مشاكل هتواجهك لو كنت فريلانسر ممكن تدمر حياتك! 1

مشاكل هتواجهك لو كنت فريلانسر ممكن تدمر حياتك!

إتكلمت في المقال اللي فات عن التدفق وإزاي تقدر توصل لـ16 ساعة شغل في اليوم من غير أي إحساس بالملل، من المقال اللي فات كان واضح جداً قد إيه التدفق حاجة جميلة ومهمة وهتفرق جداً في سعادتك وإنتاجيتك واللي يعتبروا من أهم الحاجات بالنسبالك كفريلانسر, اللي مش موجود في الكتاب واللي اغلب الناس ممكن متكونش تعرفه هو إن التدفق برضه ليه سعر باهظ جداً محتاج تدفعه ومع الوقت شغلك كفريلانسر بشكل عام (سواء لو بتدخل في حالة تدفق أو لأ) هيسببلك شوية مشاكل وهيكسبك حبة عادات ممكن وبدون أي مبالغة تدمر حياتك، في المقال دا هتكلم أكتر عن المشاكل اللي واجهتني على مدار قرابة 6 سنين وإزاي قدرت أتعامل معاها، علشان لو لاحظت إنك بتمر بأي مشكله منهم على الأقل تعرف حل ليها يوفر عليك وقت لأن أغلب الحلول دي نجحت معايا بعد كتير جداً من التجارب لحلول فاشلة.

قبل ما أبدأ كنت حابب أوضح إن المشكلات دي انا مريت بيها، يعني مش بالضرورة تكون مشاكل عامة أو كل الناس بتمر بيها، بس اللي متأكد منه هو إن أي فريلانسر اشتغل لوقت طويل هيكون مر بـ 3 منها على الأقل، المشاكل بتنقسم لـ 3 أقسام رئيسية: صحية، نفسية واجتماعية، نبدأ بالأهم:

  1. مشاكل صحية:
    شغلك كفريلانسر معناه إنك قاعد لفترة طويلة، القعدة الكتير دي هتسببلك مشاكل مختلفة على سبيل المثال لا الحصر، الآم الظهر، مشاكل في النظر، وزيادة الوزن واللي بيأثر سلبيا على باقي وظائف الجسم.
  • الآم الظهر
    مع القعدة الكتير بشكل غلط وهي إنك متكونش قاعد بزاوية 90 درجة بتبدأ مع الوقت تحس بآلام في الظهر بشكل عام وتحديداً في أسفل الظهر.

    الحل: أول نصيحة دايماً بقدمها لأي حد بيقولي إنه بيفكر يشتغل فريلانسر هي نصيحة بديهية جداً وأغلب الناس بتاخدها بسخرية بس انا ببقي عارف إنهم هيدركوا أهميتها فيما بعد وهي ببساطة “لازم تجيب كرسي مريح ويفضل لو يكون طبي”. الكرسي المريح هيقلل بنسبة كبيرة المشاكل دي وكمان هيساعدك تشتغل بشكل أفضل، بس الكرسي مش كل حاجة لأن الأهم هو الاستخدام الصح وهو إنك تكون قاعد وظهرك مفرود تماماً وإنك تاخد بريك من وقت للتاني وهتلاقي مئات الإنفو جرافيكس بتشرح الموضوع بشكل مفصل، بس أهلاً بيك في الواقع انا بقولك انت مش هتعمل أي حاجة من دول أو على الأقل مش هتحافظ عليهم لفترة طويلة ودا بسبب التدفق وحاجات تانية كتير بتختلف من طبيعة شغل للتاني، طبعاً مش بقول ان الكلام دا مش مهم بالعكس الكلام دا صح جداً نظرياً إنما تطبيقه على الواقع انا بصراحة شايف انه مش بنفس المثالية اللي بتتقال بيه.

    الحلول اللي طبقتها ونجحت معايا: ساعة في اليوم للتمارين الرياضية (هتكلم عنها بالتفصيل في زيادة الوزن) وإني بجري مرة على الأقل في الأسبوع وبتمشي لمسافات طويلة كل ما كان في فرصة لكدا، وإني في آخر اليوم سواء كنت بقرا أو بتفرج على فيلم بعمل دا وانا في وضع النوم على الظهر تماماً وبنام بنفس الطريقة ودول برضه يعتبروا بريك، العادات دي هتساعدك في تحسين وضع العمود الفقري وبالتالي هتقلل بشكل كبير الآلام الناتجة عن القعدة الكتير.

  • مشاكل العين
    في أغلب المجالات اللي تقدر تشتغلها كفريلانسر فيه قاسم مشترك بينهم وهو إن كلهم بيحتاجوا نسبة عالية من التركيز، خصوصاً لو كنت مصمم لإنك بتتعامل مع حاجات دقيقة جداً ولازم تاخد بالك من كل مللي ودا اللي ممكن يخليك تقرب جداً من الشاشة من وقت للتاني، التركيز الكتير دا هينتج عنه إنك هترمش عينك بأقل من المعدل الطبيعي واللي هينتج عنه جفاف وإجهاد للعين وممكن يوصل لضعف لا قدر الله.

    الحل: برضه للمرة التانية الحل هيبان بعيد شوية عن المشكلة لكن في الحقيقة تأثيره كبير على المشكلة وهو إنك تستخدم شاشة جودتها عالية, لأن ببساطة كل الحلول المتعلقة بتغير إضاءة الشاشة والـNight mode زي Flux & Eye Leo مثلاً وخلافه متنفعش اطلاقاً مع المصممين او اللي شغلهم ممكن يبوظ على درجة لون غلط، علشان كدا مهم تختار شاشة تديلك أفضل سطوع وتباين للألوان وأقل انبعاثات وإضاءة، انا شخصياً بفضل LG IPS LED وشايف انها ممتازة في الحالتين بس دور أكتر واختار اللي يناسب ميزانيتك واحتياجاتك.

    تاني حاجة بقي وهي إنك تحافظ على مساحة مناسبة بينك وبين الشاشة دا فعلاً مهم جداً، لو في حاجة عايز تشوفها بشكل أدق ممكن تعمل زووم في المتصفح أو برامج التصميم المختلفة وغير كدا Windows فيه حاجة لذيذة إسمها Magnifier هتكبرلك أي حاجة بشكل كافي، الغرض من كدا إنك متقربش من شاشة الكمبيوتر أكتر من اللازم لأن دا هيضر عينك بشكل كبير وضهرك كمان، ومتنساش ترمش بمعدل مناسب لأن دا هيريح عينك بشكل كبير.

    كمان متنساش تشرب مياه بمعدلك الطبيعي في اليوم واللي تقريباً 2 لتر، وعلشان تعمل دا من غير ما تخرج من حالة التدفق أو تقاطع شغلك بالكامل خلي جمبك دايماً عبوات مياه وخلي من أهدافك اليومية إنك تخلصها، في تطبيقات كتير هتفكرك بكدا لو كنت بتنسي زي Daily Water – Drink Reminder انا استعملتها لفترة من الوقت لحد ما الموضوع مشي معايا بشكل طبيعي بعدها، وخليك فاكر إن المياه تأثيرها على جسمك مهم جداً مش على عينك بس.

    رابع حاجة هي إنك تلبس نضارة للحفاظ على عينك، انا كنت كاره الفكرة جداً فوق ما تتخيل لكن لما الموضوع وصل لدرجة أنه بقي حتمي، حقيقي ندمت إني معملتش دا من فترة أطول، النضارة هتمنع نسبة كبيرة من الإشعاعات أنها توصل لعنيك وبالتالي جفاف وإجهاد أقل وراحة أكبر، أهم حاجة تكون عدسات مخصصة لكدا وهتحس بالفرق مع الوقت.

  • مشاكل الوزن
    فكرة إنك وزنك يزيد دا ممكن يأثر على ناس كتير سلبياً بشكل نفسي بقدر تأثيره الصحي وفي كل الحالات محدش بيحب كدا، بس للأسف شغلنا بنمارسه في وضع جلوس تام ولفترات طويلة، وقائم كله على النشاط الذهني، والمجهود البدني اللي بنبذله فيه قليل جداً ودا اللي هيؤدي لنتيجة واضحة ومباشرة وزن أكتر!

    طبعاً الحلول المثالية زي إنك تعمل تمارين إطالة من وقت للتاني وأنت شغال والكلام الجميل دا كله مثالي جداً على الورق وبيعمل شكل حلو في الإنفو جرافيكس، بس تطبيقه بيكون في عالم موازي كله مثالية وجمال، أهلا بيك في الواقع للمرة التانية.

    طيب إيه الحل؟
    الحل: لو لاحظت أغلب الحلول اللي قولتها في مشاكل الظهر برضه حلول فعالة جداً للوزن، بس الحل الأمثل والصح جداً هو إنك تمارس رياضة بشكل منتظم!
    من 4 سنين تقريباً لما كنت بسمع أي نصيحة بتتضمن ممارسة الرياضة بالنسبة للشغل، كنت بقول “إيه الهبل دا منا الوقت اللي همارس فيه رياضة لو اشتغلته إنتاجيتي هتكون أحسن!” بس أتضح إن انا اللي كنت أهبل! لأن الرياضة فعلاً هتزود إنتاجيتك جداً لأن كل ما كان جسمك في وضع صحي أفضل دا هيخلي تركيزك أكبر وعقلك كمان أداءه هيكون أفضل، الرياضة مش بس فايدتها إنها تخليك صحي من الناحية الجسدية، من واقع تجربة هي أهميتها أكبر بكتير من كدا أول حاجة هتساعدك جداً تنظم وقتك خصوصاً لو خليت وقت التمرين ثابت ومستحيل أي حاجة تعارضه دا بطبيعة الحال هيخليك تنظم يومك بالكامل ونومك وتهتم بأكلك كويس لأنهم 3 عوامل أساسية لو واحد منهم مش مظبوط مش هتشوف نتيجة نهائية.

    والحل الأمثل بقي اللي ساعدني يبقي عندي six pack في 50 يوم!
    تطبيق رائع جداً إسمه Runtastic Six Pack، والله الكلام دا عن تجربة واللي عارفيني شافوه بنفسهم، في 50 يوم بس لو مشيتهم على التطبيق بانتظام هيبقي جسمك مثالي تماماً أياً كان إيه وضعك الحالي، كل اللي هتحتاجه موبايل وسجادة تمارين رياضية بس! مش هتحتاج حتى تروح الجيم ولا تخرج من أوضتك، الجميل أنه بيبدأ من تمارين بسيطة مدتها 7 دقايق وكل يوم الوقت بيزيد بس أقصي وقت للتمارين فيه تقريباً 35 دقيقة! يعني كمان مش هياخد كتير من وقتك لو أنت حابب ممكن برضه تستخدم Runtastic Pushups. وباقي تطبيقاتهم هتفيدك جداً.

  • قلة الأكل أو الأكل الغير صحي
    ودي من أشهر المشاكل اللي هتمر بيها لو كنت بتدخل في حالة تدفق كتير وانت شغال! انا شخصياً كنت بمر بالمشكلة دي وهي أني باخد بالي من أني محتاج آكل في أوقات متأخرة بالليل أو ممكن ببقي عايز آكل بس بكمل الشغل الأول أو ممكن حتى أنسي آكل تماماً.

    الحل: أنسب حل من وجهة نظري هو إنك ترتب شغلك بطريقة تسمحلك بوجود فراغات كافية في اليوم يعني حدد مثلاً الأوقات المناسبة ليك في الأكل وأبدأ رتب شغلك بطريقة تسمحلك بأوقات بريك بين كل تاسك والتانية في الوقت اللي محتاج تاكل فيه.

    حل إضافي: من الحلول اللي فعالة ومفيدة جداً بالنسبالى برضه هي إني بربط الأكل بكورسات معينة بتفرج عليه، يعني بحدد مثلاً وقت الكورس أو التعلم أياً كان نوعه إيه وبربطه بالأكل فا بعمل الأتنين في نفس الوقت ودا بيشجعني على الأتنين بشكل أفضل وأنصحك تجربها هتعجبك هتلاقي نفسك بتاكل بشكل منتظم أكتر وكمان بتتعلم حاجة مفيدة!

  1. مشاكل نفسية:
  • الضغط والتوتر
    الشغل الكتير وإنك يكون عندك عدد كبير من العملاء مع الوقت هيدخلك في حالة من التوتر والضغط المستمر واللي هيأثروا سلبياً على نفسيتك واللي ممكن يحول شغلك لضغط نفسي وتفقد شغفك ناحيته مع الوقت أو حتى تكرهه!

    الحل: الحل بيبدأ من مرحلة اختيارك للعملاء نفسهم، مهم تختار العميل اللى فاهم دماغك وانت كذلك فاهم احتياجاته بسهولة وعارف إزاي تقدمله اللي هو محتاجه، ابعد عن العميل المتردد اللي مش عارف هو عايز إيه لأنه  هيتعبك وهيحطك تحت ضغط نفسي وكمان هيبقي صعب ترضيه والتجربة كلها هتكون سلبية بالنسبالكم إنتوا الأتنين.
    الحاجة التانية هي إنك تظبط التاسكات اللي عندك علي وقتك ومتاخدش شغل أكبر من وقتك، على سبيل المثال انا حالياً جدولي مشغول لمدة 3 شهور بناء علي التاسكات اللي شغال عليها، لما أي حد بيطلب مني أي شغل بوضحله بذوق إني مشغول لمدة 3 شهور ومش هقدر أبدأ أي شغل قبل كدا لأني هأثر على الجودة الكلية للكل ودا هيضرني انا قبل أي حد، ببساطة لو طبقت كدا هترتاح جداً، ومتنساش برضه وأنت بتعمل حساب لشغلك إنك تعمل حساب لنفسك من حيث ممارسة هواياتك الطبيعية زي القراءة والفرجة على الأفلام مثلاً والحاجات اللي انت بتحبها و متخليش شغلك ياخد منك الحاجات دي لأن حياتك هتبقي مملة ومع الوقت نفسيتك هتبقي في حالة مش كويسة ومش هتقدر تشتغل، مهم من وقت للتاني أو على الأقل مرة واحدة في الأسبوع إنك تخرج مع أصحابك، دا بيكون تأثيره رهيب على نفسيتك وبيشحنك بشكل حلو جداً وأفضل حاجة ممكنة هي إنك تكسر الروتين العام من وقت للتاني بإنك تسافر دي حاجة هتفصلك تماماً من أي ضغط نفسي سواء في حياتك أو شغلك.

  1. مشاكل اجتماعية
  • العزلة الاجتماعية
    علي الرغم من إنك كفريلانسر بتحتاج وقت كبير بعيد عن أي ضغوطات اجتماعية علشان تشتغل بشكل أفضل، انت كمان شخص بتمثل جزء من المجتمع اللي عايش فيه ودا بيخلي عليك واجبات اجتماعية سواء تجاه أسرتك أو أصحابك أو أياً كان، شغلك كفريلانسر ممكن يخليك متقدرش تقضي وقت أكبر مع أهلك أو اصحابك أو الناس اللي بتحبهم وفعلاً يهموك وللأسف بتحس بتقصير كبير ناحيتهم بسبب طبيعة شغلك، الواجبات الاجتماعية دي ضرورية لإنك جزء من المجتمع المشكلة بتكمن في تحولها لضغوطات، من وجهة نظري إن أصعب مشكلة هتواجهك كفريلانسر هي إنك تحقق التوازن بين شغلك وحياتك الاجتماعية.

    الحل: الموضوع شخصي وبيختلف من شخص للتاني بس في المطلق الحل في الحالة دي بيبدأ من ترتيب أولوياتك وعلى أساس الترتيب دا بتبدأ تحدد إيه النقط اللي ممكن تحقق بيها التوازن دا، وخليك دايماً فاكر إن حاجتين مينفعش تفرط فيهم كفريلانسر، سمعتك وعلاقاتك، كل ما الأتنين بقوا أفضل كل ما دا هيأثر عليك بشكل إيجابي جداً، حاول توضح أسلوب شغلك للي حواليك في البداية علشان يكونوا مدركين الموضوع من وجهة نظرك لأن دا هيخليهم يلتمسولك العذر في غياباتك اللي ممكن تحصل بسبب شغلك، الحاجة التانية هي إنك تشارك أكتر من وقت للتاني حتي لو هتخصص يوم في الأسبوع بس للتواصل المباشر والإيجابي مع الناس حواليك لأن التواصل المباشر مع الأشخاص بيساعدك تفهم أكتر احتياجاتهم ومشاكلهم ودا اللي ممكن يخليك توجدلها حلول أفضل فيما يتعلق بشغلك فا بالتاي هو مش بس مهم اجتماعياً لأ هو كمان هيفيدك على مستوي شغلك ونفسيتك كمان، متخليش شغلك يسيطر على وقتك بالكامل وحاول تتواصل أكتر مع الناس حواليك بإنك تضيف دا لجدول شغلك كأنه تاسك لازم تعملها بالظبط.

طبعاً علشان حجم المقال في مشاكل أكتر متكلمتش عنها، يمكن أهمها هي المشاكل من الناحية المالية وإزاي تنظم حياتك المالية بشكل فعال أكتر ودي تحديداً فضلت أخليها لمقال منفصل لأهميتها.

أتمنى تشاركوا المشاكل اللي مريتوا بيها في حياتكم كفريلانسرز سواء بتدوروا على حلول ليها أو حليتوها فعلاً وشاركوا حلولكم لأن في النهاية كلنا هنستفاد.

ومشاركتك للمقال ممكن تساعد غيرك جداً ياخد باله من المشاكل دي ويحلها.

, ,

ما هو تقييمك لهذا المقال؟

مشاكل هتواجهك لو كنت فريلانسر ممكن تدمر حياتك! إتكلمت في المقال اللي فات عن التدفق وإزاي تقدر توصل لـ16 ساعة شغل في اليوم من غير أي إحساس بالملل، من المقال اللي فات كان واضح جداً قد إيه التدفق حاجة جميلة ومهمة وهتفرق جداً في سعادتك وإنتاجيتك واللي يعتبروا من أهم الحاجات بالنسبالك كفريلانسر, اللي مش موجود في الكتاب واللي اغلب الناس ممكن متكونش...
5 1 5 2
0 / 5 التقييمات 5

Your page rank:

هل وجدت هذا المقال مفيدًا؟

مشاكل هتواجهك لو كنت فريلانسر ممكن تدمر حياتك! إتكلمت في المقال اللي فات عن التدفق وإزاي تقدر توصل لـ16 ساعة شغل في اليوم من غير أي إحساس بالملل، من المقال اللي فات كان واضح جداً قد إيه التدفق حاجة جميلة ومهمة وهتفرق جداً في سعادتك وإنتاجيتك واللي يعتبروا من أهم الحاجات بالنسبالك كفريلانسر, اللي مش موجود في الكتاب واللي اغلب الناس ممكن متكونش...
5 1 5 6
هل أفادك المقال؟ شارك الفائدة ❤

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: