كل اللي محتاج تعرفه عن التعاملات البنكية
المال والأعمال
59 تعليق
23,634

7 دقيقة

كل اللي محتاج تعرفه عن التعاملات البنكية

قديماً كانت وظيفة البنك ودوره بسيط ونقدر نلخصه في إنه بيوفرلك ملاذ آمن لمدخراتك وكمان بيديلك أرباح على كدا، في الـ 15 سنة الأخيرة ومع التطور السريع اللي حصل في الـ Digital World الموضوع أتغير تماماً والبنك أتحول لضرورة لابد منها لإدارة وتأمين حياتك المالية بالكامل.

المشتريات الديجيتال زي البرامج والتطبيقات والـ Themes وخلافه بقت قد تفوق في حجمها المشتريات الملموسة، ودا ناهيك عن الأرقام الخيالية اللي بتحققها منصات الـ Online shopping زي Amazon أو حتى سوق لو هنتلكم بشكل محلي، كل دا طبعاً جنب تطور الفريلانسينج في حد ذاته والفرص اللي وفرها لشخص ممكن يكون عايش في قرية بعيدة فقيرة في الهند أنه يشتغل لأي مكان في العالم بأي حجم كان!

كل اللي محتاج تعرفه عن التعاملات البنكية 1

ليه أنت محتاج تتعامل مع البنك؟

ودا بيقودنا لنتيجة واضحة وحتمية وهي إن وجود البنك في حياتك بقي ضرورة لابد منها وسواء حابب أو مش حابب أنت هتحتاج تتعامل مع البنك بصورة أو بغيرها، ممكن تكون محتاج تشتري Mobile App سعره لا يتعدى 10جـ، لازم يكون عندك وسيلة دفع تقدر تدفع بيها قيمته فا بطبيعة الحال بترجع للبنك لأنه هو اللي بيوفرلك وسائل الدفع اللي تقدر تستخدمها بسهولة وأمان.

 طبعاً دا مثال بسيط وبما إنك قررت تكون فريلانسر فا أنت حتماً لازم تكون ملم بالتعاملات البنكية وفاهمها كويس جداً، في الحقيقة من أفضل القرارات اللي أخدتها في حياتي تقريباً هي إني بدأت تعاملاتي البنكية وانا عندي 17 سنة، وفي المقال دا هتكلم عن المفاهيم الأساسية اللي لازم تعرفها في التعاملات البنكية، وأنواع البطاقات ومقارنات ما بينهم وتجاربي مع البنوك وإيه تفضيلاتي الشخصية وكمان إيه الأسواء علشان يكون مرجع فيه كل حاجة تخص الموضوع دا في مكان واحد لأن دا هيسهل كتير علشان أساعدك تبدأ صح وأوفرلك وقت التجارب الفاشلة.

قبل ما أبدأ كنت حابب أقول نصيحة لأي حد عنده أولاد او هيكون عنده قريب إن شاء الله إنك لازم، لازم، لازم تعلم أولادك التعامل الصح مع الفلوس وتخليهم يبدأوا حياتهم البنكية في أقرب وقت ممكن، وكتير من البنوك حالياً بتعمل بطاقات مشتريات للأطفال من سن 10 سنين أصلاً تحت إشراف الأب أو الأم وفي نظري دي أفضل بداية ممكنة.

كل اللي محتاج تعرفه عن التعاملات البنكية 2

 المفاهيم الأساسية الي لازم تعرفها في التعاملات البنكية:

1. أنواع الحسابات البنكية

الحسابات البنكية بتكون أكتر من نوع وبتخدم أكتر من غرض، بشكل أساسي دي أهم 3 أنواع:

– حساب التوفير:

الحساب دا هو الأنسب للأفراد أو لو تعاملاتك البنكية مش بحجم كبير ومش بتعمل عمليات كتير في اليوم زي السحب والإيداع والتحويل مثلاً، أو لو كنت حابب تدخر فلوسك في البنك بس مش لفترة طويلة وكمان تضمن حرية السحب منها في أي وقت وبيكون ليه حد أقصي للحساب مينفعش مدخراتك فيه تزيد عنه، وأحياناً كمان بيكون في حد أدني.

حساب التوفير تقدر تعمله بسهولة ومش لازم تكون موظف أو حاجة ومصاريفه بتكون بسيطة جداً، حساب التوفير مش بتاخد عليه دفتر شيكات بس بتاخد عليه فوايد نوعاً ما متوسطة، وكمان بتاخد عليه Debit Card (بطاقة مدينة) بتقدر تعمل بيها سحب وإيداع ومشتريات بحرية تامة.

– الحساب الجاري:

ودا بيكون مخصص بشكل كبير للشركات أو الأشخاص اللي تعاملاتها البنكية كتيرة وبأرقام كبيرة، طبعاً لازم تكون موظف أو عندك أملاك أو صاحب عمل علشان تقدر تعمله وتكلفته بتكون أعلي من حساب التوفير، بنسبة كبيرة مش بيكون عليه أي فوايد ولو كان في بتكون بسيطة جداً.

ميزته أنه ملوش حد أقصي يعني تقدر تودع فيه فلوس براحتك لكن بيكون ليه حد أدني (بيختلف من بنك للتاني) وبتاخد عليه دفتر شيكات وكمان تقدر تعمل سحب وإيداع بحرية تامة حتى لو أكتر من مرة في اليوم عادي جداً وبتاخد عليه Credit Card (بطاقة ائتمان).

– حساب الودائع لآجل:

الحساب دا ببساطة هو إنك بتودع مبلغ معين وغالباً المبلغ دا بيكون كبير وبتسيبه في البنك لأنك مش محتاجة لفترة كبيرة -بتكون محددة مسبقاً والفايدة بتكون ثابتة ومحددة مسبقاً كمان- والبنك بيحجز عليه لفترة معينة تقريباً بتبدأ من أسبوع وممكن توصل لـ 5 سنين، وبتاخد فوايد عالية على الوديعة دي وبتتصرف بشكل (شهري/ربع سنوي/ نصف سنوي/ أو سنوياً).

في الحساب دا مش بتقدر إنك تسحب منه لأنك لو سحبت من الوديعة قبل وقت استحقاقها كدا بتبقي كسرتها وبتفقد الفايدة بالكامل وكمان ممكن يكون في غرامة على كسر الوديعة، لكن أغلب البنوك بتسمحلك تاخد قرض بحد 90% من قيمة الوديعة على إنك ترجعها للبنك مرة تانية وبيكون في فوايد على القرض دا.

وكمان الوديعة بتيحلك تاخد بضمانها Credit Card تقدر تعمل بيها مشتريات بنفس فكرة الحساب الجاري، وتقدر تخلي الفايدة من الوديعة تروح لأي حساب تاني خاص بيك سواء جاري أو توفير.

كل اللي محتاج تعرفه عن التعاملات البنكية 3

2. تاني حاجة بقي وأكتر حاجة بتسأل عليها هي أنواع البطاقات البنكية.

 أنواع البطاقات البنكية هما فعلياً 9 بس كل اللي محتاج تعرفه منهم 3 بس:

1- الـ Credit Card أو البطاقة الائتمانية

زي ما هتلاحظ فوق البطاقة دي بتكون مرتبطة بالوديعة أو الحساب الجاري، تقدر تعمل بيها سحب وإيداع ومشتريات حتى لو بمبلغ أكبر من اللي معاك في الحساب يعني تقدر تستلف من البنك عادي بس لازم ترجعهم في فترة معينة (أغلب البنوك 45-65 يوم) وبعدها بيكون عليهم فوايد ودي قصة تانية بقي.

2- الـ Debit Card أو بطاقة الخصم المباشر أو البطاقة المدينة

ودي بتقدر تستخرجها على الحساب الجاري أو التوفير، وبتقدر تعمل بيها سحب وإيداع ومشتريات بس مش أكتر من الفلوس اللي معاك في الحساب يعني لو معاك مبلغ معين تقدر تشتري عن طريقها بس مش هتقدر تستلف من البنك وتسدد فيما بعد زي الـ Credit Card.

3- وأخيراً الـ Prepaid/Shopping Card دي أسماء مختلفة لنفس البطاقة، بطاقة مسبقة الدفع أو بطاقة مشتريات

النوع دا من البطاقات هو الأكثر شيوعاً وانتشاراً انا شخصياً معايا 5 من بنوك مختلفة الجميل فيها إنها مش بتكون مرتبطة بحساب يعني كل اللي بتحتاجه علشان تعملها هو بطاقتك الشخصية وزيارة واحدة للبنك وحبة بيانات ومصاريفها بتكون أقل من 100جـ.

في بنوك بتاخدها في نفس الوقت زي البنك الأهلي مثلاً ودا لأنها بتكون anonymous يعني مش عليها اسمك ومسجلة باسم البنك بس بياناتك أنت لكن أغلب البنوك بتاخد 3-7 أيام عمل ودي غالباً بيكون عليها بياناتك على البطاقة.

 ملهاش حد أدني للإيداع أو المشتريات لكن بيكون ليها حد أقصي بيختلف من بنك للتاني ومن بطاقة للتانية وحتى مميزاتها بتختلف بشكل كبير من بنك للتاني بس كلهم بيتفقوا في وظيفتها الأساسية وهي الشراء سواء أونلاين أو في المتاجر.

 بتكون مفيدة جداً في إنك تحتفظ بفلوسك فيها انا شخصياً بشوفها حل أفضل كتير من المحفظة فا استخداماتها كتيرة ومتاحة لأي حد، نصيحة شخصية حتى لو كنت مش محتاجها أعملها لأنك ممكن تحتاجها في أي وقت علشان تدفع بيها مثلاً اشتراك النت، تذاكر القطر ابليكيشن … الخ. دا غير إنها حل أأمن من إنك تكون معاك كاش وأنت مسافر مثلاً وحاجات تانية كتير فا هتوفر عليك مشاوير ووقت وفلوس كمان.

كل اللي محتاج تعرفه عن التعاملات البنكية 4

أفضل بطاقة Prepaid من وجهة نظري

طبعاً وبدون تفكير بطاقة المصرف المتحد هي الأفضل.

  • – المميزات: بتقدر تسحب وتودع بكل سهولة من الـATM الخاصة بيهم، حد مشترياتك شهرياً بيكون 20.000 جـ وما يعادلهم بالدولار و 10.000 يومياً -ودا أعلي حد في مصر حالياً-، قربت جداً من الحد دا بدون أي مشاكل في الدفع مع أياً كان الموقع.

 مصاريف استخراجها بتكون 10 جـ بس وبتاخد أسبوع، ومن ساعة ما جبتها والمفروض إني جبتها علشان تكون بديلة مش أساسية وهي بقت أساسية جداً بالنسبالى وشبه مش بستخدم غيرها.

 اللي بيخليها البطاقة الأمن على الأطلاق هو أنك مع أي مشتريات هتعملها البنك هيتصل بيك يتأكد إنك انت اللى عملت العملية ويبلغك بكل التفاصيل اللي محتاج تعرفها والكلام دا 24/7 حرفياً انا أحياناً بيكلموني الساعة 3 الفجر بعد ما بعمل مشتريات فا بيصعبوا عليا وبحاول أعملها بدري بصراحة فا شكراً جداً ليهم يعني.

واحدة من المميزات اللي قليل ما تلاقيها في مصر، إن خدمة العملاء الخاصة بالبنك متعاونة جداً وبيهتموا جداً بالشكاوى والأهم بينفذوها فوراً، للأسف كتير كنت بيدايقني بطئ الـ ATM الخاصة بيهم، في مرة وقفت تماماً وحصلت مشكلة كلمت البنك وضحتلهم المشكلة واقترحت عليهم حلول ليها، والمفاجأة إن تاني يوم فعلاً طبقوا واحد من الحلول دي بأنهم حدثوا الـ Software الخاص بالـATM بالكامل وبقت أسرع وأحسن بمراحل.

  • – العيوب: إن صلاحيتها بتكون سنة واحدة بس، لكن مش مشكلة ولا حاجة لأنك بتقدر تجددها بـ 10ج بس (بنك طيب أوي) وكمان تواجد الـ ATMs بتاعتهم ضعيف وغالباً بيقتصر على الفرع بس.
كل اللي محتاج تعرفه عن التعاملات البنكية 5

أسوأ بطاقة Prepaid من وجهة نظري

البطاقة الأسوأ والأقل استخداماً بالنسبالى هي Banque Misr حقيقي يعني مضيعة وقت جداً ومنصحكش إطلاقاً تفكر فيها حتى.

  • – المميزات: وسيلة دفع تقدر تعتمد عليها في حالة وجود مشكلة في باقي البنوك.
  • – العيوب: أول مشكلة إنك مينفعش تودع فيها أي مبلغ في ATM لازم في الـ Teller في البنك فا هتضيع ساعة على الأقل لأنه بيكون دايماً زحمة، مش دي المشكلة، المشكلة بقي إنك متقدرش تسحب منها إطلاقاً يعني لازم تصرف اللي فيها بس لكن متقدرش تسحبه.

 لو شايف إن دي مشكلة فا اسمحلى أقولك إن الإيداع فيها بيتضاف ليها بعد 24 ساعة من الإيداع يعني لو أودعت فلوس النهاردة هتكون متاحة للاستخدام بكرا، الغريب إن كل دا ومصاريف إصدارها 55 جـ وكتير من اللف والانتظار!! ودي أسباب كافية تخليك توفر وقتك وفلوسك ومتعملهاش أصلاً.

كل اللي محتاج تعرفه عن التعاملات البنكية 6

3. الفرق بين Visa & Mastercard

اعتقد آخر حاجة محتاج تعرفها في الموضوع دا هو الفرق بين Visa & Mastercard
الموضوع بكل بساطة إن Visa دي شركة أمريكية وMastercard شركة أمريكية برضه! فروق الامتيازات دي كدا كدا بتتأثر بالبنك فا مش مهم تعرفها ولا هتأثر عليك بحاجة، الحاجة بس اللي مهم تعرفها هي إن PayPal بيفضل التعامل مع بطاقات Visa بس كدا!

حاجة كمان لما حد يسألك عن نوع البطاقة أو الكارد تقوله Credit/Debit/Shopping فيزا دي اسم الشركة المصدرة فا مفيش داعي تقولها غير لو حد سألك Visa ولا Mastercard. (مهمة النقطة دي)

كل اللي محتاج تعرفه عن التعاملات البنكية 7

4. آخر حاجة دا شرح كلمات ومصطلحات هتسمعها في البنك مهم تكون فاهمها لأنك هتسعمها كتير:

  • Teller: التيلر يعني الصراف، ودا الموظف اللي بياخد منك أو بيديلك الفلوس، الكاشير يعني بلغة السوبر ماركت.
  • ATM: يعني Automated Teller Machine أو ماكينة الصراف الآلي ودي اللي بتشوفها حواليك في أي مكان وبتقدر منها تودع أو تسحب فلوس عادي، في حالة الإيداع لازم يكون الـATM الخاصة بنفس البنك بتاعك وإنه يكون فيها خاصية إيداع لأن مش كله بيكون فيه إيداع، أما السحب فا لو هتسحب من نفس الـATM الخاصة بالبنك بتاعك في الحالة دي مش بيكون في أي مصاريف لكن لو من بنك مختلف بيكون في نسبة بسيطة للبنك.
  • Withdraw: يعني سحب ببساطة ودي هتشوفها في تعاملك مع مواقع الفريلانسينج برضه و PayPal.
  • Deposit: يعني إيداع، ودي عملية إضافة الفلوس لحسابك أنت أو أي حساب تاني.
  • Swift Code: ودا كود التحويل الإليكتروني هتحتاج تبعته للي هيحولك خصوصاً لو كان برا مصر (انا كنت فاكر أنه ملوش لزمة في الأول).
  • Bank Statement: دا كشف الحساب اللي بيكون فيه كل تعاملاتك البنكية لوقت محدد.
  • Transfer: يعني تحويل، ودي عملية تحويل الفلوس من حسابك لأي حساب أو أي شخص بشكل عام.
  • Transaction: يعني عملية تجارية بشكل عام، لما تعمل سحب أو إيداع أو أياً كان دا اسمه Transaction (ترانزاكشن).
  • Loan: يعني قرض، ودا مبلغ بتاخده من البنك بضمان على إنك ترجعه بفوائد.
  • Interest: يعني فايدة ودي اللي بتدفعها على القرض اللي أخدته فوق ?.
كل اللي محتاج تعرفه عن التعاملات البنكية 8

5. أسئلة بنكية شائعة

س: هو انا ينفع يكون معايا أكتر من كارد في نفس الوقت؟
ج: بالتأكيد، عادي جداً غالباً الحساب الجاري او التوفير بيتحيلك تستخرج 6 بطاقات مختلفة على نفس الحساب وانا في QNB معايا Debit & Shopping على نفس الحساب عادي.

س: في بطاقات مكتوب عليها Electron دي تبع إيه؟
ج: بطاقات الـ Electronدي زي الـ Prepaid بالظبط بس الفرق الوحيد إنك متقدرش تستخدمها مع الـ ATM وغالباً بيكون مكتوب عليها Internet use only وأحياناً الـ Shopping كمان بتكون كدا، مهم تسأل البنك عن النقطة دي بس الأتنين اللي اعرفهم مينفعش تستخدمهم مع ATM هما Banque Misr Visa Virtual Account و QNB Shopping Card

س: هي الفوائد في البنوك حرام ولا حلال؟
ج: انا دورت وسمعت كتير جداً من الآراء في الموضوع دا ناس بتقول صح وناس بتقول غلط بس الرأي الوحيد اللى اقتنعت بيه هو كان رأي واحد من مشايخ الأزهر -مش فاكر اسمه الحقيقة- بس قال إن الفايدة صح للأرملة أو الشيخ الكبير أو الطفل الصغير أو الشخص اللي مش قادر يشغل فلوسه أو يكسب منها، لكن لو كنت شخص قادر على العمل والكسب يبقي الفايدة مش صح ليك.

كنت هتكلم أكتر عن مقارنة بين البنوك في مصر من حيث التجربة واللي محتاج تعرفه بس لقيت المقال هيبقي طويل خصوصاً إنه موضوع ممل يعني فا قولت هبقي أكتبهم في جزء تاني.

ملحوظة أخيرة

انا مش مليونير ولا خبير بنكي والكلام اللي كاتبه فوق دا ممكن يحتمل الخطأ والتغيير وفيه تفصيلات كتيرة تانية صعب اشرحها كلها في مقال واحد، أنا بس حاولت أوفر على اللي لسا هيبدأ تعاملاته البنكية أنه يعرف الحاجات دي مع الوقت لأنه هياخد وقت كبير جداً علشان يعرفها خصوصاً إن موظفين البنك بيكونوا مشغولين أكتر من إنهم يشرحوا لحد الكلام دا بالتفصيل مش أكتر ولا أقل.

 في رأيك إيه أفضل بنك اتعاملت معاه وليه؟

ومتنساش تعمل شير علشان الكلام دا هيوفر على غيرك كتير من الوقت والمجهود علشان يعرفه ❤

كل اللي محتاج تعرفه عن التعاملات البنكية
,

ما هو تقييمك لهذا المقال؟

كل اللي محتاج تعرفه عن التعاملات البنكية قديماً كانت وظيفة البنك ودوره بسيط ونقدر نلخصه في إنه بيوفرلك ملاذ آمن لمدخراتك وكمان بيديلك أرباح على كدا، في الـ 15 سنة الأخيرة ومع التطور السريع اللي حصل في الـ Digital World الموضوع أتغير تماماً والبنك أتحول لضرورة لابد منها لإدارة وتأمين حياتك المالية بالكامل. المشتريات الديجيتال زي البرامج والتطبيقات والـ Themes وخلافه بقت...
4.4 1 5 10
0 / 5 التقييمات 4.4

Your page rank:

هل وجدت هذا المقال مفيدًا؟

كل اللي محتاج تعرفه عن التعاملات البنكية قديماً كانت وظيفة البنك ودوره بسيط ونقدر نلخصه في إنه بيوفرلك ملاذ آمن لمدخراتك وكمان بيديلك أرباح على كدا، في الـ 15 سنة الأخيرة ومع التطور السريع اللي حصل في الـ Digital World الموضوع أتغير تماماً والبنك أتحول لضرورة لابد منها لإدارة وتأمين حياتك المالية بالكامل. المشتريات الديجيتال زي البرامج والتطبيقات والـ Themes وخلافه بقت...
4.55 1 5 31
هل أفادك المقال؟ شارك الفائدة ❤

59 تعليق. أضف تعليق

  • كنت عاوز اعرف افضل البنوك علشان اعمل حساب توفير واطلع فيزا ديبيت عليه؟

    رد
    • بالنسبالي يا محمد QNB هو البنك المفضل في كل التعاملات بعد منه بيجي المصرف المتحد

      رد
      • السلام عليكم
        من فضلك هل لازم فى حالة ايداع مبلغ انى اروح لنفس الفرع اللى قمت فيه بعمل الحساب البنكى ولا ممكن فى اى فرع اقرب لى
        وسؤال اخر
        هل بنك Qnp مناسب للمبالغ المتوسطه او العاديه

        رد
        • وعليكم السلام ورحمة الله وبركاته،
          في حالة الإيداع ممكن حضرتك تعملي إيداع من أي فرع كان لنفس البنك مفيش فروع محددة أو حاجة.
          و QNB بالتأكيد مناسب لكل الفئات

          رد
          • اى نوع استخرجه عشان افعل PayPal

          • أهلًا بيكي يا ملك، هتحتاجي بطاقة QNB Visa Debit Classic علشان تقدري تسحبي أرباحك، لكن للتفعيل أي بطاقة هتساعدك في التفعيل بدون مشكلة.

  • موضوع مفيد جداً شكراً لوقتك و مجهودك 🙂 ♥

    رد
  • شكرا جدا ،استفدت كتير من هذا الشرح وتمنيت لو كان المقال أطول من ذالك

    رد
  • كنت عايز أفهم عن المعاملات الالكترونية بشكل مفصل،وعن ماهية بايبال وغيره

    رد
  • شكرا على الشرح المتعوب فيه
    لو سمحت اعرف شروط بنك qnp ايه لفتح حساب واطلع منه ديبت كارد وخصوصا انا مش موظف

    رد
    • مفيش داعي للشكر دا واجبي، الشروط عموماً لو حضرتك طالب بتحتاج الكارنيه وفي بعض الأحيان صورة بطاقة الوالد، لو حضرتك متخرج يبقي غالباً لازم تكون موظف للأسف وساعتها بيتطلب منك مفردات المرتب لآخر 6 شهور أو خطاب من الـHR في المكان اللي حضرتك بتشتغل فيه.

      الحل التاني هو إنك تودع مبلغ وليكن 5000 جـ في البنك وتاخد بضمانهم كريديت كارد أو ممكن تفتح حساب بضمانهم كذلك، ولكن عموماً ممكن يكون في وسائل تانية ودي ممكن يفيدك فيها البنك أكتر مني تقدر تكلمهم علي 19700 وهما هيفيدوك بشكل أكبر إن شاء الله.

      رد
  • سؤال بسيط ينفع اربط ال Prepaid card بحساب الباي بال؟؟انا معايا easy pay بتاعت البريد المصري

    رد
  • السلام عليكم .. انا دلوقت توهت اكتر ويمكن ده غباء مني انا .. انا دلوقت جديد خالص في تعاملات النت بنك .. ف ايه افضل فيزا اعملها عشان اعمل بيها اعلانات الفيسبوك والسوشيال ميديا .

    رد
    • وعليكم السلام ورحمة الله وبركاته يا حسام، بإختصار يا حسام أفضل بطاقة بنكية هي بطاقة المصرف المتحد مسبقة الدفع، رسوم أستخراجها حالياً 45 جنيه تقريباً وبتاخد 5 أيام عمل لإستخراجها وصلاحيتها سنة، تقدر تستخرجها من أقرب فرع للمصرف المتحد في المحافظة اللي أنت ساكن فيها، أتمنى أكون قدرت أساعدك.

      رد
    • مني محسن
      مايو 17, 2020 3:13 م

      السلام عليكم….أولا شكرا على مجهود حضرتك الرائع .
      لو سمحت كنت عاوزة اعرف لو أنا اودعت نقود في الشهادة البلاتينية ومدتها انتهت ممكن اجددها من اي فرع تابع للبنك ولا لازم الفرع اللي اتعملت فيه ارجوا الإفادة سريعا وشكرا لحضرتك

      رد
      • وعليكم السلام ورحمة الله وبركاته يا مني، أشكرك على قراءتك ورأيك الجميل.

        في الغالب أي إجراء بيتم على الشهادة زي تجديدها أو إنهائها لازم يتم من الفرع اللي تم أصدارها فيه، ولكن دا ممكن يختلف من بنك لآخر فا أتمنى لو حضرتك توضحي من أي بنك، وعفوًا أتمنى أكون قدرت أفيدك.

        رد
  • عبدالرحمن شرف
    أبريل 6, 2020 5:18 ص

    شكرا عالشرح بس عندي سؤال هل بطاقة المصرف المتحد مسبقة الدفع بقى فيها خدمة الدفع اللاتلامسي و سعرها كام ؟
    هي ماستر كارد تنفع تتربط بالباي بال و تبقى مدفوعات ؟؟
    و شكرا ليك مسبقاً

    رد
    • لا داعي للشكر يا عبد الرحمن دا واجبي،،

      بالنسبة لسؤالك يا عبد الرحمن بطاقة المصرف المتحد المسبقة الدفع اللي معايا في الوقت الحالي مش فيها خدمة الدفع اللاتلامسي ولكن أتمنى يكونوا أضافوها قريب هبقى أأكد عليك عند تجديدها، وسعرها 45 جـ من آخر مرة أصدرتها من قرابة 7 أشهر.

      وبالتأكيد يا عبد الرحمن أي بطاقة يمكن ربطها بباي بال لاستخدامها في عمليات الدفع.

      رد
    • عبدالرحمن شرف
      يونيو 1, 2020 1:09 ص

      شكرا ليك عالرد السريع .
      و عندي سؤال . انا هعمل حساب توفير في البنك الاهلي و هيبقى فيه بطاقة خصم مباشر مرتبطة بالحساب لكن انا سامع ان بطاقات البنك الاهلي سيئة في الانترنت و مشاكل و مش بترضى تتربط على مواقع كتيرة و متجر جوجل بلاي بسبب خاصية ال otp .
      فعايز اسأل حضرتك هل جربت فيزا البنك الاهلي المسبقة او الخصم في الانترنت و تنفع في جوجل بلاي بسبب ال otp ؟؟ وشكرا ليك عالرد مسبقاً

      رد
      • لا داعي للشكر يا عبد الرحمن دا واجبي، هو الـ OTP مش بيتسبب في مشكلة يا عبد الرحمن بل بالعكس هي وسيلة أمان ممتازة، المشكلة إن بعض البنوك زي egBANK بتكون ضايفة قيود على دول ومواقع وبتحتاج ترجعلهم قبل الشراء في كل مرة ودي حاجة مزعجة، دا مكنش موجود في البطاقات مسبقة الدفع من البنك الأهلي لكن لو موجود في البطاقات الخصم المباشر تبقى مشكلة فعلًا، للأسف مقدرش أفيدك لأني مش عميل للبنك بسبب الزحمة اللي في كل فروعه تقريبًا.

        رد
        • عبدالرحمن شرف
          يونيو 1, 2020 3:20 ص

          شكرا على سرعة ردك .
          انا عارف ان ال otp زيادة امان بس معرفش المشكلة دي عند البنك الاهلي بس . مش بترضى تتربط على جوجل بلاي و فيسبوك لانهم مش بيدعموا ال otp و بتعمل ايرور كتير بسببها . خلاص انا صرفت النظر عن البنك الاهلي و فتح فرع المصرف المتحد عندنا بس انا سمعت انهم ضافوا خاصية ال otp هم كمان لكل البطاقات ولو حصل هتبقى زي البنك الاهلي ?

          رد
          • كالعادة مفيش داعي للشكر يا عبد الرحمن، شخصيًا معايا بطاقة مسبقة الدفع من المصرف المتحد ومفيش أي مشكلة تجاه الـ OTP و QNB كذلك، أنصحك بواحدة منهم وإن شاء الله مش هتواجهك أي مشاكل في الدفع.

  • محمود بدوي
    أبريل 11, 2020 7:02 م

    مقال متعوب فيها وشكرا جدا

    رد
  • فى حاله سحب الفلوس من الحساب قبل معاد صرف العائد هل يتم برضه حساب فائده على المده السابقه ولا لا مع العلم ان الفاىده سنويه

    رد
  • مساء الخير يا علي ازيك يارب تكون بخير

    انا كان عندي سؤال بطاقه الدفع المسبق بتاعت المصرف المتحد بتتربط باالباي بال عادي مش كده واقدر ادفع بيها اونلاين واشتري بيها كورسات من علي يوديمي وهي مبتحتاجش حساب بنكي صح ؟
    وكمان لو انا مخلي بطاقة الـ Easy Pay هي اللي بتسحب اوتاماتيكي كل اول شهر وعايز اسحب من بطاقه تانيه انا رابطها بنفس ايميل الباي بال ده ينفع برضو مش كده عشان انا معايا بطاقة Debit لبنك فيصل الاسلامي وكل مااجي اربطها باالباي بال بيقولي هذه البطاقه غير مقبوله يرجي استخدام بطاقه مختلفه !

    رد
    • مساء النور يا أحمد، انا بأفضل حال وأتمنى تكون بحال افضل دايمًا إن شاء الله.

      دا صحيح يا أحمد أي بطاقة تقدر تستخدمها في الشراء عن طريقة PayPal بدون أي مشاكل من أي نوع.

      هو أي بطاقة ينفع ربطها بالحساب يا أحمد ولكن في بنوك بترفض دا، شخصيًا متعاملتش مع بنك فيصل الأسلامي قبل كدا ولكن قد يكون السبب هو إن البنك رافض التعامل مع PayPal أتمنى لو تتواصل معاهم تعرف هل هما بيقبلوا التعامل معاه أو لأ، لو الإجابة كانت أنهم بيقبلوا التعامل معاه في الحالة دي أنصحك بالتواصل مع خدمة عملاء PayPal وإن شاء الله هيساعدوك في حل المشكلة.

      رد
  • محمد شاهين
    مايو 13, 2020 12:18 ص

    السلام عليكم ورحمه الله وبركاته
    تسلم ايدك علي المقال بصراحه ، ربنا يبارك فيك
    من فضلك عندي استفسار
    انا رحت البنك من حوالي ٣ سنين وقلت عاوز افتح حساب والحساب اتفتح اوكي وحطيت مبلغ كويس جدا وكل شهرين بحط مبلغ (بنك مصر ) ولسه السنه اللي فاتت عملولي صراف الي
    دلوقت انا الفايده بتعتي كم شهريا وهل لو سحبت مبلغ بسيط من المبلغ الاساسي قبل معاد العائد لو هو مثلا شهري العائد بيتحسب من الرقم اللي موجود ولا بيتلغي وشكرا ليك

    رد
    • وعليكم السلام ورحمة الله وبركاته يا محمد، بشكرك على تعليقك الجميل ربنا يكرمك.

      بالنسبة لنسبة الفايدة على حسابك شهريًا دي معلومة مش عندي للأسف يا محمد ولكن تقدر تتصل بيهم في أي وقت وهيقولولك نسبة الفايدة في الوقت الحالي لحسابك، أما بالنسبة للسؤال التاني الطبيعي في كل البنوك يا محمد إن الفايدة بتتحسب على أقل مبلغ كان موجود في الحساب في خلال الشهر لو الفايدة سنوية بس بتتوزع شهريًا، يعني لو سحبت مبلغ من حسابك أكتر من مرة في خلال شهر الفايدة في الشهر دا بتتحسب على أقل مبلغ كان موجود في الحساب.

      رد
  • لو سمحت لو أنا معايا مثلا 10000جنيه وعايزة احطهم فى البنك واقدر انى استفاد بيهم عن طريق مثلا انى يطلعلى مبلغ عليهم فى البنك بس فى نفس الوقت لو احتجت انى اتصرف فى الفلوس ديه اقدر ومبقاش خسرت ايه المسمى اللى المفروض اعمله فى البنك وايه عيوبه ومميزاته برده ؟ وشكرا مقدما .

    رد
    • أهلًا بيكي يا ندى، في الحالة دي يا ندى إنتي هتحتاجي حساب توفير Saving Account، والنوع دا من الحسابات مميزاته كتير زي إنه بيصدر معاه بطاقة Debit تقدري تستخدميها في أي وقت في معاملاتك الإليكترونية أو الشراء بشكل عام، وإنه بيكون عليه فوايد ودي بتختلف من بنك للتاني ولكن المتوسط حاليًا 5%، دا بجانب مميزات تانية زي خدمة الـ Online Banking والـ Mobile Banking.

      أما بالحديث عن العيوب فهو مفيش عيوب في الحقيقة لو الهدف من تعاملاتك البنكية هو إنك تحتفظي بفلوسك في مكان آمن ويكون ليكي حرية التعامل بيها زي ما تحبي، يعني نقدر نقول إن العيوب والمميزات بتكون على حسب البنك مش وظيفة الحساب يا ندى.

      رد
  • لو سمحت فيه جملة كدة غالبا مش بفهمها يعنى ايه ( الحساب ده ليه عائد سنوى 11% تصرف شهريا) يعنى كدة كل شهر اخد كام على المبلغ اللى انا حاطه فرضا أنه 20 الف جنيه … وسؤال تانى معلش كنت عايز اعرف ايه الفرق بين انواع حسابات التوفير وياريت لو تقولى ايه افضل بنك يتعمل فيه حساب توفير للشباب وايه المتطلبات عشان افتحه ؟

    رد
    • أهلًا بيك يا محمد، خليني أوضحلك إزاي بيتم حساب العائد السنوي اللي بيصرف شهري، لو افترضنا أن معاك مبلغ 20 الف جنيه والبنك بيقدم فايدة سنوية قدرها 5%، فا بالتالي قيمة الفايدة سنويًا المفروض تكون 1000 جنيه، علشان تصرف شهريًا بيتم تقسيم الفايدة الكلية على 12 (عدد شهور السنة) فا بيكون 1000/12 = 83.3 جنيه شهريًا، ودا بيكون المبلغ اللي البنك بيضيفه لحسابك شهريًا كعائد.

      أما بالنسبة للفرق بين حسابات التوفير هو دا بيكون على حسب عروض وخدمات كل بنك، اتمنى لو حددت أكتر أنت بتتكلم عن أي بنك، بالنسبة لأفضل بنك توفير للشباب بكل تأكيد هو بنك QNB، والمتطلبات هي صورة البطاقة وأحيانًا صورة بطاقة الوالد وكارنيه الكلية، ومصاريف فتح الحساب بتكون حوالي 150 جنيه بس.

      رد
      • طب وبالنسبة لبنك اسكندرية وبتكلم عن حسابات التوفير للشباب و حساب توفير بلس ؟

        رد
        • بصراحة بنك إسكندرية من البنوك اللي مش بنصح بالتعامل معاها يا محمد، ولكن بشكل عام فالفكرة واحدة والأرقام هي اللي ممكن تختلف من بنك للتاني مع بعض المميزات البسيطة.

          رد
  • افضل حساب بنكى أو فيزا تجمع مابين المعاملات الاون لاين فى تبادل الأموال والمعاملات العاديه

    رد
    • بالتأكيد QNB يا أحمد، الحساب بيديلك مميزات مختلفة زي الـ Internet Banking, Mobile Banking, and Phone Banking دا بجانب إن البطاقة يمكن أستخدامها للسحب من PayPal والمشتريات بدون أي قيود أو تعقيدات.

      رد
  • Mohamed abdrabou
    يونيو 19, 2020 3:55 م

    اذا انا اريد. ارسال مبلغ لشخص لديه حساب بنكي على البنك الأهلي لكن انا لا املك اي حساب بنكي، ماذا افعل في هذه الحالة ، هل ممكن أن أذهب لاي فرع للبنك الاهلي و ابعث المبلغ فقط باعطائهم بيانات الحساب للشخص المستقبل ؟ ارجو التوضيح من فضلك ؟

    رد
    • مرحبًا محمد، بالتأكيد يا محمد يمكنك أن تقوم بإيداع أي مبلغ لأي شخص لديه حساب بنكي بدون الحاجة لأن يكون لديك حساب بنكي في نفس البنك أو حتى حساب بنكي من الأساس، فقط توجه لأقرب فرع للبنك الأهلي وأطلب أن تقوم بعمل إيداع وقم بملئ بياناتك الشخصية وبيانات الشخص المودع إليه وسيتم الإيداع بشكل طبيعي.

      رد
  • انا عايزه اشتغل ف selling Designs على. Shutterstockو ال online markets فكل project بكون مقابل صغير وبالدولار لو تقدر تفيدني افضل بنك اتعامل معاه فى مصر و PayPal مهم ولا اى ؟ انا سألت فى بعض البنوك وطلع انى اى تحويل بالدولار بيكون عليه نسبه حوالى 5$ وده اكتر بكتيير من اللى ممكن أكسبه من one project اصلا! فايه افضل حل ..
    شكرا مقدما

    رد
    • أهلًا بيكي يا منة،
      بالنسبة لأفضل بنك تتعاملي معاه في مصر زي ما وضحت في المقال هو بنك QNB، والتحويلات بالدولار علشان تكون عليها نسبة دا هيتطلب إنك تكوني فاتحة حساب بالدولار يا منة وأقل مبلغ لفتح حساب في الدولار في QNB هو 500$.

      أفضل حل من رأيي الشخصي هو إنك تفتحي حساب توفير بلس بالجنيه المصري وتستقبلي عليه من PayPal والفلوس هتوصلك بالجنيه المصري.

      رد
  • لو سمحت أنا فريلانسر من زمان والحمد لله دخلي كويس لكن للاسف مكنتش بتعامل مع بنوك ومفتحتش اي حساب بتعامل فقط بالبطاقات مسبقة الدفع زي ايزي باي بسحب اي فلوس بتيجي علطول وبصرفها ههههه (متعلمش اداره الاموال وانا صغير ولا ثقافة الادخار)
    دلوقتى السؤال هل يعتبر “الفريلانسين،” مهن حرة في البنوك المصريه (بدلا عن ضمان الوظيفة ومفردات الراتب وو)؟؟؟ يعنى هل ينفع افتح حساب في بنك زي QNB أو hsbc وأخد عليه فيزا كلاسيك الائتمانيه ولا مستحيل ..
    وكمان عايز اظبط الحساب بحيث يكون معتمد للتقدم للسفارات احوش فيه لمده سنة ويبقى تعاملاتي عليه من مواقع الفريلانسين، ايه افضل حساب في الحالة دي وانا طبعا مش موظف مش موظف.
    وكمان سؤال لو عند معلومة “هل كشف حساب ال PayPal يعتد به في السفارات؟؟؟
    ياريت تقدر تساعدني

    رد
    • ربنا يباركلك يا محمد ويزيدك من فضله.

      بالنسبة لسؤالك الأول فلا للأسف العمل الحر لا يتم اعتباره مهن حرة فالمهن الحرة ليها متطلبات خاصة زي السجل التجاري والبطاقة الضريبية لأثبات أنك لديك عملك “الحر”.

      ولو مكنتش موظف يا محمد أتمنى إنك تكون طالب لأنك لو كنت طالب هتقدر بسهولة تفتح حساب بنكي في بنك QNB بسهولة، أو إذا لو مكنتش طالب في الحالة دي أنصحك تفتح حساب بنكي في المصرف المتحد لأنهم مش بيطلبوا أنك تكون موظف لفتح الحساب والحد الأدني لفتح الحساب 1000 جنيه و 150 جنيه مصاريف فتح الحساب فقط.

      وللأسف كشف حساب PayPal لا يعتمد عليه في السفارات لأن PayPal ليست جهة رسمية كونها شركة خاصة بتقوم بتقديم الخدمات المالية.

      أتمنى أني أكون جاوبت عن أسئلتك، ولو كان عندك أي أسئلة تانية هرحب بها كذلك في أي وقت.

      رد
  • عبدالرحمن شرف
    أغسطس 28, 2020 12:58 ص

    حضرتك انا جبت ماستركارد الانترنت من المصرف المتحد
    واتضافت عليه ميزة الدفع اللاتلامسي و خدمة otp و كانت بتبقى صلاحيتها سنة دلوقتي سنتين
    بس عندي مشكلة في ربطها بجوجل بلاي بيقول صحح البيانات او جرب فيزا اخرى و اعتقد بسبب خدمة ال otp بتتعارض مع جوجل بلاي و مواقع كتيرة و جربتها في اوبر و نتفلكس و كذا ابليكيشن مش قابلها .
    بس جربت اشحن رصيد ببرنامج my we قبلت و فتحت صفحة علشان اكتب فيها رمز ال otp فاعتقد هي كده مفعلة للشراء من النت بس ال otp معارض مع اكتر المواقع .
    لكن معايا ايزي باي من البريد شغالة في كل المواقع لكن مش بتقبل ايداع من atm و دي مشكلتها علشان البريد بيبقى زحمة

    رد
    • أهلًا بيك يا عبد الرحمن، جميل جدًا أني عرفت أكتر عن تجربتك مع بطاقة المصرف المتحد وفعلًا أضافوا خدمات ومميزات جديدة ليها من فترة زي ما أشرت، شخصيًا جربتها في عدد من الخدمات المختلفة ومواجهتنيش أي مشكلة متعلقة بالـ OTB خصوصًا وإن كل بطاقات بنك QNB بتطلب OTB كذلك ومسبقش وواجهتني أي مشكلة في وجوده بما يشمل الخدمات اللي ذكرتها زي We و Google Play.

      أتمنى تراجع البنك لأن غالبًا ممكن تكون مشكلة متعلقة بالرصيد لأن المصرف المتحد بطاقاته الـ Debit مش بتقبل الشراء أونلاين مطلقًا والوسيلة الوحيدة للشراء أونلاين بتكون عن طريق كارد المشتريات اللي معاك وبالتالي صعب يكون المشكلة فيها.

      رد
  • debit card في بنك QNB بتقبل التعامل (دفع واستقبال) اون لاين ولا لا وهل بنستلم البطاقة اول ما نفتح الحساب ولا بتاخد وقت

    رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
7 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: