فؤاد بدوي "متستسلمش أبدًا"
شخصيات ملهمة
6 تعليقات
8,155

6 دقيقة

فؤاد بدوي “متستسلمش أبداً”

“متستسلمش أبداً”

فؤاد بدوي أو المعاصر، أشتغل حياته كلها فريلانسر ومسبقش وأشتغل في أي شركة قبل كدا، لما اتكلمت عن مميزات الفريلانسينج في مقال الفرق بين الموظف والفريلانسر قلت “مفيش سقف! في بعض المجالات من الشغل الحر بتعتمد على إنك تعمل حاجة وتبيعها الاف المرات زي الـ Themes مثلاً والـ Software، دا بتيحلك تبيعها على نطاق عالمي مش محدود وبعدد لا منتهي من المرات فا بالتالي مفيش سقف محدد لأرباحك”

فؤاد بدوي يعتبر تجسيد حي وحقيقي للكلام دا، كونه انجح مصري وغالباً عربي على Envato Market بحجم مبيعات 46,883 ألف مبيعه -ربنا يزيد ويبارك يارب- وأرباح تخطت الـ 2.5 مليون دولار تقريباً وواحد من أنجح مصممين المواقع ومطورين الـ WordPress في الوطن العربي ومش بعيد في العالم، لو هلخص كل اللي أعرفه عن فؤاد بدوي أو حابب أعرّفه يكفي بس أني أقتبس منه الكلمتين دول اللي تحولوا من كلمتين لرسالته في الحياة!

في 2016 كلمتني كلاينت عندي وقالتلي أنها بتفكر تعمل مدونة وطلبت مني إني أساعدها في اختيار ثيم للمدونة دي، بعد 4 أيام تقريباً من البحث والمقارنة لقيت ثيم صحيفة وافتكرت أني تجاهلته في أول مرة من اسمه وتوقعت انه ثيم عربي ومش هيكون اللي بدور عليه (هه!)

الحقيقة أني أول ما شوفت الثيم حبيته من أول Scroll وقلت في نفس اللحظة ان دا الثيم المناسب وفعلاً اشتريته للكلاينت، غالباً لما حاجة بتعجبني بدور أكتر في تفاصيلها ودا اللي حصل ولقيت إن اللي عمل الثيم دا تيم مصري اسمه TieLabs وقتها على ما أتذكر كان الثيم دا عامل تقريباً 19 ألف مبيعه! زي ما هتشوف في السكرين شوت إني شوفت باقي الثيمات وفرحتي بالإتقان اللي هي فيه وأنها من تيم مصري كانت حاجة أشبه بفرحتي بأول كاش عملته أونلاين مثلا!

فؤاد بدوي "متستسلمش أبداً" 1

ومن هنا عرفت أن مؤسس TieLabs هو فؤاد بدوي ووقتها عرفت حبة أكتر عنه لاهتمامي وأعجابي بشغله أولاً واللي حققه ثانياً, وبعدها بشهر تقريباً كنت رايح أحضر مؤتمر AAS2016
وكانت المفاجأة أنه كان في سيشن لفؤاد بدوي هناك عنوانها “خرافات عن العمل الحر”

طبعاً المؤتمر كان بشكل أساسي عن الـAffiliate وفؤاد بدوي بعيد عن النقطة دي وعلى الرغم انها مكانتش مصدر اهتمام كتير من اللي حضروا بحكم أنها مش مجالهم، إلا إني كنت مركز في كل كلمة فيها بنسبة 150% وبعتبرها تاني أهم سيشن في المؤتمر -بعد نعمة الله طبعا- الجميل إن أغلب الكلام اللي قاله فؤاد في السيشن انا كنت مريت بيه فعلاً كفريلانسر وكّونت تقريباً نفس الأفكار ووصلت لنفس الاستنتاجات اللي وصلها، من وقت السيشن دي وفؤاد بقي واحد من أهم مصادر الإلهام بالنسبالى ومن الحاجات اللي بتمني أوصلها.

بداية الحكاية

بعد المقدمة الطويلة دي انا مش هتكلم عن حياته ولا أنه أتولد سنة 89 وبدأ شغله وهو عنده 12 سنة -نفس السن اللي بدأت فيه- والكلام دا خالص أبسلوتلي! انا هتكلم عن نقط معينة في حياته وهي إزاي ممكن تستفيد بأكبر قدر من تجاربه اللي حقيقي ملهمة جداً وبعتبره تجسيد حي واقعي لـ 99% من الكلام اللي قُلته في كل المقالات اللي فاتت.

كان سبق واتكلمت عن أهمية الـPortfolio ليك كفريلانسر، فؤاد بدوي لحد تقريباً 18 سنة كان شغله كله مجاني تماماً بنسبة كبيرة بدافع الشغف وحب اللي بيعمله في الفترة من 12 لـ18 سنة كان كل تركيزه منصّب على تكوين سمعة واسم ليه

“سُمعتك أهم حاجة أوعي تخسر سُمعتك”

دي من الجمل اللي هتلاقيه دايماً بيقولها في كل مكان بيتكلم فيه وهي جملة لازم كل فريلانسر يحفظها عن ظهر قلب والأهم أنه يعمل بيها دايماً, المهم في خلال الفترة دي ومن مجرد الشغل المجاني ضمن الفرق اللي اشتغل فيها في VB و VBZoom و MySmartBB علي الرغم من إن كان عنده 13 سنة، كان كّون لنفسه Portfolio قوي كان هو السبب في أنه يتحول من طريق الشغل من أجل الشغف وحب اللي بيعمله للاحتراف والشغل بمقابل مادي.

أول ثيم عمله كان بالـ PowerPoint (صدق أو لا تصدق) كنوع من الانبهار بفكرة الـ Hyperlinking ومن هنا تحديداً مهم جداً تتلعم إنك متستقلش البدايات وأهتم بكل إنجازاتك الصغيرة وأبني عليها دايماً، بداية المعاصر مع وورد بريس كانت في 2008 واللى خلاه يتعلم Html/Css من W3cschools بعدها كان أول ثيم حقيقي صممه كان ثيم المعاصر في نفس السنة واللي كان موقعه الشخصي وكان عبارة عن تعديل بسيط على الثيم الافتراضي لووردبريس وكمان كان على استضافة مجانية!

ومن هنا بدأت نقطة تحول جديدة في حياة فؤاد وتحديداً بعد ما صمم مدونة شبايك واللي نقلته تماماً، بعدها صمم كتير من المواقع العربية زي أيفون إسلام، سوالف سوفت وعالم التقنية وغيرهم كتير، وفي 2009 عمل موقع تكويد.كوم واللي يعتبر أول موقع فؤاد حوله من PSD لـHTML.

الحلم والطموح

زي كتير من الشباب فؤاد كان نفسه يدخل كلية حاسبات بس للأسف مجموعه كان أقل منها وأضطر يدخل كلية علوم قسم رياضيات بحته وعلوم الحاسب،

فؤاد كان شايف إن أفضل مرحلة تبدأ فيها تشتغل كفريلانسر هي فترة الجامعة ومهم جداً على الأقل تكّون خبرة في مجال ما في الفترة دي لإن ببساطة بيكون عندك وقت كبير وغالباً أغلب الشباب مش بيستغلوه في أي حاجة؛ المشكلة ان في الوقت دا ثقافة الفريلانسينج مكانتش بنفس القوة والانتشار اللي هي موجودة بيه حالياً فا كان بيتعرض لكتير من الإحباط من أهله وأصحابه وكان حله للمشكلة دي هو إنه أخد مكتب برا البيت وأشتغل فيه سنتين من 2010 لـ2012 فا بقي بيرد على أي حد بيكلمه بأنه عنده شركة وشغال فيها،

الجدير بالذكر إن فؤاد دخل الجامعة في 2006 وأتخرج منها في 2014 بعد ما أتجوز وخلف وحقق النجاحات دي كلها! طبعاً هو مكنش فاشل هو كان سايب مادة علشان يأخر الجيش -ودي حاجة أتمنى يفهمها الناس اللي معترضة أني بعمل كدا- ونصيحتي الشخصية حاول على قد ما تقدر تستغل فترة الجامعة في حاجتين أساسيتين:

– الأولي هي تطوير نفسك في مهارة ما بأقصى قدر ممكن.
– والتانية هي تكوين أكبر كم ممكن من العلاقات والمعارف الإيجابية.

صدقني انا لسا في جامعة وبقولك إن الدراسة هي آخر حاجة ممكن أشغل تفكيري بيها دا لو فكرت فيها من الأساس.

لازم تعرف إن

لو كفريلانسر سبق وأتعرضت للنصب اسمحلى أقولك إن حتى أنجح الفريلانسرز حصل معاهم كدا فؤاد على سبيل المثال أتنصب عليه كتير ومنهم مرة من مدرب تنمية بشرية مشهور وبيطلع على القنوات يتكلم عن الحب والسلام (يالسخرية)!

أول خطوة في الطريق الصح!

كل دا بقي كوم وبداية علاقة المعاصر بـEnvato كوم تاني خالص، بعد وقت طويل من تطوير المواقع لعملاء عرب فؤاد قرر أخيراً يبدأ يحول خدمته لمنتج -ودي الحاجة اللي من أول ما سمعتها منه وانا حياتي كلها بقت بتدور حوالين أني أطبقها في مجالي- وفعلاً بعد سنتين من الانتظار لظروف الجواز وإنها خطوة فيها مجازفة نوعاً ما لأنه هيضطر يوقف شغله بالكامل ويجرب في حاجة جديدة، عمل أول ثيم ليه واللي اتكلمت عنه فوق صحيفة

فؤاد بدوي "متستسلمش أبداً" 2

وقت تطوير صحيفة أخد 3 شهور الثيم خلص فعلياً في شهرين تقريباً وبعد ما نزله علي ثيم فورست وكان متخيل أنه هيكسر الدنيا الثيم أترفض! خلاص كدا يروح يرجع بقي لشغله ويشوف حياته؟ لأ! فؤاد أستلهم أكتر ودور على العيوب والمشاكل وأشتغل على تطويره أكتر ونزله مرة تانية واترفض وتالتة ورابعة .. وسادسة وبرضه اترفض!

بعد المحاولة السادسة فؤاد قرر يرجع للسوق العربي مرة تانية واللي هو بالفعل مميز جداً فيه ومحقق نجاحات عظيمة بس بعد فترة قصيرة قرر يحاول مرة كمان، بعد كتير من التطوير في المرة السابعة الثيم اتوافق عليه بشكل مبدأي لكن كان فيه تعديلات المفروض يعملها وفعلاً عملها وها قد حانت اللحظة! الثيم نزل على ثيم فورست في 16-8-2012 -يوم عيد ميلاده بالمناسبة- واللي كان رمضان وتحديداً بعد الفطار ووقتها كان معزوم عند واحد صاحبه!

من التاريخ دا لحد فترة قريبة وثيم صحيفة موجود في قائمة الـ Popular list ومفارقهاش طول المدة دي غير أسبوع واحد بس! -وبالمناسبة حالياً هتلاقي فيها ثيمه الجديد واللي بعتبره أفضل ثيم في مجاله أتعمل على الأطلاق وهو جنة، وفي أول أسبوع بس ثيم صحيفة حقق 124 مبيعه وفؤاد بقي صاحب حساب من أكتر الحسابات الجديدة تحقيقاً للأرباح على ثيم فورست!

فؤاد بدوي "متستسلمش أبداً" 3

المعاصر وTielaps

حالياً فؤاد بدوي أو خلينا نقول TieLabs بعد ما أنضمله صديقه علاء سلامة وواحد من أصحابه وعدد من المصممين والمطورين، أنتجت 7 ثيمات كلها بأسماء عربية وهي (Jannah, Sahifa, Basata, Jarida, Remal) واتنين تقريباً حذفوهم وهما Sokar & Qamar وكمان 4 Plugins منهم أتنين رائعين وبيتم استخدامهم في أغلب المواقع الإخبارية والمدونات، TieLabs هما واحد من 5 حسابات بتابعها على Envato من سنتين وبهتم جداً أشوف شغلهم حتى لو مش هحتاجه فعلياً وثيم Jannah من أكتر الثيمات المبدعة اللي شوفتها وأخد أفضل ثيم أخباري في 2017! وحالياً أتعمل منه الإصدار التالت اللي بقي فيه مميزات أكتر بمراحل

فؤاد بدوي "متستسلمش أبداً" 4

حقيقي سعيد إن عندنا في مصر ناس بتعمل حاجة بكواليتي عالمية بالشكل دا واتمنالهم كل النجاح في كل اللي جاي ويكونوا دايماً مصدر إلهام ليا ولغيري.

لو أي حد قالي متستسلمش -بعيداً عن إيماني الشخصي بكدا- ممكن ماخدش كلامه باهتمام كبير لكن لما فؤاد بدوي قالها بعد تجربته مع ثيم فورست الحقيقة كان ليها وقع مختلف تماماً.

الخطوة الأصعب!

على الرغم اني متكلمتش غير علي جزء بسيط من حياته وقصته لإني مش عايز أخد من وقتك كتير في القراءة بس هقول حاجة أخيرة، الحاجة اللي فعلاً فؤاد بدوي قالها في السيشن دي وفعلاً مكنتش لسا مريت بيها أو مدركها بنسبة كبيرة هي إنك هتوصل لمرحلة ومش هينفع تعمل كل حاجة بنفسك وفي المرحلة دي يا هتقف، يا هتنزل، يا هتبدأ تكبر بإنك تكون تيم يشاركك شغلك ويساعدك تحقق أكتر.

بعد السيشن بسنة لقيت نفسي فعلاً في المعضلة دي وفعلاً كان لازم أتخلي عن حاجات كتير وأحدد لنفسي أتجاه واضح وأمشي فيه، حاول قبل ما توصل المرحلة دي تفتكر كلام فؤاد بدوي لأنك فعلاً هتشكره جداً وقتها وانا من تجربتي بأكد تماماً علي كلامه وإن دا فعلاً الحل الأمثل.

أتمنى جداً إن ناس أكتر تعرف مين هو فؤاد بدوي والأهم تستفيد فعلاً من تجاربه وحياته وأتمني أشوف ناس كتير زيه في مجالات مختلفة إن شاء الله، لو عندك اصحابك لسا بيبدأوا جامعة أعملهم منشن أو اعمل شير للمقال لأنه ممكن يغير حياتهم تماماً.

فؤاد بدوي "متستسلمش أبدًا"
, , , , , ,

ما هو تقييمك لهذا المقال؟

0 / 5 التقييمات 0

هل وجدت هذا المقال مفيدًا؟

فؤاد بدوي “متستسلمش أبداً” محتويات المقال “متستسلمش أبداً”بداية الحكايةالحلم والطموحأول خطوة في الطريق الصح!المعاصر وTielaps “متستسلمش أبداً” فؤاد بدوي أو المعاصر، أشتغل حياته كلها فريلانسر ومسبقش وأشتغل في أي شركة قبل كدا، لما اتكلمت عن مميزات الفريلانسينج في مقال الفرق بين الموظف والفريلانسر قلت “مفيش سقف! في بعض المجالات من الشغل الحر بتعتمد على إنك تعمل حاجة وتبيعها الاف...
4 1 5 19
هل أفادك المقال؟ شارك الفائدة ❤

6 تعليقات. أضف تعليق

  • hope you rite in standar arabic

    رد
  • مقال روعه وباذن الله توصل للمستوي الي تتمناه قريبا

    رد
  • محمد عبد العزيز حسين
    يونيو 2, 2020 1:36 م

    انا بحاول ادخل المجال، وعندي الرغبة واتعلم بالفعل اتعملت html و css وشوية بايثون بس لسة في مرحلة تطبيق وبعدين مفترض اتعلم hrml5 و css3 وبعدين Javascript.. السؤال هنا انا حاليا عندي ٢٨ سنة وشغال مهندس كهرباء وحابب ادخل مجال الويب ديزاين واعمل كارير شفت،، فهل وانا عندي ٢٨ سنة ادخل المجال واوصل فيه للاحترافية في وقت قصير واقدر اعتمد عليه كمصدر دخل في المستقبل القريب؟ أرجو الإفادة وشكرا للمقاول الجميل الملهم المشجع ده.

    رد
    • أهلًَا بيك م. محمد، في البداية انا سعيد بقراءتك للمقال ورأيك الجميل عنه.

      في الحقيقة مفيش أي حاجة تقول العكس، بالتأكيد تقدر بشكل تدريجي تتعلم أكتر وتتجه للتطوير بجانب عملك الحالي لحد ما توصل لمستوى يسمحلك بالتخلي تمامًا عن عملك والإكتفاء بالعمل الحر، في ناس كتير عملت دا في سن أكبر الموضوع مش مرتبط بالتحفيز بقدر كونه مرتبط بالنتيجة، وشخصيًا بتمنالك كل التوفيق.

      رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
25 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: