Pomodoro Vs Flow 1

Pomodoro Vs Flow

إيه اللي بيفرق فعلاً في الإنتاجية من فريلانسر للتاني؟ الحقيقة السؤال دا ليه أكتر من إجابة في المقال دا هتكلم معاك عن حاجة بعتبرها أكثرهم أهمية وهي التكنيك، استخدام التكنيك الصح مع التاسك الصح!

Pomodoro Vs Flow 3

بشكل عام كل شخص ليه تفضيل شخصي في طريقة الشغل وطالما دا بيحقق نتيجة يبقي أنت ماشي صح، بس أحياناً كتير بنلاقي نفسنا حتى من غير ما ناخد بالنا بنستخدم أسلوب غلط في التعامل مع الشغل والوقت وتنظيمه ودا بيأدي لتجربة سيئة أو حتى تأخير في تسليم التاسك وفي كل الحالات دي مش حاجة أنت هتحبها.

ليه؟ إيه؟ وإزاي؟

Pomodoro Vs Flow 4

ليه انت محتاج تستخدم تكنيك معين في إدارة الوقت والمهام اللي بتشتغل عليها؟

الحقيقة لأسباب كتير خليني أقول أهمها إن الشغل بشكل عشوائي مش هيوصلك لأي حاجة، هتدخل اللي المفروض ولازم تعمله مع اللي أنت عايز تعمله وبدون ترتيب واضح للوقت والمهام وكمان الأولويات فا أنت كدا حياتك العملية هتبقي كارثية ومش هتتطور سواء في مستواك أو في إنتاجك.

وهتلاقي نفسك بتنسي كتير من المهام وبتكتشفها قبل الـ Deadline أو حتى بتنساها أصلاً أو بتلاقي نفسك قضيت وقت كبير بتشتغل على حاجة هي أقل أولوية وتأثير من حاجة تانية بس أنت مأخدتش بالك غير لما ضيعت كتير من الوقت فيها فعلاً.

ولو هنتكلم بإيجابية أكتر دا الحقيقة هيساعدك جداً في إنك تقدر تتعامل مع كم أكبر من الشغل بنفس الجودة اللي عايزه يكون بيها واللي بدوره بيزود إنتاجيتك وفي الأخير دخلك، ممكن أفضل أتكلم كدا ساعة مثلاً بس أعتقد إن الفكرة وصلتك فا هكتفي بهذا القدر وننتقل بقي لـ

Pomodoro Vs Flow 5

إيه التقنيات اللي تقدر تطبقها ف شغلك علشان تحول شغلك لتجربة ممتعة وتساعدك تزود من إنتاجيتك؟

بشكل أساسي انا بستخدم الـ Flow ودا كنت شرحته بالتفصيل في مقال كامل تقدر تقرأه بعد ما تخلص قراءة المقال دا من هنا

لو كنت قرأته فا غالباً أنت عارف انا بتكلم على إيه أما لو مكنتش قرأته فا الـ Flow

هو عبارة عن حالة ذهنية بتتوحد فيها كل حواسك تجاه هدف واحد وأثناء دخولك حالة التدفق بتنسي تماماً الإحساس بالوقت أو الملل أو التعب لدرجة إنك مش بتحس بوجود العالم الخارجي حواليك، والجميل أنه بيكون مرتبط بإحساس السعادة والحيوية والإنجاز وبيكون كل تركيزك بس على الحاجة اللي أنت بتعملها ودا بطبيعة الحال بيزود إنتاجيتك جداً وبيخلي عقلك أنشط فا بتقدر تتعامل مع تحديات أصعب بسهولة شديدة أو حتى بتعمل حاجات مكنتش تتخيل إنك تقدر تعملها في الوضع الطبيعي.

دا التكنيك اللي بستخدمه بشكل أساسي في شغلي وهتعرف ليه بعد شوية، تاني تكنيك بتبعه هو تكنيك الـ Pomodoro ودا تكنيك بيستخدم لإدارة الوقت طوره Francesco Cirillo أثناء فترة دراسته بالجامعة في تمانينيات القرن اللي فات والغريب أنه بقي شائع جداً لدرجة إنه لسا بيتم استخدامه لحد اللحظة اللي بتقرأ فيها وما بعدها.

فكرته ببساطة هي تقسيم المهام على فترات زمنية متساوية ما بينها فترات راحة بشكل أساسي طول الفترة بيكون 25 دقيقة وبعدها بيكون في 5 دقايق بريك، والنص ساعة دي كلها بيبقي إسمها Pomodoro.

معلومة إضافية: معناها طماطم بالإيطالي وسبب التسمية هو إنه كان بيستخدم الـ Kitchen Timer الشائع وقتها وكان على شكل طماطم.

لحسن الحظ أنت مش محتاج تستخدم الـ Kitchen Timer ولا حاجة لأن بقي في برامج وتطبيقات ومواقع كتير بتتيحلك استخدام التكنيك دا بشكل أبسط زي موقع Tomato Timer او أكتر حاجة انا شخصياً بفضلها هو برنامج Focus Booster. بعد ما عرفت الأدوات، الوقتي هو الوقت المناسب عشان تعرف إزاي تستغلها صح.

Pomodoro Vs Flow 6

إزاي أقدر أدخل في حالة Flow؟

بطبيعة الحال انا مش هشرح دا بالتفصيل لأنه موجود في المقال مسبقاً ولكن هقولك إنك تقدر تدخل في حالة تدفق ذهني تقريباً إياً كان نوع شغلك إيه طالما أنت بتحبه فعلاً، من الجميل إن التصميم والبرمجة والرسم على سبيل المثال من أكتر المجالات الإبداعية وأسهلها في الدخول في حالة تدفق، علشان تقدر تدخل في حالة تدفق ذهني وأنت بتعمل أي نشاط في..

5 شروط لازم تحققها:

  1. 1- حدد هدفك صح من البداية.
  2. 2- الهدف دا لازم يكون ليه ردود أفعال سريعة وملحوظة.
  3. 3- الهدف دا لازم يكون قابل للقياس علشان تقدر تلاحظ تقدمك في تحقيقه.
  4. 4- الهدف لازم يكون في نوع من التحدي، بمعني إنه ميكونش سهل لدرجة أنه يبقي ممل أو صعب لدرجة أنه يبقي مرهق لأنك في الحالتين مش هتحققه.
  5. 5- ابعد تماماً عن أي مصدر تشتت وأنت بتشتغل على التاسك لأن دا هيخرجك من حالة التدفق وهتحتاج تعيد المراحل دي كلها من البداية علشان تدخلها تاني.

دول الخمس شروط اللي لو حققتهم في أي تاسك بتعملها هتقدر بسهولة تدخل في حالة تدفق وهتلاحظ أنه بيتم تصميم أغلب الأنشطة بناء عليهم زي الألعاب مثلاً ووسائل التعلم المختلفة وبعض أنواع الشغل.

Pomodoro Vs Flow 7

إزاي أقدر أستخدم تقنية الـ Pomodoro؟

دا كان الـ، Flow أما بالنسبة للـ Pomodoro فا الموضوع تقريباً مشابه مع اختلاف بسيط بتحتاج 5 خطوات علشان تقدر تطبقه:

  1. 1- حدد التاسك اللي هتشتغل عليها ولازم تكون واضحة ويفضل لو كانت واحدة بس.
  2. 2- أول ما تبدأ تشتغل أبدأ الـ Pomodoro Timer سواء من المصادر اللي ذكرتها في الـ “إيه؟” أو غيرها كلهم نفس الشيء تقريباً.
  3. 3- أشتغل على التاسك بس من غير ما تعمل أي حاجة تاني أو أي حاجة تقاطعك.
  4. 4- وقف شغل لما جرس البريك يرن (واللي بيكون بعد 25 دقيقة) وخد بريك لمدة 5 دقايق بعيد عن التاسك.
  5. 5- بعد ما توصل 4 Pomodoro ساعتها بتاخد بريك طويلة وبتكون 15 لـ 30 دقيقة علي حسب تفضيلك، وبعدها بترجع تعيد نفس العملية مرة تانية.


كدا أنت بشكل كبير عرفت كل اللي محتاج تعرفه عن الأتنين ولكن يبقي السؤال الأهم.

أمتي أستخدم تكنيك Pomodoro وأمتي أدخل في حالة Flow؟

من واقع شغلي اكتشفت إنه في نوعين من التاسكات بمر بيهم، أول نوع هو المهام الصغيرة اللي بتاخد وقت قليل في تنفيذها ومش بتحتاج لتفكير عميق أو حل مشاكل معقدة مثلاً، بشكل رئيسي المهام التكرارية واللي بتحتاج تركيز أكتر من التفكير، النوع دا أنسب حاجة تستخدمها معاه هو تكنيك الـ Pomodoro لأنه ببساطة مناسب ليها من حيث الوقت والوظيفة.

على العكس تماماً المهام اللي بتتطلب تركيز كبير مع تفكير عميق وحل مشاكل أو المهام الإبداعية عموماً زي التصميم، الرسم، البرمجة والكتابة إلخ، النوع دا من المهام بيحتاج وقت أطول بكتير لتنفيذه سواء بشكل كلي أو جزئي، في الحالتين إنك يتم مقاطعتك أثناء ما أنت شغال عليه أو إنك تاخد بريك دا بيأثر عليك بالسلب في أغلب الأحيان لأنك بتفصل النشاط العقلي وبتبدأه من الأول واللي بدوره بيرجعك لنقطة الصفر فا بالتالي الأنسب إنك تدخل في حالة Flow وتحافظ عليها أطول وقت ممكن.

بكدا تكون عرفت كل اللي محتاج تعرفه عن الأتنين بشكل نظري، الجانب العملي هو إنك تبدأ فعلاً في تجربتهم مع أول تاسك هتشتغل عليها علشان تشوف مدي فاعلية كل تكنيك منهم بالنسبالك وهل هو فعلاً ساعدك تحقق تجربة شغل أفضل أو لأ.

بعد قراءتك للمقال شايف إيهما أفضل وأكثر فاعلية بالنسبالك الـ Pomodoro ولا الـ Flow؟ وهل بتستخدم أي تقنيات تانية لأداره وقتك ومهامك؟ هكون سعيد بمشاركتك ليها في التعليقات.

مشاركتك للمقال هتساهم في نشره وإفادة عدد أكبر من الفريلانسرز ❤

, , ,

ما هو تقييمك لهذا المقال؟

Pomodoro Vs Flow إيه اللي بيفرق فعلاً في الإنتاجية من فريلانسر للتاني؟ الحقيقة السؤال دا ليه أكتر من إجابة في المقال دا هتكلم معاك عن حاجة بعتبرها أكثرهم أهمية وهي التكنيك، استخدام التكنيك الصح مع التاسك الصح! بشكل عام كل شخص ليه تفضيل شخصي في طريقة الشغل وطالما دا بيحقق نتيجة يبقي أنت ماشي صح، بس أحياناً كتير...
4.33 1 5 3
0 / 5 التقييمات 4.33

هل وجدت هذا المقال مفيدًا؟

Pomodoro Vs Flow إيه اللي بيفرق فعلاً في الإنتاجية من فريلانسر للتاني؟ الحقيقة السؤال دا ليه أكتر من إجابة في المقال دا هتكلم معاك عن حاجة بعتبرها أكثرهم أهمية وهي التكنيك، استخدام التكنيك الصح مع التاسك الصح! بشكل عام كل شخص ليه تفضيل شخصي في طريقة الشغل وطالما دا بيحقق نتيجة يبقي أنت ماشي صح، بس أحياناً كتير...
5 1 5 7
هل أفادك المقال؟ شارك الفائدة ❤

4 تعليقات. أضف تعليق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: