إزاي تخسر 3 سنين و8000$ على Upwork 1
العمل الحر
12 تعليق
4,256

5 دقيقة

إزاي تخسر 3 سنين و8000$ على Upwork

الفترة الأخيرة نسبة القبول في Upwork بقت ضعيفة جداً وخصوصاً لو كنت من مصر أو معظم الدول العربية (بعيداً عن الدول المحظورة تماماً زي سوريا) والأغرب هو نسبة قفل الحسابات اللي زادت بشكل رهيب حتى علي أتفه الأسباب، انا متفهم تماماً إن Upwork بيحاولوا وقدروا فعلاً يكّونوا أفضل وأكبر مجتمع للفريلانسينج في العالم لكن على الجانب الآخر نجاحهم في كدا خلاهم بيتعاملوا بقيود وطريقة صعبة أكتر من اللازم، المقال دا فيه تجربة حقيقية هتعرف منها إزاي متضيعش وقتك وفلوسك ومجهودك في يوم وليلة خصوصاً لو هتشتغل علي Upwork.

من فترة قريبة وكان على غير العادة يوم لطيف قضيت معظمه برا، رجعت متأخر وكنت تعبان فقولت أرد على الرسايل قبل ما أبدأ جلسة قراءة عشان غالباً بقفل الفون لحد ما أخلص وبنام بعدها، اللي حصل إني إتفاجئت برسالة طويلة مفادها إن حساب صاحب الرسالة على Upwork أتقفل بعد سنتين شغل و+8000$ أرباح! وهنا بدأت القصة كلها.
الرسالة كانت من Mahmoud A. واللي أشتغل Interior & Architectural designer لمدة 3 سنين على Upwork قدر في آخر سنة منها يحقق 8000$ أرباح وكمان بقي Top-Rated.

السؤال الأهم ليه حسابه اتفقل؟ 

دا بياخدنا لبداية القصة وهي إن محمود كان عنده حساب قديم على Upwork عمل عليه بروجيكت واحد، بس كانت المشكلة وزي ما واضح في رسالة Upwork ليه في الصورة

 

إزاي تخسر 3 سنين و8000$ على Upwork 3
إن سبب قفل الحساب إنه كان بيبعت Proposals كتير واللي بيتقبل منها كان قليل لأنه غالباً وقتها كان لسا بيتطور أكتر، اللي حصل بعدها انه فضل فترة بعيد عن Upwork فترة وبعد الخبر دا بـ6 شهور الشخص اللي عمله الشغل وكان إسمه Alex R. كلمه بشكل مباشر علي Facebook إنه عايز يشتغل معاه مرة تانية، محمود شاف إنه مش صح يتعامل معه بشكل مباشر بعيداً عن Upwork خصوصاً ان العميل طلب كدا وإنهم اشتغلوا مع بعض فعلاً وبقي في بينهم ثقة والموضوع بالنسبة ليهم هما الأتنين أفضل من غير عمولات أو أي قيود من الموقع، -خليني أقول للأسف- محمود فضل أنه يتعامل معاه على Upwork علشان هو عرفه عن طريق الموقع وبالتالي دا الصح.

وهنا محمود عمل حساب جديد على الموقع بنفس بيانات حسابه القديم والعميل طلب منه ينتظر علشان البروجيكت هيتأخر كام شهر، هنا بقي محمود اشتغل على مشاريع تانية وفعلاً خلص 3 مشاريع بنسبة نجاح 100% ورجع كمل شغل مع العميل القديم وعملا تاني أكتر من الأول، وقرر أنه يوجه كل تركيزه على Upwork ويطور من مهاراته أكتر علشان يقدر يشتغل علي مشاريع أكتر وفعلاً اشتغل علي 15 مشروع بتقييمات معظمها 5 Stars ونسبة نجاح وصلت لـ94% وحقق أكتر من 8000$ أرباح وكمان أخد بادج Top-Rated في الموقع وبقي واحد من الأفضل في مجاله وكل دا في سنة واحدة من الحساب الجديد.

لحد هنا بقي من تقريباً شهر طلبوا منه تحقيق شخصية كأجراء روتيني، ومحمود بعتلهم تحقيق الشخصية وكان نفس اللي عمل بيه الحساب القديم، وبعتلهم مسج طويلة بيشرح فيها القصة دي كلها وليه هو عمل الحساب الجديد علشان كان قلقان إن الحساب دا كمان يتقفل، ودا كله واضح في الصور دي

إزاي تخسر 3 سنين و8000$ على Upwork 4


الرد على المستوي الشخصي كان صادم بالنسبالى من Boaz واللي قاله إنه مش صح يكون عنده أكتر من حساب على الموقع وإن دا مخال لقواعد الاستخدام ومش صح، وقاله إنه هيحّول الحالة للقسم المختص وهما هيشوفوا الموضوع.

إزاي تخسر 3 سنين و8000$ على Upwork 5

وجه الرد من Mary G أغرب من اللي قبله واللي بتقول فيه:

إزاي تخسر 3 سنين و8000$ على Upwork 6

انا بكلمك لأننا لاحظنا إن حسابك متصل بحسابات تاني على الموقع (تقصد الحساب القديم) وإن بنود الخدمة بتسمح بمستخدم واحد فقط لكل حساب، وحساب واحد لكل مستخدم. وإن وجود أكتر من حساب لمستخدم واحد (“حسابات متعددة”) أو أكتر من مستخدم في حساب واحد مش حاجة بيشجع عليها Upwork، وكمان دا ممكن يكون مربك بالنسبة للعملاء على الموقع. في الوقت الحالي، حسابك وأي حسابات تانية مرتبطة بيه هيبقوا في الانتظار. وإن خيار إعادة تنشيط حسابك مبقاش متاح وممكن منردش على أي طلب تاني في الموضوع دا

اللي كان واضح بالنسبالى لما شوفت الطلب دا وردهم عليه كان حاجة واحدة بس، إنهم مش بيتعاملوا مع مشاكل عملائهم بشكل H2H لأن مش منطقي إنهم من الرسالة دي كلها مياخدوش بالهم غير من نقطة إنه كان عنده حساب قديم خصوصاً إنه هو اللي قالهم كدا مش هما اللي لاحظوا أصلاً بجانب أنه وضح أكتر من سبب منطقي وإيجابي ليه هو عمل حساب جديد، لكن مكنش في أي مراعاة للأسف!

المهم إنه كان من الواضح علشان المشكلة دي تتحل يكون في تواصل مباشر معاهم بعيداً عن الـ Requests والـ emails لأن كلها بيترد عليها بطريقة غريبة ومش مقبولة بصراحة، تاني يوم بعد ما جمعت ورتبت الأحداث كلها، وبعد الاتفاق مع محمود قررت أكلمهم بنفسي علشان أوضح الموضوع بشكل أفضل وفعلاً اتصلت بالـ Customer Support وكلمني حد إسمه Jani فضلنا نتكلم لمدة 35 دقيقة

إزاي تخسر 3 سنين و8000$ على Upwork 7


وشرحتله الموقف بالظبط وبعتله رقم الطلب وهو بنفسه راجع القصة كلها، الغريب إنه طول المكاملة كان بيكرر نفسه الجملة

“أنا من خدمة العملا ومش من القسم المختص ومقدرش أساعدك أو أوعدك بأي حاجة”

ولما كنت برد عليه بأنه إيه البوينت من كلامنا لو مش هيقدر يساعدني وليه مفيش تواصل مباشر مع قسم الـTrust & Safety كان بيقولي هبعتلهم الكلام دا كله علشان يعيدوا النظر في حالتك  بعيداً عن كدا هو كان متعاون ومتفهم جداً الحقيقة، بعد تقريباً 24 دقيقة من الكلام والشرح والإقناع قال: “اسمحلي أسألك سؤال” قولتله: “أتفضل أكيد” فقالي: “انا لو كان عندي حساب وأتقفل فدا معناه أني مش فريلانسر كويس صح؟” وكان ردي ببساطة:

أتفق معاك، بس ليه لازم يكون دا السيناريو الوحيد؟ متفترضش وجود سيناريو معاكس بعيداً عن إن حد من الموقع طلب مني أشتغل معاه كمان، وهو إني كنت لسا في بدايتي وخبرتي مش قوية وبعد ما أتطورت أكتر وأخدت شهادات أكتر (وكنا بعتنا الشهادات كلها والإثباتات بالكلام دا) وبقي مستوايا أفضل عملت حساب تاني والدليل على كدا واضح وهو إني في سنة قدرت أحقق أكتر من 8000$ وكمان بقيت Top-rated

هنا بقي معرفش يرد وقالي فعلاً كلامك صح والوقتي انا فهمت الموضوع بشكل أفضل وهبعتلهم الكلام دا كله.

إزاي تخسر 3 سنين و8000$ على Upwork 8

وفعلاً زي ما واضح في الصورة إن Jani كتر خيره فهم الكلام دا كله وبعتهولهم في صيغة مختصرة وضح فيها الموقف بشكل أفضل. ودي كانت إضافة محمود وفيها الشهادات وحالة الحساب حالياً

إزاي تخسر 3 سنين و8000$ على Upwork 9

وجه الرد من Angel أغرب من كل الردود اللي سبقته واللي باختصار بتقول فيه إننا شركة خاصة ولينا الحق في تقرير مين اللي يقدر يشتغل على منصتنا وإحنا قررنا عدم مشاركتك، وإن القرار دا نهائي وغير قابل لطرح أي استئناف عليه وبنطلب منك بذوق إنك متكلمناش تاني!

إزاي تخسر 3 سنين و8000$ على Upwork 10

شخصياً انا اتعاملت مع الـ Customer Support الخاصة بمعظم الشركات اللي ممكن تكون تعرفها أو متعرفهاش وبعمل دا بشكل شبه يومي، وأقدر أقول عن ثقة إن خدمة العملا الخاصة بـUpwork واحدة من أسوأ 3 أتعاملت معاهم دا إذا مكانتش الأسوأ، بداية من الـskim reading للطلبات والرد عليها بشكل يخليك صعب تحدد اللي بيرد عليك دا شخص زيك ولا Autoresponder مروراً بصعوبة الوصول للدعم الفني في مكالمة (كلمتهم 4 مرات علشان أقدر أوصل لمكالمة مع حد) وصولاً للقرارات اللي فيها نوع من التسلط واللي واضح في التجربة كلها إن أنت كفريلانسر مش مهم بالنسبالنا!

الغريب إنه أثناء كل الأحداث دي عميل كان خلص معاه شغل وعمله تقييم 5 Stars!

إزاي تخسر 3 سنين و8000$ على Upwork 11
للأسف المشكلة متمش حلها والحساب أتقفل بشكل نهائي ومحمود حالياً بيبدأ من جديد في أكتر من مكان وبتمناله ربنا يكرمه ويوفقه، وشكراً ليه على موافقته على نشر القصة دي لأنها مهم يتم نشرها للتعلم بقدر الاستلهام من تطويره لوقته ووصوله للي حققه واللي أتوقع هيحققه كمان وأكتر إن شاء الله.

خلاصة القصة كلها في نصايح سريعة

أو خلينا نقول الدروس المستفادة من القصة دي ببساطة

1. قبل ما تبدأ تشتغل على أي موقع إتأكد إنك قريت كل حاجة خاصة بشروط الاستخدام وقواعد الموقع للتعامل والأهم تلتزم بيها علشان تتجنب تماماً أي مشاكل ممكن تأثر عليك مستقبلاً.

2. من الحاجات اللي دايماً بنصح بيها وهي إنك متحطش البيض كله في سلة واحدة علشان متبكيش على اللبن المسكوب! يعني ببساطة متخليش كل اعتمادك على موقع واحد بس أو مكان واحد بس بتشتغل فيه، مهم تنوع مصادر دخلك وشغلك مش بس علشان متخسرش كل حاجة لو لا قدر الله حصلت أي مشكلة في الموقع أو مشكلة ليك أنت في الموقع، لأ لأنه ببساطة انت متعرفش الخير فين فا أشتغل في أكتر من مكان بس خلي النسبة الأكبر من تركيزك في المكان اللي نجحت فيه أكتر.

3. من الوضح تماماً في التجربة كلها إنك تتجنب تعمل أكتر من حساب بنفس البيانات علشان كل المواقع والشركات مش بتحب دا وبتعتبره تضليل للمستخدمين وإساءة استخدام للخدمة.

4. الدرس الأهم وهو إنك متبدأش شغل وأنت في مرحلة التعلم أو لو لسا مش واثق من جودة شغلك، ممكن تشتغل بشكل محلي (وانا شخصياً بفضل دا) لكن إتأكد تماماً إن الشغل في مواقع زي Upwork بيكون ليه متطلبات عالية وصعب لو لسا بتبدأ فا خد وقتك كله بس المهم تبدأ صح ولما تكون مستعد.

5. طور نفسك باستمرار ولو حتى 10 دقايق في اليوم وبعد سنة هتتفاجئ بالمستوي اللي وصلتله وهتحقق حاجة كبيرة إن شاء الله.

وأخيراً مشاركتك للمقال ممكن تساعد كتير من الفريلانسرز يتعلموا من التجربة ويعرفوا أن مع الشغل المستمر والتطوير هيقدروا يحققوا أكتر من اللي ممكن يتخيلوه والأهم أنهم ياخدوا بالهم من الوقوع في نفس الأخطاء.

, ,

ما هو تقييمك لهذا المقال؟

إزاي تخسر 3 سنين و8000$ على Upwork الفترة الأخيرة نسبة القبول في Upwork بقت ضعيفة جداً وخصوصاً لو كنت من مصر أو معظم الدول العربية (بعيداً عن الدول المحظورة تماماً زي سوريا) والأغرب هو نسبة قفل الحسابات اللي زادت بشكل رهيب حتى علي أتفه الأسباب، انا متفهم تماماً إن Upwork بيحاولوا وقدروا فعلاً يكّونوا أفضل وأكبر مجتمع للفريلانسينج في العالم لكن على...
3.67 1 5 3
0 / 5 التقييمات 3.67

Your page rank:

هل وجدت هذا المقال مفيدًا؟

إزاي تخسر 3 سنين و8000$ على Upwork الفترة الأخيرة نسبة القبول في Upwork بقت ضعيفة جداً وخصوصاً لو كنت من مصر أو معظم الدول العربية (بعيداً عن الدول المحظورة تماماً زي سوريا) والأغرب هو نسبة قفل الحسابات اللي زادت بشكل رهيب حتى علي أتفه الأسباب، انا متفهم تماماً إن Upwork بيحاولوا وقدروا فعلاً يكّونوا أفضل وأكبر مجتمع للفريلانسينج في العالم لكن على...
4.78 1 5 23
هل أفادك المقال؟ شارك الفائدة ❤

12 تعليق. أضف تعليق

  • اولا حسبنا الله ونعم الوكيل
    ثانيا ان شاء الله ربنا هيوفقه وهيعوضه عشان هو شخص مجتهد في مجاله وربنا مش بيضيع تعب حد
    ثالثا ..يعني ايه اشتغل محلي ؟؟
    ازاي؟
    النقطة رقم 4

    رد
    • إن شاء الله ربنا هيوفقه أكيد لأنه شخص مجتهد وشغله مميز وأنا واثق أنه هيقدر ينجح في أي مكان وأي وقت.

      تشتغل محلي يعني مع عملاء محليين في بلدك أو برا بلدك بعيداً عن المواقع وبشكل، بالنسبة لنقطة رقم 4 ننصحك تقرأ مقال إزاي تتعلم أي حاجة في أقل من شهر

      رد
  • طيب انا حصل معايا نفس المشكلة السيناريو مختلف هل مفيش اى حل اني ارجع اشتغل تاني علي upwork ؟

    رد
  • ازيك يا علي عامل ايه يا رب تكون بخير،
    سؤالي: هل لو كان مسح الأكونت الأول بمجرد ما عمل التاني كان هيتفادى حصول الليلة دي كلها في المستقبل؟

    حاجة كمان: أنا شايف إنه غلط إنه اصر يرجع يتعامل مع العميل من خلال الموقع، العميل جاي يقلك نتعامل برة ف دي حاجة كويسة ليك وليه (إلا لو خايف من حفظ حقه) ف ايه رأيك انت؟

    رد
    • أهلًا بيك يا عمر، الحمد لله انا بأفضل حال وأتمنى تكون بحال أفضل وأسلم يارب.

      بالنسبة لسؤالك يا عمر فهو فعلياً مكنش عنده القدرة على كدا على ما أتذكر لأنه أتوقف.

      فعليًا وجهة نظرك تحترم جدًا يا عمر ودا اللي شخصيًا كنت هعمله خصوصًا لكونه عميل متكرر مش جديد، ولكن هو كان ليه رأي مختلف.

      رد
      • انا حسابي اتعلق بسبب البروفايل مش قوي وعدلته وزي ماهو الحساب متعلق ايه الحل

        رد
        • للأسف يا منى دي مشكلة العمل على Upwork الحل هو إنك تحدثي الحساب زي إنك تضيفي شهادات جديدة حصلتي عليها مؤخرًا، مهارات جديدة وخدمات أو أي حاجة تساعد في تقوية حسابك.

          رد
    • نعلش هو سؤال بره الموضوع شويه بس زي ما حضرتك قلت لازم نفهم قبل ما نشتغل انا للاسف في مشكله دلوق و بتمني حل ليها انا كل ال connects بتوعي علي upwork خلصو و مش هقدر اشتري هل كده خلاص مش هعرف اشتغل علي الموقع تاني ؟؟

      رد
  • Sid'Ahmed Aleyouta
    أغسطس 17, 2020 2:33 م

    لا حول ولا قوة الا بالله
    السلام عليكم اخوك من موريتانيا
    انا اعلمت حساب على اب ورك لكن ما قبلوه اظن بسبب البروفايل هل يمكن تعديله أقصد أن أضع شهادات وخبرات مو عندي عشان يقبلوه

    السؤال الثاني يعني مثلا حد دخل على اب وورك كي يتعامل مع مترجم ليش ما ايروح على القاموس وايترجم لنفسه بدون ما يدفع افلوس

    ارجو الإجابة وشكرا

    رد
    • وعليكم السلام ورحمة الله وبركاته أخي وأهلًا بكل وبكل أخواننا في موريتانيا ❤ بداية أسمحلي أعتذرلك على التأخير في الرد طول الفترة دي.

      بالنسبة لسؤالك عن عدم القبول على أب ورك دا أصبح شيء طبيعي في الوقت احالي، بالتأكيد أنصحك جدًا بإضافة خدمات مختلفة وشهاداتك وأي تغير يطرأ على حياتك المهنية وإن شاء الله هيتم قبوله.

      أما بالنسبة لسؤالك الثاني، دا بيكون ليه اسباب كتير زي أنه الترجمة هي مهارة معقدة أكتر بكتير من البحث في القاموس، وإن العملية دي بتاخد وقت طويل وبالنسبة لأغلب أصحاب الأعمال مش بيكون عندهم الوقت دا وبالتالي الأستعانة بمترجم متخصص بتكون منطقية أكتر.

      أتمنى أكون جاوبت على اسئلتك ولو عندك أي أستئلة أو استفسارات تانية هكون سعيد بالإجابة عنها في أي وقت.

      رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
34 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: