أصعب أنواع العملاء وكيفية التعامل معها 1
العمل الحر
2 تعليقان
2,154

11 دقيقة

أصعب أنواع العملاء وكيفية التعامل معها

تخيل لو قولتلك إن +90% من مشاكل الفريلانسرز سببها حاجة واحدة بس! الشغل المرفوض والتعديلات الكتير وعدم الاتفاق وحتى النصب في بعض الحالات كل دا سببه حاجة واحدة بس!

الحاجة دي بكل بساطة هي عدم وجود ثقافة اختيار العميل أو الأسوأ اختيار العميل الغلط، لو أتعلمت مهارة اختيار العميل أنت مش هتقابل 90% من المشاكل دي كلها، شخصياً على مدار آخر 3 سنين عندي بروجيكت واحد بس Rejected ومسبقش وأتعرضت لأي مشكلة نصب قبل كدا، هل انا ساحر أو عبقري؟ إطلاقاً! الموضوع ببساطة إني ممكن أشتغل بس على 2 من أصل كل 10 بروجيكتس بيتعرض عليا أشتغل عليهم، الاختيار بيكون على أساس إيه؟ وليه بعمل كدا؟ دا اللي هتعرفه بالتفصيل في المقال دا.

في البداية انا مدرك تماماً صعوبة تنفيذ الجملة الأخيرة لو كنت لسا بتبدأ وإنها تبان مش منطقية وغريبة بعض الشيء، بس بنهاية المقال دا هتعرف دا ليه وهتستغرب إزاي مش بتطبقه، على الرغم من إنك بتعمله في حاجات تاني كتير في حياتك بس مش مدرك إنه بيحصل.

مشكلة أغلب الفريلانسرز وخصوصاً في البدايات إنهم بيشتغلوا على أي حاجة بتقابلهم وأي عميل بيطلب منهم شغل، دا غالباً بسبب الحماس الكبير في المرحلة دي وقلة الخبرة، مش بقول دا غلط تماماً طبعاً خصوصاً في المرحلة دي بالعكس الموضوع كويس، بس مينفعش يكمل معاك لأنك بالشكل دا هتخسر وقت ومجهود وحتى فلوس أكتر ما هتكسب على المدي البعيد.

خليني أقربلك الصورة بمثال عشان تبقي فاهم أنا اقصد إيه، عايزك تفتكر أخر مرة عملت فيها شوبينج، وليكن وأنت بتشتري لبس في الشتا مثلاً، هل بتدخل أي ستور تشتري كل حاجة فيه؟ أكيد لأ طبعاً دي حاجة جنونية جداً! اللي بيحصل إنك بتشوف كمية كبيرة من القطع وفي الأخير بتختار أكتر حاجات فيهم مناسبة ليك وشايفها كويسة وقادر تتحمل تكلفتها. دا تقريباً بيحصل معاك في كل حاجة في حياتك، ودا بالظبط اللي المفروض تعمله كفريلانسر.

للأسف في ناس مش متخيلة أصلاً فكرة إنك كفريلانسر بتختار العميل اللي حابب إنه يتعامل معاك أو بالأحرى اللي حابب أنت تتعامل معاه، والحقيقة دا شيء غريب لأنك لو فكرت في الموضوع هتلاقي إنك كدا بقيت موظف بس بمسمي مختلف، باختصار الموظف مش بيختار مديره بس الفريلانسر يقدر، وإذا مكنش عندك المفهوم دا فا نصيحة راجع اختيارك من البداية.

أصعب أنواع العملاء وكيفية التعامل معها 3

عشان تعرف إزاي تختار العميل الصح لازم في البداية تعرف أنواع العملاء، ولو هنتكلم على أنواع العملاء فا من رأيي الشخصي مينفعش أقول أكتر من اللي قاله الرائع Josh Gordon في كتابه Tough Calls المميز في الكتاب إنه مش مجرد كتاب بيعلمك مهارة البيع بشكل أفضل، الكتاب دا بيعلمك إزاي تبيع لحتي أصعب أنواع العملاء.

وهتتعلم فيه إزاي تفهم العملاء وتتعامل معاهم بأفضل طريقة وكمان تكسبهم بكل سهولة، الكتاب دا رائع وفرق معايا فوق ما تتخيل وبرشحه كـ Must read لأي فريلانسر أو شخص بيتعامل مع عملاء بشكل مباشر.

الكتاب اتكلم عن 20 نوع مختلف من أنواع العملاء، من وجهة نظري كفريلانسر، انت هتحتاج تعرف عن 6 منهم بشكل رئيسي، خلينا نبدأ بأنواع العملاء وفقاً للكتاب:

أصعب أنواع العملاء وكيفية التعامل معها 4

1- العميل اللي عاوز سعر أقل (المساوم)

مبدأياً لازم تفهم إن العميل اللي عاوز سعر أقل هو في الحقيقة مش بيدور على سعر أقل بقدر ما هو بيحاول إنه يحصل علي أكبر قيمة ممكنة بأقل مقابل (ودا هتقابله كتير جداً)

الأخطاء اللي ممكن ترتكبها في التعامل مع العميل المساوم وإزاي تتجنبها:

  1.  من أكبر الأخطاء اللي ممكن ترتكبها في التعامل مع النوع دا من العملاء هو إنك تركز على السعر أكتر من المنتج أو الخدمة اللي بتقدمها (للأسف في ناس لسا فاهمة إن السعر يعتبر ميزة تنافسية)، لأن ببساطة المكسب مش في تقديم أقل سعر ممكن ولكن المكسب هو تقديم أكبر قيمة ممكنة، وزي ما وضحت فوق دا اهتمامه في الأساس فا تركيزك على السعر وإهمالك للقيمة مش هيساعدك تبيع بشكل أفضل.
  2.  إنك تناقش السعر في البداية دا خطأ كارثي إياك تقع فيه، لأن بعد مناقشة السعر في البداية كل محاولاتك لتوضيح مدي قيمة اللي بتقدمه هيفسرها على إنها تبريرات للسعر في محاولة للبيع، فا بالتالي دايماً إبدا بقيمة المنتج أو الخدمة اللي بتقدمها الأول وخلي السعر في آخر مرحلة ممكنة.
  3.  نسبة مش قليلة من العملاء اللي بيدوروا على سعر أقل هما في الحقيقة مش عملاء جادين أو محتاجين فعلاً اللي بتقدمه وأحياناً كتير بتكون محاولتهم في الحصول على سعر أقل هي مجرد محاولات للخروج من عملية البيع ككل.إزاي تقدر تتأكد من كدا هو إنك تقدم عرض أفضل في القيمة ولكن مش في السعر وتشوف هل فعلاً هيطلبوا الخدمة دي أو لأ، بيع قيمة اللي بتقدمه مش سعره. وفي المطلق هما مش نوع يعتمد عليه في علاقات العمل الطويلة لأنه ببساطة ممكن يوقف شغل معاك بمجرد ظهور بديل أرخص ليك ودا أحد أهم أسباب إنك تخلي علاقتكم قايمة على القيمة مش السعر.
  4.  حاجة ذكرتها قبل كدا في مقال بشكل منفصل لأهميتها بس هذكرها تاني، هي إنك متحاولش إطلاقاً تتفاوض مع العميل في مكالمة تليفونية أو حتى تشات، الأسعار لازم تتقدم في Proposal فيه تفاصيل الخدمات والأسعار وإيه اللي هيتم تسليمه وإمتي وموضح فيه كل التفاصيل، بالطريقة دي هتمنع أي مدخل لمحاولات بائسة للتفاوض على السعر.
  5.  من الأخطاء اللي ممكن تقع فيها (خصوصاً لو كنت في البداية) في التعامل مع النوع دا من العملاء هو إنك تصدق كل اللي بيقوله عن أسعار المنافسين، بنسبة كبيرة دا بيكون مجرد كلام مش حقيقي، دورك هنا إنك توضح ليه خدمتك ممكن تكون أفضل بدون الدخول في أي تفاصيل أو الاستجابة أو حتى إبداء أي رد فعل على كلامه.
  6.  الخطأ الأبشع على الإطلاق من وجهة نظري هو إنك تقدم سعر أقل، الخطأ دا نتيجته كارثية بكل المقاييس لأنك كدا خليت دي طبيعة التعامل بينكم ودا الطبيعي ومن المتوقع جداً مستقبلاً إنه هيتعامل معاك بالقيمة الأقل لأ وكمان ممكن يطلب أقل بكل بساطة وفي الحالة دي هيكون صعب عليك إنك حتى ترجع للسعر الطبيعي.فا قبل ما تفكر تقدم أي تنازلات خصوصاً لو بسهولة حاول متفكرش في اللي هتكسبه النهاردة ولكن في اللي هتخسره بعد سنين جاية!

 

أصعب أنواع العملاء وكيفية التعامل معها 5

2- العميل اللي بيكذب عليك

أحياناً بتكون شبه عملت ديل مع عميل وفجأة تكتشف أنه قدملك عذر غير منطقي على رفض التعامل أو كذب عليك بوسيلة أو بغيرها، العميل لو كذب عليك فا دا ممكن يكون لسبب من 3 أسباب:

  1.  هو مش صاحب قرار في عملية الاتفاق وبعد ما أتفق معاك وكل حاجة ظهر صاحب القرار الحقيقي ورفض التعامل، علشان كدا أهم حاجة تعملها لما تتواصل مع أي عميل محتمل إنك تتأكد إنك بتكلم صاحب القرار في الشغل اللي هيتم عمله.
  2.  قرار الاتفاق كان متسرع وبعد ما تم أكتشف إنه هيسبب مشكلة في الميزانية أو إن الميزانية من البداية متسمحش بشراء خدمتك او منتجك فا بالتالي صعب يشتري، غالباً هو مش هيقولك كدا ولكن هيدور علي مخرج يحفظ كرامته بإنه يقولك مثلاً إنه هيشتري في وقت تاني أو حاجة مشابهة.
  3.  هو شخص غير منظم وغير ملتزم في الأساس، متستغربش لأن فعلاً كتير من الناس بتكون كدا فعلاً، هو ممكن يطلب منك خدمة وينسي أنه عمل كدا فعلاً أو يكتشف أنه مكنش محتاجها أو بس عمل كدا لأنه كان مهتم في البداية لكن فقد اهتمامه بعدها.

علشان كدا أنصحك دايماً لما تتعامل مع عميل في أي تفاصيل مهمة إنها تكون مكتوبة زي إنك مينفعش تاخد تفاصيل أي حاجة في مكالمة تليفونية، شخصياً بتعامل مع فريلانسرز كتير وحتى مناقشاتنا على Skype بنسجلها علشان نتأكد إنه ميكونش في أي خطأ في الشغل بسبب سوء تفاهم أو ما شابه فا أنصحك تعمل كدا.

الأخطاء اللي ممكن ترتكبها في التعامل مع العميل اللي بيكذب وإزاي تتجنبها:

  1.  طبعاً من البديهي جداً إني اقولك إنك مينفعش أياً كانت الظروف أو الأسباب إنك تقول للعميل بشكل مباشر أنه بيكذب! في أسوأ الأحوال قولها في عقلك لكن إياك تقع في خطأ إنك تقول للعميل بشكل مباشر أو حتى تلمحله إنه بيكذب، أنت كدا خسرته في نفس اللحظة وأعتقد هتكون نقطة اللارجعة.
  2.  تاني خطأ إنك تواجه كذب العميل بحقائق تثبت كذبه، انت كدا حطيته في وضعية دفاعية ودا مش في مصلحتك لأنه هيحس إنه مهدد ودا ممكن يسبب مشاكل تانية، ناهيك عن إنه ممكن يكون أصلاً سوء تفاهم من ناحيتك فا في الحالة دي هيبقي مظهرك سيئ بصورة تصعب تصحيح الخطأ الأساسي، علشان كدا أتعامل دايماً مع العميل علي إنكم في نفس الجانب وحاول تظهرله إنك مفسر كذبه (لو كان كذب فعلاً) على إنه سوء تفاهم وأديله فرصة تانية وشوف إيه اللي هيحصل.

 

أصعب أنواع العملاء وكيفية التعامل معها 6

3- العميل اللي بيحب اللي بتقدمه بس مش هيشتريه!

العميل دا ظاهرياً هو من أفضل أنواع العملاء المحتملين بالنسبالك، بيوفرلك تجربة ممتعة في التعامل وبيبدي اهتمام شديد باللي بتقدمه وحتى بيكون سعيد وبيشكرك على الـ Presentation ولكن مش بياخد قرار شراء أو الأسوأ إنه بيطلب خدمة او منتج شخص تاني!

أحياناً الشخص دا بيكون بيواجه مشكلة في إنه يقولك “لأ” في وشك من البداية أو ممكن بالنسباله أنه يسمعك ويسبك تخلص أسهل من إنه يرفض الطلب ويبرر سبب رفضه وبعدها يرد على تبريرك فا بيعمل كدا علشان يوفر وقته.

الأخطاء اللي ممكن ترتكبها في التعامل مع العميل اللي حابب الخدمة بس مش هيشتريها وإزاي تتجنبها:

  1. الخطأ اللي ممكن ترتكبه مع النوع دا من العملاء هو إنك تحاول تبني معاه علاقة قائمة على البيع! النوع دا تحديداً من العملاء أغلب قرارات شرائهم بتكون مينبة على الجوانب العاطفية والحسية أكثر من المنطقية.أحياناً ممكن يكون في شركتين بيقدموا نفس المنتج وبنفس السعر بس أنت بتختار واحدة منهم تحديداً تشتري منها لو فكرت في الموضوع هتلاقي إن دا بيرجع للجانب العاطفي أكثر من الجانب المنطقي (ودي حاجة ممكن أحتاج مقال كامل علشان أشرحها فا أتمنى تبحث عنها بشكل أكبر) المهم إن النوع دا من العملاء أسهل في إنك تكون معاه علاقة كويسة عن إنك تبيعله فا دا اللي المفروض يكون تركيزك عليه من البداية.
  2.  الخطأ التاني واللي هتقدر تعرف منه بسهولة إذا كان العميل اللي بتتعامل معاه من النوع دا أو لأ هو إنك تعتبر الاتفاق تم لمجرد أنه معندوش أي اعتراض على أي حاجة! لو فكرت أكتر هتلاحظ إن الاعتراض أو تحديد المشاكل جزء طبيعي جداً ومنطقي من عميلة الشراء، وأنه فعلياً لو مكنش موجود ممكن يكون دلالة واضحة إنه مش محتاج المنتج فعلياً، حاول لو ملقتش أي اعتراض من ناحيته تتكلم عن مشكلة صغيرة ممكن تكون موجودة بحكم خبرتك وتشوف رد فعله عليها وساعتها هتعرف بسهولة إذا كان عميل مش هيشتري.
  3.  تالت خطأ ممكن تقع فيه هو إنك تترجم الكلام اللطيف عنك وعن اللي بتقدمه على إنه علامات شراء! مع معظم أنواع العملاء الكلام الإيجابي عنك أو عن اللي بتقدمه بيكون علامات قوية على الرغبة في الشراء لكن مش مع النوع دا من العملاء.الأسباب كتير وممكن تختلف من حالة للتانية بس في المطلق لازم تحاول تكتشف العميل دا في مرحلة متقدمة علشان تتعامل معاه بأفضل طريقة ممكنة،
    دي العلامات اللي تقدر تعرفه من خلالها حتى من أول مكالمة: لو العميل مأظهرش أي اعتراض على أي حاجة قولتها.
    مكالمتك كانت قصرية بطريقة متسمحلكش إنك فعلاً تقنع حد أنه يشتري منتجك أو خدمتك حتى لو كان العميل قال انه مهتم.
    إنك ركزت على تكوين علاقة مع الشخص دا أكتر من كونك أتكلمت عن الشغل فعلاً.
    إنه يظهر إنه شخص لطيف أكتر من اللازم لدرجة أنه كلامه يبان على إنه اعتذارات مهذبة على رفض علي أمل إنك تفهمها.
    أنه يبان إن عملية البيع ليه أسهل من الطبيعي.

أصعب أنواع العملاء وكيفية التعامل معها 7

4- العميل اللي بيشتكي من كل حاجة وأي حاجة

طبيعي جداً إن العملاء يكون عندها شكاوى ومشاكل من وقت للتاني، بس العميل دا تحديداً بيكون عنده مشكلة مع كل حاجة وأي حاجة حتى لو كان هو السبب فيها، ومع أي نقطة بتشرحها عن اللي بتقدمه بيرد عليك بالمشكلة قبل أي حاجة لدرجة إنك مع الوقت هتخاف تتكلم معاه من الأساس!

بعيداً عن الكتاب شخصياً أتمنى جداً أقابل النوع دا من العملاء لأنه أكتر حد هيساعدك تعرف فين المشاكل المحتملة ودا هيساعدك بشكل أفضل في إقناع عميل محتمل تاني بإنك تكون عارف المشاكل وحلولها من البداية.

وكالعادة الأخطاء اللي ممكن ترتكبها في التعامل مع العميل الشكاي وإزاي تتجنبها:

  1.  الخطأ دا واضح جداً وهو إنك تتفق معاه في كل شكوى بيشتكيها من منتجك أو خدمتك، من وجهة نظرك ممكن تشوف الاتفاق معاك بيساعدك تقرب منه أكتر واللي بدوره بيقربك من إنك تبيع المنتج أو الخدمة بس في الحقيقة دا بينقص من قيمة منتجك وفعلياً بيبعدك عن إنك تقدر تبيعه، مهم إنك توضح بشكل تفصيلي نقاط قوة منتجك وكذلك تضعف من نقاط ضعفه في نظر العميل دا.
  2.  إنك تفكر إن الشكوى دي حقيقية ونابعة من مشاعره وخوفه الشخصي دا خطأ وارد جداً إنك تقع فيه بحكم إن دا الطبيعي في الحياة، في البيزنيس اللعبة مختلفة، ببساطة الشكوى غالباً بيتبعها محاولة لتحويلك لوضعية دفاعية وبالتالي تقديم سعر أقل أو عرض أفضل، علشان كدا مهم إنك تكون عارف أكتر من أي حد إيه نقاط قوة وضعف منتجك وإزاي توضحها بطريقة مقنعة.

 

أصعب أنواع العملاء وكيفية التعامل معها 8

5- العميل المتردد

العميل المتردد أو اللي بيواجه صعوبة في إتخاذ القرارات، عميلة إتخاذ القرارات في حياة العميل دا ممكن تكون فيها مشاكل زي إنه بيواجه صعوبة في اتخاذها أو بيخاف من مواجهة تبعات اختياراته أو حتى بيخاف من الخسائر المترتبة على اختياراته من حيث لو كان الاختيار اللي مختاروش أفضل!

أو الأسوأ من وجهة نظري أنه يكون بياخد رأي كتير من الناس في أي حاجة، غالباً العميل دا من أكتر أنواع العملاء اللي ممكن تضيع وقتك ومجهودك فا لازم تكتشفه في البداية جداً.

نرجع نقول الأخطاء اللي ممكن ترتكبها في التعامل مع العميل المتردد وإزاي تتجنبها:

  1.  إنك تحاول تدفعه لاتخاذ قرار الشراء لو كان في حالة مقاومة، انت دورك الطبيعي هو إنك تساعد العميل علي إتخاذ قرار الشراء لكن مع النوع دا من العملاء محاولتك لتحفيزه على إتخاذ قرار الشراء ممكن ينتج عنه مقاومة أكبر من ناحيته لأنه غالباً مش هيقولك لأ بشكل واضح.لو لقيت مقاومة واضحة للشراء هنا توقف عن تضييع وقتك في محاولة إقناعه وحاول تخلقله مخرج آمن من إنه ميتخذش قرار الشراء وفي نفس الوقت يحافظ على صورته بدون إحراج، عن طريق إنك تسأله مثلا لو حابب يفكر الأول في الموضوع أو أي قرار بيحتاج وقت يقدر يخرج بيه.
  2.  الخطأ التاني هو إنك تكون بتقرأ الاعتراضات بشكل منطقي مش عاطفي، بطبيعة الحال أنت أكتر حد عارف كل النقط المتعلقة بمنتجك أو خدمتك وإيه منها اللي ممكن تكون مشاكل حقيقية وإيه اللي ممكن تكون مجرد مخاوف من العميل.لو لقيت إن العميل المتردد بيقولك على مشاكل هي في الحقيقة مخاوف لازم تطمنه من ناحيتها زي إنك توفرله ضمان مجاني أو دعم فني لمدة معينة أو أياً كان اللي هيساعده يطمن أكتر، وطبعاً يفضل قدر الإمكان إنك تقلل حيرته بإنك تعرض عليه أختيارين واضحين يختار ما بينهم وتساعده يختار الأفضل.
  3.  الخطأ الأكبر والأكثر شيوعاً هو إنك تفقد صبرك أثناء التعامل مع النوع دا من العملاء، أحياناً بتقابل عميل معندوش أي فكرة عن اللي بتقدمه ومحتاج مساعدتك في كل خطوة من أول الشراء لحد حتى الاستخدام والمشاكل الناتجة عنها، ممكن تفقد صبرك في التعامل معاه، حاول متنساش إنه في النهاية العميل وإنه لو مطلبش منتجك أو خدمتك فا بالتأكيد هيطلبهم من حد تاني وكون صبور أكتر.

 

 

أصعب أنواع العملاء وكيفية التعامل معها 9

6- العميل اللي عارف كل حاجة.

في نوع من العملاء قد يكون عارف كل حاجة عن منتجك أو خدمتك ممكن حتى أكتر منك أنت نفسك -وطبعاً في اللي بيشوفوا نفسهم كدا لكن هما في الحقيقة معندهمش أي فكرة- غالباً محاولتك لأقناعهم بالشراء بتواجه نقد من وجهة نظرهم الأكثر خبرة وبتتحول لماساه، بالنسبالى النوع دا هو نوعي المفضل من العملاء في كل الحالات هتعرف ليه لما تعرف..

الأخطاء اللي ممكن ترتكبها في التعامل مع العميل اللي عارف كل حاجة وإزاي تتجنبها:

  1.  أول خطأ ممكن ترتكبه في التعامل مع العميل اللي عارف كل حاجة هو إنك تتعامل معاه على إنك بتبيع! غالباً النوع دا من الأشخاص أذكي من إنه يمر بمراحل البيع الطبيعية اللي بتعملها مع أي حد وطرق تقفيل البيع التقليدية زي “تفضل تختار أي خطة أسعار” غالباً بيشوفوها على إنها إهانة لذكائهم. حاول متكونش متصنع الامتنان أو حتى متحمس أكتر من اللازم، وظهورك في صورة رجل مبيعات بيخليهم مش بس مش بيسمعوا أياً كان اللي انت بتقوله لأ دول كمان بيتضايقوا منها!طيب إيه الحل؟ الحل بسيط جداً وهو إنك تديله فرصة أكبر للكلام وتسيبه يستعرض مهاراته وخبرته وتبدي اهتمام بيها بعدها هتقدر تكسبه بسهولة وتخليه يسمعك.
  2.  خطأ ممكن يكلفك خسارة كبيرة هو إنك تكون بتتعامل مع النوع دا من العملاء وأنت مش مجهز نفسك أو خبرتك مش كافية، غالباً النوع دا من العملاء مش بيحب محاولات الأقناع بالشراء بالطرق التقليدية لأنه فاهمها كلها فا إنك تتكلم معاه بنفس مستوي رجل المبيعات التقليدي من حاجات بيعتبرها هو أساسيات أو بديهيات في شغله هينتج عنها أنه هيصنفك كواحد منهم ومش هيهتم أصلاً يسمعك.
    علشان كدا مهم تكون مستعد تماماً وتظهرله مدي قوة خبرتك وإنك مش حد تقليدي بيحاول يبيعله وقدمله حلول حقيقة في خدمتك تهمه فعلاً، ويفضل لو تحاول تعرفه الأول علشان تعرف هو مهتم بإيه تحديداً في خدمتك أو منتجك.
  3.  في النقطة التانية أتكلمت عن أهمية إنك تظهرله مدي خبرتك، هنا بقي في خطأ ممكن تقع فيه وأنت بتحاول تعمل دا ممكن يكلفك كتير، وهو إنك تدخل معاه في منافسة!
    العميل دا أخد وقت كبير علشان يجمع الخبرة دي كلها وهو غالباً بيستمتع بأنه يظهرها في كلامه فا محاولتك للتقليل منها أو إنك تتنافس معاه فيها خطر جداً علشان كدا لازم تكون حذر جداً وأنت بتحاول تقنعه بقرار الشراء من غير ما تقلل من أو تنافس خبرته بأي شكل كان.
  4.  الخطأ الأخير هو إنك تخاف، أحياناً إنك تواجه عميل عارف عن اللي بتقدمه أكتر منك ممكن يخليك تخاف ودا غلط طبعاً وهيأثر عليك سلبياً علشان كدا مهم تكون عارف إنك مش في مسابقة اختبار معلومات، انت دورك إنك تحاول تقنعه ومش لازم تكون عارف كل حاجة ممكنة -مع إنه يفضل تكون عارف طبعاً- حوالين الخدمة أو الصناعة نفسها، ركز على دورك الأساسي في إقناعه ومتحوّلش التعامل لمسابقة ذكاء او اختبار معلومات.

دي تقريباً نبذة بسيطة من الكتاب وأعتقد دول أكتر 6 أنواع أنت معرض إنك تقابلهم أثناء شغلك كفريلانسر، طبعاً أنصحكم جداً تقرأوا الكتاب لأنه مفيد فوق ما تتخيلوا.

طبعاً مكنش المقصود من المقال إنه يكون تلخيص للكتاب ولكن صعب جداً أتكلم في مراحل وطبيعة الشغل الفعلية بداية من اختيار العميل لحد التسليم من غير ما تكون عارف علي الأقل الأنواع دي من العملاء لأن هيتبني عليها كتير في المقالات الجاية إن شاء الله واللي هتكون تحت سلسلة #دليلك_الشامل_لأفضل_تجربة_فريلانسينج.

واللي هشارك فيها تفاصيل التعامل مع العملاء بداية من اختيارهم لحد تسليم الشغل وكل المراحل اللي بين الأتنين سواء من وجهة نظر العميل أو الفريلانسر علي حد سواء فا لو مكنش ليك أي سابق تجربة هتكون مفيدة جداً بالنسبالك إن شاء الله.

للأسف مقدرش أشارك نسخة من الكتاب PDF لأن دا بيتعارض مع حقوق نشر الكاتب ولكن تقدروا تلاقوا ملخص سريع عن كل نوع في السلايد الجميل دا على SlideShare أو ملخص أكثر تعمقاً على موقع Get Abstract وفي المطلق أنصحكم تشتروا الكتاب متأكد إنه هيساعدكم تحققوا أضعاف سعره من المحتوي اللي موجود فيه.

بشكرك على وقتك في قراءة المقال وأتمني يكون أفادك ولو بمعلومة بسيطة، ومهتم جداً أعرف إجابتك على السؤالين دول
إيه أكتر نوع قابلته من أنواع العملاء دي؟ وإيه أكبر خطأ كنت بتقع فيه أثناء التعامل معاه؟

,

ما هو تقييمك لهذا المقال؟

أصعب أنواع العملاء وكيفية التعامل معها تخيل لو قولتلك إن +90% من مشاكل الفريلانسرز سببها حاجة واحدة بس! الشغل المرفوض والتعديلات الكتير وعدم الاتفاق وحتى النصب في بعض الحالات كل دا سببه حاجة واحدة بس! الحاجة دي بكل بساطة هي عدم وجود ثقافة اختيار العميل أو الأسوأ اختيار العميل الغلط، لو أتعلمت مهارة اختيار العميل أنت مش هتقابل 90% من المشاكل...
5 1 5 3
0 / 5 التقييمات 5

هل وجدت هذا المقال مفيدًا؟

أصعب أنواع العملاء وكيفية التعامل معها تخيل لو قولتلك إن +90% من مشاكل الفريلانسرز سببها حاجة واحدة بس! الشغل المرفوض والتعديلات الكتير وعدم الاتفاق وحتى النصب في بعض الحالات كل دا سببه حاجة واحدة بس! الحاجة دي بكل بساطة هي عدم وجود ثقافة اختيار العميل أو الأسوأ اختيار العميل الغلط، لو أتعلمت مهارة اختيار العميل أنت مش هتقابل 90% من المشاكل...
5 1 5 8
هل أفادك المقال؟ شارك الفائدة ❤

2 تعليقان. أضف تعليق

  • معتز محمدي
    مايو 23, 2020 12:26 م

    للاسف وقعت مع عميل من النوع رقم ٦

    في النهاية كل ما كتبته انت بالحرف حصل خسارة وقت وفلوس وتعب نفسي

    رد
    • نتيجة منطقية يا معتز التعامل مع العملاء من النوع دا هو الأصعب تقريبًا، أتمنى يكون درس مفيد ليك في المستقبل.

      رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: