كل ما تريد معرفته عن PayPal 1

كل ما تريد معرفته عن PayPal

ن نظراً لإني مؤخراً بقى بيتم التعامل معايا على إني أحد ممثلي خدمة عملاء PayPal والإنبوكس عندي بقي أسئلة وأجوبة، وكتير من الأسئلة بتكون عبارة عن نفس السؤال، فا قررت أكتب كل حاجة محتاجين تعرفوها عن الموضوع في مقال واحد عشان يكون مرجع ثابت ليه فيما بعد.

طبعاً لو دي مش أول مرة تقرأ فيها مقال في فريلانستيشن فا أكيد أنت عارف إني بتجنب تماماً أتكلم في كل ما هو بديهي وسهل الوصول ليه في أكتر من مصدر وبفضل أتكلم عن التجارب الفعلية والخبرات المكتسبة منها ولكن خلينا نستثني المقال دا.

لأنه هيكون عبارة عن شرح لكل حاجة خاصة بـ PayPal بشكل مبسط جداً وكمان بالتفصيل الممل، وهيكون متقسم في صورة أسئلة وأجوبة لتسهيل الوصول للمعلومة وتوفير وقت السرد.

المقال طويل وبيتكون من 9 أجزاء رئيسية مختلفة، لتسهيل الوصول للمعلومة اللي بتدور عليها دي قائمة بأقسام المقال، بالضغط على أياً منها سيتم تحويلك مباشرة للجزء دا في المقال بدون الحاجة لقراءته بالكامل:

  1. ما هو PayPal؟
  2. كيف افتح حساب على PayPal؟
  3. كيف أقوم بربط بطاقتي البنكية بحسابي في PayPal؟
  4. كيف أفعّل حسابي على PayPal؟
  5. شرح لوحة تحكم حسابك في PayPal.
  6. شرح تفعيل البطاقة البنكية بعد ربطها بحساب PayPal.
  7. شرح تفعيل السحب التلقائي الشهري في PayPal.
  8. كيف أسحب أرباحي من PayPal؟
  9. أسئلة وأجوبة حول PayPal.

جاهز؟ يلا بينا ?

كل ما تريد معرفته عن PayPal 3

 1. ما هو PayPal؟ أو هو PayPal دا عبارة عن إيه؟

بص يا سيدي، PayPal دا فكرته بكل بساطة هو إنه يكون أأمن وأفضل وسيلة للتعامل المادي أونلاين، يعني إيه الكلام دا؟ 

يعني PayPal ببساطة وظيفته هو إنه يسهل عليك ويأمنلك تعاملاتك المادية أونلاين، التعاملات دي قد تكون مشتريات Purchasing أو تحويلات Transfer أو استقبال وسحب أموال Request & Withdraw (شايف عينك بتلمع ?).

دا جميل، بس إزاي أسرع وأأمن؟

ليه PayPal بيساعدك تعمل المعاملات دي كلها بشكل أسرع؟ لأنك ببساطة وأنت بتشتري على سبيل المثال، مش هتكون محتاج كل مرة تشتري فيها تفتح محفظتك وتطلع الكارد بتاعتك وتفضل تكتب البيانات الخاصة بيها كلها، دي بالتأكيد عميلة محدش بيحب يعملها كل مرة يشتري الموضوع بياخد وقت ومزعج نوعاً ما.

حل آخر

Google وفرت حل لطيف وهو إنك تحفظ البطاقات كلها في المتصفح وتكتبهالك هي وقت ما تحب تشتري بس الخدمة دي بتكلف 0.5$ في المرة، وشايف إنها تكلفة ملهاش أي داعي يعني ولو كانت بسيطة لأن كتير من المحافظ التانية بتقدمها بشكل مجاني.

المهم دا مش موضوعنا حالياً، أنت في حالة PayPal بتضيف بطاقاتك لحسابك في PayPal وكل مرة بتحب تشتري فيها بتعمل دا بضغطتين تلاتة بالكتير من غير ما تحتاج تكتب كل البيانات دي كل مرة أو حتي تدفع مقابل لكدا.

طيب إزاي بقي أأمن؟

أأمن لأن ولو ممكن متكونش حاسس بدا حالياً هي حاجة كانت بتحصل قديماً وهي إنك ممكن تشتري من موقع ما وليكن في الصين مثلاً وتكتشف تاني يوم إن الموقع تم اختراقه وسحب بيانات البطاقات الخاصة بكل عملاءه!

هل هتحب تشتري من أي مكان بكامل بيانات بطاقتك؟ ممكن تكون أنت بتثق في الموقع أو الشخص دا بس لازم تحط اعتبار إنك مش عارف إنه ممكن يتعرض للإختراق في أي وقت، فا بالتالي PayPal بيوفرلك الحل الأمثل في إنك تشتري من أي مكان سواء واثق فيه أو لأ بدون الحاجة لمشاركة بيانات بطاقتك وطبعاً مفيش أأمن من كدا.

  أتوقع أنت حالياً بعد ما عرفت إيه هو PayPal وليه محتاج تستخدمه بقيت متحمس أكتر تعمل حساب خاص بيك، تعالي اشرحلك إزاي.

كل ما تريد معرفته عن PayPal 4

 2. إزاي أقدر أعمل حساب على PayPal؟

الموضوع بسيط تماماً وبعيد كل البعد عن التعقيد وأشبه بعميلة التسجيل في أي موقع ولا يتعدى عمله 3 دقايق (أو 5 في حالة لو كنت من عملاء TE ?) المهم نبدأ بسم الله.

أول حاجة بتدخل على موقع PayPal الرسمي www.paypal.com، هتلاقي نفسك خير اللهم أجعله خير في الصفحة دي.

كل ما تريد معرفته عن PayPal 5

دلوقتي هتضغط على Sign Up، بعدها بتبدأ أول خطوة، واللي فيها بيسألك إذا كنت حابب تسجل حساب شخصي ولا حساب بيزنيس.

طيب إيه الفرق بين الحساب الشخصي والبيزنس؟ وانا محتاج إيه فيهم؟ ?

الفرق يا سيدي بكل بساطة إن الحساب الشخصي دا لو أنت كنت شخص وحابب تشتري أونلاين أو تبعت وتستقبل فلوس بكل المميزات اللي اتكلمت عنها فوق.

أما البيزنس دا لو كنت بتبيع أونلاين مثلاً و بتتعامل مع عملاء عددهم كبير وبتكون محتاج تسهل عليهم الدفع ويبعتولك مباشرة على PayPal وكمان تبعتلهم فواتير وخلافه كـ Payment Gateway بوابة دفع (زي اللي هتشوفها لو كنت بتشتري من أي موقع بيقبل الدفع عن طريق PayPal)

كل ما تريد معرفته عن PayPal 6

أغلب الظن إنك هتحتاج حساب شخصي Personal Account فا أختار دا ويلا نشوف إيه اللي بعد كدا.

كل ما تريد معرفته عن PayPal 7

طبعاً كل البيانات المطلوبة هنا بيانات بديهية جداً وأنت تعرفها، بس هشرحها تحسباً

Country

 ودا اسم الدولة اللي عايش فيها حالياً

First Name

اسمك الأول الجميل

Last Name

 اسم الوالد أو العيلة اللي تفضله

Email Address

 بريدك الإليكتروني ولازم تكون قادر توصله في أي وقت لأنك هتحتاجه في الخطوات الجاية 

Create Your Password

كلمة مرور الحساب، ويفضل جداً إنها تكون مكونة من حروف (كبيرة وصغيرة) وأرقام ورموز، يعني بلاش 123456 أو 2041996 والحاجات اللي ممكن أي حد يخمنها أو يعرفها بسهولة دي.

وطبعاً مش محتاج أقولك إن الباسورد دا لازم تكون حافظه أكتر من اسمك لأنك لو نسيته ونسيت الميل فوق ومش قادر توصل للفون هتودع الحساب فا الوقاية خير من العياط ?

Confirm Your Password

هتكتب الباسورد الجميل اللي كتبته فوق مرة كمان عشان تتأكد إنك كتبته صح.

خلصت الحمد لله؟ دوس Next ويلا نكمل.

كل ما تريد معرفته عن PayPal 8

هنا أقولك مبروك يا بطل أنت وصلت أهم مرحلة من مراحل التسجيل، ولكن لازم تكتب البيانات دي الأول.

Date of Birth

دا تاريخ ميلادك ومهم جداً تكتبه صح (زي ما موجود في بطاقتك الشخصية) لأنك ممكن تحتاجه في التأكيد لو حسابك حصلتله أي مشكلة لا قدر الله يعني.

Nationality

طبعاً دي الجنسية مش الدولة المقيم فيها اللي أخترتها الخطوة اللي فاتت، يعني لو أنت مقيم في أمريكا بس أنت مصري هنا بتختار إنك مصري ? وفوق أميركا.

Address line 1

دا عنوانك هنا ممكن تكتب العنوان كامل لو مكنش كبير أو تكتبه على سطرين في الخانة اللي بعدها لو بتفضل تكتبه كدا.

Address Line 2

طبعاً أنت كتبت العنوان كله في أول سطر أو ممكن تقسمه على سطرين أيهما تفضل دي مش حاجة ضرورية.

City / Town / Village

هنا بتكتب اسم المدينة أو القرية أو المنطقة اللي أنت عايش فيها.

State / Province / Region

دا اسم المحافظة أو المقاطعة اللي أنت تابع ليها وبما إنك مش عايش في أميركا فا بتكون None

Postal Code

لو مش عارف الكود البريدي لمنطقتك بلاش تعمل زي الناس وتكتب فيه أي أرقام وخلاص لأن أنت شخص محترم ومش هتعمل كدا وهتدخل الموقع دا تكتب اسم منطقتك أو أقرب مكان أنت تابع ليه وهتلاقي ظهرلك الكود البريدي لمنطقتك خده كوبي وبيست هنا ويفضل لو تحفظه هيريحك.

Phone Type

دا نوع الهاتف (مش أبل ولا سامسونج ولا واواي لأ ?) يعني هل دا تليفون شغل، منزل، أو موبايل شخصي؟ غالباً هتختار موبايل وتكتب رقم موبايلك مسبوقاً بـ +20 لو كنت من مصر أو كود بلدك. 

طبعاً مش محتاج أقول إن دا هتحتاجه فيما بعد فا إتأكد إنك كاتبه صح وإن الموبايل موجود معاك، هتعرف ليه بس مش دلوقتي.

بعدها لو كنت فاتح من جهازك الشخصي يفضل تضغط علي

Stay Logged in for faster checkout عشان تشتري بسرعة من غير ما تفتح حسابك كل مرة، ولكن في المطلق مش هتحتاجها حالياً.

وطبعاً لازم توافق على شروط الاستخدام وسياسة الخصوصية اللي بالتأكيد مقريتهاش ?

وها قد حانت اللحظة المهمة، اللحظة الحاسمة، اللحظة اللي مستنيها من زمان إنك هيبقي عندك حساب PayPal “وتقبض بالدولار” اللحظة اللي هتضغط فيها علي

Agree and Create account

وهوب لقيت نفسك في الصفحة دي!

كل ما تريد معرفته عن PayPal 9

وقولت: أنت مش قولت فوق إننا خلصنا تسجيل! وربنا أنت بتخم على فكرة ?

الصفحة دي مش تسجيل متخفش الصفحة دي فيها الخدمات اللي ممكن تحتاجها من PayPal تعالوا نشرحها بالتفصيل.

Shopping With PayPal

طبعاً دي عشان تتسوق بس ملهاش لازمة أنت فريلانسر إحنا بنشتغل بس ??

Send Payments

دي لو أنت عامل حساب عشان تبعت لحد فلوس أو تحول فلوس فا أضغط Try it now لكن إحنا برضه جايين نشتغل والناس هي اللي تحولنا فلوس مش العكس، نعمل إيه؟

تالت حاجة ودي الأهم في سطر تحت مكتوب فيه:
 Not Sure? Add Card to Use Later.

حالياً هو دا المهم بالنسبالك، إنك تضيف بطاقاتك البنكية عشان تستخدمها فيما بعد سواء في الإرسال أو السحب أو المشتريات. (ركز في الجملة دي جداً)

لحظة واحدة! انا مش معايا بطاقة بنكية أعمل إيه؟

لو أنت مش معاك بطاقة سواء Purchasing / Debit / Credit ومش عارف بتتعمل إزاي، اطمن دا مقال فيه كل اللي محتاج تعرفه عن التعاملات البنكية.

هتلاقي فيه شرح كل حاجة متعلقة بالبنوك والبطاقات وترشيحاتي وكل اللي محتاج تعرفه، هيفيدك جداً في الخطوة دي وأنصحك تقرأه بعد ما تخلص قراءة المقال دا وترجع تكمل من النقطة دي.

(ربنا يقدرني ومخليكوش عايزين حاجة ?) اللي معاهم بطاقات بنكية ركزوا معايا هنا شوية بعد إذنكم.

 3. إزاي أربط بطاقتي البنكية بـ PayPal؟

كل ما تريد معرفته عن PayPal 11

هنا هتكتب بيانات بطاقتك عشان تقدر تربطها بـ PayPal، بافتراض إنك أول مرة تشوف بطاقة بنكية ومش عارف حاجة هشرحلك الجزء دا كمان

Credit Card Number

دا عبارة عن الـ 16 رقم اللي هتلاقيهم على الوجه الأمامي للبطاقة.

Expiration Date

ودا تاريخ انتهاء صلاحية البطاقة غالباً هتلاقيه تحت الأرقام اللي فوق.

CSC

ودا أهم حاجة الكود التأكيدي للبطاقة وهتلاقيه غالباً في الوجه الخلفي للبطاقة وغالباً باسم CVV ومكون من 3 أرقام بجانب التوقيع. 

بعد ما تكتب بيانات بطاقتك البنكية وتراجع بياناتك في Billing Address وتلاقي كل حاجة مظبوطة بتضغط على Link Card عشان تقدر تربط بطاقتك بـ PayPal.

بعد ما بتضغط بتلاقي نفسك أتحولت للصفحة دي…

كل ما تريد معرفته عن PayPal 12

كدا نقول مبروك حسابك بقي جاهز للاستخدام ❤، ولكن مش جاهز لاستقبال وإرسال الأموال! ? متقلقش فاضل خطوتين بالكتير وتبقي جاهز تماماً المهم حالياً تضغط علي

Go to your Account

بعد ما بتضغط عليها بتلاقي نفسك في صفحة حسابك واللي هتكون بالشكل دا…

كل ما تريد معرفته عن PayPal 13

هنا أنت على بعد خطوتين من الانتهاء، دلوقتي أنت محتاج تأكد بريدك الإليكتروني عشان حسابك يكون مفعّل وجاهز للاستقبال والإرسال.

كل ما تريد معرفته عن PayPal 14

 4. إزاي أفعّل حسابي على PayPal؟

أول حاجة بتعملها في الصفحة دي هي إنك تضغط علي

Confirm Your Email Address

بعد ما بتضغط بتلاقي نفسك في الصفحة دي …

كل ما تريد معرفته عن PayPal 15

الخطوة دي الهدف منها إنه يسمحلك بمراجعة بريدك الإليكتروني عشان تتأكد أنه الخاص بيك فعلاً مش حد تاني، بعد التأكد من صحته أضغط على Send Email عشان يبعتولك لينك تأكيد حسابك على البريد الإليكتروني دا.

بعدها بلحظات هتلاقي وصلتك رسالة من PayPal على بريدك بالشكل دا…

كل ما تريد معرفته عن PayPal 16

هنا بتضغط على Click to Activate your Account عشان تفعّل حسابك على PayPal وتقدر ترسل أو تستقبل أي فلوس.

بعد ما بتضغط على اللينك في الميل بتلاقي نفسك هنا…

كل ما تريد معرفته عن PayPal 17

كزيادة أمان PayPal بيطلب منك إنك تكتب الباسورد مرة كمان عشان تنتهي من تأكيد بريدك الإليكتروني تماماً، وبعدها بتضغط على Confirm Email Address.

كل ما تريد معرفته عن PayPal 18

بعدها بيطلب منك إنك تأكد رقم الموبايل (مفاجأة مش كدا ?) مبدأياً الخطوة دي لزيادة الأمان ولكن هي مش لازم تتعمل وممكن تضغط على Not Now لو مش حابب تعملها في الوقت الحالي، ولكن شخصياً أنصحك إنك تعملها لأنها طبقة حماية مهمة جداً لحسابك فا بعد ما تتأكد من رقم موبايلك أضغط علىNext.

بعدها بلحظات بتوصلك رسالة على موبايلك فيها الكود اللي هتكتبه بالشكل دا

كل ما تريد معرفته عن PayPal 19

بعدها بترجع مرة تانية لـ PayPal عشان تكتب الكود اللي وصلك في رسالة بالشكل دا …

كل ما تريد معرفته عن PayPal 20

بعد ما تكتبه بتضغط على Continue وكدا نقول مبروك انت انتهيت من 95% تقريباً من خطوات إنشاء حسابك على PayPal الجزء الجاي من المقال هيتكلم عن التعامل مع حسابك وشرح مختلف أجزاء لوحة التحكم بالتفصيل.

كل ما تريد معرفته عن PayPal 21

 5. إزاي اتعامل مع لوحة تحكم حسابي في PayPal؟

بعد ما خلصت الجزء اللي فوق بتلاقي نفسك في لوحة تحكم حسابك واللي بتكون بالشكل دا…

كل ما تريد معرفته عن PayPal 22

إيه بقي الكلام دا كله! تعالوا نشوف.

هتكلم عن كل الأجزاء اللي في الصورة دي بأرقامها عشان تفهمها بشكل أفضل.

  1. من هنا بتقدر تضيف صورتك الشخصية لحسابك أو تضغط على Get The Most Out of PayPal عشان تعرف إيه اللي ناقصك.
  2. PayPal Balance
    دا المكان اللي بيكون فيه رصيد حسابك على PayPal يعني لو عندك أي فلوس على حسابك هتلاقيها مكتوبة هنا.

  3. Currencies
    دي العملات المختلفة لو بتستقبل بأكثر من عملة، بشكل افتراضي هي بتكون باليورو وشخصياً بفضل أخليها بالدولار، هشرحلك إزاي تغيرها في آخر المقال.

  4. Withdraw Funds
    ودا الخيار اللي عن طريقه تقدر تسحب رصيدك على أحد بطاقاتك البنكية واللي هتكلم عنه بشكل منفصل في جزء مخصص في المقال.

  5. Bank Accounts & Cards
    وهنا بيكون موجود البطاقات والحسابات البنكية اللي مربوطة بحسابك على PayPal، لو محتاج تشوفها بالكامل بتضغط عليها عشان تنتقل لصفحة Wallet ولكن متستعجلش عشان هنتكلم عنها أكتر في تفعيل البطاقة كمان حبة.

  6. Add a bank account or a card
    ومن هنا بتقدر تضيف بطاقة جديدة أو حساب بنكي، ولكن حابب أنوه عن إن PayPal بيقبل بس الحسابات البنكية الأمريكية يعني الأوبشن دا مش متاح ليك لو مكنش عندك حساب بنكي أمريكي، وبرضه يفضل لو يكون حساب فعلي مش افتراضي لأن PayPal بيرفض التعامل مع الحسابات الافتراضية بنسبة كبيرة.

  7. Selling Tools
    دي هتحتاجها لو كان حسابك بيزنس أو لو كنت تاجر وبتستخدم PayPal كبوابة دفع ودا مش نقطة اهتمامنا حالياً.

  8. Useful Information
    ودي هتلاقي فيها لينكات لمعلومات قد تكون مفيدة ولكن بما إن المقال دا مفيد أكتر فا نشوف النقطة اللي بعدها ?

  9. Pay for Goods or services
    ودي بتنقلك لصفحة Send & Request واللي هنتكلم عنها بشكل منفصل في جزء مخصص من المقال.

  10. Recent Activity
    وهنا بيكون فيه آخر العمليات اللي تمت في حسابك ولكن بما إنه جديد حالياً فا مش هيكون في أي عمليات.

بكدا تكون عرفت إيه الموجود في لوحة التحكم الخاصة بحسابك وإزاي تقدر تستغلها صح، Now What؟

كل ما تريد معرفته عن PayPal 23

الخطوة اللي المفروض تعملها دلوقتي هي إنك تفعّل البطاقة اللي ربطتها فوق عشان تكون جاهزة للاستخدام.

كل ما تريد معرفته عن PayPal 24

 6. إزاي أفعّل بطاقتي البنكية بعد ربطها بـ PayPal؟

تفعيل البطاقة البنكية من أسهل ما يكون، ركز في الخطوات الجاية وهتلاقي الموضوع بسيط جداً.

أول حاجة بتضغط على البطاقة اللي قمت بإضافتها في الخطوات السابقة أو عن طريق صفحة Wallet.

كل ما تريد معرفته عن PayPal 25

بعدها بتضغط على Confirm Credit Card

كل ما تريد معرفته عن PayPal 26

هنا بيشرحلك الخطوات اللي هتتم عشان يتم تأكيد البطاقة، وهي بإختصار إنهم هيعملوا معاملة بسيطة قيمتها 1.5 يورو أو 1.95$

كل ما تريد معرفته عن PayPal 27

وتقدر تعرف القيمة بكل العملات في الجدول دا:

كل ما تريد معرفته عن PayPal 28

وهتوصلك المعاملة في رسالة بكود فيه 4 أرقام تقدر تستخدمه في التفعيل وبعد التفعيل بتسترد القيمة اللي تم خصمها لبطاقتك مرة تانية وتبقي جاهزة للاستخدام، طبعاً بتضغط OK وبتنتظر دقايق.

هنا مهم أوضح إن مش في كل الحالات تفاصيل المعاملة هتوصلك في رسالة على موبايلك لأن دا بيتوقف على البنك أو مصدر البطاقة زي مثلاً إنك لو بتستخدم بطاقة من QNB فا بالتأكيد المعاملة هتوصلك في رسالة على موبايلك لأنهم بيبعتوا رسايل بكل معاملات حسابك على موبايلك مباشرة وبشكل لحظي، وكذلك المصرف المتحد.

ولكن بعض البنوك مش بيكون فيها خدمة الرسائل النصية بالمعاملات على حسابك زي بنك الإسكندرية مثلاً واللي لازم تطلب الخدمة دي من البنك لأنها مش بتكون في حسابك بشكل أساسي (حاجة غريبة جداً بس مش مشكلة) وكذلك البريد المصري وبطاقات Easy Pay ودي كانت البطاقة المستخدمة في الشرح.

طيب تعمل إيه في الحالة دي؟

في الحالة دي بتتواصل مع البنك أو مصدر البطاقة وتطلب منهم يبعتولك الرقم من معاملتك مع PayPal هما غالباً مروا بدا كتير وعارفين طلبك وتقدر تقولهم ببساطة

“محتاج الـ PP كود الخاص بـ PayPal”

وهيردوا عليك بالكود المكّون من 4 أرقام اللي تقدر تستخدمه في التفعيل.

دا اللي عملته مع بطاقة Easy Pay وكان الرقم 7723.

كل ما تريد معرفته عن PayPal 29

بعد القيام بالخطوة دي هتلاقي إن حالة البطاقة تحولت لـ Ready to Confirm يعني جاهزة للتأكيد، بانتظار بس إدخال الأربع أرقام اللي عرفتهم من الخطوة السابقة، بعد الضغط عليها بتنتقل للصفحة دي واللي بيتشرحلك فيها مكان الأربع أرقام لو كانت وصلتك الرسالة.

كل ما تريد معرفته عن PayPal 30

في مطلق الأحوال بتكتب الأربع أرقام وبعدها بتضغط Confirm تأكيد، بافتراض إن الرقم صح هنا بيقولك مبروك أنت حالياً فعلت بطاقتك بنجاح! ?

كل ما تريد معرفته عن PayPal 31

وبعدها بتلاقي حالة البطاقة اصبحت Ready to Use جاهزة للاستخدام زي ما هتشوف في الصورة دي.

كل ما تريد معرفته عن PayPal 32

وكمان بيوصلك الميل دا واللي مضمونه إن تم رفع حد السحب على حسابك وتقدر دلوقتي تسحب أرباحك زي ما تحب.

كل ما تريد معرفته عن PayPal 33

كل ما تريد معرفته عن PayPal 34

 7. طريقة تفعيل السحب التلقائي الشهري في PayPal

بعد الخطوة دي شخصياً بفضل أفعّل السحب التلقائي الشهري تحسباً لو نسيت أعمله، ولكن في البداية خلّونا نعرف

إيه هو السحب التلقائي الشهري؟ وليه هو مهم؟

في المطلق مع أي عملية سحب بتعملها عن طريق PayPal مصاريفه بتكون كالآتي:

    دولياً

  • 4.99 دولار + 3.4% من قيمة المبلغ + مصاريف ثابتة (0.30 دولار)
  • محلياً

  • 3.4% من قيمة المبلغ + مصاريف ثابتة (0.30 دولار)

خليني أشرحها بمثال، لنفترض إنك معاك في حسابك حالياً 20$ وحابب إنك تستلمهم على بطاقتك فا اللي هيوصلك هيكون:

4.99$ (مصاريف باي بال) + 0.68$ (نسبة 3.4%) + 0.30$ (القيمة الثابتة) – 20$ (المبلغ المراد سحبه) = 14.03$

يعني صافي اللي هيوصلك 14.03$

الكلام دا كله في حالة السحب اليدوي، يعني إنك تسحب أرباحك بنفسك وقت ما تحب، في حالة السحب الشهري التلقائي PayPal في كل أول شهر بيحول رصيدك على بطاقتك البنكية مباشرة بدون أي مصاريف من السابق ذكرها.

يعني لو معاك 20$ في يوم 1 في الشهر PayPal بيبعتهالك على بطاقتك بشكل تلقائي من غير تدخل منك ومن غير أي مصاريف يعني بيوصلك 20$ كاملة، أعتقد دا بيوضح مدي أهمية السحب التلقائي الشهري.

بعد ما عرفت إيه وليه تعالي اشرحلك إزاي؟

كل ما تريد معرفته عن PayPal 35

بتضغط على بطاقتك مرة تانية زي ما عملت فوق في خطوات التفعيل، ولكن المرادي بتختار Change في Auto-withdrawal

كل ما تريد معرفته عن PayPal 36

بعدها كل اللي بتعمله هو إنك بتختار البطاقة وتضغط على Continue.

كل ما تريد معرفته عن PayPal 37

وبعدها بتلاقي حالة البطاقة Auto-Withdrawal ودا معناه إنها بقت مفعّلة للسحب التلقائي الشهري.

بعد كدا يبقي السؤال المنتظر من بداية المقال…

كل ما تريد معرفته عن PayPal 38

 8. كيف أسحب أرباحي من PayPal؟

بدون التطرق لأكتر من طريقة لعمل كدا، انا سبق وشرحت الجزء دا في مقال إزاي سحبت 500$ من حسابي في PayPal مباشرة لحسابي البنكي في المقال دا هتلاقي تفاصيل التجربة بالكامل وفيها كل اللي محتاج تعرفه عن عملية السحب وإزاي تقدر تسحب أرباحك الخاصة.

كل ما تريد معرفته عن PayPal 39

 9. أسئلة وأجوبة حول PayPal (متجدد)

الجزء دا من المقال هيكون عبارة عن أسئلة وإجابتها متعلقة بـ PayPal هجاوب فيها على  أكتر الأسئلة اللي بتوصلني، ولو ملقتش إجابة سؤال بتدور عليه تقدر تكتبه في تعليق وهيتم إضافته وطبعاً بالشكل دا هنقدر نحول المقال لمرجع فيه كل حاجة أي حد محتاج يعرفها عن PayPal ويقدر يرجعله في أي وقت بكل سهولة ❤ نبدأ على بركة الله.

باي بال رافض إضافة بطاقتي ماذا أفعل؟

ج: بشكل أساسي أياً كان نوع البطاقة فهي تصلح للإضافة على حسابك في PayPal وتصلح كمان للشراء، لو واجهتك مشاكل في إضافتها لحسابك أنصحك أولاً إنك تتأكد إنك دخلت بيانات البطاقة بشكل صحيح، وتأكد إن فيها رصيد كافي 50 جـ على الأقل، وبعدها تواصل مع البنك المصدر للبطاقة وهما هيساعدوك.

المشكلة ممكن تكون في السحب لأن مش كل البطاقات بتقبل السحب ولكن كل البطاقات بيتم إضافتها بدون أي مشاكل.

هل باي بال أفضل من خدمات مثل بايونيير وبايسيرا؟

ج: هذا يتوقف على تفضيلك الشخصي، خدمات مثل بايونيير قد تبدو أرخص من باي بال ولكن شخصياً أفضل استخدام باي بال لسهولة التعامل معه ولاستخداماته المتعددة في الدفع والشراء والاستقبال والتحويل وخلافه، شخصيًا أنا أفضل استخدام باي بال، ماذا عنك؟

ما هي أفضل بطاقة للسحب من باي بال؟

ج: أفضل بطاقة للسحب من باي بال (حالياً) هي بطاقة الخصم المباشر من QNB وتقدر تعرف أكتر عن إزاي سحبت 500$ عن طريقها في المقال دا.

عند أستلام أرباحي من باي بال هل سيقوم باي بال بتحويلها لحسابي البنكي بالدولار أم بالعملة الرئيسية لحسابي؟

ج: سيتم التحويل لحسابك بالعملة الرئيسية لحسابك بمعني أنه إذا كنت تمتلك 100$ سيتم تحويلها إلي حسابك بالجنيه المصري في حالة ما إذا كان العملة الرئيسية لحسابك، تماماً مثلما تقوم بشراء منتجات بعملة الدولار وتقوم بالدفع مقابلها بعملة حسابك الجنيه بمعدل تحويل عملة 2%.

ما هو الحد الأقصى للبطاقات على حسابي؟

ج: شخصياً في بعض حساباتي أستخدم 6 بطاقات مختلفة وكلها مفعلة ونشطة، يقال إن الحد الأقصى لحسابك هو 8 حسابات بنكية و8 بطاقات بنكية نشطة في نفس الوقت، ولكن شخصياً لم أصل إلي هذا الحد من قبل.

هل يمكن إضافة نفس البطاقة البنكية على أكثر من حساب؟

ج: باي بال تقول لا يمكنك إضافة نفس البطاقة إلي أكثر من حساب في نفس الوقت لأسباب أمنية، ولكن في بعض حساباتي قمت بإضافة نفس البطاقة سواء للسحب أو لتسريع عمليات الشراء ولم أجد مشكلة في هذا حتي الآن.

كيف يمكنني استقبال التحويلات على حسابي في PayPal مباشرة؟

ج: يمكنك استقبال التحويلات على حسابك مباشرة عن طريق الذهاب إلي Send & Request ومن ثم Request وهنا تقوم بإضافة أسم الشخص المراد الاستقبال منه أو بريده الإليكتروني

وبعدها إضافة المبلغ المراد طلبه وبعدها تقوم بإرسال الطلب.

ماذا لو أردت من العميل القيام بعميلة التحويل مباشرة بدون الحاجة لعمل طلب في كل مرة؟

ج: في هذه الحالة ستقوم بنفس الخطوات السابقة مع اختلاف بسيط وهو عن اختيارك تحويل بدلاً من إدخال أسم الشخص المراد التحويل منه تقوم بالضغط على  Get your own PayPal.Me ومنها تقوم باختيار اسم الكود المميز لحسابك مثل هذه الصورة

كل ما تريد معرفته عن PayPal 40

ويمكنك مشاركة هذا الكود او ارساله لأي شخص تريد منه إرسال أموال إلي حسابك مباشرة.

معلومة إضافية يمكنك أيضًا إضافة المبلغ المراد تحويله بنهاية الرابط الخاص بحسابك ليتم إدخاله بشكل تلقائي عند التحويل مثل http://paypal.me/atakistudio/5 ليقوم المرسل بإرسال 5$ (أو أياً كانت العملة الافتراضي لحسابك) مباشرة.

كيف يمكنني تغيير العملة الافتراضية لحسابي؟

ج: يمكنك تغيير العملة الافتراضية لحسابك عن طريق الذهاب إلي Wallet ثم الضغط على Details مثل هذه الصورة

كل ما تريد معرفته عن PayPal 41

وبعدها تقوم بالضغط على Manage Currencies

كل ما تريد معرفته عن PayPal 42

وهنا يمكنك إضافة عملة جديدة عن طريق Add Currencies أو تغيير العملة الافتراضية لحسابك عن طريق اختيار العملة المراد التغيير إليها واختيار Make Primary

كل ما تريد معرفته عن PayPal 43

هل يمكنني الشراء عن طريق رصيدي في باي بال؟

ج: لا، لا يمكنك الشراء عن طريق رصيدك في باي بال مباشرة، رصيدك في باي بال يستخدم للسحب على أحدي بطاقاتك ومن ثم يمكنك الشراء أو الدفع عن طريقها.

ويقال إنك لو بتحاول تشتري أو تدفع لحاجة ما وليكن قيمتها 50$ وأنت معاك بس 25$ على بطاقتك و25$ أو أكثر في رصيدك في باي بال إنه بيقوم بشكل تلقائي باستخدام رصيدك في الحالة دي ولكن شخصياً لم أجرب هذا من قبل.

هل هناك مصاريف إضافية عند إرسال واستقبال الأموال عن طريق باي بال؟

ج: نعم بالتأكيد، مصاريف استقبال او إرسال الأموال في باي بال هي كالآتي:

3.4% من قيمة المبلغ + مصاريف ثابتة (0.30 دولار)

فلنفترض إن عميل مقيم في نفس دولتك أرسل لك 10$ فمصاريف باي بال هي:

0.34$ + 0.30$ = 0.64$ وصافي المبلغ الذي سيصلك سيكون 9.36$

أما في حالة التحويلات الدولية فتكون المصاريف كالآتي:

4.99 دولار + 3.4% من قيمة المبلغ + مصاريف ثابتة (0.30 دولار)

فلنفترض إن عميل أمريكي أرسل لك 10$ فمصاريف باي بال هي:

+ $4.990.34$ + 0.30$ = 5.63$ وصافي المبلغ الذي سيصلك سيكون 4.37$.

ما هو الحد الأقصى للسحب شهرياً من حسابي على باي بال؟

ج: الحد الأقصى للسحب شهرياً هو 500$ ولكن بعد إزالة الحد كما فعلنا أثناء المقال يمكنك رفع هذا الحد وسحب المزيد، ولكن لا يجب أن تقلق بالحد الشهري لباي بال بقدر الحد الشهري لحسابك البنكي، على سبيل المثال معظم البطاقات البنكية في مصر لا تقبل باستلام أكثر من 10.000 جـ شهرياً، لذلك يجب أن تعرف أكثر عن حدود بطاقتك البنكية.

لقد أرسل لي باي بال بريد يقول أنه تم تقييد حسابي، ما معني هذا؟

ج: هذا يعني إن حسابك لا يمكنه سحب أو إرسال الأموال إلا إن يتم تقديم المعلومات المطلوبة (غالباً ما يتم إرفاقها في البريد) ولكن يمكن لحسابك استقبال الأموال في هذه الفترة بالتأكيد.

ماذا لو لم أستطيع تقديم المعلومات المطلوبة أو إصلاح المشكلة، هل سأفقد أموالي؟

ج: لأ بكل تأكيد، إذا لم تستطع التوصل لحل مع فريق مساعدة باي بال أو قمت بمخالفة شروط الاستخدام بشكل لا يسمح بإزالة التقييد عن حسابك في هذه الحالة ستنتظر 180 يوم وبعدها سيقوم باي بال بإرسال الأموال إلي بطاقتك أو حسابك البنكي.

هل يمكن غلق حسابي في باي بال؟ وما الأسباب التي تؤدي إلي ذلك؟

ج: نعم يمكن تقييد حسابك مثلما شرحت سابقاً أو غلقه نهائياً عند مخالفتك لشروط الاستخدام والتي أنصح بقراءتها في الموقع، بشكل أساسي أشهر المخالفات هي:

  • لديك العديد من الحسابات على موقع باي بال.
  • تستقبل مبالغ كبيرة بما لا يتوافق مع الحد الطبيعي لإنفاقك أو استقبالك.
  • تقوم بالكثير من المعاملات في وقت قصير.
  • تقوم باستخدام حسابك من أكثر من عنوان IP مختلف.
  • تقوم بفتح العديد من الحسابات من كمبيوتر واحد (شخصياً أفعل هذا ولا توجد مشكلة مع أي من حساباتي حتى الآن).
  • عند استقبالك أو إرسالك أموال لحساب مخالف أو تم إيقافه.
  • عند استقبالك أموال تم الإبلاغ عن إنها مسروقة.
  • عند تغيير بيانات حسابك أكثر من اللازم أو عند أضافتك وحذفك لكثير من البطاقات.

هذه هي أشهر الأسباب التي قد تؤدي إلي تقييد حسابك أو غلقه بعد التأكد من مخالفتك للشروط في حالة وجود مخالفة واضحة.

بشكل عام تجنب القيام بأي عمليات قد تبدو إنها غير طبيعية لتحافظ على حسابك.

كيف يمكنني استعادة حسابي في باي بال بعد تقييده أو غلقه؟

ج: غالباً ما يتم تقييد الحساب بهدف التأكد من هوية صاحبه، فا بنسبة كبيرة بيتم طلب بيانات مثل:

صورة البطاقة القومية أو جواز السفر، أو صورة البطاقة البنكية أو صورة أي فواتير تحمل اسمك عليها.

مثل فواتير الكهرباء وخلافه، ولكن عموماً صورة البطاقة القومية في معظم الحالات بتحل المشكلة وبتكون أكثر من كافية.

حتي الآن دول أكتر 16 سؤال بتعرض ليهم بشكل مستمر، الهدف من المقال إنه يكون المرجع الأكبر لكل ما هو متعلق بباي بال ومتوفر باللغة العربية، لذلك إذا كان لديك أي سؤال أو مشكلة أو استفسار من أي نوع هكون سعيد جداً بإضافتك ليها في تعليق في المقال أو بإضافتها في صورة سؤال في صفحة الأسئلة الشائعة في المدونة.

أتمني أكون وفقت في كتابة المقال وإنه كان مفيد بالنسبالك، كتير من الفريلانسرز بيواجهوا مشاكل مع سحب أرباحهم من PayPal.

مشاركتك للمقال دا بالتأكيد هتساعد في حل المشكلة لعدد أكبر من الفريلانسرز ❤

إذا كنت تواجه مشكلة في عرض الصور بالمدونة أو تريد مشاهدتها بالترتيب بعيداً عن المقال لإتباع الخطوات يمكنك تحميل جميع الصور بالمقال

مصادر إضافية يمكنك الإستفادة منها:
All About PayPal
PayPal Fees
Common Questions & Answers about PayPal Account

وأخيراً أتوجه بالشكر إلي أخي محمود لمساعدته العظيمة في إخراج المقال بهذا الشكل ❤

, , ,

ما هو تقييمك لهذا المقال؟

كل ما تريد معرفته عن PayPal نظراً لإني مؤخراً بقى بيتم التعامل معايا على إني أحد ممثلي خدمة عملاء PayPal والإنبوكس عندي بقي أسئلة وأجوبة، وكتير من الأسئلة بتكون عبارة عن نفس السؤال، فا قررت أكتب كل حاجة محتاجين تعرفوها عن الموضوع في مقال واحد عشان يكون مرجع ثابت ليه فيما بعد. طبعاً لو دي مش أول مرة تقرأ فيها مقال...
4.2 1 5 5
0 / 5 التقييمات 4.2

Your page rank:

هل وجدت هذا المقال مفيدًا؟

كل ما تريد معرفته عن PayPal نظراً لإني مؤخراً بقى بيتم التعامل معايا على إني أحد ممثلي خدمة عملاء PayPal والإنبوكس عندي بقي أسئلة وأجوبة، وكتير من الأسئلة بتكون عبارة عن نفس السؤال، فا قررت أكتب كل حاجة محتاجين تعرفوها عن الموضوع في مقال واحد عشان يكون مرجع ثابت ليه فيما بعد. طبعاً لو دي مش أول مرة تقرأ فيها مقال...
4.64 1 5 11
هل أفادك المقال؟ شارك الفائدة ❤

62 تعليق. أضف تعليق

  • اشكرك على المقال المميز
    جزاك الله خيرا

    في حل لموضوع تعليق الحوالات المستلمه لمدة شهر ؟؟

    رد
    • أهلاً بيك يا محمود، وبشكرك علي تعليقك ورأيك الجميل.

      غالباً ما بيتم التقييد للأسباب المذكورة فوق وأهمها هو أختلاف الحد الطبيعي لمعاملات حسابك، في الحالة دي ننصحك بالتواصل مع خدمة عملاء PayPal والسؤال إذا ما كانوا بحاجة لأي بيانات تأكيدية أو إزاي يحلوا المشكلة، ولتواصل أسرع تقدر تكلمهم علي +65-6510-4584.

      رد
  • عندي سؤالين:
    1- هو في مشكلة حاليا في باي بال داخل مصر؟
    في التسجيل في الأول خالص لما بكتب البيانات عن مكان الإقامة عند “states” مفيش اختيار “none” ولما بسيبها وبكمَل رقم الموبايل بيكون مكتوب غلط “قبله +1 مش +20” ولو سيبتها على أي واحدة من ال states المعلومات هتكون غلط فا هل دا هيؤثر في حاجة؟!

    2- البنك بتاعي EGBank لما قلتله اني هربط حسابي ب paypal ولما بدخل الرقم اللي مكتوب عالكارت مش بينفع.. قال لي إنه لازم اقول له الدولة اللي موقع باي بال تبعها عشان يفعل خدمة التعامل أونلاين للدولة دي فقط! وقال لي انه باي بال اللي ظاهر عنده انها من أمريكا وأنها من الدول المصنفة عندهم إنها خطر ولازم العميل يكون مسؤول عن رغبته في فتح التعامل أونلاين لأمريكا تحسبا لاختراق الحساب لأني بفتحه للتعامل مع امريكا عموما مش باي بال فقط!! ايه صحة الكلام ده؟

    وآسفة عالإطالة

    رد
    • أهلاً بيكي يا أسماء،

      1- لأ هو مفيش مشكلة فعلياً، حاولي تتأكدي إنك مختارة الدولة مصر، لأن طالما بتقولي مظهرش None فا دا معناه إنك مختارة الدولة USA، أتمني تتأكدي مرة تانية إن شاء الله هتلاقيه بقت تمام.

      2- دا غالباً راجع لنفس السبب اللي في السؤال الأول كدا أنتيى بنسبة 99% مختارة الدولة USA وطبعاً دا مش صح، ياريت تراجعي بيانات التسجيل مرة تانية.

      ومفيش أي إطالة مساعدتك هي هدفنا وواجبنا يا أسماء.

      رد
      • مرحبًا أسماء، تصحيح للإجابة على السؤال الثاني، المشكلة مش من PayPal ولكن المشكلة من egBANK للأسف البنك بيحتاج تفعيل البطاقة للشراء أونلاين بشكل يدوي يعني البطاقة مش بتكون مفعلة للشراء أونلاين بشكل أوتوماتيك أول ما تفعليها وتودعي رصيد في حسابك.

        علشان تقدري تفعليها لازم تتصلي بيهم وتطلبي التفعيل وهما هيقولو نفس الكلام عن الأمن وما شابه، للأسف كل دا كلام في منتهى الغباء لأن دا الهدف الرئيسي من البطاقة، أطلبي منه تفعيل البطاقة لكل الدول ولفترة إنتهائها بدون الدخول في أي تفاصيل وهتشتغل معاكي إن شاء الله.

        رد
      • هل الشخص يكون ضامن فلوسه في أي عمليه شراء عبر الباي بال . لو حاب يرد المبلغ بعد فترة و ام كانت طويلة لان البضائع لم توفر

        رد
        • بالتأكيد يا محمد، دي تقريبًا أحد أهم مميزات PayPal، الطريف إني قبل ردي على رسالتك كنت طلبت Refund بقيمة 113$! 😃

          رد
        • السلام عليكم، انا اعمل في موقع مستقل، و يوجد في الحساب اكثر من ١٠٠ دولار ،هل يوجد مشكلة في ارسال المبلغ كامل في معاملة واحدة الى باي بال و لا يجب ارسل المبلغ على اكثر من مرة؟

          رد
          • وعليكم السلام ورحمة الله وبركاته يا راما،

            بالتأكيد لا يوجد أي مشكلة يا راما، حد السحب اليومي هو 500$ والشهري 10.000$ وبالتالي لا توجد أية مشكلة في سحب المبلغ بالكامل في مرة واحدة.

          • اسغة على الازعاج بس في سؤال ثاني، انا عاملة ربط للفيزا الخاصة بالبريد المصري على حساب الباي بال، و لما بعمل تحويل من باي بال للفيزا الفلوس بتوصل بالعملة المحلية (الجنيه) هل في اي طرقة لاستلام المبلغ بعملة الدولار؟

          • إطلاقًا يا راما مفيش أي إزعاج دا واجبي،

            بالنسبة لسؤالك فهو Easy Pay مش بتقبل غير العملة المحلية، لو حابة التحويل يتم بالدولار في الحالة دي بتعملي حساب بنكي بالدولار في بنك QNB الحساب بيتطلب 500 دولار على الأقل لفتحه ولكن هيسمحلك بإستلام العملات الأجنبية.

          • شكرا جدا، بس ليه بنك QNB بالذات؟
            يعني البنك الأهلي المصري بستم فتح حساب بنكي حد أدنى ١٠٠٠ جنيه مصري

          • سؤال وجيه يا راما وهتلاقي إجابته في مقال كيف سحبت 500$ من حسابي في PayPal مباشرة لحسابي البنكي

          • و سؤال أخير لما بعمل فتح حساب بمبلغ ٥٠٠ دولار، المبلغ دا بيتخصم و لا بيفضل في الحساب اقدر بعد كدا استخدم المبلغ دا بالتحويل او الشراء و لا لازم يفضل المبلغ دا علطول في الحساب؟

          • 500$ دا الحد الأدنى لفتح الحساب يا راما وتقدري تستخدميهم بعد فتح الحساب بكل حرية.

  • السلام عليكم ..لدي سؤال لو سمحت ..لقد اهدرت المحاولات الثلاث التي ترسل فيها بايبال كود التأكيد للأنني لم الاحظ انهم يصلون لحسابي البنكي فكنت اعيد المحاولة حتى انتهت المحاولات و خيرتني بايبال بين الاتصال بهم لزيادة ليميت او مسح البطاقة …سؤالي هو في حالة مسحي للبطاقة هل يمكنني ان اعيد ربطها من جديد ؟ وهل ستعيد بايبال المال الذي اقتطعته خلال المحاولات الثلاث ؟ ارجو اجابتي لو سمحت

    رد
    • وعليكم السلام ورحمة الله وبركاته يا حفصة،،
      في حالة التعرض لليميت من الأفضل التواصل مع باي بال لتأكيد الهوية وسيتم حل المشكلة إن شاء الله، لا أنصحك بمسح البطاقة وإضافتها من جديد من الأفضل التواصل مع باي بال لتأكيد الهوية وبالتالي إزالة الليميت عن الحساب، وأعتقد عند التأكيد سيتم رد المبالغ المسحوبة في المحاولات.

      رد
      • اذا لم ارمي رصيد في باي بال هل سأذفع ضريبة

        رد
        • لا، إذا لم يكن لديك رصيد بالحساب فالحساب مجاني تمامًا PayPal يأخذ عمولته من عمليات التحويل وححسب كما هو موضح بالمقال.

          رد
  • كيف يمكن إيقاف التحويل الأوتوماتيك أول كل شهر؟؟
    وهل يعتبر بايبال وقتها وسيلة آمنة لحفظ أموالي خارج مصر لو اوقفت التحويل الأوتوماتيك اول الشهر؟؟
    ولو تم إيقاف التحويل الأوتوماتيك أول الشهر… كيف يمكنني سحبها مستقبلا؟؟
    وهل توجد مشكلة اذا أوقفت التحويل الأوتوماتيك أول الشهر وكان في رصيدي مبلغ كبير متراكم لعدة شهور؟؟

    رد
    • للأسف يا طاهر لا يمكن إيقاف التحويل التلقائي بسبب القيود في مصر، وبالتأكيد PayPal هو وسيلة آمنة للغاية لحفظ الأموال ولكن إذا كنت مقيم في دولة تسمح بذلك، وفي حالة إيقاف التحويل التلقائي (أكرر إذا كنت في دول تسمح بحفظ الرصيد في PayPal) فيمكنك طلبها في أي وقت تريد مقابل 5$ رسوم سحب، ولا توجد مشكلة في ذلك إذا كنت في دولة تسمح بإبقاء رصيد حسابك في PayPal يا طاهر.

      رد
  • mohmamed ibrahem
    مايو 22, 2020 3:32 ص

    بالنسبة للحساب البيزنس هل بيحتاج شروط اكتر فى التفعيل وايه حدود السحب والتعامل فى النوعين شخصى وبيزنس لو هستخدمة لقبول مدفوعات على متجر الكترونى متوسط الحجم ؟
    وياريت شرح لخدمة payflow و paypal plus وايه الفروقات بينهم

    رد
    • أهلًا بيك يا محمد، بيحتاج تفاصيل البيزنيس والرقم الضريبي لو في دولة بتطلبه، أما بالنسبة لحدود السحب بالنسبة للحساب الشخصي فهي 5,000$ يوميًا بحد أقصى 15,000$ شهريًا، اما بالنسبة للبيزنيس فالحد الأقصي للسحب في اليوم 100,00$ وشهريًا 500,000$.

      أما بالنسبة لـ PayFlow فهي بوابة دفع إليكترونية مقدمة من PayPal ولكنها متاحة فقط في 4 دول: أميركا، أستراليا، نيوزلاندا، وكندا.

      و بالنسبة لـ PayPal Plus فهي أيضًا خدمة دفع مخصصة للمتاجر المتوسطة، والهدف منها هو تسهيل الدفع أونلاين وتقليل التعامل النقدي، وليست مثل PayFlow في كونها بوابة دفع، ولكنها متاحة فقط في ألمانيا و أميركا اللاتينية في الوقت الحالي.

      رد
  • السلام عليكم ورحمة الله وبركاته… مقالك أكثر من رائع ومفيد جدا شكرا جزيلا لك، فقط أود الاستفسار عن التالي:
    1.ليس لدي حساب بنكي ولا املك بطاقة ائتمانية ولكنني سأقوم بشراء بطاقة من البطاقات المدفوعة مسبقا فهل يمكنني ربطها بالباي بال وسحب الاموال نقدا ام لا يمكن؟
    2. في حالة أنشأت حساب بنكي في البنك الإسلامي في الاردن فهل يمكنني ربطه مع حساب الباي بال وتحويل المال إليه وسحب المال نقدا؟.
    3. في حالة كانت لي بطاقة ماستر كارد من البنك الإسلامي هل من الممكن أن يتم ربطها مع الباي بال وسحب المال إليها واستخدامها في دفع الرسوم الجامعية وحسب المال نقدا؟.
    اعتذر عن كثرة الأسئلة ولكن كرما منك لا تبخل علي في الاجابة.

    رد
    • وعليكم السلام ورحمة الله وبركاته ريهام، أشكرك على رأيك الجميل وسعيد بقراءتك للمقال.

      بالحديث عن أسئلتك:
      1. للأسف يا ريهام البطاقات مسبقة الدفع مخصصة للشراء ولذلك فهي غير مخصصة للسحب من باي بال او أي موقع آخر في أغلب الأحيان.

      2. للأسف أيضًا انا مقيم في مصر، ولذلك لا أعلم إذا كان البنك الإسلامي في الأردن يقبل بالإستلام من باي بال أم لا.

      ولكن الأردن ليست من الدول المحظورة من السحب من باي بال على حد علمي، وإذا كان هذا البنك يسمح لك بفتح حساب توفير ويقدم بطاقات من نوع Visa وليس MasterCard فهناك فرصة كبيرة بأنه يقبل السحب. لكي تعرفي إذا كان البنك يقبل الإستلام من باي بال أم لا، أنصحك بالتواصل مع البنك لسؤالهم بشكل أفضل.

      3. كما اشرت في الإجابة على السؤال الثاني، البطاقات من نوع MasterCard لا تقبل الإستلام من باي بال، لذلك يجب أن يكون نوع البطاقة Visa وليس MasterCard.

      لا عليك ولا داعي للإعتذار فأنا هنا لمساعدتك، إذا كان لديك المزيد من الأسئلة فسأكون سعيد بالإجابة عنها كذلك ?

      رد
  • السلام عليكم
    تواجهنى مشكلة أخي الكريم بخصوص السحب من البايبال لـ الفيزا
    الفيزا بتاعتى من البريد المصرى .. كانت تسحب وكل شئ تمام
    هذا الشهر تخطيت سحب 500 دولار
    عند سحب اى مبلغ اخر يكتب لى هذه الرسالة
    ( عذراً. لا يمكننا معالجة طلبك في الوقت الحالي. يُرجى إعادة المحاولة لاحقاً. )
    فـ هل المشكلة لانى تخطيت السحب الشهرى ؟
    مع العلم ان مكتوب فى قوانين البايبال
    ( بينما الحد الأقصى للتحويلات اليدوية لبطاقة ائتمان Visa قدره 500 دولار أمريكي (أو ما يعادله) لكل يوم. )
    فيما معناه انى اقدر اسحب 500 دولار فى اليوم الواحد

    رد
    • وعليكم السلام ورحمة الله وبركاته أخي عمرو،

      هذا صحيح يا عمرو، وهنا يجب أن تعرف حدود السحب، فعند محاولتك السحب اليدوي فالحد الأقصى اليومي قدره 500$، أما السحب التلقائي الشهري حده الأقصى 10.000$، وبشكل عام فالسحب سواء أكان يدوي أو تلقائي يجب ألا تزيد قيمته عن 10.000$ يوميًا (إذا كان لديك مبلغ أكبر من ذلك وقت السحب التلقائي الشهري).

      أي أنه إذا كان لديك مبلغ أكثر من 500$ وتريد أن تقوم بتحويلها إلى بطاقتك فلا يمكنك تحويلها في يوم واحد، لأن الحد الأقصضى للحسب اليدوي هو 500$ يوميًا.

      أما إذا كنت هذه الرسالة تظهر لك بعد مرور أكثر من يوم على سحبك اليدوي فهذه المشكلة غالبًا ما ترجع للبطاقة وليس PayPal.

      رد
      • المشكلة تظهر لى لها اكثر من 3 ايام وعند مكالمة البريد المصرى
        اخبرونى ان مافى اي مشاكل فى الكارت
        ما اعرف صراحة فين المشكلة

        رد
        • في تلك الحالة أنصحك بالتواصل مع خدمة عملاء PayPal وإخبارهم بالمشكلة فقد يكون هناك عطل فني.

          رد
          • استاذ علي تحيه طيبه وبعد..
            هتكلم كتير شويه استحملني .انا مقيم بتركيا وتركيا ممنوع فيها البايبال فحاليا ماشي ف خطوان لتفعيل حسابي وهطلب بطاقه بايونير واربطها بالبايبال علشان اقدر اسحب الفلوس عن طريقها.

            1- اولا سؤالي تمام يعني اطلب بطاقه بايونير ولا في حاجه احسن منها.

            2- ثانيا انا حسابي هيكون بيزنس مش شخصي، ولو في مجال او فرصه انك تعملي كل اللي محتاجه بمقابل مادي انا مستعد للتعامل سويا.

          • أستاذ علي حياك الله وبارك فيك. بداية أسمحلي أعتذرلك على التأخير في الرد طول الفترة دي. مفيش أي داعي للإعتذار المسبق أتمنى جدًا تاخد راحتك في مشاركة أي شيء حابب تشاركه.

            للأسف الشديد فعلًا تركيا ترفض التعامل مع PayPal وأستخدام Payoneer كويسط هو حل جيد وبيعتمد عليه كتير من الفريلانسرز اللي بيصعب عليهم التعامل مباشرة مع PayPal.

            شخصيًا اتمنى أقدر أوفرلك مساعدة شخصية ولكن للأسف هيكون صعب عليا أعمل دا لأن وقتي مش هيسمح، ولكن متأكد أنك مش هتكون محتاج مساعدة من حد في تنفيذه ولو أحتجت مساعدة في أي وقت تواصل معايا وإن شاء الله أقدر أفيدك.

  • شكراً جداً تعبتك معايا
    فى إنتظار مقالتك لشرح مخاطبة خدمة عملاء PayPal بالتفصيل

    شكراً لك ♥

    رد
    • لا داعي للشكر يا عمرو، وأتمنى أن تحل مشكلتك في أسرع وقت.

      أشكرك أيضًا لمشاركتك تلك الفكرة الرائعة، فأنا لم أكن أفكر في الكتابة عن هذا الأمر! ربما سأتحدث عنه في مقال قادم إن شاء الله.

      رد
  • اتبعتلي مبلغ علي بايبال لأول مرة للحساب بعد انشاءه ب دقايق , بعدها اتبعتلي ع البريد انه المبلغ وصل لكن للأسف مش ظاهرلي في حسابي علي بايبال – كدة ايه المشكلة ؟

    رد
    • مع العلم باني فعلت الجيميل و حسابي جاهز – وهل يجب عليّ ترقية حسابي لحساب تجاري للعمل كفريلانسر أم ليس ضروري؟

      رد
      • وحيد صالح
        يوليو 7, 2020 12:53 ص

        السلام عليكم اخي علي حفظك الله على مجهودك وجعلها بميزان حسناتك اخي لوتكرمت عندي بعض اسئله
        ١ انا في اليمن وعندي باي بال وبعض مشتركين يمنين يبعثوا لي فلوس واقوم ارسالها لهم الى الباي بال السؤال كيف اعرف ان هذا الحساب باي بال مسروق؟ او انه حساب سالب او عليه بلاغات الاموال مشبوهه ؟؟ بحيث اتجنب الارسال له عشان باي بال ماتوقف حسابي؟
        جميعا يعلم انه يوجد حسابات مخترقه ويوجد scam
        ولو استلمت مبلغ او ارسلت لهذا الحسابات باي بال يوقف عليك الحساب الان السؤال كيف اتجنب هذا الحسابات قبل الارسال؟ ارجوا الرد

        رد
        • وعليكم السلام ورحمة الله وبركاته أخي وحيد، باركك الله على هذه الدعوات الجميلة وجعلها من نصيبك إن شاء الله.

          بداية يجب أن تعلم بأن باي بال لن تقوم بإيقاف حسابك إذا كان نشط ويجري عمليات طبيعية وموكد بهويتك يا وحيد، ولن يقومون بالنظر في معاملاتك إلا إذا تخطت الحد الطبيعي لمعاملاتك بشكل عام، مثل أنك تقوم عادة بإتمام معاملات بأقل من 500$ ثم في شهر ما تقوم بمعاملة تتخطي 5000$، هنا قد يتم مراجعة العملية يدويًا للتأكد من شرعيتها.

          أيضًال إذا كنت ترغب في التأكيد من شرعية حسابات من تقوم بالتعامل معهم أنصحك بأن تتأكد بأن اسم الحساب هو نفسه اسم الشخص الذي تتعامل معه، وأن يكون التعامل على حساب واحد لكل شخص، هذه هي أفضل طريقة لتتأكد من شرعية حسابات من تتعامل معهم.

          رد
    • أهلًا بيك يا محمود،

      إن شاء الله مفيش أي مشكلة يا محمود لو مظهرش في حسابك بعد 10 دقايق يبقى غالبًا موصلش، ولو موصلش لأن الحساب جديد دا بيكون بسبب وجود Limit على الحساب ودا بيتم رفعه بأنك توفر ما يثبت شخصيتك زي بطاقتك الشخصية أو جواز سفرك أو رخصة القيادة، بعد ما بتأكد هويتك الحساب بيتشال من عليه الـ Limit وبيقبل إرسال واستقبال بشكل طبيعي جدًا إن شاء الله.

      وبالنسبة لسؤالك الثاني أنت مش محتاج حساب تجاري في حالتك الحساب الشخصي هو الصح.

      رد
  • ازاي موصلش وجالي ايميل بانه الشخص بعتلي المبلغ + الشخص نفسه عاملي سكرين من حسابه بانه وصل

    دلوقتي حاولت اعمل توثيق للبطاقة خصملي فلوس ومبعتليش الرمز و كررت المحاولة مرة تانية ومش عارف هيخصم تاني ولا ايه + برضه مفيش حاجة اتبعتتلي!

    + مش لاقي مكان ادخل فيه بطاقتي ؟!

    سامحني لو ازعجتك

    رد
    • هي حاجة قد تبدوا بديهية يا محمود ولكن حاول تتأكد من إنك فاتح نفس الحساب اللي وصلك على الميل إنه تم التحويل عليه، لو برضه ملقتش حاجة في My Balance في الحالة دي تواصل مع خدمة عملاء PayPal وبلغهم بالمشكلة قد تكون ناتجة عن خطأ فني وهيتم التحقق من التحويل وهيبلغوك بكل التفاصيل إن شاء الله.

      بالنسبة لأن الكود المكون من 4 أرقام موصلش دا طبيعي يا محمود في بنووك كتير مش بتبعت الرسالة والحل بسيط جدًا وهو إنك تتواصل مع البنك وتطلب منهم الكود وهيقولولك عليه بكل بساطة.

      بالنسبة لـ” + مش لاقي مكان ادخل فيه بطاقتي ؟!” ممكن توضيح بشكل أكبر عن اللي بتحاول تعمله؟ وهل راجعت المقال بالكامل لأن خطوات إضافة البطاقة والتفعيل موضحة في المقال بالفعل.

      وإطلاقًَا يا محمود مفيش أي إزعاج دا واجبي.

      رد
      • انا قمت بتوثيق البطاقة زي ماحضرتك وضحتلي – لكن للأسف دا حصل بعد محاولتين فخصملي 3 يورو و اصلا كان خصملي 1 دولار عند انشاء الحساب , و رغم كل دا حسابي مازال فاضي .

        بالنسبة للفلوس الل اتخصمت دي اللي هي 1 دولار و 3 يورو ايه موقفهم كدة وهل هيرجعولي ولا ضاعوا كدة؟

        و حقيقي ممتن لذوقك و كفاءتك , جزيت خيرا

        رد
        • الطبيعي يا محمود إن مبلغ التأكيد بيرجع لحسابك مرة تانية (غالباً في خلال 5-7 أيام عمل) فا إن شاء الله هيرجعوا لحسابك متقلقش، وأشكرك على ذوقك يا محمود دا واجبي حقيقي.

          رد
          • لازال حسابي صفر دولار الي الان يا علي رغم توثيقي للبطاقة والايميل , انا بس خايف ال 45 دولار تضيع عليا كدا وبكلم الدعم مش بيردوا, اعمل ايه وهل دا طبيعي ولا لأ؟

          • دا طبيعي يا محمود الأستراداد بياخد 5-7 أيام عمل، ومتقلقش مفيش أي حاجة بتضيع.

  • هل الشخص يكون ضامن فلوسه في أي عمليه شراء عبر الباي بال . لو حاب يرد المبلغ بعد فترة و ام كانت طويلة لان البضائع لم توفر

    رد
    • بالتأكيد يا محمد، يمكنك طلب أسترداد المبلغ الذي تم دفعه ثم أختيار “Report an issue” ومن القائمة يمكنك أختيار I didn’t receive an item I purchased وسيتم النظر في الحالة والتواصل مع البائع ومعك لإجراء اللازم.

      رد
  • السلام عليكم
    هل لو حد الإرسال عندى فوق 2500يورو ممكن لو تواصلت مع البيبال ا يقلل مصاريف الإرسال للطلاب ؟
    شكرا لحضرتك

    رد
    • وعليكم السلام ورحمة الله وبركاته يا سارة،

      في الحقيقة دي حاجة بترجع لسياسات الدولة المقيمة فيها يا سارة، فمثلًا أغلب الدول العربية بترفض بقاء الأموال في رصيد حسابك في PayPal وبتطلب تحويلها شهريًا بشكل تلقائي، ولكن أتمنى لو تواصلتي معاهم إن دا ممكن يتحقق، هستنى أعرف منك.

      رد
  • حساني.محمود.محمد
    يوليو 4, 2020 3:52 ص

    السلام عليكم لو سمحت انا للان لم اعرف كم رصيدي في باي بال وللان لم يصلني اي مبلغ علما بان كافة البيانات معكم رقم الفيزا والعنوان ورقم الهاتف ارجو الرد في اقرب وقت ممكن وشكرا

    رد
    • وعليكم السلام ورحمة الله وبركاته يا حساني،
      نعتذر ولكن نحن ليس لدينا أي بيانات خاصة بأي أحد ولا نقوم بطلب بيانات حسابات أي شخص، إذا أردت معرفة رصيدك في PayPal فيمكنك التوجه لهم لمعرفة رصيدك، موقعنا لا يربطه أي صلة بـ PayPal ولا يمكننا معرفة رصيد أي شخص.

      رد
  • سلوى محمد
    يوليو 5, 2020 12:00 ص

    السلام عليكم
    قمت بإنشاء حساب في باي بال ولكن لم اقم بربطه بالبطاقة .. هل يمكن ان استقبل دفعات او حوالات من حساب باي بال اخر .. ثم بعد ذلك اربط البطاقه بالحساب وهل سوف توصل الفلوس ؟

    رد
    • وعليكم السلام ورحمة الله وبركاته يا سلوى،
      بالتأكيد يا سلوي يمكنك أستقبال دفعات على حسابك قبل إضافة بطاقتك البنكية، إذا كانت هذه أول مرة فسيتم تحديد حسابك وطلب تأكيد الهوية بعد ذلك سيصبح الحساب نشط وقابل للإستلام والسحب بدون أي مشاكل.

      رد
  • مقال جميل جدا يا علي شكرا
    هو بس السحب الشهري بيبقي من اول مااحط الفلوس بتاعتي عليه بعدها بشهر ولا بيبقي كل شهر ميلادي ؟

    رد
    • كالعادة أشكرك يا أحمد على رأيك الجميل، بالنسبة للسحب الشهري التلقائي بيكون يوم 1 في الشهر وبيتم فيه تحويل رصيد حسابك بالكامل لأحدى وسائل السحب المتاحة على حسابك، يعني كل شهر ميلادى وفقًا لسؤالك.

      رد
  • عمرو صالح
    أغسطس 11, 2020 2:05 م

    شكرا على هذه المعلومات القيمة ..
    لكن عندى سؤال ماذا لو لم اربط حسابى ببطاقة بنكية؟ .. هل هذا يمنعنى من استقبال المدفوعات على حساب بايبال ؟ ( استقبال المدفوعات من اى موقع فريلانسنج)
    شكرا ..

    رد
    • لا داعي للشكر يا عمرو فهذا واجبي.

      سؤالك مهم في الحقيقة، إذا لم تقم بربط بطاقة بنكية على حسابك ستتمكن من أستقبال المدفوعات بدون مشكلة ولكن لن تتمكن من تحويلها إلى حسابك البنكي بدون إضافة بطاقة تقبل الإستلام من PayPal وتأكيد هويتك أيضًا.

      رد
  • السلام عليكم انا حديث التعامل مع الموضوع ولكن اتخذت اتباع الخطوات وحدة وحدة ولكن طلبو منى ( 4 ارقام و كتابتهم فى صفحة تاكيد الفيزا فى الباى بال و الفعل قمت بالاتصال بالبريد المصرى و قامو بالفعل بالرد بالرقم المطلوب ولكن مش عالارف اوصل فى الباى بال علشان ادخل الرقم للتفعيل ممكن المساعدة رجاءاً.

    رد
    • وعليكم السلام ورحمة الله وبركاته يا أيمن، سعيد بإتباعك للخطوات للمرحلة دي، في الحالة دي يا أيمن بتفتح حسابك وبتدخل على بطاقاتك وبتختار البطاقة هتلاقي مكتوب عليها إنها بنتظار التفعيل، هتدخل الـ 4 أرقام وهيتم التفعيل بنجاح.

      رد
  • أستاذ علي شكرا لك على مشاركتنا خبراتك
    واسمح لي بهذا السؤال :
    انا من سوريا و غير مسموح لي أن أنشئ حساب باي بال ولكن لدي صديق يعيش في ألمانيا لديه حساب باي بال .
    أنا أشترك بمواقع تقوم بدفع مبالغ مالية لي فهل أستطيع استخدام حساب صديقي لإستقبال الأموال عليه ؟ أي عندكا يطلبون مني طريقة لاستقبال الاموال فهل أستطيع ان اقدم بيانات حساب ال باي بال الخاصة بصديقي واستقبال الاموال ؟ وشكرا

    رد
    • أهلًا بيك أخي مدحت وبكل أهلنا وأخواننا في سوريا،

      شخصيًا انا في كل مرة بسمع فيها عن حظر باي بال في سوريا بكون حزين جدًا وحقيقي قلبي معاكم.

      على الجانب الآخر سؤالك في غاية الأهمية يا مدحت ولكن للأسف مفيش إجابة عامة للسؤال بنعم أو لا لأن دا بيتوقف تمامًا على الموقع اللي بيقوم بالدفع، موخرًا أغلب مواقع العمل الحر بقت بتتطلب إن حساب باي بال يكون بنفس بيانات حساب الفريلانسرز لتجنب محاولات الغش أو حتى تهريب الأموال، ولكن بشكل عام مواقع وشركات الأفلييت مثلًا مش بتحتاج نفس الدرجة من التأكيد وعادي جدًا تطلب منهم يحولوا لأي حساب بال بال بدون أي مشاكل، وبالتالي الإجابة الأكيدة على سؤالك هتكون موجودة في قوانين وشروط الموقع اللي بتتكلم عنه يا مدحت.

      رد
  • خالد ابو السعود
    أكتوبر 14, 2020 6:35 م

    هل حساب الباى بال بتاعى هو هو ال G mail اللى بسجل بيه ؟

    رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
10 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: