إزاي سحبت 500$ من حسابي في PayPal مباشرة لحسابي البنكي 1
المال والأعمال
102 تعليق
16,049

4 دقيقة

إزاي سحبت 500$ من حسابي في PayPal مباشرة لحسابي البنكي

إزاي سحبت 500$ من حسابي في PayPal مباشرة لحسابي البنكي من غير أي مشاكل، عمولات إضافية أو وجع دماغ!

المقال دا فيه تجربة حقيقية بكل تفاصيها عن إزاي سحبت 500$ وموضح فيه الطريقة وكل التفاصيل اللي ممكن تكون محتاجها أو حتي مش واخد بالك منها عشان تعمل نفس الشيء.

إيه المشكلة؟

بعد مشكلة إضافة عمولة إضافية لبطاقة مشتريات البريد المصري Easy Pay بقيمة 3% + 10 جـ قيمة ثابتة (مش 10% زي ما الناس بتقول) وكمان بأثر رجعي، وإنها مبقتش الحل والملاذ الآمن للحسب من PayPal جربت أعمل حاجة مختلفة تماماً!

المتعارف عليه إنك عشان تحول فلوسك من PayPal لحسابك البنكي فهو لازم يكون Credit مش Debit سواء عن طريق إنك تكون موظف وعامل حساب جاري وبيضمنلك Credit أو إنك تسيب وديعة في البنك وتاخد بضمانها Credit ودا الكلام اللي لو اتصلت بالبنك حالياً هيتقالك، التجربة دي هتثبت إن الكلام دا غلط تماماً.

مبدأياً انا معايا حساب توفير Saving Account في QNB (بنكي المفضل ) وطبعاً بتاخد عليه Debit Card وكمان مطلع Shopping للمشتريات عادي بس مش دا موضوعنا، الفكرة إنك لو سألت البنك هيقولولك إن الـ Debit مينفعش تسحب عليها فلوس من PayPal وانا كنت عايش بالاعتقاد دا بقالي كتير الحقيقة للأسف ومتأكد إن معظمكم كمان كدا.

محتاج تعرف أكتر عن التعاملات البنكية؟

لحظة واحدة! لو انت مش فاهم الكلام دا معناه إيه يبقي مهم جداً تقرأ مقال كل اللي محتاج تعرفه عن التعاملات البنكية هتلاقي فيه كل المعلومات اللي محتاجها عشان تعرف إزاي تتعامل مع البنك وتعمل حساب وكل حاجة.

كل دا لحد آخر عملية سحب حبيت اعملها من PayPal وكانت بقيمة 196.43$ وقتها قلت ليه لأ أجرب أسحبهم علي بطاقتي في QNB لو نفع يبقي خير وبركة، منفعش عادي الفلوس هترجع حسابي في PayPal وهسحبها علي حاجة تانية سواء Payoneer أو Easy Pay مش هتفرق.

وفعلاً يوم 20 يناير طلبت أول سحب مباشرة علي حسابي في QNB زي ما هتشوف في الصورة دي

PayPal 1st Withdraw

طبعاً واضح كفاية في الصورة إن الكارد اللي سحبت عليها نوعها Debit، وبعد خصم مصاريف PayPal واللي هي 5$ المفروض يوصلني 191.43$.

دي صورة بعد 4 أيام من عميلة السحب والفلوس وصلت حسابي وبقت في الـ Available Balance يعني الرصيد المتاح والقابل للاستخدام.

إزاي سحبت 500$ من حسابي في PayPal مباشرة لحسابي البنكي 2

للمرة التانية واضح في الصورة إن حسابي Saving وبستخدم كارد Debit، هنا حسابي بقي فيه 3,472.26 جـ

دا معناه إن PayPal بيحول الفلوس لحسابك البنكي بسعر دولار 17.89 جـ، ودا سعر البنك فعلاً، من غير أي عمولات او وقت ضايع أو وسيط أو أي حاجة!

خلينا نحسبها عشان نتأكد:

$191.43 × 17.86 جـ = 3,419.40 جـ

 (الباقي انا كنت سايب فكة في الحساب عشان إتأكد من الريت)

طيب هنا الفلوس وصلتني وبقت متاحة للسحب بعد 4 أيام بس لسا مظهرتش في الـ E-Statement بمعني إني معرفش المعاملة دي تمت من PayPal فعلياً، بعد 3 أيام واللي كدا يبقي مجمل 7 أيام ظهرت فعلاً ودي تفاصيلها بتأكد نفس اللي قولته فوق.

1st Withdraw Card Fund

كدا مبروك جداً انا سحبت فعلاً المبلغ وكل حاجة، بس محتاج أتأكد أكتر من المعلومة لأني مينفعش أشارك حاجة انا مش واثق فيها بنسبة 200%.

تاني تجربة

فا جربت أعمل عملية سحب تانية بنفس الطريقة والمرادي كانت بقيمة 47.75$ ويوم 1 فبراير زي ما واضح في الصورة.

إزاي سحبت 500$ من حسابي في PayPal مباشرة لحسابي البنكي 3

لاحظت حاجة؟ لو ملاحظتش فا هقولك انا إن مفيش 5$ مصاريف PayPal ليه؟

دا لأن السحب التلقائي الشهري Auto Withdrawal (سحب أرباحك بشكل أوتوماتيك كل أول شهر) مش بيكون عليه مصاريف سحب وبيكون مجاني تماماً.

للمرة التانية بعد 5 أيام الفلوس وصلت حسابي فعلاً، ودي صورة بتأكد دا من الـ E-Statement بعدها بـ 5 أيام برضه.

إزاي سحبت 500$ من حسابي في PayPal مباشرة لحسابي البنكي 4

ولكن هنا في حاجة كمان لو طبقنا نفس معدل تحويل العملة واللي هو 17.86 جـ هنلاقي المفروض يوصلني 852.815 جـ وانا وصلي بس 840.07 جـ دا معناه إن الريت في الوقت دا كان 17.59 جـ معرفش إذا كان الدولار نزل وقتها ولا إيه، فا روحت أشوف لقيت إنه فعلاً الدولار في يوم 5 فبراير كان معدله 17.59 جـ زي ما هتشوف في الصورة دي.

إزاي سحبت 500$ من حسابي في PayPal مباشرة لحسابي البنكي 5

خد بالك من معدل تحويل العملة!

ومن هنا نستنتج معلومة مهمة وهي إن البنك بيحولك من دولار لجنيه مصري بسعر الدولار في اليوم اللي تم فيه التحويل، بالتالي مهم تتابع معدل سعر الدولار وانا شخصياً في العملية دي بفضل أستخدم موقع وتطبيق XE.Currency ضفتلك لينك معدل الدولار للجنيه المصري مباشرة لما تضغط علي الموقع لو مش هتعرف توصلها بنفسك.

تالت تجربة

طيب المرة التانية وكانت العملية ناجحة، بالنسبالي دا مش كفاية عشان أتأكد من المعلومة فا أثناء الوقت دا تحديداً يوم 4 فبراير عملت عملية سحب تالتة من حساب مختلف علي نفس البطاقة علشان أتأكد إن دي حاجة عامة وإنه مش حسابي انا بس، الصورة الجاية هتوضح كل التفاصيل.

إزاي سحبت 500$ من حسابي في PayPal مباشرة لحسابي البنكي 6

المرادي سحبت 79.75$ وبعد خصم عمولة PayPal كدا المفروض يوصلني 74.75$ وفعلاً بعدها بـ 3 أيام بالظبط وصلني مبلغ 1,315.85 جـ يعني المعدل المرادي 17.60 جـ ودي صورة من الـ E-Statement بتأكد العملية.

إزاي سحبت 500$ من حسابي في PayPal مباشرة لحسابي البنكي 7

كدا للمرة التالتة علي التوالي وفي أقل من 3 أسابيع سحبت 3 مبالغ مختلفة من حسابين مختلفين علي نفس البطاقة.

علي الرغم من إني سحبت الفلوس دي من ATM بنك QNB بنفسي ومتأكد تماماً من كلامي إلا إني عايز أكون متأكد بما لا يدع مجال لذرات الشك إن دي طريقة فعّالة وناجحة وأفضل طريقة ممكنة لسحب أرباحك من PayPal علشان أقدر أشارك المعلومة معاكم.

فا قمت إمبارح (يوم 8 فبراير) طلبت سحب مبلغ 143$ والنهاردة قبل كتابة المقال طلبت سحب 47$ كمان دي صور بالطلبات

إزاي سحبت 500$ من حسابي في PayPal مباشرة لحسابي البنكي 8 إزاي سحبت 500$ من حسابي في PayPal مباشرة لحسابي البنكي 9

وبكدا يبقي مجموع اللي سحبته 500$ في الفترة من 20 يناير حتي 9 فبراير (أقل من 20 يوم) إن شاء الله لو وصلوا علي خير هبقي أضيف تأكيد وصولهم للحساب والسحب في المقال.

تحديث:تم سحب التحويلات السابقة بنجاح

إزاي سحبت 500$ من حسابي في PayPal مباشرة لحسابي البنكي 10

طيب قبل ما أقولكم مبروك خلونا نسترجع المعلومات المهمة في التجربة دي عشان تاخدوا بالكم منها.

  • التجربة تمت باستخدام حساب توفير في بنك QNB علي Visa Debit Card دي اللي بتكون متاحة على الحساب.
  • لو حد حوّلك فلوس علي حسابك في PayPal بيتخصم منها عمولتهم 3.9% + قيمة ثابتة 0.30$ (علي موقعهم قيمة العمولة 3.4% بس أتوقع الكلام دا قديم لأن لو حسبتها هتلاقي العمولة 3.9% (طبعاً دا علي التحويلات الشخصية الدولية) فا مهم تعمل حسابها.)
  • السحب التلقائي الشهري مش بيكون عليه مصاريف سحب لكن السحب وقت ما تحب بيكون عليه 5$ مصاريف سحب.
  • مدة السحب بتتراوح ما بين 4-7 أيام عمل وممكن الفلوس توصل حسابك قبل ما تظهر في حسابك عادي ودي حاجة كويسة.
  • الفلوس بتوصلك بمعدل سعر العملة في اليوم اللي وصلت فيه الفلوس لحسابك البنكي فا تابع كويس أسعار العملة عشان فرق بسيط في سعر العملة ممكن يأثر علي اللي هيوصلك بالجنيه.
  • الفلوس بتوصلك مباشرة في حسابك البنكي وتقدر تسحبها من أي ATM عادي جداً بدون أي وجع دماغ.

وبكدا أعتقد عن دي أفضل طريقة ممكنة تقدر تسحب بيها أرباحك من PayPal، طيب لو مكنش عندك أصلاً حساب علي PayPal ولا عارف إيه اللي المفروض تعمله يبقي أطمن، المقال الجاي عن شاء الله هيكون بعنوان كل اللي محتاج تعرفه عن PayPal وهيكون فيه شرح كامل لكل التفاصيل اللي محتاج او حتي مش محتاج تعرفها عنه في صورة أسئلة وإجابتها وهتتعلم فيه كل حاجة عنه بداية من إنشاء الحساب حتي السحب.

لو عندك أي سؤال متعلق بـ PayPal محتاج تسأله ممكن تسيبه في التعليقات وهقولك إذا كانت إجابته موجودة فعلاً في المقال أو لو لأ هضيفها وتكون بكدا ساعدت كتير من اللي بيدوروا علي إجابة نفس السؤال، شكراً مسبقاً.

, , , ,

ما هو تقييمك لهذا المقال؟

إزاي سحبت 500$ من حسابي في PayPal مباشرة لحسابي البنكي إزاي سحبت 500$ من حسابي في PayPal مباشرة لحسابي البنكي من غير أي مشاكل، عمولات إضافية أو وجع دماغ! المقال دا فيه تجربة حقيقية بكل تفاصيها عن إزاي سحبت 500$ وموضح فيه الطريقة وكل التفاصيل اللي ممكن تكون محتاجها أو حتي مش واخد بالك منها عشان تعمل نفس الشيء. إيه المشكلة؟ بعد مشكلة إضافة عمولة...
4.34 1 5 29
0 / 5 التقييمات 4.34

Your page rank:

هل وجدت هذا المقال مفيدًا؟

إزاي سحبت 500$ من حسابي في PayPal مباشرة لحسابي البنكي إزاي سحبت 500$ من حسابي في PayPal مباشرة لحسابي البنكي من غير أي مشاكل، عمولات إضافية أو وجع دماغ! المقال دا فيه تجربة حقيقية بكل تفاصيها عن إزاي سحبت 500$ وموضح فيه الطريقة وكل التفاصيل اللي ممكن تكون محتاجها أو حتي مش واخد بالك منها عشان تعمل نفس الشيء. إيه المشكلة؟ بعد مشكلة إضافة عمولة...
5 1 5 37
هل أفادك المقال؟ شارك الفائدة ❤

102 تعليق. Leave new

  • انا مافهمتش الجزء الخاص بعمولتهم الـ 3.9% هل هى تشمل السحب من مواقع الفريلانسنج و لا التحويلات الشخصية بس؟
    انا حاليا بقارنها ببايونير من حيث الاسرع و الاوفر.
    بايونير مثلا الفلوس بتدخل حسابك بدون عمولة لو من على موقع فريلانسر و عمولة 1$ بياخدها اب ورك لما بحول لبايونير
    و متاح ليا 3 طرق منها الكارت و دا اغلاهم و طريقتين تانين شايفين كويسين نوعا ما:

    – التحويل للحساب البنكى بالجنيه
    https://pasteboard.co/I0o1zGz.jpg
    و دى بيكون رسومها فرق فى سعر التحويل حوالى 30 قرش بين سعر الدولار و الجنيه يعنى لو سعر الدولار الفعلى 17.80 بيوصلى 17.50 بدون اى رسوم تانية و بقدر اسحبهم من البنك فى اى وقت

    – التحويل بالدولار
    https://pasteboard.co/I0o1Yyp.jpg
    و عمولتها 2% على اى مبلغ و احيانا البنك بيخصم 3$ و شوية و ساعات لأ و ميزتها ان الفلوس بتوصل بالدولار و اسحبها فى اى وقت من الشهر بدون مصاريف زيادة + ان متاح السحب ليا بالبطاقة لو مش عايز استنى 3 ايام عمل.
    مش عارف لو قارنتهم باى بال هلاقى ايه الاوفر خصوصا انى ما اتعاملتش قبل كدا مع باى بال لأن ماحصليش قبل كدا مشاكل مع بايونير و بسحب منها فى اى وقت فى الشهر بس لو باى بال اوفر اكيد ممكن استخدمه كوسيلة سحب.

    رد
    • العمولة الخاصة بباي بال يا محمود هي رسوم تحويل دولية للحساب, بالنسبة للتحويل البنكي بالجنيه لو حسبتها هتلاقيها ارخص من باي بال لو زي ما بتقول مفيش اي مصاريف تانية دي مثلا حسبة باي بال
      باي بال: $191.43 × 17.86 جـ = 3,419.40 جـ
      بايونيير: 200$ × 17.56 جـ = 3,512 جـ
      وحتي في حالة السحب التلقائي بايونيير ارخص لأن هيكون
      195$ × 17.86 جـ = 3,482 جـ

      رد
  • شكرا ليك كثير على المعلومات القيمة، عندي سؤال واحد وهو كيف افعل الـ(Automatic Monthly Withdraw) ؟

    رد
    • مفيش داعي للشكر يا محمد دا واجبي، دي بتفعلها في حسابك عن طريق
      Wallet > Card > Auto-withdraw: On
      الصورة دي هتوضحلك أكتر https://prntscr.com/miw53t

      وإنتظر المقال القادم هيكون فيه تفاصيل أكتر عن كل ما هو متعلق بـPayPal

      رد
      • رحت لنفس المسار ولكن لا يوجد خيار لتفعيل السحب الشهري علمًا بأنه بطاقتي debit، هل بتعتقد انه ممكن البنك اللي انت فيه بمثل بأي طريقة من الطرق نوع من الاستثناء لبطاقات الـdebit في Paypal؟

        الصورة بتبين انه ما في خيار: https://i.imgur.com/0J4UAZf.png

        رد
        • في الحالة دي يا محمد دا معناه إن البطاقة مش بتقبل السحب من PayPal، لو بتقبل فعلاً وسحبت عليها بشكل يدوي ياريت تيعتلهم ميل بالكلام دا وهما هيردولك الفلوس اللي اتخصمت في السحب اليدوي وهيصلحولك السحب التلقائي.

          رد
      • سلام أخي علي أنا عندي حساب بايبال business هل هناك طريقة لتفعيل Automatic Monthly Withdraw؟ لان الطريقة التي ذكرتها لا تعمل وياليت تعمل الفرق بين حساب بايبال شخصي وباسنس وشكرا

        رد
        • أنا من أشد المتابعين لمقالاتك المفيدة والرائعة وعندي ملاحظة بسيطة حول لغة الكتابة التي أرى من الأحسن أن تكتب باللغة العربية و لتشمل جميع الناطقين باللغة العربية في العالم وللمساهمة في اثراء المحتوى العربي في هذا المجال ولتشمل الفائدة عدد أكبر من الفريلانسر في العالم العربي).

          رد
          • دا شرف كبير ليا حقيقي يا فؤاد وسعيد بمتابعتك جداً ورأيك الجميل، بالنسبة لملاحظتك هي فعلاً في الاعتبار حالياً ولكن تظل المشكلة الأكبر هي إن حجم المحتوي وكثرة المعلومات به تجلعه صعب المتابعة في حالة الكتابة باللغة العربية.

            ولكن مستقبلاً سيكون هناك الكثير من المحتويات مخصصة كلياً للمجتمع العربي بالكامل وليس فقط المصريين، بشكرك مرة تانية لإقتراحك الجميل وإن شاء الله سيتم تنفيذه

          • الف شكر لحضرتك
            معلش سؤال تاني اعمل انهي حساب توفير فيهم ال qnb عامل اكتر من نظام واعمله يانهي حد ادني ف ١٠٠٠ج هل لو عملته ب ١٠٠٠ ج هيكون في اي ضرر

          • تحت أمرك يا بسنت، طالما هو حساب توفير يا بسنت يبقي مش هتفرق كتير العرض الحالي طالما كل العروض لحسابات توفير، ولكن ننصحك تستشيري حد من البنك في الفرق بين العروض لربما يكون في حاجة ممكن تحتاجيها أكتر من التانية.

        • أهلاً بك أخي فؤاد، بالنسبة للسحب التلقائي الشهري لا أعلم إذا كان متاح للحسابات الـ Business أم لا، لأن ها بتكون حاجة مختلفة تماماً، ولكن لو نوع البطاقة Visa بالتأكيد هتكون متاحة، أحياناً بيكون في مشكلة في الحساب فا ممكن تتواصل معاهم وهما هيفعلوهالك برضه، دا طبعاً لو دا كان مسموح في الحسابات الـ Business.

          أما بالنسبة لطلبك فا بشكرك لإقتراحك ودا بالفعل موجود في مقال منفصل بيتكم عن كل ما له علاقة بباي باي وسيتم نشره قريباً إن شاء الله، وبشكرك لإهتمامك وكلامك الجميل

          رد
  • انا محتاج افعل الباي بال هل qnb بيفعله واقدر اسحب منه مباشر يعنى اشتري بيه اونلاين وابيع منه

    رد
    • بالتأكيد يا عبد الرحمن بيفعله ولكن مش بتقدر تشتري من رصيد حسابك في PayPal مباشرة، رصيد حسابك متاح ليك إنك تستلمه بس.

      رد
  • انا رحت لنفس المسار ولكن لا يوجد خيار لتفعيل السحب التلقائي علما بأنه بطاقتي debit، هل ممكن انه البنك اللي انت فيه بشكل نوع من الاستثناء باي طريقة من الطرق لبطاقات الdebit، لاني مش متخيل في سبب لعدم وجود الخيار الا واحد من اثنين، الاول انه مش مسموح في منطقتي وهذا شيء انا الى حد ما مستبعده، الثاني انه بالفعل Paypal ما بيقبل بطاقات الـdebit بس بطريقة ما زبط في بنكك.

    هي صورة بتوضح: https://i.imgur.com/0J4UAZf.png

    وشكرًا لوقتك.

    رد
    • زي ما رديت عليك فوق يا محمد، هي إما مشكلة في البطاقة ودي بترجع للبنك لأنه في الحالة دي لا يدعم الإسلاتم من باي بال، وإما مشكلة حساب في الحالة دي بتتواصل معاهم وهما بيحلوها، طيب إزاي تقدر تتأكد؟ عن طريق إنك تحاول تسحب بشكل يدوي لو السحب تم فعلاً يبقي دي مشكلة حساب وساعتها هيصلحوه ويرجعولك مصاريف السحب التلقائي.

      أما لو مشكلة بطاقة فا هي مشكلة خاصة بالبنك فا ياريت تتواصل مع البنك المصدر للبطاقة وتسألهم إذا كانوا بيقبلوا السحب من باي بال.

      بالنسبة لعلاقة PayPal ببطاقات الـ Debit فا دي حاجة مفيهاش أي مشاكل يا محمد وبتعامل معاملة الـ Credit عادي، شخصياً أتوقع المشكلة من البنك نفسه، بس زي ما قولتلك هتتأكد بس عن طريق إنك تجرب تجري عملية سحب يدوية وتشوف النتيجة.

      بالتوفيق

      رد
    • طب لو سمحت هل البنك بيعمل اي مشاكل او حظر ع الحساب للتعامل مع الدولار او الفلوس الا جاية من برة هل بيطلبو اي اثباتات مثلا ؟

      رد
      • لا يا بسنت، طالما المبالغ اللي تم تحويلها بتتماشي مع الحد الطبيعي للإنفاق في الحساب مفيش أي مشكلة، ممكن يطلبوا إثبات في حالة إن الفلوس بتتخطي الحد الطبيعي للإنفاق للحساب.

        رد
    • لو سمحت هل بواجه اي مشكله بعد كده مع البنك بسبب الدولار او مصدرة او بيحتاجو اي اثباتات مثلا؟

      رد
  • يعني QNB مابياخدش أي عمولة على السحب؟

    رد
  • Mohamed Elmasri
    مارس 21, 2019 1:02 م

    هل ينفع أربطها ب حساب CIB Depit حساب جاري
    ولا زم يبقا عندي Credit مربوطة بيها

    رد
  • المقال مفيد، لكن عندي استفسار
    احاول تحويل مبلغ مالي من حسابي في paypal الى بطاقة بنكية مربوطة بحساب توفير، والبطاقة نوعها debit لكن موقع paypal يرفض الربط وتظهر رسالة ” البطاقة غير مستوفية لشروط اجراء تحويلات فورية من خلالها”

    تأكدت من الانترنت، و وجدت قائمة بأسماء البنوك التي تدعم حسابات paypal في منطقتي و البنك الذي اتعامل معه ليس من ضمنها.
    هل هذا له علاقه ؟

    ما الحل ؟

    رد
    • أشكرك يا بلقيس على رأيك، بالتأكيد كون البنك غير مدرج في قائمة البنوك التي يقبلها PayPal دا ليه علاقة بالمشكلة.

      رد
  • السلام عليكم مشكور علي مجهودك والتجربه الواضحة بدون فتي عندي كام سؤال برجاء الرد هل لوحساب التوفير في qnb بالدولار الفلوس هتيجي كاملة بالدولار بدون اقططاع اي قيمه اضافيه من زي عموله مثلا لا اتحدث عن ضريبة بايبال اتحدث عن البنك وعايز اعرف اللليمت او الحد المسموح لاستلام علي البطاقه debit الكلاسيك والجولد والبلاتينية وتكلفة اصدار كل منه ,جزاك الله خيرا انشاء الله

    رد
  • عمرو ياسر
    مايو 20, 2020 12:40 ص

    ارجوك تساعدنى ماهى الشروط لفتح سحاب فى بنك qnp dibet اللى بيتعامل كاكريديت

    رد
    • أهلًا بيك يا عمرو،

      متطلبات فتح حساب في بنك QNB بتكون على حسب فئتين، الطلبة/الموظفين

      للطلبة: المتطلبات هي صورة البطاقة وأحيانًا صورة بطاقة الوالد وكارنيه الكلية.
      للموظفين: صورة البطاقة، وخطاب من قسم الموارد البشرية بالشركة التي تعمل بها.

      ولكن أتمنى توضح المقصود بـ “اللى بيتعامل كاكريديت” لأن الـ Debit والـ Credit هما حاجتين مختلفتين.

      رد
  • هل مازال بنك qnb يدعم سحب من الpaypal؟

    رد
  • هل مازال بنك qnb يدعم سحب من الpaypal علي فيزا DEBIT لحساب التوفير؟؟

    رد
  • اشكرك جدا على المقال الرائع…وعندى سؤال اذا تكرمت…
    انا لقيت فى انواع كتير من حسابات التوفير وكمان انواع كتير من البطاقات…وانا مش عندى اى خبره فى التعاملات البنكيه وهكون شاكر جدا لحضرتك لو قولتلى الحساب المناسب اللى اقدر افتحه لسحب الفلوس من باى بال وانا طالب عمرى 21 سنه.

    رد
    • مفيش داعي للشكر يا أحمد دا واجبي، وسعيد بقراءتك.

      بالنسبة لسؤالك يا أحمد، دا بيتوقف على البنك المستخدم، في بنوك بتقدم أكتر من نوع حساب توفير زي بنك CIB اللي بيقدم حساب التوفير Savers وحساب التوفير Premium savers وحساب Easy وسمارت توفير كل حساب فيهم طبعًا بيختلف في المميزات والاستخدام.

      لكن بالنسبة لمعظم البنوك غالبًا بتقدم نوع واحد أو أتنين من حسابات التوفير بمميزات مختلفة علشان تناسب شرائح مختلفة من العملاء، وبالتالي محتاج أعرف منك إذا كنت بتتكلم عن بنك محدد.

      لكن لو بتسأل بشكل عام، أنصحك تفتح حساب توفير بلس في بنك QNB في أسرع وقت بما إنك طالب لإنك مش هتقدر تفتحه بعد التخرج، دا زي ما أعتقد لاحظت في المقال هو أفضل طريقة في الوقت الحالي لسحب أرباحك من PayPal.

      رد
      • سعيد جدا برد حضرتك وبجد افدتنى ربنا يبارك فى حضرتك …اخر سؤال بس انا لقيت فى نوعين من حساب التوفير بلس في بنك QNB واحد بالجنيه المصرى و واحد بالعملات الاجنبيه…انا دخلى بالدولار فهل اختار العملات الاجنبية؟ او ايه الافضل من وجهة نظر حضرتك.

        رد
        • أنا أسعد إني قدرت أفيدك يا أحمد، في الطبيعي أنصحك تعمل حسابك بالجنيه المصري، ولكن في QNB تقدر تعمل الأتنين يا أحمد وأعتقد دا أفضل في حالتك.

          رد
  • وياريت لو حضرتك تقولى… بطاقة المصرف المتحد المسبقة الدفع (افضل) ولا حساب التوفير من بنك qnb (افضل) لربطه بباى بال والسحب منه؟

    رد
    • بالنسبة لسؤالك يا أحمد هو مفيش مقارنة بين الأتنين لأن كل واحدة فيهم بتأدي وظيفة ودور مختلف، وأنصحك تجمع بينهم لأنك هتحتاج كل واحدة في سيناريو مختلف من تعاملاتك، لكن بالنسبة للسحب المصرف المتحد مش بتسحب من PayPal نظرًا لكونها MasterCard وبالتالي زي ما وضحت في التعليق السابق QNB هي أفضل حل للسحب في الوقت الحالي.

      رد
  • السلام عليكم مشكور علي مجهودك عندي كام سؤال برجاء الرد هل لوحساب التوفير في qnb بالدولار الفلوس هتيجي كاملة بالدولار بدون اقططاع اي قيمه اضافيه من زي عموله مثلا لا اتحدث عن ضريبة بايبال اتحدث عن البنك وعايز اعرف اللليمت او الحد المسموح لاستلام علي البطاقه debit الكلاسيك والجولد والبلاتينية وتكلفة اصدار كل منه ,جزاك الله خيرا انشاء الله

    رد
    • وعليكم السلام ورحمة الله وبركاته يا محمد،

      سؤال رائع في الحقيقة يا محمد، البنك لا يقوم بإقتطاع أي قيمة إضافية من التحويلات القادمة من PayPal، ولكن يقال أنه في حالة التحويلات البنكية المباشرة Wire transfer قد يأخذ البنك 5$ ولكني لم أقم بتجربة هذا الأمر شخصيًا.

      أما بالحديث عن الليميت الخاص ببطاقات البنك للأسف البنك قام بحجب تلك البيانات من موقعهم ربما نظرًا لتغيرها المتجدد، لذلك أنصحك بالإتصال بالبنك للحصول على معلومات أكثر دقة حيث أن معلوماتي قد لا تكن الأكثر دقة في هذا الأمر.

      رد
      • شكرا علي سرعة الرد طيب هل الافضل حساب بالدولار او بالجنيه ؟

        رد
        • عفوًا يا محمد، دي حاجة بترجع لتفضيلك الشخصي يا محمد ولكن بالتأكيد الدولار أضمن.

          رد
          • احمد ابراهيم
            سبتمبر 23, 2020 5:53 م

            السلام عليكم استاذ علي عندي مشكله ارجو منك مساعدتي في حلها انا عندي بطاقه qnb debit وقمت بربطها بحسابي في PayPal بعدها قمت بارسال مبلغ من المال إلى بطاقتي وبعد ٣ ايام تم رفض العمليه من باي بال ولا أعلم لماذا بعدها قمت بتحويل حسابي من شخصي ال بيزنس وقمت باعاده إرسال نفس المبلغ هذه المره بعد ٣ ايام تم ارسال المبلغ الي حسابي ولكن في خانه المعلقات وابلغت البنك وقال لي انها ستكون في حسابي بنهايه اليوم ولكن مضى يومين ولم ترسل الي حسابي واختفت نهائيا من كل حسابي ولم ترد حتى ال باي بال حتى الآن وعندما أبلغت البنك قال لي انه لا يتعامل مع باي بال ولا أعلم لماذا افعل وأين نقودي

          • وعليكم السلام ورحمة الله وبركاته يا أحمد،

            بداية يا أحمد من المهم أن تعرف إن السحب اليدوي لا يعمل في أغلب الحالات ولذلك أنصحك بإنتظار السحب التلقائي في بداية كل شهر، شخصيًا واجهتني مشلكة رفض المعاملة عندما يتم عملها يدويًا ولكن لا مشكلة حتى الآن في التحويل التلقائي من PayPal إلى بطاقتي في بداية كل شهر.

            أما بالنسبة لمشكلتك، فغالبًا ما يستغرق البنك 3 أيام حتى تظهر المعاملة في حسابك كمعاملة مسجلة ولكن يتم إضافة الرصيد بدون مشاكل، فستجد بأن تم إضافة القيمة المرسلة إلى رصيد حسابك ولكن المعاملة قد تظهر بعدها ب 1-3 أيام هذا طبيعي، أتوقع أن المعاملة ستظهر في حسابك في خلال تلك الفترة وإن لم تظهر فسيتم ردها إلى حسابك في باي بال بعد 5-7 أيام عمل.

  • “حساب توفير بلس في بنك QNB في أسرع وقت بما إنك طالب لإنك مش هتقدر تفتحه بعد التخرج” السبب بعد اذنك

    رد
    • سؤال جميل يا أميرة، وفي الحقيقة هناك سببين،

      السبب الأول، هو أنه سيتطلب أن تكون موظف وتأتي بخطاب من مدير شئون العاملين بشركتك أو HR Letter، أو مفردات مرتبك لآخر 6 أشهر.

      والسبب الثاني هو أن إذا كنت ستقوم بفتح الحساب وأنت طالب فستدفع فقط 150 جنيه مصاريف فتح الحساب وإصدار البطاقة بدون حد أدني لفتح الحساب، أما إذا لم تكن طالب فستدفع 2500 جنيه حد أدني لفتح الحساب، هذا بالطبع بعد توفر السبب الأول.

      لهذا أنصح دومًا بأن تقوم بفتح ما تحتاجه من حسابات بنكية بينما لا تزال طالب لأن هذا سيسهل ويوفر عليك الكثير أيضًا.

      رد
  • Yara Hassan Mansour
    يوليو 29, 2020 5:28 م

    عايزة اعرف 1- تكلفة الاونلاين بنك
    2- والمصاريف السنوية للحساب مع الفيزا مع الخدمات الاساساية كام تقريبأ سنويا
    3-الفايدة علي خساب التوفير بتتحسب من اول 5000 او الف واحده وهل هي تصاعديه زي Cib
    *شكرا علي تعبك يا بشمهندس*

    رد
    • أهلًا بيكي يا يارا، بداية بعتذرلك جدًا على التأخير دا كله.

      1- لو سؤالك عن بنك QNB فمصاريف فتح الحساب بتكون 150 جنيه شاملة كل الخدمات الأساسية (Internet banking – Mobile Banking – Card issuing)
      + مصاريف البطاقات الإضافية، أما المصاريف السنوية فا بتكون غالبًا في حدود 100-150 جنيه سنويًا لاحظت أنها بتختلف من سنة للتانية ولكن معرفش تحديدًا السبب.

      2- الفايدة بتتحسب سنويًا وبتصرف شهريًا وبتكون على أقل مبلغ في الحساب في الشهر اللي بتتحسب فيه (بشرط أن تكون أعلى من الحد الأدني لفتح الحساب) وعلى حد كلام البنك هي بتتحسب على حسب سعر الكوريدور المعلن من البنك ولكن شخصيًا مش بهتم بالفايدة زي ما وضحت في المقال.

      رد
  • عبد الحميد
    أغسطس 9, 2020 7:52 م

    كارت المشتريات بتاعهم ينفع استقبل عليه فلوس من بايبال يعني بيتعامل زي الكريديت كارد وكام عمولتهم من المبغ المبعوث

    رد
    • أهلًا بيك يا عبد الحميد، أسمحلي أعتذرلك على التأخير في الرد طول الفترة دي.

      في الحقيقة يا عبد الحميد كارت المشتريات مينفعش تستقبل عليه رصيدك من باي بال، وبالمناسبة كارت المشتريات لا يمكن أستخدامه في ماكينات الصرف والطريقة الوحيدة لإضافة رصيد عليه هي من حسابك الأساسي.

      رد
  • ينفع احول الفلوس من فيزا المشتريات للحساب البنكي تاني

    رد
    • للأسف يا أحمد فيزا المشترات هي طريق من إتجاه واحد بس، تقدر تحولها فلوس من حسابك وتشتري عن طريقها لكن متقدرش تعمل العكس.

      رد
  • مساء الخير أستاذ علي .. جزاك الله كل خير على مجهودك.
    لو سمحت عندي سؤال.. انا حسابي في باي بال عمل سحب تلقائي على كارت فيزا ائتمان مقفولة من بنك كريدي أجريكول عن طريق الخطأ لأن الفيزا التانية اللي كنت بسحب عليها بقت منتهية الصلاحية .. وأنا قريت مقال حضرتك وشجعني اني أروح أفتح حساب في Qnb وطلعت بطاقة فيزا إئتمانية بـ 10000 ج علشان لو مش عرفت اسحب على الديبت .. فمش جددت البطاقة .. واتفاجئت انه سحب من نفسه حوالي 500 دولار على الفيزا المقفولة يوم واحد فش الشهر والنهاردة 23 سبتمبر والفلوس لسه مارجعتش تاني باي بال ولا دخلت حسابي في البنك .. انا بعت رسالة لخدمة العملاء في باي بال وطلبوا مني انتظار الرد وفات كتير ولسه مش ردوا عليا وكمان اتكلمت مع خدمة عملاء البنك وكانوا دايما بيطمنوني انها حاتترفض وحاترجع بس بعد ما فات وقت كتير بعتولي ايميل للإدارة علشان يعرفوا الفلوس دي رجعت ولا لسه محجوزة ولا مش وصلت البنك أصلا وطلبوا مني اتابع بعد كام يوم الرد .. فهل اللي بيحصل ده طبيعي في حالة زي دي يا أستاذ علي؟ ولو مش طبيعي ممكن تنصحني اتصرف ازاي لو سمحت؟
    شكرا جزيلا

    رد
    • مساء النور أ. هدى، بداية بعتذرلك جدًا على التأخير الطويل دا في الرد،

      زعلت لما سمعت عن تجربتك، ولكن فعليًا مفيش أي مشكلة الحمد لله لأنها هتاخد 5-7 أيام عمل علشان توصل حسابك اللي عليه البطاقة المنتهية، وبعدها ههيتم رفضها بشكل تلقائي وبالتالي هتاخد 5-7 أيام عمل كمان علشان ترجع حسابك في باي بال، يعني المفروض إن دا يتم في مدة أقصاها 14 يوم، لو كان تم 23 يوم ولسا الفلوس مرجعتش في الحالة دي إنتي عملتي الصح بإنك تواصلتي مع البنك وباي بال أتوقع وأتمنى كذلك إنها تكون رجعت في خلال الفترة دي.

      منتظر جدًا أعرف إيه اللي حصل معاكي في خلال الأسبوع دا.

      رد
      • مساء الخير أ. علي
        شكرا على ردك واهتمامك، الوضع ما زال على ما هو عليه للأسف..
        باي بال ردوا عليا بصباح الخير وقالولي ان رسالتك حايترد عليها لما يجي دورها في الرد، والبنك كل ما اتصل بيهم يبلغوني ان الادارة ردت بإن الموضوع مازال تحت التحقيق ومفيش معلومة مؤكدة الفلوس فين لحد دلوقتي .. ولما حكيت لصديق في خدمة عملاء احد البنوك قاللي ان الموضوع لما بيوصل للإدارة بياخد 50 يوم عمل علشان يعرفوا الفلوس فين بالظبط واحتمال ساعتها انهم ينزلوا الفلوس على حسابي في البنك ( اتمنى ذلك ) ومش يرجعوها تاني باي بال لو كانت دي رغبتي.. وانا لحد دلوقتي مش عارفة ايه اللي حايحصل.. بس الكل بيطمني الحمد لله ويقوللي ان مفيش فلوس بين البنوك بتضيع ومصير الفلوس حايبقى في واحد منهم في الآخر بس لما بيبقى فيه مشكلة في مسار التحويل الموضوع بياخد وقت وجهد زيادة، لأن المفروض وزي ما حضرتك قولت ان الموضوع في الظروف العادية بياخد 14 يوم عمل وترجع الفلوس مكانها.
        وان شاء الله لو فيه جديد حابقى ابلغ حضرتك بيه ..
        تحياتي

        رد
        • مساء النور أ. هدى،

          دا واجبي بكل تأكيد، للأسف واضح أن الموضوع هيكون فيه حبة تعطيل ولكن من ناحيتي متأكد إن مينفعش بأي حال من الأحوال الفلوس مترجعش سواء لباي بال أو لحسابك البنكي، وغالبًا أتمنى إن باي بال يكون ردهم أسرع من البنك وإنها ترجع حسابك في باي بال لأن دا بيكون حال أي عملية معلقة إنها بترجع المصدر فا إن شاء الله باي بال يردوا عليكي قريب ويرجعوا حسابك مرة تانية، وبالتأكيد هكون سعيد إني أعرف منك أي تطورات في أي وقت.

          رد
          • مساء الخير أ.علي
            الحمد لله استلمت فلوسي النهاردة بشيك من احد فروع البنك بعد انتظار شهر وعشرين يوم بالظبط. بس الحمد لله ان الناتج خير وكانت كمان المفاجأة بالنسباللي اني استلمت الفلوس بسعر صرف بنك لوكسمبرغ زي ما كنت بستلمها بالكريدت كارد، تقريبا 16.35ج للدولار.
            متشكرة على اهتمامك انك تعرف ايه اللي حصل معايا وانتظارك ردي.
            ويا رب يكون السحب لسة شغال على الفيزا الديبت وما يحصلش زي اللي حصل زمان واللي يعرفه الناس القديمة في العمل اون لاين زيي.
            لأن أصلا الطبيعي في بنك QNB هو السحب على الفيزا الدبيت مش الكريديت واللي كان مماثل ليه هو بنك HSBC في السحب على بطاقات الحساب مباشرة بس الجميع كان بيفضل البنك القطري لأن بنك HSBC من البنوك اللي مصاريفها عاليه وخدمة العملاء فيها مش مثالية. بس للأسف بعد مازادت احتمالت غسيل الأموال وتمويل الإرهاب من الخارج، ابتدى البنك المركزي في مصر يتشدد بشكل كبير مع مسحوبات باي بال وأصبح البنك يقبل التحويل شهر ويرفضه عشرة ده غير قفل البطاقات وسمعت ان فيه حسابت كاملة اتقفلت وفي الأغلب ان الحسابات دي كانت خاصة بالوسطاء الماليين اللي كان بيسحبوا مبالغ كبيرة بالطبع، فالبالتالي الفريلانسر وقتها صرفوا نظرهم عن البنك القطري وابتدوا يدوروا على حلول أخرى.
            فياريت الأمر المرة دي يكون مستقر اكتر من الأول ويغنينا عن مشكلة تصفير البطاقات الائتمانية وفوايدها والعمولة الكبيرة على السحب النقدي.
            وياريت حضرتك تطمني ايه آخر الأخبار لأني ناوية أحاول أسحب على الديبت المرة دي ان شاء الله. وايه هي أسوأ العواقب لو البنك كان رافض الموضوع ده بالنسبة للحساب بتاعي.
            شكرا جزيلا

          • مساء النور أ. هدى، في البداية اسمحيلي أعتذرلك جدًا لتأخري في الرد طول الفترة دي لإنشغالي ببروجيكت فريلانس ويكي.

            أول حاجة انا فرحت جدًا لما عرفت إنك استلمتي فلوسك الحمد لله ودا كان المتوقع بالنسبالي فعلًَا، وكويس جدًا إنها كانت بالريت دا الريت حاليًا مش بيوصل 16 في أحسن الأحوال واضح إنها كانت تأخيرة فيها خيرة فعلًا!

            إطلاقًا انا اللي متشكر على مشاركتك التجربة دي وفعلًا كنت مهتم جدًا أعرف منك أكتر وفرحت لما أتحلت كأنها كانت مشكلتي والله. بالنسبة للسحب فهو فعلًا بالنسبالي على مدار 3 سنوات محصلش أي مشكلة تذكر والشهر دا كذلك السحب تم بدون أي مشاكل من QNB، وسعيد بمعرفة رأيك في بنك HSBC هو بالنسبالي أسوأ بنك ممكن تتعامل معاه مصاريفه مبالغ فيها، خدمة العملاء هي الأسوأ، وفترات الإنتظار بين العمليات طويلة جدًا يعني تحويل بسيط لبنك آخر بياخد 5 أيام! الغريبة إنه سمعته الدولية هي الأسوأ كذلك بعد فضائح التعامل مع الكارتيل وإنه تم تسميته ببنك الكارتيل بسبب الفضائح دي.

            للأسف فعلًا مؤخرًا بسبب الشمول المالي وبعض العوامل التانيلة الوضع مبقاش مستقر بشكل عام خصوصًا زي ما ذكرتي بعد ظهور شركات الوساطة والسحب المتكرر وخلافه، ولكن شخصيًا شايف إنه إن شاء الله مفيش مشكلة من ناحية بنك QNB لو الحساب شخصي والتعاملات اللي عليه شخصية لأن مسئول حسابي برضه كان قالي حاجة مشابهة لما حصل إختراق من فترة لبعض الحسابات عندهم ومتوقعش يكون في خطر على الحساب إن شاء الله، ولكن لو هيكون في بديل ففي الوقت الحالي البديل المتاح هو كارت EasyPay من البريد المصري.

            أتمنى دي تكون آخر مشكلة تواجهك في سحب مستحقاتك إن شاء الله.

  • انت كلامك ده ساعدني جدا و وفر عليا وقت و مجهود انا كنت هعمل easy pay بس حاليا في مشكله فيها فمكنش قدامي طريقه غيرها علشان انا طالب و كنت فاكر انو لازم credit و كلمت كذا بنك و كلو بيقول لازم credit فلما شوفت كلامك عملت الحساب وانا طالب و عندي ١٦ سنه فكان youth و انشاء الله هجرب اسحب بعد اسبوع واتمني انك تبقا تتكلم عن مشكال الfreelancing الي غالبا الناس بتواجها زي طريقه ان حد يقبلك و تشتغل فلو اعرف ايه الخطوات الي امشي عليها

    رد
    • سعيد بمعرفة إن التجربة فادتك يا أحمد وسعيد اكتر إني عرفت إنك عملت حساب في السن دا ما شاء الله، منتظر الخبر الأحلى وهو إنك سحبت رصيدك من PayPal بدون مشاكل. وهتلاقي فعلًا حلول لمعظم المشاكل دي في قسم العمل الحر في المدونة يا أحمد أنصحك تتطلع عليها.

      رد
  • السلام عليكم يا علي
    ماشاء الله كلامك منسق جدا وجميل وفهمت المراحل اللي مريت بيها بطريقه مبسطة وتسلم على المعلومات الجميله دي بجد
    ..
    حابب بس اسأل حضرتك سؤال
    دلوقتي انا فلوسي كلها موجوده ع فريلانسر وقالها فتره وكل مره بتزيد ومش عارف احبها للأسف لاني مش معايا حساب بيبال وربط حساب بيبال باسم شخص تاني بموقع فريلانسر ومش موافقين يبعتو عليه
    الخلاصة.. انا عاوز اجيب فيزا qnb واربطها ببيبال واربط بيبال بموقع فري لانسر
    حضرتك بقا تنصحني بانهي نوع فيزا ديبت كارد بالظبط
    في البلاتنيوم وفي الكلاسيك من الديبت كارد
    مش هتفرق اعملها بكام المهم أنهي الأفضل ومتتعبنيش وتكون سهله معايا واعرف اسحب منها من بيبال
    وشكرا جدا لحضرتك مره تانيه

    رد
    • وعليكم السلام ورحمة الله وبركاته يا محمود،

      سعيد بمعرفة الرأي الجميل دا يا محمود أشكرك، بالنسبة لسؤالك يا محمود أعتقد مفيش أي مشكلة تعمل حساب خاص بيك على باي بال كونه مجاني تمامًا وهتلاقي كل التفاصيل في المقال دا، أما بالنسبة لنوع البطاقة فهي بطاقة Debit من أي نوع لو قدرت تجيب بلاتينوم وجولد يبقى ماشاء الله لكن في العادي كلاسيك هتفي بالغرض.

      بتمنالك كل التوفيق، وبعتذرلك إني سمحت لنفسي بتعديل تعليقك وحذف اللقب، انا شخص بسيط وبحب أتنادي بأسمي بدون حاجة قبله أو بداله.

      رد
  • مساء الخير يا علي
    النهاردة ولله الحمد وصلني ايميل من باي بال بيقول انه نجح السحب من باي بال على الفيزا ال debit لبنك QNB بس طبعا العملية لسه مش ظهرت في حسابي زي ماحضرتك عارف، بس أنا حصل معايا شيء غريب جدا أول مرة أشوفه على حسابي في باي بال لدرجة أني غمضت عيني وفتحتها علشان أتأكد اني مش بحلم ولا حاجة فاقولت لازم أشارك حضرتك والمتابعين فيه…
    فوجئت بإن الرصيد مسحوب بالجنيه المصري ؟!!!
    و المفجأة الأكبر كانت لما بصيت على سعر الصرف اللي تم بيه التحويل لاقيته 15.12 للدولار !!!!
    وده طبعا سعر صرف مش موجود على مستوى العالم، يعني بدل ما يحول الرصيد بسعر صرف زيادة أكتر من خمسين قرش زي ما انا متعودة مع البطاقات الكريدت حول بسعر صرف أقل من خمسين قرش تقريبا وكان سعر الصرف في البنك ساعتها 15.6.. يعني حوالي جنيه فرق في سعر الصرف تقريبا بين الكريدت والديبت !!
    وطبعا الموضوع ده حيرني أوي ومش سكت وبدأت أبحث في سياسات باي بال.. واكتشفت ان باي بال بيخصم مصاريف تحويل عملة 3% بيقتطعها من سعر الصرف نفسه .
    السؤال بقى هنا اللي انا مش عارفة اجابته هو ايه اللي يخللي باي بال يحول العملة المرة دي ؟ وايه كانت الضرورة اللي لازم يتم فيها تحويل العملة ؟
    بالذات اني شوفت المرفقات اللي حضرتك رافعها واللي بتقول انك بتسحب على حسابك بالدولار عادي زي الفيزا الكريدت !!
    فياترى ده حصل ليا لوحدي ؟ ولا دي سياسة جديدة من باي بال في عمليات السحب ؟
    يا ريت الاقي رد عند حضرتك أو عند أحد المتابعيين للموضوع .. في كل الأحوال الحمد لله الوضع أفضلي من السحب عن طريق وسيط (عمولة 6%) أو عن طريق الكريدت (تصفير البطاقة الاجباري والسحب النقدي بعمولة 2.5%) بالرغم من الاقتطاع اللي حصل .. بس كل المشكلة اني عاوزة أفهم بس مش أكتر…
    شـــــــــــــــــــــــــكرا

    رد
    • على فكرة يا أستاذ علي.. بنك QNB حديثا أعلن بشكل رسمي عن تحويل الأموال في الاتجاهين وده من خلال الخدمات المصرفية على الموقع الرسمي .. خدمات باي بال
      https://www.qnb.com/sites/qnb/qnbqatar/page/ar/arpaypalservices.html
      انا قريت البيدج كذا مرة قبل كدة بس المرة دي اكتشفت انهم اضافوا جزئية امكانية السحب من رصيد باي بال على الحساب البنكي عن طريق بطاقات الائتمان والخصم (ايهما تفضل)..
      وتحويل الأموال ده كان في بداية التعاون (الشكل المعلن مش اللي حاصل فعلا) في اتجاه واحد بس من خلال خدمة تعبئة رصيد باي بال من حسابك البنكي وارسال الأموال الى حسابات باي بال لأشخاص آخريين.
      انما موضوع السحب ده دلوقتي أصبح بشكل علني وصريح.
      مبرووك للجميع بس ربنا يهديهم ويستمروا =)

      رد
    • مساء الأنوار يا هدى، بعتذر جدًا على التأخير المبالغ فيه من ناحيتي للأسف.

      للأسف اللي قولتيه دا حقيقية اتفاجئنا بيها كلنا يا هدى، دي ساسية جديدة فعلًا ولما تواصلت مع باي بال وضحوا أنها سياسة جديدة وضعتها بعض الدول إن التحويل ليها يكون بالعملة المحلية ليها، شخصيًا مش مقتنع بالإجابة دي ولكن بما إنه من ناحيتنا كبنك مركزي او حتى بنوك مفيش أي توضيح للسياسة الجديدة دي فسمحت لنفسي أفترض إنها ساسية وضعتها باي بال نفسها.

      فعلًا سعر الصرف كان 5.12 ودا رقم قليل مقارنة بسعر الصرف الرسمي والحقيقة معرفش باي بال قرروه على أي أساس لأنه حتى مش أقل سعر صرف في الشهر الحالي، ولكن شخصيًا الموضوع مش بيمثل أزمة كبيرة لأنه زي ما وضحتي أثناء كلامك هي في الأخير أقل طرق السحب تعقيد وأقلها عمولة، وبالنسبالي الراحة أهم من معدل الصرف على كل حال ولكن دا مش شيء مبشر في الحقيقة، أتمنى أكون ساعدتك تفهمي أكتر باللي عرفته في الموضوع.

      أما بالنسبة للخبر اللي شاركتيه يؤسفني الفت نظرك إنك في النسخة القطرية من الموقع والخدمة دي بيتم تقديمها لدولة قطر فقط في الوقت الحالي، وإنها مش موجودة في مصر.

      ولكن في قطر -بناء على كلام أحد أصدقائي هناك- مسموحلهم استخدام رصيد باي بال فقط ومش مسموحلهم سحبه، يعني عكسنا في مصر، بقدر ما دا يبدو غريب بقدر ما أكدلي المعلومة كوني بتعامل معاه في مدفوعات كتير عن طريق باي بال، يعني الوضع في مصر أفضل، مش عارف هل فعلًا أتمنى الخدمة دي تتاح في مصر قريب ولا لأ.

      ولكن كل الأحداث دي لا تقلل من إن بنك QNB هو أفضل بنك في شيء وإنه الوسيلة الأفضل في التعامل مع باي بال.

      رد
      • مساء الخير
        طبعا ردك أفادني كتير بالذات اني عرفت ان مش أنا لوحدي اللي حاصلها كدة وان دي سياية عامة ع الجميع.
        ودي تقريبا سياسة تحويل العملة عند الضرورة واللي عمولتها 3% مقتطعة من سعر الصرف زي ما هو مذكور على موقع باي بال نفسه.
        وفعلا لو حسبت الفرق بين سعرصرف باي بال وسعر صرف البنوك المحلية في نفس التوقيت حاتلاقيه 3% فعلا.
        ع العموم انا بالنسباللي ما زال الأفضل لو تم التحويل بالفعل لأن للأسف الفلوس لسه مش ظهرت في رصيدي لحد دلوقتي خالص بأي شكل من الأشكال ولا حتى كرصيد معلق،
        فإن الموضوع مش نجح معايا لا قدر الله حاضطر أرجع لسياستي القديمة تاني وهي أني أستعمل البطاقة الكريدت في تفعيل الباي بال وتلقي المبالغ الصغيرة اللي بتجيللي من أفراد وأجمعهم وأسحبهم كل كام شهر على الكريدت بعد عملية التصفير المستفزة لتلافي عمليات الحظر اللي بتحصل بتحصل كل فترة. والجزأ الأكبر من الدخل عن طريق المواقع والشركات أسحبه بشكل شهري عن طريق وسيط.
        فاكنت حابة انك تشاركني رأيك في شركة الوساطة دي واللي اتعرفت عليها بالصدفة مؤخرا..
        اسمها شركة Pay EG
        وده اللينك بتاعها
        https://pay-eg.com/
        بتفتح حساب ع السايت بتاعهم وبتستعمل حساب الباي باي بتاعهم مع الشركات والمواقع.
        وبتروح الفلوس على حسابك عندهم بعد ما بتبلغهم بتفاصيل العملية كرصيد محتمل.
        وبتقدر تسحب أموالك بسعر صرف البنك الأهلي المصري في يوم السحب وبعمولة 1.5% بس مش 6% زي وسطاء تانيين ولا حتى 4 كمان.
        أنا شيفاها أفضل الحلول وأرخصها ان ما نفعش السحب على الحساب مباشرة وكمان نص العمولة اللي فرضها علينا باي بال مؤخراَ.
        يا ريت حضرتك تفيدني برأيك في الموضوع ده وأكيد حاتفيد ناس تانية مهتمة.
        وشكرا جزيلا لمجهودك ووقتك

        رد
        • سعيد بمعرفة دا يا هدى، وبالمناسبة انا بشاركك نفس الشيء إن الرصيد مظهرش في حسابي البنكي حتى الآن كذلك، المفروض إن المعاملة في العادي كانت بتحصل بعد 3 أيام عمل وحاليًا اليوم السابع وهو المفروض أقصى مدة. هتابع معاهم المشكلة دي بكرا إن شاء الله وأبلغك لو في أي جديد ناحيتها.

          جميل بالنسبالك إنك عندك وسيلة تانية زي الكريديت، أنصحك كمان تستخرجي بطاقة إيزي باي كحل بديل، كثرة الحلول حاجة كويسة بكل تأكيد وبالحديث عنها أشكرك على مشاركة PayEG تبدوا بالنسبالي حل جميل كذلك رأيي الشخصي هو إني مش بفضل أتعامل مع أي وسطاء أو ما شابه في حاجة زي كدا، ولكن قد تكون هي الملاذ الآمن لو حصل أي مشكلة سواء في سياسات باي بال الجديدة أو في البنوك، ربنا يسهلنا كل خير إن شاء الله دعواتك.

          رد
  • ان شاء الله كل خير .. ربنا ييسر أمورنا جميعا.
    أنا كمان كان المبلغ بيوصل في حساب بطاقة الائتمان بعد 3 أيام تقريبا من السحب، لعل المانع يكون خير، أنا بقول ده ممكن يكون تابع للسياسة الجديدة للتحويل بالمعملة المحلية والله أعلم.
    وخاللي بالك النهاردة مش كان السابع ده لسه خامس يوم عمل لأن الجمعة والسبت أجازة.
    ياريت تبلغني بإيه اللي حصل معاك لما تكلم خدمة العملاء وان شاء الله خير.
    تحياتي

    رد
    • اللهم آمين يا هدى،

      بالفعل المعاملة تمت إمبارح واللي وفقًا لتصحيحك لحساباتي كان اليوم السابع، كوني شخص إيجابي وبشوف نص الكباية المليان فأنا ممتن إن العملية تمت بدون مشكلة، مضطريتش أتواصل مع خدمة العملاء ولكن إن شاء الله ممكن أتواصل معاهم الشهر القايم لو كان في مشكلة في الريت أو ما شابه وإن لم أكن مهتم بس علشان أعرف أكتر، وبالتأكيد هشارك معاكي أي جديد.

      رد
      • مساء الخير
        الحمد لله ان فلوسك وصلت، أنا كمان وصلتني امبارح كرصيد متاح وبعدين معلق وفي الآخر فعلي كله في يوم واحد بدل من ثلاث أيام على الأقل لأنه أصلا كان آخر يوم لانهاء العمليه، ممكن يكون التأخير ده علشان احنا في شهر تقفيل حسابات ختامية كل عام وانت بخير ..
        الله أعلم ، يا رب تكون دي بقى آخر الأحزان وباي بال مش يتحفنا بسياسة جديدة .
        شكرا لأهتمامك وعام سعيد بإذن الله.

        رد
  • طيب السلام عليكم..
    كنت عايزه اسأل حضرتك سؤال أنا متخرجة من سبع سنين ومش موظفة ممكن أفتح حساب توفير في بنك QNB

    رد
    • وعليكم السلام ورحمة الله وبركاته يا تسنيم،

      للأسف لو مش طالبة ومش موظفة هيكون صعب، ولكن في حل تاني وهو إنك تفتحي حساب بكشف حساب ليكي في بنك آخر بمعني إن لو عندك حساب بنكي في بنك آخر ممكن بكشف حسابك تفتحي حساب توفير في بنك QNB عادي يا تسنيم.

      رد
  • شكرا انك افدتنا..
    معلش كنت عايزه اسألك علي حاجه انا روحت النهاردا لبنك QNB ودخلت لموظف وقولت له إني عايزه اعمل حساب توفير بلس وشاف ورق الوظيفة ولما شافهم قالي انت هتعملي ايه بالحساب قولت له هحط فيه فلوسي وكمان هيتبعتلي من PayPaL قالي لازم يكون في إثبات علي الفلوس الي هتجيلك من بره
    معلش عل التطويل بس بعد كده في يوم تاني روحت ودخلت عند موظفة قبلت إني أعمل حساب في البنك.
    وعايزة أعرف لازم أعمل حساب جاري في بنك QNB غير حساب التوفير ولا مش لازم وحساب التوفير بلس فقط ينفع يربط مع Pay PaL ويسحب

    رد
    • عفوًا يا مريم دا واجبي،

      بالنسبة للموقف الأول مفيش أي مشكلة دا كلام بيقوله الموظف لانه مش فاهم طبيعة الإستخدام مش أكتر، وأعتقد هو بيتكلم على التحويلات البنكية من الأشخاص. جميل إنك عملتي حساب توفير بلس في الحالة دي مش هتحتاجي لحساب جاري لو دا إستخدامك بشكل أكبر وهتقدري من خلاله تستقبلي من PayPal بشكل طبيعي جدًا.

      رد
  • norhan abdelnaser
    يناير 16, 2021 12:33 ص

    جزاك الله خيرا على افادتك لينا وبجد مقال مفيد جدا وحقيقي استفدت كتير
    انا بس عندي استفسار انا عملت زي ما قولت فعلا وروحت بنك qnp وقولت للموظف عايزة اعمل حساب توفير قالى عشان انتي عندك 19 سنة هيتعملك حساب قاصر واقصى حد للسحب من الحساب ف الشهر هوا 4000 جنيه ! ساعتها اتصدمت وكمان عشان افتح الحساب بالف جنيه واقدر اسحب الالف عادي ف اي وقت ودي لفتح الحساب بس طبعا اتصدمت تاني لاني كنت فاكرة ان الطلبة زي ما قولت بيفتحو الحساب ب 150 جنية تقريبا هوا طبعا شاف الكارنية وعرف اني طالبة قالي لا هنفتحلك حساب قاصر ولما تتمي 21 سنة الحساب هيبقى حساب توفير عادي وتقدري تحصلي على كل مميزاته طبعا زعلت جداا وقولت خلاص مش هعمله لاني مش هستفيد حاجة
    عايزة اعرف ازاي حضرتك عملت حساب طلبة لانه على كلامة انه مفيش الكلام دا

    رد
    • أهلًا بيكي يا نورهان، بالنسبة للكلام اللي قاله الموظف من حيث نوع الحساب دا صحيح جدًا الحساب بيكون حساب قصّر وبيتم ترقيته لما توصلي 21 سنة، أما بالنسبة للحد الأدنى لفتح الحساب زي ما وضحت في المقال هو قابل للتغير في أي وقت وأعتقد إنه فعلًا الحد الأدني حاليًا هو 1000 جنيه فعلًا زي ما وضحلك، المشكلة هي في كلامه عن الحد الأدني للسحب من الحساب، معرفش إذا كانت دي سياسة جديدة للبنك أو لأ ولكن في حالتي دا غير صحيح بالمرة.

      ولكن على جانب آخر إنتي هتستفادي كتير جدًا يا نورهان بغنك تفتحي الحساب لانك لما تتخرجي إن شاء الله مش هتقدري تفتحي حساب بنفس السهولة دي، نصيحتي هي إنك تفتحيه ومتقلقيش من موضوع حد السحب، لأنه في أسوأ الأحوال لو مكنش مفيد فهو بالتأكيد مش هيكون مضر وفي مرحلة ما في حياتك هتحتاجي إن يكون عندك حساب بنكي وبالتالي من الأفضل إنك تفتحيه وهو سهل يتفتح.

      رد
  • انا كان معايا فيزا ايزى باى وبسحب من عليها ضاعت وقفتها وعملت واحده جديده مش راضيه تتربط ف بايبال سالت قالوا الاصدارات الجديده من الكروت مش بتتقبل القديمه شغاله عادى
    انا عايز اعرف اعمل فيزا من بنك ايه عشان اربطها ببايبال واقدر اسحب عليها من غير مشاكل
    انا 28 سنه

    رد
    • أهلًا بيك يا محمود، دا حقيقي للأسف بخصوص بطاقات إيزي باي الجديدة، البطاقة اللي تقدر تستخرجها وشغالة بدون أي مشاكل هي بطاقة Visa Debit من بنك QNB وبيتم إصدارها على حساب توفير بلس سواء بالعملة المحلية أو بالعملات الأجنبية.

      رد
  • بناء علي ترشيحك انا اشتركت اونلاين عن طريق موقع البنك و البنك مقدم خدمة اسمها معاك اونلاين و بتفتحلك حساب توفير و بتاخد فيزا Debit جولد QNB بيتجيلك لحد باب البيت و بتروح البنك مرة واحدة بس تمضي بدون انتظار و الميزة ان مفيش حد ادني لفتح الحساب ، انا عملت ايداع ب 200 جنيه بس!
    اول م تطلع الفيزا هجربها و ربنا يكرم.

    رد
    • ماشاء الله يا حسن دي بالتأكيد تجربة كانت مميزة جدًا! أتمنى البطاقة توصلك بسلام ومتحمس جدًا تشاركنا رأيك بعد استخدامها.

      رد
      • هي مش تجربة مميزة ، بالعكس دي تجربة بمقاييس اجنبية!
        ال Debit وصلتني بعد يومين من اليوم ال مضيت فيه في البنك و فعلتها عن طريق خدمة العملاء بعد تفعيل الخدمة الصوتية و نزلت عملت رقم سري في اقرب QNB ATM و بكده البطاقة كانت جاهزة لأي عملية. بمجرد اني عملت لينك م بين البطاقة و PayPal ، جاتلي رسالة العملية في نفس اللحظة علي الموبايل و فيها الكود الخاص ب PayPal و بكده بقت Verified و سحبت الفلوس بعدها علي طول و ده كان يوم الخميس. الفلوس ظهرت في الحساب يوم التلات النهاردة بدون اي مشاكل!
        شكرا ليك لان مقالك هو ال شجعني علي الخطوة دي 🙂

        رد
        • ماشاء الله يا حسن مبروك على عملية الإستلام، انا سعيد جدًا بمعرفة تجربتك مع بنك QNB وأتمنى تكون مشجعة لأشخاص أكبر إنهم ياخدوا نفس الخطوة ❤

          رد
  • شكرا يا علي عاووز اعمل حساب qnb لو ممكن تفاصي اي حساب واي كارت اقدر اسحب عليهم من بايبال لان ديبت تبعcib مش شغاله بايبال معايا

    رد
  • كل المعلومات ال انت محتاجها هتلاقيها في التعليقات ال فوقك! بس خليني اساعدك و اقولك انك ممكن تشترك اونلاين عن طريق موقع البنك نفسه من خلال اختيار “انضم لعملاءنا” و ده هيمنحك حساب توفير و بطاقة Visa Gold تقدر تستخدمهم علي PayPal بدون مشاكل

    رد
    • انا رحت البنك وعملت حساب توفير بلس قال مينفعش فيزا جولد لازم تعمل شهاده ب10000 عملت الكلاسيك هل هتنفع

      رد
  • اه هتنفع عادي بس كان الأفضل عن طريق موقع البنك عشان خدمة معاك اونلاين دي حصرية علي الموقع فقط و مش بيبقي في حد ادني او اي مصاريف ، اقرا الكومنتات ال فوق هتعرف اكتر!

    رد
  • شكرا جدا يا حسن انا مدفعتش اي حاجه في البنك بس خير هحاول اطلع الجولد بعد فترة

    رد
  • رغدة أسامة
    مارس 29, 2021 7:09 م

    شكرا جدا على المقال والمعلومات المفيدة وتنظيم المعلومات…
    كنت عايزة اسأل هل حضرتك عندك علم انه ممكن استقبل على حساب debit البنك الأهلي

    رد
  • شكرا لك على المقال الرائع والاهتمام بالرد على التعليقات كل هذه الفترة
    وأنصح بقراءة الردود ففيها تحديث للمعلومات وفائدة توازى فائدة المقال

    اسمح لى بسؤال وهو أنى بالفعل أربط بين حسابى فى الباى بال وبين qnb من فترة طويلة ولم تواجهنى أى مشكلة حتى أول إبريل
    للتوضيح أنا كنت أربط الكارت الخاص بحساب الجنيه وكان يتم التحويل الاوتاماتيكى بداية كل شهر
    ثم فتحت حساب بالدولار من 6 أشهر وربطه البايبال بالفيزا الخاصة بالدولار وأصبح التحويل يأتينى بالدولار شهريا كما هو بدون أى خصم وبتلقائية وسهولة حسدت عليها من موظف البنك نفسه

    وفوجئت فى أول إبريل أن التحويل التلقائى تم إرساله من باى بال بالجنيه المصرى وليس بالدورلار كالعادة ثم قام البنك بتحويله للدولار لوضعه فى حساب الدولار لأنه الحساب الافتراضى
    فطبعا تم سحب 720 دولار من باى بال وصلوا لحسابى 690 دولار تقريبا
    وده عكس ما كان يحدث فى ال5 شهور الماضية تماما
    كان بيتسحب 500 دولار مثلا يصلوا 500 دولار كاملين

    كلمت خدمة عملاء باى بال فأبلغونى أن حسابى رفض قبول التحويل بالدولار !!!
    وكلمت البنك أخبرنى أن حسابى بالدولار كيف سنرفض التحويل ليه بالدولار وحتى الفوس لما اتحولت خلينهالك بالدولار

    طبعا أنا فى حيرة من أمرى من اللى بيحصل
    ما زلت فى محاولات مع خدمة عملاء باى بال إنهم يأكدولى إن حسابى هيقبل التحويل استقبال التحويل الدولار علشان الشهر القادم لربما تكون حادثة عابرة ومشكلة مؤقتة وتتحل ولكن لم أتلق التأكيد منهم حتى الآن

    أعتذر عن الإطالة لكن كنت حابب أخد رأى حضرتك فى الموضوع ده وهل تنصحنى بحاجه أعملها من تجاربجك فى الأمر
    وجزاك الله خيرا

    رد
  • ما هو أقصي مبلغ استطيع سحبه من بايبال علي qnb

    رد
  • معايا بطاقة خصم مباشر من البنك الأهلي وكملت التسجيل بيها وتم .. حولت الفلوس من حوالي شهر وإلى الان مفيش اي رسالة اوتاكيد او حاجة تدل ان الفلوس اتحولت وحتى لو محتاجة اغير الفيزا ف مش عارفة ارجع الفلوس للباي بال تاني
    ايه الحل الممكن

    رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة

Spelling error report

The following text will be sent to our editors: