خرافات عن الفريلانسينج! 1
العمل الحر
4 تعليقات
969

4 دقيقة

خرافات عن الفريلانسينج!

الكام شهر اللي فاتوا شوفت خرافات كتيرة عن الفريلانسينج وهي لا تمت للفريلانسينج بصلة الحقيقة! والموضوع تحول لـ Stereotype (صورة نمطية) عن مجال شغلنا وعننا إحنا كفريلانسرز لكن دا مش صح إطلاقاً! في حاجات لازم تكتسبها وتعرفها الأول علشان تقدر تبقي فريلانسر مختلف وناجح فعلاً.

  • أكتر جملة بتستفزني في حياتي تقريباً “هتقبض بالدولار” ودي جملة هتسمعها في أي كورس متعلق بالفريلانسينج والهدف الوحيد منها هو زيادة مبيعات الكورس دا، إحنا حتى ولو كان دخلنا بالدولار فعلاً فهي مش زي ما أنت متخيل يعني على سبيل المثال أنت ممكن تحقق دخل وليكن 100-200$ دا برضه هيتراوح بين 1750-3500 جنيه فا متخليش اللعب بالمسميات والكلام اللي بيتقال علشان بيع الكورسات دا يخليك متخيل أنك هتبقي مليونير في أول شهر، لازم تعرف إن الموضوع محتاج حبة صبر ومجهود وهتحقق أرقام كويسة بس متعليش سقف طموحاتك في البداية علشان ميحصلكش أي إحباط!
  • إنك تشتغل كفريلانسر يعني التزام يعني مصداقية يعني تعب ومجهود وتعلم مستمر طول الوقت، ببساطة “البدايات للكل والثبات للصادقين”، لو مش هتقدر تستحمل إنك تقضي 3 شهور من غير أي دخل في محاولة لإتقان مهارة ما وتحقيق دخل منها وكل نظرتك عن شغل الفريلانسينج هو إنك تجهز البروفايل بتاعك في مواقع الفريلانسينج المختلفة والكلاينتس هتجرى عليك اسمحلى أقولك الموضوع مش كدا انت لازم تشتغل وتتعب وحرفياً تتمرمط في البداية لكن مع مرور الوقت الموضوع مجدي جداً طبعاً.
  • الشغل كفريلانسر مش مجرد شغل بتعمله وبتاخد عليه مقابل مادي! انت فريلانسر يعني بتبيع وقتك ومجهودك وخبرتك ومهارتك والأهم نتيجة شغلك، دي الخدمات الرئيسية اللي بتقدمها كفريلانسر، لازم تهتم بتطوير الحاجات دي في نفسك ومتشوفهاش مش مهمة أو الشغل أهم من التعلم، أنت بتمثل منتجك وخدمتك اللي بتقدمها يعني لو مكنتش أنت نفسك في جودة كويسة وبتتطور باستمرار محدش هيطلبها منك ولا هتقدر تنافس لأن في زيك ملايين حرفياً لازم تبقي أنت مختلف عنهم، دا التحدي الحقيقي اللي هيخليك تنجح فعلاً.
  • علم النفس ومهارات التواصل والإقناع والتسويق دي حاجات مهمة وببساطة شديدة شغلك بيعتمد عليهم بنسبة متقلش عن 85%، محدش مهتم انت بتعمل إيه طالما مش عارف تسوقله وتسوق لنفسك، التسويق دا مهارة لازم تتقنها تماماً كفريلانسر لأن من غير ما تعرف تسوق لخدماتك بشكل مختلف هتبقي تقليدي وهتدخل في دايرة إحباط أنك مش بتحقق أي دخل!
  • بلاش تشوف إن الفريلانسينج تريند وإنها حاجة كول وهتبقي أروش من أصحابك وكدا، انت فريلانسر يعني لو مطبقتش كل مبادئ شغلك على نفسك وعشت وفقاً ليها مش هتعرف تبيعها، الموضوع مش تريند مثلاً وكل الناس بتشتغل فريلانسرز فا أجرب بقي وخلاص، لأ لازم تكون فاهم أنك مقدم على شغل ميقلش أهمية عن أي نوع شغل تاني وفيه تعب ومجهود أضعاف كمان.
  • الفريلانسينج مش حاجة هتعملها وخلاص أو تجرب حظك! انت علشان تاخد قرار أنك تبقي فريلانسر في حد ذاته لو مش عن اقتناع تام وفهم كامل لمبادئ الفريلانسينج هتبقي بتضيع وقتك ومجهودك واشتراك النت، حاول الأول تقرا أكتر وتعرف هل أسلوب الحياه دا مناسب ليك؟ وهل ودا اللي فعلاً محتاجة؟ لأنه حقيقي مش مش حاجة كمالية أو خاضعة للتجربة والحظ، مع التخطيط الصح والشغل والاجتهاد هيبقي هو شغلك الأساسي.
  • بلاش تتخيل نفسك قاعد بلابتوب في جزيرة استوائية على الشط وجمبك البيناكولادا والجو مشمس وجميل، مش بقولك إن دا مستحيل لأ بالعكس اتمنالك في يوم من الأيام ودا ممكن طبعاً بس علشان توصل للمرحلة دي لازم تمر بمراحل كتير وصعبة جداً زي إنك بتسهر شهور على شغل وتلتزم بمواعيدك وتتحمل كلاينتس رخمين ومعقدين، وبتثتستمر وقتك في تطوير نفسك وشغلك وتعب كتير دا بس الطريق الوحيد لكدا.
  • لما تشتغل فريلانسر لازم تكون صبور لأنك مش هتحقق دخل خيالي في أول شهر! أو حتى أول سنة! الفريلانسينج عاوز صبر ومثابرة غالباً أول سنة دي هتقضيها في التجربة والتعلم واكتساب الخبرات واللي بالمناسبة بحول أنقلهالك في مقالاتي علشان أوفر عليك التعب والوقت دا، بس دا ميمنعش إنك لازم تمر بمشاكلك الخاصة وتلاقيلها حلول وتجرب أكتر وتفشل وتجرب وهكذا لحد ما توصل لأنسب حاجة تحقق بيها عائد محترم.
  • التخطيط وتنظيم الوقت والمهمات وحياتك المالية دول مش حاجات بتحصل بشكل تلقائي أو مش مهم تعمل كدا ومتيسرة إن شاء الله! الـ 3 حاجات دول لو أهتميت بيهم وأديتهم حقهم هتحقق كل اللي عايز تحققه وأكتر كمان (إن شاء الله هتكلم عنهم في مقالات منفصلة لأهميتهم وتأثيرهم عليك كفريلانسر).
  • لازم يكون عندك مهارة محددة! للأسف بشوف كم كبير من الناس متخيلة إن “الفريلانسينج” دا هو الشغل! بجد والله مش بهزر! الفريلانسيج هو إنك تقدم خدمة أو منتج خاص بيك على نطاق غير محدود وبشكل حر وبتاخد مقابل مادي على كدا (راجع مقال الفرق بين الموظف والفريلانسينج علشان تعرف أكتر)، يعني لو معندكش خدمة أو منتج وبتطورهم بشكل مستمر بإنك تطور نفسك فيهم مش هيبقي عندك حاجة تقدمها كفريلانسر، يعني متدورش على الشغل بقدر ما تدور على اكتساب المهارات والتعلم والتطور المستمر (كررتها كتير جداُ في المقال وممكن أكتب مقال بس بيتكون من الكلمتين دول مكررين 1000 مرة).
  • بلاش الأسئلة اللي من نوعية “إزاي أسحب أرباحي”، لو انت بتشتغل علشان “تحسب أرباحك” أو بتشوف فيديوهات من نوعية “كيفية الربح عن طريقة الأنترنت” اسمحلى أقولك إنك مش هتحقق أرباح ولا هتسحبها! ركز في التعلم وبعد التعلم في الشغل والأرباح دي هتيجي لوحدها بعد كدا لكن لو عايز تروح للأرباح من أول خطوة مش هتحققها, بلس انه أصلاً المفروض أرباحك في أول سنة دي تستثمرها أكتر في تطوير نفسك وخدمتك والتسويق لنفسك, يعني هنفترض إن ربنا كرمك وعملت 50$ في شهر, الصح والمنطقي هو إنك يا تجيب بجزء منهم كورسات تتعلم منها أكتر يا تشتري خدمات ومنتجات تساعد في التطوير وعمل شغلك بشكل أسهل يا تستثمرهم في التسويق لنفسك وخدمتك على نطاق أوسع، لو الموضوع بالنسبالك سحب أرباح فصدقني مش هتوصل لحاجة على المدي البعيد، الفريلانسينج استثمار أكتر ما هو شغل انت بتستثمر في نفسك ووقتك وخدمتك ودا هيضاعف أرباحك مع الوقت.

أغلب الحاجات اللي في المقال دا هتكلم عنها بالتفصيل وبشكل عملي في مقالات تانية. المهم إن مشاركتك للبوست هتساعد جداً في القضاء على الخرافات دي اللي بيتم استغلال الشباب بيها علشان يدفعوا فلوس كتير في كورسات وتدريبات محتواها نظري وغير مفيد إطلاقاً للأسف.

,

ما هو تقييمك لهذا المقال؟

خرافات عن الفريلانسينج! الكام شهر اللي فاتوا شوفت خرافات كتيرة عن الفريلانسينج وهي لا تمت للفريلانسينج بصلة الحقيقة! والموضوع تحول لـ Stereotype (صورة نمطية) عن مجال شغلنا وعننا إحنا كفريلانسرز لكن دا مش صح إطلاقاً! في حاجات لازم تكتسبها وتعرفها الأول علشان تقدر تبقي فريلانسر مختلف وناجح فعلاً. أكتر جملة بتستفزني في حياتي تقريباً “هتقبض بالدولار” ودي جملة...
4.5 1 5 6
0 / 5 التقييمات 4.5

Your page rank:

هل وجدت هذا المقال مفيدًا؟

خرافات عن الفريلانسينج! الكام شهر اللي فاتوا شوفت خرافات كتيرة عن الفريلانسينج وهي لا تمت للفريلانسينج بصلة الحقيقة! والموضوع تحول لـ Stereotype (صورة نمطية) عن مجال شغلنا وعننا إحنا كفريلانسرز لكن دا مش صح إطلاقاً! في حاجات لازم تكتسبها وتعرفها الأول علشان تقدر تبقي فريلانسر مختلف وناجح فعلاً. أكتر جملة بتستفزني في حياتي تقريباً “هتقبض بالدولار” ودي جملة...
5 1 5 8
هل أفادك المقال؟ شارك الفائدة ❤

4 تعليقات. أضف تعليق

  • إزيك يا علي يارب تكون بخير
    انا مكنتش عايز المقال يخلص الصراحة فعلا معاك حق في كل كلمة زي ماالوظيفة ليها عيوب الفريلانس برضو ليه عيوب ومحتاج مسئولية مش أقل من الوظيفة دي لو مكانش عايز مجهود أكتر علي فكرة.
    حماس البدايات دا بيروح مع ملل أول كورس انت بتحضره عشان تتعلم وساعتها يا تكمل وتثبت صحة قرارك اللي انت خدته يااما هو مكانش قرارا صحيح، بصراحة انت عبرت عنه بطريقة عحبتني أوي هو مجرد اسلوب حياة فيه اللي بيتماشي مع ناس وبتستحمل قرفه وفيه اللي بيفضل الوظيفه عنه ودا لا يعيب الموظف ولا يعيب الفريلانسر كل واحد حر
    وباالنسبة لحتة هتقبض باالدولار دي ياراجل ده انا مرة قريت بوست لواحد بيبيع كورس بيقولك هخليك تقبض 1200 دولار أول شهر ؟!!!!!!! قمة في العبث والله
    مقال موفق

    رد
    • أهلًا بيك يا أحمد، أنا بخير الحمد لله يا أحمد وأتمنى تكون بأفضل حال في البداية يا أحمد أنا بعتذرلك شخصيًا جدًا على التأخر في الرد طول الفترة دي، وإن شاء الله لما تعيد فتح حسابك في فيسبوك هبقى أشرحلك تفاصيل أكتر.

      بالعودة لتعليقك فأنا سعيد جدًا إن المقال كان ممتع بالنسبالك للدرجة دي، وبالتأكيد أتفق مع رأيك في أهمية الأخذ في الأاعتبار بعيوب ومميزات الوظيفة والعمل الحر، وتحديدًا الجزء دا

      “حماس البدايات دا بيروح مع ملل أول كورس انت بتحضره عشان تتعلم وساعتها يا تكمل وتثبت صحة قرارك اللي انت خدته يااما هو مكانش قرارا صحيح”

      شخصيًا انا من أكتر الناس اللي بتروج لأهمية تحديد ومعرفة هل أحساساك تجاه حاجة ما هو حقيقي فعلًا ولا دا مجرد حماس البدايات زي ما أنت عبرت عنه وكنت سعيد إن حد عبر عن المشكلة دي بالطريقة الجميلة دي.

      أما بالحديث عن الشعارات الكاذبة المنتشرة بكثرة زي هتقبض بالدولار للأسف هي ظاهرة بتهدد من صورتنا النمطية كفريلانسرز ولازم نتصدى ليها بشكل أكبر أتمنى متخليش الأمثلة دي تعدي من غير محاولتك في ردعها أو التنبيه بأنها كاذبة في المستقبل.

      رد
      • مفيش داعي للأعتذار يا علي أنا اللي عايز أشكرك علي كتاباتك الجميلة دي و أتمني أشوف مقالات ليك أكتر و أكتر
        هقرا كل تعليقاتك مع المقالة بتاعت انهاردا

        رد
        • أشكرك يا أحمد على ذوقك وتفهمك وإن شاء الله هتشوف مقالات أكتر قريب جدًا، بتمنالك كل التوفيق في قراءة التعليقات والمقال.

          رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: