام، لذلك لازم تعرف كويس جداً سيكولوجيا الألوان، وإيه دلالات كل لون؟ وأمتي وليه تستخدمه؟ ومع مين؟ وإزاي توظف الألوان في نقل الرسالة اللي بتحاول توصلها في التصميم؟

أول حاجة بعد ما تقول بسم الله الرحمن الرحيم هي إنك تقرأ كتاب The Language of Colors (متقلقش الكتاب متوفر باللغة العربية وتقدر تحمله بالضغط علي إسمه) ولو دي مش أول حاجة هتعملها بعد ما تقرأ المقال نصيحة شخصية متكملش قراءة، لإنك هتعرف فيه إجابات كل الأسئلة اللي تم ذكرها فوق، ومن غيرها صعب جداً تقدر تستغل الألوان بشكل صح.

ولو حابب تتعمق أكتر واحد من أكثر الكتب اللي أنصحك بقراءتها فيما يتعلق بالألوان هو كتاب Secret Language of Color لإنه واحد من الكتب الممتعة والغنية واللي هتخليك تحب الألوان، وكذلك كتاب Universal Principles of Design.

الخلاصة هي إن الألوان لازم تبقي صديقك المفضل كمصمم، لازم تعرف إزاي تتعامل معاها والأهم إنك تحسها وأنت بتستخدمها، تعالى نعمل تجربة بسيطة:

دليلك الشامل لتصبح مصمم جرافيك ناجح 4

دي صورة فيها 10 ألوان مترتبين بطريقتين مختلفتين، واحدة من الأدفى للأكثر دفئاً والصف التاني مترتب بشكل عشوائي ياترى حسيت بنفس الإحساس في المرتين؟

بالتأكيد حسيت إحساس مختلف تماماً عن أي ترتيب تاني ليهم، مجرد ترتيب الألوان بس عمل فرق كبير في الإحساس، تخيل حاجات تانية زي اختيار الألوان ذات نفسها.. أعتقد الفكرة وصلت.

طبعاً الألوان هي عنصر من 6 عناصر أساسية في التصميم وهما (الخط/ الشكل/ الاتجاه/ الحجم/ الملمس/ وأخيراً اللون) بس حبيت اتكلم عن الألوان في البداية لأنها الأكثر أهمية.

المقال دا واحد من أكتر المقالات اللي برشحها فيما يتعلق بأساسيات التصميم، هتعرف فيه العناصر الأساسية في التصميم بسهولة جداً.

 

دليلك الشامل لتصبح مصمم جرافيك ناجح 5

2- مبادئ وقواعد التصميم الأساسية

تاني حاجة لازم تعرفها، سواء كنت محترف أو لسا بتبدأ ولو كنت بتشتغل على أكثر التصاميم تعقيداً أو أبسطها، أنت في كل الحالات بتستخدم المبادئ الستة الأساسية للتصميم واللي لازم تعرفهم عن ظهر قلب لأنهم أساس كل ما يمكن أن يقال عنه إنه تصميم جيد.

دليلك الشامل لتصبح مصمم جرافيك ناجح 6

1. الوحدة والانسجام

وحدة التصميم هي أحد أهم عوامل نجاحه، وتقريباً الوحدة هي الحاجة اللي بيسعى لتحقيقها أي مصمم، عشان تفهم الوحدة بشكل أفضل عايزك تفكر فيها كأنها وجبة أنت بتحبها، خلينا نقول بيتزا مثلاً ?❤

البيتزا بتتكون من عناصر ومكونات مختلفة، منفصلين مش هيكون ليهم معني حقيقي (أو مسمي البيتزا) لكن كلهم متجمعين بطريقة معينة هنا بيبدأ يظهر ليهم معني جديد وهو أنهم أصبحوا حاجة واحدة بس وهي البيتزا.

وبالتالي مينفعش يكون في عنصر منفرد أكثر أهمية من البيتزا ككل، كدا الطعم مش هيكون مظبوط، عشان تعمل ألذ بيتزا لازم يكون في توازن جيد بين تنوع ووحدة العناصر عشان تتجنب إن البيتزا تكون معمولة من مكون واحد أو مكون واحد واخد مساحة 50% وباقي المكونات واخدة الجزء الباقي، أكيد مش هتحب الطعم وقتها أو مش هينفع نقول عليها بيتزا.

نفس الكلام دا بالظبط بينطبق علي التصميم، لو عناصر التصميم المختلفة منفردة وكل جزء منفصل عن التاني ومفيش بينهم وحدة وانسجام أنت مش هتقدر توصل رسالة واضحة من التصميم ولا مسمي خاص وفي حالة الوحدة بيتم التركيز علي التصميم ككل مش كعناصر منفصلة.

دليلك الشامل لتصبح مصمم جرافيك ناجح 7

إزاي أقدر أخلق وحدة وانسجام في التصميم؟

الوحدة بيتم تحقيقها عن طريق خمس قواعد مختلفة وهما:

  • التشابه: وهو خلق علاقة ترابط بين العناصر المختلفة في حالة تشابهها في أحد الخصائص.
  • التقارب: وهو الإحساس بوجود علاقة ناتجة عن المسافة بين العناصر.
  • الاستمرارية: وهو الإحساس بوجود خط أو نمط لاستمرار العناصر.
  • التكرار: وهو تكرار العناصر المختلفة وتكوين ترابط بينها.
  • الإيقاع: والإيقاع بيتم تحقيقه عن طريق تكرار خصائص العناصر المختلفة زي اللون، الحجم، أو طبيعة الاستخدام.

الإنفوجراف اللي فوق هيوضح أكتر المقصود بالقواعد اللي سبق ذكرها بأمثلة بتشوفها لسهولة ربط وإيصال المعلومة.

دليلك الشامل لتصبح مصمم جرافيك ناجح 8

2. التوازن

 التوازن في التصميم أشبه بالتوازن في حياتنا بشكل عام، التوازن بيوفر الاستقرار والقوة في التصميم ودي عوامل بتخلي التصميم مريح بصرياً وجذاب وناجح أكتر.

دليلك الشامل لتصبح مصمم جرافيك ناجح 9

أنواع التوازن في التصميم الجرافيكي.

التوازن تقدر تحققه بأربع أشكال مختلف وهي:

  • التوازن المتماثل Symmetry: وهو إن العناصر علي جانبين مركز التصميم تكون متطابقة تماماً.
  • التوازن غير المتماثل Asymmetry: وهو أن العناصر علي جانبين مركز التصميم تكون مختلفة في الشكل بطريقة ديناميكية.
  • التوازن الدائري Radial balance: وهو أن العناصر تكون علي شكل دائري من مركز التصميم.

بالمناسبة هل لاحظت وجود أحد أنواع التوازن في الصورة دي؟

معلومة عن التوازن

تعرف إن التوازن بيدخل تقريباً في جميع العلوم زي الهندسة، الكيميا، المعمار وحتى الموسيقى! وإن أشهر وأفضل من استخدموا التماثل هم المصريون القدماء، وهتلاقي دا بيظهر بوضوح في التماثيل وفي مظاهر مختلفة من حياتهم وهما أكثر من أتقن فن التماثل وأبدع فيه.

 

عشان تفهم أكتر عن إزاي بيتم استخدام وتطبيق التماثل، اتفرج على الفيديو الرائع دا للمخرج العبقري Wes Anderson اللي يعتبر من أكثر المبدعين هوساً بالتماثل في جميع أعماله تقريباً وهتدرك مدي روعة التماثل في إخراج صورة جذابة بصرياً ❤

 

دليلك الشامل لتصبح مصمم جرافيك ناجح 10

3. التسلسل

التسلسل كمان يعتبر أحد أهم عوامل نجاح التصميم، لأنه بيسهل علي المتلقي تتبع وفهم محتوي التصميم بمجرد ترتيب العناصر حسب الأهمية مثلاً، علي سبيل المثال أنت بتقرأ المقال دا حالياً بسهولة بسبب وجود التسلسل!

تخيل إنك تقرأ المقال بالكامل بدون وجود أي اختلاف في حجم الخط أو وجود للأرقام، بالتأكيد هتكون قراءته أصعب، وهيكون صعب عليك كمان إنك توصل لأي معلومة بسهولة، كذلك الأمر في التصميم.

الإنفوجراف دا هيتولى عملية توضيح إزاي بيكون التسلسل وإزاي تقدر تطبقه في تصميماتك الجاية.

دليلك الشامل لتصبح مصمم جرافيك ناجح 11

بيتم تحقيق التسلسل في التصميم باستخدام 3 طرق رئيسية مختلفة:

  • التفريعات Trees: وفيها بيتم ترتيب العناصر علي هيئة فروع منفصلة، زي شجرة العيلة مثلاً.
  • الأعشاش Nests: وفيها بيتم ترتيب العناصر حول بعضها البعض، زي مثلاً إن العناصر الثانوية بتكون أعلى أو أسفل العناصر الرئيسية.
  • الأوزان Weights: وهو أشهر أنواع التسلسل وأكثرها استخداماً، وهو إن العناصر من نفس الوزن تنتمي لنفس التسلسل بترتيب تسلسلي (زي ما هو واضح في الجزء دا وأنت بتقرأ).

 

تدريب عملي

خذ حبة اوقت وبص حواليك، هل لاحظت وجود أي نوع من أنواع التسلسل حواليك؟ ياتري لاحظته في كام حاجة؟ متنساش تشاركنا في التعليقات.

دليلك الشامل لتصبح مصمم جرافيك ناجح 12

4. الحجم أو التناسب

الحجم أو التناسب بيدي علاقة بين العناصر المختلفة في التصميم، العلاقة دي بتظهر تناغم وانسجام بين العناصر وبعضها البعض.

هتلاقي مثلاً إن استخدام الحجم النسبي للعناصر زي مربعين فوق بعض يقابله مربع بنفس حجمهم -زي المثال السابق في التوازن- بيخلق بشكل تلقائي تناغم وعلاقة بينهم وبيجذب النظر لنقطة محورية في التصميم.

كتير ما بيتم استخدام الحجم والتناسب في التصميم بواحدة من الطرق دي:

  • الحجم Size: هتلاقي إن العناصر ذات الأحجام المختلفة على علاقة ببعضها البعض.
  • النسبة Ratio: العناصر اللي بتتناسب في الحجم مع بعضها البعض بتظهر بينها علاقة أكثر تناغماً وسلاسة.
  • الانقسامات Divisions: تقسيم العناصر يساعد جداً علي إظهار إحساس بوجود علاقة بين العناصر وبعضها البعض.

 

معلومة متقدمة

النسبة الذهبية هي واحدة من أشهر أنواع النسب المستخدمة في التصميم، وبيتم استخدامها كتير في إنتاج صور بصرية متوازنة ومتناسقة وتقريباً بتشوفها كل يوم من غير ما تدرك وجودها، متنساش تعرف أكتر عن النسبة الذهبية وإزاي تقدر تدمجها في تصميماتك.

 

دليلك الشامل لتصبح مصمم جرافيك ناجح 13

5. التركيز أو التأكيد

في كتير من الأحيان بيكون في عنصر محتاج يكون عليه التركيز الأكبر في التصميم، وبالتالي التركيز أو التأكيد علي العنصر دا بيكون شيء مهم لإنه قد يكون الهدف الأساسي من التصميم، لذلك التأكيد والتركيز هو من أساسيات التصميم.

ولكن إزاي أقدر أستخدم التأكيد في التصميم؟

سؤال جميل، التركيز في التصميم بيتم تطبيقه بـ3 طرق رئيسية وهي:

  • التأكيد باستخدام التظليل Highlight: التظليل هنا مش مقصود بيه النوع الحرفي من التظليل واللي أنت شايفه حالياً ولكن التظليل هنا يقصد بيه إنك تخلي العنصر المراد التركيز عليه مختلف في الشكل عن بقية العناصر.
  • التأكيد باستخدام اللون Color: التأكيد عن طريق اللون هو تماماً زي التأكيد عن طريق الشكل ولكن باستخدام اللون وهو تقريباً الأكثر شيوعاً.
  • التأكيد باستخدام الحجم Size: التأكيد عن طريق الحجم يتم عن طريق تغيير حجم العنصر المراد التأكيد عليه في التصميم.

ودلوقتي عايزك تشوف الصور دي بنظرة سريعة جداً لكل صورة وتلاحظ عينك اتحركت فين!

دليلك الشامل لتصبح مصمم جرافيك ناجح 14

بالتأكيد لاحظت إن عينك انجذبت للعناصر اللي تم التأكيد عليها بشكل لا إرادي مش كدا؟ هي دي قوة التأكيد في التصميم، لذلك استخدمه بحكمة.

 

دليلك الشامل لتصبح مصمم جرافيك ناجح 15

6. التشابه والتناقض

التشابه والتناقض بيدخلوا في كتير من عناصر التصميم اللي ذكرتها فوق وبعتبرهم من أكثر المبادئ أهمية واستخداماً في حياتنا بشكل عام. 

مثال حي على التباين هو إن وأنت بتقرأ المقال دا اللون المستخدم في الكتابة أسود ودا عكس تماماً لون الخلفية الأبيض والنتيجة إنك بتقرأ بسهولة والكلام بالنسبالك أوضح بكتير من إنه يكون رمادي مثلاً لإنك هتواجه صعوبة كبيرة في قراءته لإن مفيش قدر كافي من التباين.

دا باختصار التباين وهو إنك تختار ألوان متقابلة على عجلة الألوان مثلاً أو تخلق علاقة تناقض بين عنصرين من حيث اللون، المسافة، الحجم، الاتجاه، الكثافة أو أي خاصية تقريباً.

أما التشابه فهو إن الأشكال اللي بتتشابه في نفس الخصائص (زي اللون أو الشكل أو الحجم) بتكون أكثر ارتباطاً من العناصر اللي مش بتتشابه في نفس الخصائص، ودا لأن العين بتخلق علاقة بين الأشكال المتشابهة بكل بساطة.

بشكل أساسي دي المبادئ الستة الأساسية للشكل والتصميم عموماً، ولكن يظل كذلك في كتير من المبادئ غير الأساسية واللي متقلش عنهم أهمية.

هكتفي بس بالحديث عن مبدأ واحد منها لأهميته وكثرة استخدامه وهو الكتلة والفراغ، أو الفضاء أو المساحة، أو المساحة الموجبة والمساحة السالبة دي كلها مسميات لنفس المبدأ.

 

دليلك الشامل لتصبح مصمم جرافيك ناجح 16

7. الكتلة والفراغ

 الكتلة أو المساحة في التصميم هي المنطقة فوق، تحت، يمين، يسار أو حتى داخل العناصر نفسها، المساحة بتنقسم لجزئين، مساحة موجبة وهي اللي بيكون فيها العنصر ومساحة سالبة وهي المساحة الفارغة.

دليلك الشامل لتصبح مصمم جرافيك ناجح 17

Ed’s Electric By Josiah Jost

الاعتماد على المساحة السالبة والموجبة من أهم العوامل في التصميم من حيث الأحساس وكذلك توصيل الفكرة لأنها بتستخدم في عمل شعارات عبقرية زي شعار Ed’s Electric مثلاً لمصمم الشعارات العبقري Josiah Jost (من الشعارات المفضلة بالنسبالي في استغلال المساحة السالبة ❤).

طبعاً المبادئ دي انا اتكلمت عنها بشكل مختصر علشان أوصلك فكرة مبدأيه عنها، لكن كل مبدأ ممكن تقرأ عنه كتاب كامل منفصل، وأحب أذكر إنك لازم تعرفهم لأن شغلك بيعتمد عليهم فوق ما تتخيل أياً كان تخصصك.

وعلى ذكر التخصص، هل فكرت في إنك لازم تتخصص؟ لو معندكش فكرة يبقي لازم تقرأ الجزء دا من المقال.

 

دليلك الشامل لتصبح مصمم جرافيك ناجح 18

3- مرحلة التخصص

بعد ما عرفت عناصر ومبادئ التصميم الأساسية لازم بقى تحدد أنت هتعمل إيه بالظبط، “التصميم” كلمة كبيرة جداً وبيدخل فيها مئات المجالات، بشكل أساسي أكتر 3 مجالات انتشاراً من التصميم هما:

  1. التصميم الجرافيكي (Graphic Design)
  2. تصميم الويب (Web Design)
  3. التصميم الصناعي (Industrial Design)

بافتراض إنك اخترت مجال التصميم الجرافيكي، هنا بقي مهم تعرف إنه برضه بيحتوي على مئات التخصصات الداخلية اللي يمكن أشهرهم:

Photo Manipulation – Retouching – Logo Design – Brand Identity Design – Printings – Advertisement – Typography & Typeface Design – Packaging – Illustration … etc.

كل دي تخصصات من كتير من التخصصات في مجال التصميم الجرافيكي ولكن دول يعتبروا الأشهر والأكثر انتشاراً، ولكن يبقى السؤال …

إزاي أقدر أختار المجال المناسب ليا؟

عشان تعرف إيه أنسب مجال بالنسبالك، دورك هنا إنك تاخد نبذة بسيطة أو تعرف أكتر عن كل مجال من المجالات دي وتختار أكتر حاجة حبيتها أو شايف نفسك مميز فيها وتبدأ تشتغل فيها بس وبشكل متخصص.

تخيل مثلاً لو أنت تركيزك على إنك تشتغل في 4 مجالات من دول، النتيجة إنك هتحتاج 4 أضعاف الوقت اللي كنت هتتعلم فيه مجال واحد وتتقنه -على الأقل- وكمان بنسبة كبيرة مش هتتقن كل المجالات وتبقي فعلاً مميز فيها، هتلاقي نفسك نسب معينة في كل مجال لكن مش +95% في مجال واحد!

لكن لما تختار مجال واحد بس -أو أتنين على الأكثر- وتبدأ في تعلمه ساعتها دا هيبقي أسهل جداً وهياخد وقت تعلم أقل والأهم إنك هتتطور فيه بشكل أسرع بمراحل.

مش بقول إنك تختار مجال وتتعلمه ومتعرفش حاجة عن الباقي لأ انا زي ما قولت فوق “دورك بقي إنك تاخد نبذة بسيطة أو تعرف أكتر عن كل مجال من المجالات دي”.

ودا ما يعرف باسم الـ T-Shaped Person واللي معناه إنك يكون عندك خبرة عميقة وكبيرة في مجال ما وكذلك عندك معرفة عامة في باقي المجالات، الصورة دي هتوضحلك أنواع الأشخاص من حيث التعلم.

دليلك الشامل لتصبح مصمم جرافيك ناجح 19

 

والقاعدة بسيطة ومعروفة لدرجة النسيان

“اعرف شيء عن كل شيء واعرف كل شيء عن شيء”.

ماذا لو معرفتش تحدد إيه المجال المناسب ليك؟

لو معرفتش تحدد إيه المجال المناسب ليك بكل بساطة جرب نفسك في أكتر من تخصص لفترة من الوقت وأستكشف أكتر في مجالات وتخصصات مختلفة؛

واسأل أكتر من حد عنده خبرة في المجالات دي عن إيه اللي المفروض تعمله لو فكرت تتقن المجالات دي لحد ما توصل للتخصص اللي هتحس فعلاً إنك حابب تعمله وإن هو دا اللي هتكمل فيه.

هتعرف إزاي؟ هتعرف من شغفك وحماسك وأنت بتشتغله ودي حاجة هتحسها تماماً، غالباً أكتر حاجة أنت شغوف بيها هتكون هي أنسب مجال تكمل فيه، وبتمنالك فيه كل التوفيق من ناحيتي ❤

 

دليلك الشامل لتصبح مصمم جرافيك ناجح 20

4- إزاي أطور نفسي كمصمم جرافيك؟

أغلب الناس في المرحلة دي بعد تحديد مجالها بتبدأ تسأل نفسها إزاي أطور نفسي وإيه الكورسات اللي محتاجها مثلاً؟

هنا مهم أوضحلك إن في مجالات بتحتاج كم كبير من المعرفة النظرية زي الـ Logo Design مثلاً وفي مجالات تانية بتعتمد على الاستلهام المباشر والـ Tutorials زي الـ Retouch مثلاً.

مصادر المعرفة في كل الحالات كتير ومتاحة لكل الناس الأهم من إنك تتعلم إنك الأول تعرف إزاي وليه تتعلم! ودا في حد ذاته موضوع مقال كامل، كنت كتبت مقال بعنوان إزاي -وليه- تتعلم أي حاجة في أقل من شهر، بيتكلم عن النقطة دي تحديداً.

أي كلام هقوله هنا هيكون مختصر أو مكرر، لذلك أنصحك تبدأ بقراءته بعد قراءة كتاب لغة الألوان بعد قراءة المقال دا بالطبع لإنك هتلاقي فيه المصادر اللي هتعتمد عليها في التعلم وإزاي تستغلها صح.

ودا فيديو جميل لمروان عمرو بيقدم فيه “أهم 5 مصادر لتعلم الجرافيك” هتلاقي فيه مصادر متنوعة وأشخاص وهيفيدك جداً في تعلم الجرافيك من مصادر مختلفة.

 

التعلم بالمحاكاة

هتكلم بس في نقطة إضافية مش موجودة في المقالين لارتباطها بالتصميم علي وجه الخصوص وهي التعلم بالمحاكاة أو التقليد.

مهم تعرف إنه مش عيب ولا غلط إنك تعمل دا بالعكس من أفضل الوسائل اللي هتتعلم عن طريقها التصميم إنك تتعلم بالتقليد، وانا شخصياً كنت بعمل في المرحلة دي كتير كمان!

علشان محدش يفهم كلامي غلط اللي أقصده بالتعلم بالتقليد أو الهدف الأساسي منه هو التدريب أو اكتساب مهارة تكنيك معين في التصميم.

على سبيل المثال انا فاكر أني كنت بشوف حاجات ما مثلاً وبسأل نفسي هي اتعلمت إزاي؟ وعلشان اعرف الإجابة كنت ببدأ أحاول انفذها فعلاً علشان أتدرب على التكنيك دا او علشان أحاول أعرف إزاي انفذه فعلاً وأكتسبه.

 

دليلك الشامل لتصبح مصمم جرافيك ناجح 21

5- التغذية البصرية والاستلهام

التغذية البصرية والاستلهام المستمر دي حاجة لازم تعملها سواء كان عندك خبرة 20 سنة في مجال التصميم أو لسا بادئ حياتك التصميمة إمبارح!

شخصياً انا مخصص نص ساعة لحد ساعتين يومياً -علي حسب اليوم- بقضيها في الاستلهام على موقع بيهانس بس، ودي حاجة تحولت بالنسبالى لعادة بعملها كل يوم.

الاستلهام والتغذية البصرية من أهم الحاجات اللي هتفيدك كمصمم وتساعدك تحسن مستواك في أسرع وقت، بس في نقطة لازم تعرفها الأول وهي إنك لازم تشوف شغل جودته عالية حتى لو كان بعيد عن مجالك (يفضل طبعاً أنه يكون في مجالك).

لأن اللي بيحصل إن كل التغذية البصرية مع الوقت بتتخزن في عقلك الباطن وبتبدأ تنعكس على شغلك بشكل كبير من غير حتى ما تلاحظ دا بس هتدركه مع الوقت ودا السبب اللي علشانه بقول إنها من أسرع -وأقصر- الطرق اللي هتساعدك تطور من نفسك كمصمم أو مبدع عموماً.

بس للأسف الاستلهام المستمر والتغذية البصرية ليها أعراض جانبية، زي إنك بعد كتير من الاستلهام ممكن تكتشف إنك عملت حاجة أنت فعلاً شوفتها قبل كدا بس مش فاكر دا، أو إنك تعمل شغل مقارب لحاجة بتشوفها باستمرار.

الحل في إنك تتغلب على المشكلة دي هي إنك تنوع مصادرك الاستلهامية بقدر الإمكان ومتعتمدش بس علي مصدر أو شخص واحد في الاستلهام وإلا هينتهي بيك المطاف كنسخة أقل منه، وحاول دايماً تطور في أفكارك وانت بتنتجها عشان تتجنب أي تكرار لأفكارك.

إيه أفضل المصادر للاستلهام؟

مصادر الاستلهام كتيرة ومتنوعة ومنها المخصص لمجالات بس في حد ذاتها، شخصياً بستخدم 5 مواقع للاستلهام بشكل أساسي، هتلاقي فيهم كتير من الأفكار العبقرية في مختلف مجالات التصميم.

1. Pinterest

سواء للمصممين او غير المصممين Pinterest هو أفضل موقع حالياً للاستلهام واستكشاف أفكار جديدة وجميلة في أي حاجة تقريباً.

2. Behance

بيهانس هو أكبر مجتمع للمصممين في العالم، مكاني المفضل في الاستلهام وكذلك مشاركة مشاريع قد تكون ملهمة لبعض الناس، أنصحك بتخصيص وقت يومي تقضيه علي الموقع وتحولها لروتين يومي إيجابي وهتستغرب من سرعة تطور مستواك كمصمم.

3. Dribbble

علي الرغم إن الموقع موجه بشكل أساسي لمصممين الويب عموماً إلا إنه مصدر رائع من مصادر الاستلهام أياً كان مجالك وهتكتشف فيه كتير من الأساليب المختلفة من أشهر المصممين حول العالم.

4. Artstation

الموقع يعتبر نسخة أفضل وأمتع من الموقع الشهير Deviant Art وبشكل عام مخصص لمجالات مثل Digital Art & Manipulation وبعض المجالات المشابهة، وأنصح به جداً خصوصاً للرسامين ومحبين الـ3D.

5. Awwwards

لو كنت بتحب تصميم الويب فا الموقع دا بالتأكيد هيكون أحد الأماكن المفضلة بالنسبالك.

وإذا مكنتش مهتم بتصميم الويب هو برضه المفروض يكون أحد أهم مصادرك للاستلهام لإنه بيكون فيه كتير من التصاميم المتقنة بشكل كبير واللي هتتعلم منها كتير.

وأخيراً الطبيعة واللي بعتبرها أحد أهم مصادر الاستلهام واللي غالباً ما بيتم تجاهلها نظراً لإننا بقينا عايشين في عصر التكنولوجيا ?.

حاول تخصص وقت تستكشف فيه الطبيعة المحيطة بيك أو اللي بتشوفها كل يوم ولكن من وجهة نظر مختلفة زي إنك تحاول تطبق عليها أساسيات التصميم اللي اتعلمتها فوق، وهتندهش من اللي ممكن تتعلمه منها.

 

دليلك الشامل لتصبح مصمم جرافيك ناجح 22

6- طّور اسلوبك الخاص!

دي آخر نقطة هتكلم فيها وتعتبر آخر مرحلة هتوصلها، بالتأكيد هي بتاخد حبة وقت عشان تقدر تحققها بالتالي حاول متستعجلش عليها وهي إنك تطور ستايل يكون خاص بيك وبيعبر عنك.

زي ما في مغنيين بتعرف أغانيهم من اللحن ومن قبل ما يتكلموا حتى، كذلك الأمر في مصممين لو شوفت شغلهم مش هتحتاج تشوف اسمهم عليه علشان تعرف أنه شغلهم، دا تقريباً الهدف الأسمى والأصعب لأي مصمم في مختلف المراحل واللي كل المصممين بيحاولوا يحققوه.

على سبيل المثال ستايل كريم مرغني في التايبوجرافي، من الأساليب المميزة جداً واللي قدر يطوره لحد ما بقى ستايل خاص بيه وبيعبر عنه بشكل كبير ودا هيخلي أي حد بيشوف شغله بيربطه بيه بشكل تلقائي.

زي ما قولتلك دي مرحلة متقدمة في التصميم بس مهم تعرفها وتحط تركيزك عليها وتفكر فيها دايماً وأنت شغال لإنك لو معملتش كدا مش هتقدر تبقي مميز عن غيرك وممكن كمان تبقي تقليدي لو ما اشتغلتش على تطوير نفسك واسلوبك الخاص.

الخلاصة

الموضوع كبير وممكن يحتاج كم كبير من المقالات، انا بس في المقال دا حبيت أوصلك حاجات مهمة وشخصياً كانت هتفرق معايا كتير لو كنت عرفتها في المرحلة دي.

إن شاء الله هتكلم أكتر عن التصميم وتكملة للمقال دا في مقالات قادمة هشارك فيها كم أكبر من التجارب والخبرة اللي ممكن تفيدك.

في الأخير لو عندك أي سؤال متعلق بالتصميم تقدر تكتبه في تعليق وهكون سعيد جداً بمساعدتك في إيجاد إجابة ليه

تعرف شخص حابب يتعلم أكتر عن التصميم؟ ساعده يبدأ أول خطوة في رحلته كمصمم واعمله منشن أو شارك المقال عشان تساعد في الوصول ليه

 

ننصحك بالاطلاع علي المصادر الآتية للإفادة والاستزادة:
Visual design elements and principles | Wikipedia
Symmetry | Wikipedia
Principles of grouping | Wikipedia
What Makes Good Design? Basic Elements and Principles | Visme
The 6 Principles of Design | Visually
T-shaped skills | Wikipedia
إزاي -وليه- تتعلم أي حاجة في أقل من شهر؟ | فريلانستيشن

دليلك الشامل لتصبح مصمم جرافيك ناجح

ما هو تقييمك لهذا المقال؟

دليلك الشامل لتصبح مصمم جرافيك ناجح دليلك الشامل لتصبح مصمم جرافيك ناجح، في مسار تعليمي كامل في مجال التصميم.
4.17 1 5 24
0 / 5 التقييمات 4.17

هل وجدت هذا المقال مفيدًا؟

دليلك الشامل لتصبح مصمم جرافيك ناجح دليلك الشامل لتصبح مصمم جرافيك ناجح، في مسار تعليمي كامل في مجال التصميم.
5 1 5 126
هل أفادك المقال؟ شارك الفائدة ❤

63 تعليق. أضف تعليق

  • مقال رائع بكل معنى الكلمة أفادني كثيرا يا ريت رابط الكتاب بتاع الألوان

    رد
    • سعيد إن المقال أفادك يا أنس وبعتذر علي التأخر في تعديله وإضافة الروابط، إن شاء الله النهاردة هيتم تعديل المقال وإضافة كل الروابط

      رد
  • انا مبسوط جدا اني قرأت المقال دا بحييك من كل قلبي … تمنياتي ليك بالتوفيق

    رد
    • وأنا مبسوطأكتر إنه عجبك وأفادك يا أسامة، وبالتأكيد بتمني يكون نقطة بداية بالنسبالك وبتمنالك توفيق أكتر

      رد
    • المقال حلو اوي ومفيد جدا…..هو انا كبداية اي البرامج اللي استخدمها ف الجرافيك ومحتاجة لابتوب اي ولا اي

      رد
      • سعيد برأيك في المقال يا سلمى وإنه أفادك، بشكل أساسي هتحتاجي Adobe Photoshop أو Adobe Illustrator على حسب تخصصك، ولكن ممكن تحتاجي الأتنين بشكل كبير، وبالتأكيد هتحتاجي PC أو Laptop بكارت شاشة كويس.

        رد
  • فعلا مقال اكثر من رائع انا نفسي ابدأ من زمان ومش عارف اعمل ايه او ابدأ ازاي بس بعد المقال ده الرؤية وضحت فعلا جزيت خيرا

    رد
  • ادام الله عليك السعادة ياصديقى

    رد
  • انا بدأت اتعلم جرافيك
    في كورس ، بس بجد تايهه مش عارفه اكمل منين بعدها … انا حابه المجال جدا و عارفه انا عاوزه ايه بس مش عارفه اكمل ازاي

    رد
    • أهلاً بيكي يا ريم،
      سعيد إنك بدأتي تتعلمي جرافيك، ممكن تقولي المشكلة اللي بتواجهك بشكل أوضح؟

      رد
      • المقال اكتر من رائع ❤
        انا سني صغير وعندى شغف لموضوع الجرافيك بس عايزه اعرف ابدا منين بالظبط

        رد
        • سعيد بقراءتك وبشكرك على رأيك يا نجوان، أنصحك تبدأي من سؤال ليه حابة تكوني مصممة جرافيك؟

          رد
        • مرحبًا
          سرد رائع و شيق،ألهمتني بالكثير ❤️
          لو فيه بديل لبرامج الادوبي حاجة مجانًا كذا كتمرين ممكن تشاركنا هيا لو سمحت..
          او ممكن تحط لنا روابط شروحات بسيط على الادوبي شكرًا

          رد
  • انا بتعلم تصميم الشعارات.بس الجهاز ضعيف جداً ماهو الجهاز المناسب

    رد
  • انا مش عارف اتعلم تصميم جرافيك ولا تصميم ويب
    وسنى كبير هل ينفع اتعلم ولا خلاص القطر فاتنى

    رد
  • انا حابه اتعلم جدا ده خالص وشغوفه جدا وكمان علشان إني اشتغل فري لأنسر بس مش حاسه إني هكون مبدعه اغمر واجرب ولا اعمل ايه ياريت ترد عليا

    رد
    • سعيد بحماسك وشغفك يا سهيلة، بالنسبة لسؤالك هل تغامري أو لأ فا دا بيتوقف على ظروف كتير انا مش على علم بيها للأسف، ولكن المغامرة مطلوبة في الحياة أتمنى لو تبدأي رحلتك في الفريلانس بشكل تدريجي وأتمنى تكون تجربة جميلة.

      رد
  • المقال جميييل حدا وافادني كثييرا ولكن الان بعد معرفه كل هذه المعلومات من اين ابدأ ماهو افضل برنامج للتصميم
    وكيف يتم تحميله

    رد
    • سعيد إن المقال أفادك يا روان، وهناك مقال مخصص للإجابة على سؤالك سيصدر قريباً إن شاء الله

      رد
      • انا عاوز اتعلم التصميم ألجرافيك التسويقي ومش عارف ابدا ازاي ممكن تقولي ابدا منين

        رد
        • أهلًا بيك يا عصام، أنصحك بمتابعة أشخاص متخصصين في التصميم الإعلاني للإستلهام والتعلم وهتلاقي كتير منهم في جروب Epic Design على فيسبوك.

          رد
  • مقال جميل استفدت فيه كثيرا اشكركم و اتمنى لكم التوفيق و النجاح.

    رد
  • خالد محمد صلاح
    أبريل 10, 2020 9:50 م

    انا خالد صلاح طالب تجاره عين شمس انا لسه مبتدأ فى التصميم الجرافيكى وكان عندى اسئله كتير جدا عن التصميم وبحمد ربنا انى قريت المقال الرائع ده لانه بجد فرق معايا جدا وفهمنى حاجات كتير مكنتش واضحه بالنسبالى بجد اشكر كاتب المقال واتمناله التوفيق دايما
    شكرا جدا جدا

    رد
    • أهلًا بيك يا خالد، سعيد إنك قرأت المقال وسعيد أكتر إنك لقيته مفيد وبيجاوب على الأسئلة اللي عندك، بشكرك على كلامك الجميل وبتمنالك كل التوفيق فيما هو قادم.

      رد
  • هو طبيعي يا علي انك تحس انك تايه في الاول وان ده مش مجالك بسبب عدم فهمك لحاجات كتير انا متابعك بس برضو يعني حابب اعرف انت كنت بتحس انك تايه في الاول كده خصوصا اني معرفتي محدوده ببرامج التصميم ولسه بتعلم فيها

    رد
    • أهلًا بيك يا أحمد، دا طبيعي جدًا يا أحمد في مرحلة البداية أنت في الحالة دي محتاج تبدأ تتعرف على المصادر الأفضل ليك وبعد كدا هتلاقي الأمور بتبدأ تكون أوضح واحدة واحدة، بتمنالك تعدي المرحلة دي على خير وكل التوفيق إن شاء الله.

      رد
    • هل دراسه الجرافيك عن طريق الكورسات ولا عن طريق كليه زى فنون تطبيقيه افضل

      رد
  • Mohamed Yasser
    مايو 4, 2020 4:51 م

    مبدأيا بحييك جدا علي المقال الاكتر من رائع دا …. ثانيا هل ممكن الجرافيك ديزاين (تصميم مواقع خصوصا ) يبقي مهارة جانبية لحاجه تانيه زي الفرونت اند مثلا

    رد
    • أشكرك يا محمد ربنا يخليك، ممكن يا أحمد وفي الحقيقة أغلب شركات تطوير المواقع بتطلب أن اللي هيشتغل فرونت إند يكون ملم بقواعد تصميم المواقع لأنها بتأثر بشكل مباشر على شغله وبينهم أرتباط كبير لأن واحدة بتتبني على التانية، وبالتالي بطبيعة الحال مهم تعرف قواعده وتكون ملم بيه.

      وكونه مهارة جانبية للفرونت إند تحديدًا دي حاجة هتفيدك وهتضيفلك كتير كمعرفة وخبرة، لكن كقيمة التخصص هيضيفلك أكتر.

      رد
  • حضرتك انا عاوزة ابدأ مجال الجرافيك بس مش عارفه منين ابدأ وتايهه جدا ممكن حضرتك ترشحلي الأماكن اللي اتعلم فيهاا وادرب فيها وشكرا جدا

    رد
    • أهلًا بيكي، هو دا هيتحدد بشكل أفضل لو حددتي تخصص معين، هل قراءة المقال مساعدتكيش في تحديد دا؟ أتمنى أقدر أساعدك أكتر.

      رد
  • المدونة مهمة بلا شك ومفيدة للكثيرين. لكن هل يمكنك أخي الكريم أن تشرح لي سبب إصرارك على الكتابة باللهجة المصرية؟ هل رغبة منك بعدم استفادة أحد من غير الشعب المصري مما تكتبوه وتنشرونه في هذه المدونة؟ فكر بالفرق بين أتكتب مقالاً موجهاً لأربعمئة مليون شخص أو لثمانين مليون شخص أيهما الأفضل؟ أرجو منكم إعادة كتابة ماتنشرونه باللغة العربية الفصحى لتعيمي الفائدة. مع التمنيات لكم بالتوفيق.

    رد
    • مرحبًا أخي ناصر، كيف حالك؟ أشكرك كثيرًا على رأيك الجميل في المدونة.

      في البداية اسمح لي أن أعتذر منك كثيرًا أخي ناصر إذا كان قد واجهتك صعوبة في قراءة المقال، وأشكرك كثيرًا على وقتك في كتابة هذه الملاحظة الهامة، والتي تفهمت منها مدى أهمية الأمر بالنسبة لك ولكل أخواننا العرب.

      في الحقيقة أخي ناصر لا يوجد أي سبب غير أنني لم أكن أتوقع أن يصبح 39% من القراء من أخواننا العرب، وبالفعل أخبرني الكثير هذا الأمر وقمت بالاستجابة له وستجد أن آخر 13 مقال جميعهم باللغة العربية الفصحى.

      وفي تلك الأثناء أيضًا أقوم بتحويل المقالات السابقة من العامية المصرية للعربية كذلك وأتوقع أنه بنهاية هذا العام إن شاء الله ستكون جميع المقالات باللغة العربية، لأنه وكما أشرت أخي ناصر الهدف الحقيقي هو نشر الفائدة على نطاق أكبر، ولكن كما تعلم أنا جيش مكون من فرد واحد لذا فالأمر يستغرق بعض الوقت.

      أشكرك على متابعتك وأتمنى أن تجد في تلك المقالات ما ينفعك، وإن شاء الله القادم سيكون أفضل.

      رد
  • يوسف من غزه
    مايو 9, 2020 5:17 ص

    مقال مفيد وعميق وجميل جدا. انا مبتدئ بتعلم عمل فيديوهات الموشن جرافيكس باستخدام الافترافكت. ويوميا استفيد من اليوتيوب. ولكن عندما أشاهد فيديوهات الموشن جرافيك يصيبني الاحباط فهي جميله جدا وإبداعه وما أقوم به وانفذه واتعلمه من الي تيوب بسيط ولا علاقه له بما اشاهده. اقصد ان الفيديوهات الجاهزه للموشن التي اشاهدهاتكون جميله جدا والدروس التي اتعلمها تكون عاديه. فكيف اصبح محترف واعمل فيديوهات موشن جذابه وجميله. ممكن تدلني علي مصاد: قويه للتعلم

    رد
    • أهلًا بك يا يوسف، أشكرك على رأيك في المقال.

      من الرائع أنك تقوم بالتعلم كل يوم يا يوسف، وبدلًا من أن تشعر بالإحباط أنصحك أن تشعر بالالهام فأنت تعمل على تحقيق هذا الأمر وهو ما بتطلب وقت ومجهود لكي تصل إلى هذا المستوى الذي ترى بأنه جميل.

      إذا كنت من مصر يا يوسف كنت بالتأكيد سأرشح لك Motion Camp ولكن في تلك الحالة أنصحك بمشاهدة هذا الكورس.

      رد
  • مقال شامل وجامع لأهم المعلومات التي يحتاجها أي شخص يريد تعلم التصميم. لك مني جزيل الشكر على هذه الجهود أخي علي.

    رد
  • دورت علي كتاب the langauge of colors علي النت ملقتوش ؟❤

    رد
  • المقال عظيم حرفيا?انا لسة خارجة من اولى ثانوى و الصراحة بحب مجال الجرافيك و الانيميشن جدا و المقال بتاع حضرتك سهل عليا حاجات كتير اوى،شكرا جدا لحضرتك استاذ على?

    رد
    • أشكرك جدًا يا جودي على رأيك الجميل ❤ بتمنالك التوفيق في دراستك ومن الجميل جدًا إنك بتبدأي في مرحلة متقدمة كدا دا بالتأكيد هيديلك أفضلية كبيرة.

      سعيد إن المقال سهل عليكي وأفادك يا جودي وبتمنى يكون نقطة بدايتك في الأنيميشن والجرافيك إن شاء الله.

      رد
  • مصطفى همام
    يونيو 10, 2020 2:43 ص

    استفدت جدا جدا جدا فى حاجات كنت اعرفها لكن الاسلوب اجبرنى اتابع لاخر حرف فى المقال
    ربنا يوفقك
    انا فى مرحله متوسطة فى المجال او مبتدأ
    وبدأت احس بالتشتت ومش عارف اعمل ايه دلوقتى
    لو تنصحنى رجاء

    رد
  • انا قرات كتير عن قواعد التصميم كوني مبتدأه بس حسيت نفسي توهت ف الكلام بس المقال تحفه اوي ومنظم شكرا بجد ?

    رد
  • اولا المقال بسراحة تحفة انا عايز اقول حاجة بس هو انا عندي 15 سنة وانا متلغبط دلوقتي انا هختار التخصص بتاعي الزاي انا عايز اقرأ التخصصات هو التخصص المحطوط في دماغي هو logo design فنا عايز اقرأه اعمل ايه بقة

    رد
    • أشكرك يا شهاب على قراءتك وسعيد إن المقال أفادك، تخصص الـ Logo Design هو تخصص مميز يا شهاب، أنصحط أن تنتظر المقال القادم لأنه هيكون موجه بالكامل لمجال تصميم الشعارات.

      رد
  • مقال اكثر من رائع ومفيد جدآ لكل اللي حابب المجال ده او عاوز يمتهنه.
    انا عندى سؤال بعد اذنك انا شغوف جدآ بتخصص الlogo design واتعلمت شوية اساسيات فى illustrator وبعدها قريت فى مقال انه ينفصح بالبدأ ببرنامج photoshop فسبت illustrator وبدأت photoshop سؤال هو ايه المدى اللى لما اوصله فى الفوتوشوب اقول خلاص كده وادخل على التخصص اللى انا حابب انا ادخله؟ …وشكرآ لحضرتك

    رد
    • أشكرك يا سيف سعيد بقراءتك للمقال.

      للأسف يا سيف دا خطأ كبير إذا كنت حابب تخصص الـ Logo Design مهم تعرف إنه الشعارات لابد أن تكون Vector وبرنامج Photoshop مخصص للـ Raster وليس الـ Vector وبالتالي من الأصح أنك تستخدم Illustrator في تصميم الشعارات.

      ومفيش مدى معين بعده بتبدأ تتخصص يا سيف، الموضوع بيتوقف على تفضيلك الشخصي وأحتياجك لإمتلاك أي مهارة.

      رد
      • انا فاهم انه فوتوشوب راستر واليستراتور فيكتور..انا قصدي هل من الضروري اني اكون بادئ ببرنامج فوتوشوب ولا لأ طالما انا حابب الlogo design يبقا ادخل illustrator على طول ؟

        رد
        • دا جميل يا سيف، بالتأكيد مش من الضروري إطلاقًا ولكن بالتأكيد في مرحلة ما هتحتاج تستخدم Photoshop لسبب أو آخر وبالتالي مهم يكون عندك خبرة فيه.

          رد
  • هل دراسه الجرافيك عن طريق كليه فنون تطبيقيه ام كورسات افضل

    رد
    • الأتنين مختلفين بشكل كبير يا خلود، ومش هيوصلوا لنفس النتيجة بنفس الطريقة بكل تأكيد، الدراسة هتفيدك جدًا بشكل نظري ولكن مش بالضرورة هتخليكي مصممة بالمستوى اللي ممكن تتمنى تشوفيه، الكورسات والتعليم الذاتي على العكس لأنك هتركزي على تعلم اللي محتاجة تتعلميه، ولكن هتحتاج منك شغل أكبر على الجانب النظري.

      رد
  • المقال رائع جدا و كفيل أنه يجعل إي شخص يحب المجال ده.
    أنا عندي سؤال مهم هو لازم الالتحاق بجامعه عشان أكون مصممه جرافيك لأني بالفعل طالبه جامعيه في مجال تاني من اختيار أهلي لكن طول عمري عندي شغف للتصميم هل ممكن انى اخد دورات أو كورسات و الحق المجال ده ولا خلاص راحت عليا

    رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
193 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: