15 مقال لازم تقرأهم لو كنت مصمم جرافيك
تصميم
2 تعليقان
4,390

7 دقيقة

15 مقال لازم تقرأهم لو كنت مصمم جرافيك

سواء كنت لسا بتبدأ حياتك التصميمة أو كنت مصمم لوقت كبير، في كل الحالات Medium هو أنسب مكان هتلاقي فيه مقالات وCase studies بتحتوي على كم هائل من الخبرة والمعرفة والأجمل أنها بشكل متعمق ومبسط في نفس الوقت.

من أكتر الأماكن اللي بقضي وقت مفيد وممتع هو موقع Medium لو مكنتش سمعت عنه قبل كدا فهو باختصار منصة بتسمح لأي حد يشارك فيها أفكاره وخبراته واللي قدر يوصله مع العالم لأن دا الهدف اللي علشانه الأنترنت بقي متاح لكل الناس ودا بالظبط اللي للأسف بدأ يقل في وسط الإعلانات وسيطرة المحتوي الترفيهي والسوشيال ميديا على الأنترنت.

عشان تعرف أكتر عن هدف Medium بالتأكيد انا مش هقوله بشكل أفضل من الفيديو الخاص بيهم واللي مكتوب بشكل أقل ما يقال عنه أنه عبقري.

بالنسبة لغير المصممين فا موقع Medium مش بس للمصممين، هتلاقوا عليه أفكار في كل حاجة و -حرفياً- أي حاجة، أما بالنسبة للمصممين فا المقال دا هيحتوي على 15 من أهم المقالات -من وجهة نظري- لازم تقرأهم لو كنت مصمم، مع وصف سريع عن كل مقال فيهم وإيه اللي هتتعلمه فيه، فا من غير أي مقدمات لنبدأ الرحلة..

15 مقال لازم تقرأهم لو كنت مصمم جرافيك 1

1.  33 Graphic Design Tips For Beginners

نصائح تصميمة للمبتدأين في مجال التصميم.

المقال دا بالتأكيد هو أفضل بداية ممكنة لو كنت لسا بتبدأ في مجال التصميم، النصايح الموجودة فيه هي بالتأكيد كل اللي محتاج تتعلمه والأهم تلتزم بيه وخاصتاً النصيحة رقم 13 واللي تقدر تعرف أكتر عن أهميتها في البوست دا

أقرأ المقال

  • مدة القراءة: 10 دقايق ملهمة ومفيدة
  • المستوي: مبتدأ

15 مقال لازم تقرأهم لو كنت مصمم جرافيك 2

2.   How to get started as a graphic designer

كيف تبدأ حياتك كمصمم جرافيك

المقال دا من المدونة الرائعة لموقع Yes I'm Designer واللي أنصح جداً بمتابعتها بشكل منفصل لأن بيكون فيها مقالات مميزة جداً عن التصميم، المقال دا من أفضل المقالات اللي هتساعدك من بداية اتخاذك لقرار إنك تكون مصمم جرافيك لحد ما تنتج أول أعمالك، وبالتأكيد لو مهتم تعرف أكتر عن حاجة زي دي باللغة العربية ننصحك بقراءة مقال كيف تصبح مصمم جرافيك ناجح.

أقرأ المقال

  • مدة القراءة: 6 دقايق من الإلهام والإفادة
  • المستوي: مبتدأ

15 مقال لازم تقرأهم لو كنت مصمم جرافيك 3

3.   Don’t Spill the Drinks: A New Metaphor for Design Thinking

لا تسكب المشروبات: تصور جديد للتكفير التصميمي

واحد من أفضل المقالات اللي بتتكلم عن التفكير التصميمي وبتناقش بشكل أوضح مراحل التصميم بداية من التعاطف وحتى التجربة، وإزاي بيتم توظيف التفكير التصميمي في كل حاجة في حياتنا، باختصار واحد من أكتر المقالات اللي أنصح بقراءتها على الرغم من إن المحتوي ككل نظري بحت وفكري خالص إلا أنه هيغير الطريقة العملية اللي بتشتغل بيها كلياً.

 

أقرأ المقال

  • مدة القراءة: 5 دقايق من الإحساس بإنك مكنتش تعرف حاجة عن الموضوع دا!
  • المستوي: متوسط – متقدم

15 مقال لازم تقرأهم لو كنت مصمم جرافيك 4

4.   What I learned as a beginner in Graphics Designing

ما تعلمته كمبتدئة في مجال التصميم الجرافيكي.

في المقال القصير دا Charlotte بتشارك كم كبير من الخبرة وإيه اللي اتعلمته في بداية رحلتها التصميمية، المقال مش مفيد بالدرجة الكبيرة ولكنه محفز جداً وهيديلك دفعة معنوية كبيرة تساعدك تكمل أكتر لأنك غالباً بتمر أو مريت بنفس المرحلة اللي هي أتكلمت عنها فيه.

 

أقرأ المقال

  • مدة القراءة: دقيقتين من الجرعة اليومية اللي محتاجها من التحفيز، وسنتين خبرة علي أقل تقدير.
  • المستوي: مبتدأ

15 مقال لازم تقرأهم لو كنت مصمم جرافيك 5

5.   12 Secrets Graphic Designers Don’t Want You to Know

12 سر مصممين الجرافيك مش عايزينك تعرفهم

انا شوفت كم كبير جداً من المقالات اللي بتتكلم عن أساسيات التصميم وكمان أتكلمت عنها، أقدر عن ثقة أقولك إن دا أفضل مصدر ممكن تتعلم منه أساسيات التصميم بشكل سلس وبسيط وممتع وهتفهمه وتستفاد منه لو كنت معندكش أي خبرة تصميمة أو حتى لو كنت Senior وبرشح وبنصح بقراءته جداً وياريت لو تحتفظ بيه وترجعله من وقت للتاني لأنه مش من نوعية المقالات اللي تتقرأ مرة واحدة الحقيقة.

أقرأ المقال

  • مدة القراءة: 7 دقايق ممتعة، مفيدة ومغذية للعين والعقل بشكل جميل.
  • المستوي: كل المستويات

15 مقال لازم تقرأهم لو كنت مصمم جرافيك 6

6.   5 key steps to take in order to become a better designer

5 خطوات أساسية لكي تصبح مصمم أفضل

على الرغم من إن كاتب المقال مصمم معماري وإني مصمم جرافيك متخصص في تصميم الشعارات وأنت ممكن تكون حاجة مختلفة تماماً إلا إني متأكد إن القواعد والطرق اللي أتكلم عنها هتساعدك جداً في مجالك زي ما ساعدتني في مجالي.

  المقال عموماً مناسب ليك لو كنت مصمم أياً كانت إيه الجملة اللي بعدها أو حتى اللي قبلها، أتمنى لو قريت المقال دا تتعلم منه بشكل أفضل المبدأ الياباني العبقري Ikigai واللي معناه “سبب للحياة” واللي لو قدرت توصله وفقاً للصورة الموجودة في المقال أنت كدا هتبقي حققت أفضل تجربة ممكنة في أياً كان اللي أنت بتعمله، دي كانت من الحاجات اللي غيرت حياتي لما قريتها أول مرة وأتواق إنها هتكون كدا بالنسبالك.

 

أقرأ المقال

  • مدة القراءة: 13 دقيقة مليئة بالمعرفة والخبرة والتفكير العميق.
  • المستوي: متقدم.

15 مقال لازم تقرأهم لو كنت مصمم جرافيك 7

7.   10 Small Design Mistakes We Still Make

10 أخطاء تصميمة بسيطة لسا بنقع فيها.

المقال دا لو هوصفه بإختصار فهو ملهم، ممتع ومفيد. واحد من أفضل المقالات التصميمية اللي هتخليك تخرج أكتر من عقلية المصمم وتبدأ في استكشاف عقلية المستخدم ودي الحاجة اللي متأكد إن +90% من المصممين مش بيعملوها.

 إحنا بنكون منشغلين جداً في التصميم لدرجة إننا بننسي إننا بنصممه علشان الشخص العادي، في المقال دا Eugen شارك أفكار مهمة جداً عن عقلية المستخدم وإزاي دا بيأثر على التصميم عموماً وإيه الأخطاء اللي بنقع فيها في التعامل معاه وأخيراً إزاي نصحلها.

 

أقرأ المقال

  • مدة القراءة: 9 دقايق من الدهشة والاستغراب ثم التصفيق والإعجاب.
  • المستوي: متوسط – متقدم

15 مقال لازم تقرأهم لو كنت مصمم جرافيك 8

8.   10 golden rules in Design thinking

 10 قواعد ذهبية في التفكير التصميمي.

على الرغم من إن المقال متمحور حوالين الـ Product Design والـ UX Design إلا إن القواعد العشرة اللي شاركها الرائع Emanuele Milella في مقاله مهمة جداً وقابلة للتطبيق في كل تخصصات التصميم المختلفة.

المقال دا قوي جداً لأنه بيخرجك برا عباءة المصمم وبيخليك تشوف دماغ الشخص العادي وكمان طريقة شغلك وتعاملك مع غيرك كمصمم بوضوح أكتر، لأنه للأسف إنك تكون مصمم لفترة طويلة دا بيخليك تشوف حاجات كتير من وجهة نظر المصمم وبتنسي اللي معمول علشانه التصميم من الأساس.

القواعد دي كفيلة بأنها تغير تفكيرك تماماً كمصمم وفي الحقيقة انا بواجه صعوبة في إني أحدد في المقال دا أيهما أكثر أهمية من وجهة نظري لأن كلهم بنفس مستوي الأهمية والفاعلية، بس أكتر قاعدة أنصحك تهتم بيها أكتر هي القاعدة الثامنة.

 

أقرأ المقال

  • مدة القراءة: 5 دقايق ملخص فيها 10 سنين من الخبرة.
  • المستوي: كل المستويات.

 

15 مقال لازم تقرأهم لو كنت مصمم جرافيك 9

9.   ‘SMART’ logo design principles

مبادئ تصميم الشعارات على طريقة ‘SMART'

على الرغم أنه بالنسبالى القاعدة الذهبية في تصميم الشعارات أنه مفيش أي قواعد إطلاقاً! إلا إني بستخدم المبادئ الموجودة في المقال دا في صورة Checklist لازم تتوافر في الشعار لأنها بتساعد على نجاحه بنسبة أكبر.

المبادئ قد تكون بديهية ومعروفة لأي حد ولكن المقال مكتوب بطريقة بسيطة ومفيدة وبيحتوي على اقتباسات مهمة، اختلافي الوحيد مع المقال هو استخدامه لـ Resizable على إنها مبدأ من مبادئ تصميم الشعارات، شخصياً انا شايف إن دا Must وإنه من الأفضل استبدالها بـ Responsive لأن دا الاحتياج الفعلي حالياً للشعار في ظل استحواذ الهواتف الذكية على نسبة أكبر من الاستخدام وفي زيادة كل يوم.

 

أقرأ المقال

  • مدة القراءة: 6 دقايق من الاقتباسات المهمة جداً في مكان واحد.
  • المستوي: مبتدأ – متوسط.

15 مقال لازم تقرأهم لو كنت مصمم جرافيك 10

10. There are 7 types of logo designs: but which type of logo is right for you?

هناك 7 أنواع مختلفة من الشعارات، ولكن أيهما الأنسب لك؟

تقريباً أنت كمصمم بالتأكيد قريت مقالات كتير واتفرجت على فيديوهات وخلافه بتتكلم على نفس موضوع المقال دا، دا كان انطباعي أول مرة شوفته ولكن بعد ما قرأته اكتشفت أنه كان بالتأكيد يستحق 10 دقايق من وقتي وأكيد من وقتك كذلك.

الطرقة اللي اتكتب بيها المقال دا من حيث التنظيم والترتيب والوضوح في الأمثلة حقيقي مذهلة وبتميزه عن أي مصدر تاني ممكن يكون أتكلم عن نفس الموضوع بشكل أو بآخر، أنصحك جداً بقراءته.

 

أقرأ المقال

  • مدة القراءة: 10 دقايق من البساطة والسهولة والجمال.
  • المستوي: مبتدأ – متوسط.

15 مقال لازم تقرأهم لو كنت مصمم جرافيك 11

11.  Shape and Color in Logo Design. Practical Cases.

الشكل واللون في تصميم الشعارات. حالات عملية.

مقال مميز جداً كعادة Tubik Studio وواحد من المصادر القليلة جداً اللي شوفتها أتكلمت عن السيكولوجي في تصميم الشعارات، ومدي تأثير الألوان والأشكال عليها بشكل عملي وتنفيذي.

المميز في المقال دا أنه مش بس بيشرح التأثير النفسي للألوان والأشكال بشكل نظري، المقال دا فعلاً فيه حالات تطبيقية كتير وإزاي تم تنفيذ الشعارات دي بالشكل دا بناء على النظريات والإحصائيات والوضع في الاعتبار الجانب النفسي ومدي تأثير الشعار عليه، ودي النقطة اللي تعتبر من أهم الجوانب في تصميم الشعارات والتصميم عموماً.

المقال كمان بيحتوي على روابط داخلية بتتكلم بتفصيل أكبر عن اختيار الألوان وتأثيرها النفسي وعدد من الشعارات والبروجيكتس الملهمة جداً فا أتمنى تاخد نظرة أقرب عليهم علشان تفهم الموضوع بشكل أكبر.

 

أقرأ المقال

  • مدة القراءة: 9 دقايق من الإبداع والإلهام والمتعة والإفادة في مقال واحد.
  • المستوي: متقدم.

15 مقال لازم تقرأهم لو كنت مصمم جرافيك 12

12. Using a Grid-system in Logo Design

استخدام نظام الشبكة في تصميم الشعارات

واحد من أكتر الأسئلة اللي بيتم تكرارها كل يوم في مجال تصميم الشعارات هو كيفية استخدام الـ Grid System والـ Golden Ratio في تصميم الشعارات، لو كنت بتدور على إجابة السؤالين دول أو حتى حابب تتطور أكتر فيهم فا أطمن انت في المكان الصح.

الجميل إن اللي كاتب المقال دا هو واحد من أكتر المصممين اللي بعتبرهم ملهمين جداً في شغلهم على المستوي الشخصي وهو الرائع Jeroen van Eerden.

المقال بإختصار بيحتوي على مجموعة ملهمة من الشعارات اللي صممها وإزاي تم عملها باستخدام كلاً من الـ Grid-System & Golden Ratio ومراحل تنفيذها بالتفصيل وكمان Tutorials منها أثناء التنفيذ علشان تعرف أكتر عن الطريقة المستخدمة في تنفيذها، واحد من المقالات اللي أنصح جداً بقراءتها في مجال تصميم الشعارات عموماً.

 

أقرأ المقال

  • مدة القراءة: 4 دقايق من المتعة البصرية البحتة (بدون احتساب المصادر الخارجية).
  • المستوي: متقدم.

15 مقال لازم تقرأهم لو كنت مصمم جرافيك 13

13.  Modern Identity and Logo Designs

الهوية الحديثة وتصاميم الشعارات

لو مكنتش من هواة القراءة فا المقال دا هو الأنسب ليك، المقال ببساطة بيحتوي على كم رائع وجميل من الشعارات والهويات البصرية الملهمة والممتعة بصرياً، لو كنت لسا مأخدتش جرعتك من التغذية البصرة النهاردة فا المقال دا بيجمعلك مجموعة من أفضل المشاريع الملهمة في مكان واحد.

وبيكون في مقالات كتير مشابهة فيها جرعة يومية من الاستلهام في التصميم في مختلف المجالات في Inspiration Supply تقدر تتابعها على الموقع وبعتبرها من أفضل الأماكن اللي بستخدمها في التغذية البصرية والاستلهام Pure class.

 

أقرأ المقال

  • مدة القراءة: 3 دقايق من المتعة البصرية البحتة ×2 (بدون احتساب المصادر الخارجية).
  • المستوي: متقدم.

15 مقال لازم تقرأهم لو كنت مصمم جرافيك 14

14.  7 Logo Design Trends You Need to Keep in Mind

7 اتجاهات في تصميم الشعارات تحتاج أن تعرفها

لو متابع اتجاهات التصميم هتلاحظ إنها بتختلف كلياً من سنة للتانية وعلى الرغم من إن المقال 2017 إلا أنه يظل الاتجاهات المذكورة فيه موجودة وبيتم استخدامها في الوقت الحالي.

 لابد دايماً كمصمم وخصوصاً كمصمم شعارات تعرف أكتر عن الـ Design Trends المستخدمة في الوقت الحالي علشان تقدر توظفها في شغلك بشكل أفضل.

المقال عنوانه بيوضح بالظبط محتواه بشكل رئيسي، الجميل أنه مش بس بيتوقف عند تقديم الاتجاهات العامة ولكن كمان بيشرحها بشكل أدق وهي مناسبة لأيه وأمتي تقدر تستخدمها وإيه الفرق اللي هتعمله، ودا السبب انه علي الرغم من كونه 2017 فهو كذلك مهم لأنه بيحتوي علي معلومات مفيدة عموماً وبالتأكيد مقال لابد من قراءته.

 

أقرأ المقال

  • مدة القراءة: 5 دقايق ممتعة ومفيدة في نفس الوقت.
  • المستوي: متوسط – متقدم.

15 مقال لازم تقرأهم لو كنت مصمم جرافيك 15

15. 13 Successful Logo Designers And Their Awesome Tutorials

الدروس الرائعة لـ 13 مصمم شعارات ناجح.

تقدر تقول إني فضلت أسيب الحلو للآخر! المقال دا متجمع فيه 13 من أفضل مصممين الشعارات في العالم، منهم طبعاً George Bokhua وMackey Saturday  وFraser Davidson و10 مصممين شعارات فعلاً متميزين في مجالهم، وكل الكورسات، الدروس وحتي الكتب الخاصة بيهم في أي مكان موجودة فيه وكمان أماكن تواجدهم علي السوشيال ميديا لمتابعتهم والاستلهام منهم.

تجميعة أكتر من مميزة وأكيد هتكون مفيدة جداً لأي حد بيدور على كورسات أو دروس في مجال تصميم الشعارات، شخصياً أنصحك جداً تبدأ بالدروس الخاصة بالعبقري George Bokhua على Skillshare الموجودة في المقال، مدة الكلاس الوحد لا تتعدي 30 دقيقة ولكن فيها كتير من الخبرة العملية اللي هتساعدك تكون مصمم شعارات أفضل.

 

أقرأ المقال

  • مدة القراءة: 4 دقايق هيوفرولك ساعات من البحث.
  • المستوي: كل المستويات.

لو بتواجه صعوبة في الوصول للموقع نظراً لأنه بيكون غير متاح أحياناً في مصر أنصحك تستخدم أي أضافة أو برنامج VPN وهيفتح معاك من أي دولة تانية.

أتمنى تكون تجميعة المقالات دي مفيدة ليكم وفيها الي بتدور عليه وأكتر، مشاركتك ليها هتساعد في إفادة عدد أكبر من المصممين ❤
ولو عندك ترشيحات لمقالات تانية سواء على موقع Medium او برا الموقع تقدر تشاركها في كومنت بالتأكيد هتفيد بيها غيرك وتستفاد منهم.

15 مقال لازم تقرأهم لو كنت مصمم جرافيك

, , ,

ما هو تقييمك لهذا المقال؟

15 مقال لازم تقرأهم لو كنت مصمم جرافيك سواء كنت لسا بتبدأ حياتك التصميمة أو كنت مصمم لوقت كبير، في كل الحالات Medium هو أنسب مكان هتلاقي فيه مقالات وCase studies بتحتوي على كم هائل من الخبرة والمعرفة والأجمل أنها بشكل متعمق ومبسط في نفس الوقت. من أكتر الأماكن اللي بقضي وقت مفيد وممتع هو موقع Medium لو مكنتش سمعت عنه قبل كدا...
5 1 5 1
0 / 5 التقييمات 5

هل وجدت هذا المقال مفيدًا؟

15 مقال لازم تقرأهم لو كنت مصمم جرافيك سواء كنت لسا بتبدأ حياتك التصميمة أو كنت مصمم لوقت كبير، في كل الحالات Medium هو أنسب مكان هتلاقي فيه مقالات وCase studies بتحتوي على كم هائل من الخبرة والمعرفة والأجمل أنها بشكل متعمق ومبسط في نفس الوقت. من أكتر الأماكن اللي بقضي وقت مفيد وممتع هو موقع Medium لو مكنتش سمعت عنه قبل كدا...
5 1 5 10
هل أفادك المقال؟ شارك الفائدة ❤

2 تعليقان. أضف تعليق

  • محمد التهامي
    أبريل 25, 2019 10:52 ص

    بالضبط وليس بالظبط
    خاصةً وليس خاصتا

    لتقن لغتنا أولاً

    رد
    • أشكرك على ملاحظاتك المهمة يا محمد واللي بالتأكيد هتفيدني أكثر في تقديم محتوى أفضل، ولكن بالظبط مكتوبة بالشكل دا لأن المقال مش مكتوب لغة عربية فصحى على كل حال، أما بالنسبة لخاصةً فهي خطأ منى فعلاً وبشكرك على ملاحظتك مرة تانية

      *أيضاً لنتقن وليس لتقن

      رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
25 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: