إزاي تتغلب علي مشكلة نقص العملاء
العمل الحر
6 تعليقات
1,960

9 دقيقة

إزاي تتغلب على مشكلة نقص العملاء

واحدة من مشاكل الفريلانسينج الأكثر شيوعاً هي مشكلة المد والجزر، إنك في بعض الأوقات بيكون عندك عملاء كتير جداً وفي أوقات تانية بيكون العملاء الحاليين قليلين جداً، إزاي تتعامل مع المشكلة دي؟ دا اللي هنعرفه في قصة هالة واللي هتكلم عنها في المقال دا.

بالأمس القريب وصلني سؤال جميل من هالة، مدرسة لغات من الجزائر، هالة طالبة في هندسة وبتستغل وقتها في تدريس اللغات كفريلانسر لزيادة دخلها وممارسة حاجة هي أكيد بتحبها زيها زي معظم الفريلانسرز اللي اختاروا يكونوا بيمارسوا شغلهم أثناء الدراسة.

مشكلة هالة

سؤالها أو مشكلتها الحقيقة كلنا بنمر بيها، وهي إن في فترات بيكون عندها عدد كبير من الطلاب وفي فترات مش بيكون في عدد كافي من الطلاب.
هالة بعد بحث في المشكلة لقت إنها بترجع لظروف مختلفة في دورة حياة الطلاب نفسهم مش في طريقة تدريسها لأنهم بيشكروا فيها جداً.

أعتقد هالة في المثال دا بتمثل كم كبير جداً من الفريلانسرز سواء في مرحلة البداية أو حتى فيما بعدها، وانا شخصياً كنت بتعرض أحياناً للموقف دا وبطبيعة الحال قدرت أوصل لحلول كتير ساعدتني أتخطي المعضلة دي وغالباً ما جدولي بيكون مشغول 3 شهور على الأقل، والسر في دا بسيط جداً فوق ما تتخيل، Marketing، قبل ما تعرف أكتر جهّز مشروبك المفضل وأستعد لرحلة تعلم أتمني تكون ملهمة ومفيدة.

إزاي تتغلب على مشكلة نقص العملاء 1

ابحث عن السبب مش المشكلة

اللي لاحظته إن هالة وهي بتتكلم عن مشكلتها اهتمت جداً بنتيجة المشكلة (واللي هي قلة عدد الطلاب أو العملاء في أوقات معينة) ومأخدتش بالها إنها مدورتش على السبب الفعلي للمشكلة بعيداً عن نتيجته، ودي حاجة بيقع فيها كتير من الناس في حل المشكلات. إننا أحياناً بنوجه النسبة الأكبر من تركيزنا على المشكلة ومش بناخد بالنا من السبب الفعلي ليها واللي لو تعاملنا معاه بحكمة وقدرنا نصلحه المشكلة نفسها هتتحل لوحدها.

السبب الفعلي هنا للمشكلة من وجهة نظري هو التسويق! تقريباً في كل مقال بكتبه برجع لنفس نقطة التنويه عن أهمية تعلم البيع والتسويق واللي ممكن تكون زهقت من كتر ما بتكلم فيهم بس صدقني هما أساس شغلك كفريلانسر (أو حتى مش فريلانسر) ومن غير الأتنين دول أنت بتضيع على نفسك فرصة دخل أكبر بنسبة 50% علي أقل تقدير.

المشكلة من منظور مختلف

عشان تفهم أنا اقصد إيه خلينا نصيغ المشكلة بشكل مختلف لأن كدا جوانبها هتبان بشكل أفضل، فلنفترض إن هالة (اللي بتمثلك كفريلانسر) فتحت ستور بتقدم فيه خدمة تدريس اللغة، في البداية عشان هالة أصلاً تقدر تختار المكان الصح للستور بتاعها لازم تمر بمرحلة إسمها Business Planning & Strategy واللي فيها بتحدد الخطوط العريضة لحاجتين أساسيتين:

  1. 1- المنتج أو الخدمة الي بتقدمها Product/Service

  2. 2- الفئة المستهدفة Target Audience أو العملاء المحتملين Potential Customers

إزاي تتغلب على مشكلة نقص العملاء 2

1- المنتج أو الخدمة اللي بتقدمها

هنا هالة المفروض بتعرف كل الجوانب المتعلقة بالخدمة اللي هي بتقدمها، وطبعاً لو رجعنا للنظرية العبقرية لـ Simon Sinek هتلاقي الموضوع بيتمحور حوالين 3 أسئلة بنفس ترتيبهم

  1. – ليه انا بقدم الخدمة/المنتج دا؟ Why

  2. – إزاي أقدر أقدم الخدمة/المنتج دا؟ How

  3. – إيه الخدمة/المنتج اللي انا بقدمه؟ What

وتقدر تعرف أكتر عن الكلام دا بالتفصيل في الـ Talk الرائع دا

وطبعاً أسئلة تانية هتساعدك في عمل Copywriting ذكي وفعّال لمنتجك أو خدمتك زي:

  • – إيه الحلول اللي الخدمة أو المنتج بتاعي بيوفرها للمستخدم؟
  • – إيه الفرق اللي الخدمة أو المنتج بتاعي هيعمله في حياة الفئة المستهدفة منه والعملاء المحتملين؟ وهكذا..

ودا بيقودك إنك تختار أفضل طريقة لكتابة الـ Copywriting الخاصة بيها، زي إن السؤال الأول هيقودك للكتابة بإستراتيجي PAS والسؤال التاني هيخليك تستخدم إستراتيجي BAB وهكذا.. دي طبعاً أمثلة بسيطة لأن مش الهدف من المقال إني أعملك Copywriting بس هتعرف ليه بنهاية المقال.

إزاي تتغلب على مشكلة نقص العملاء 3

بعد كدا المفروض إنك بتحدد 4 نقاط أساسية إسمها SWOT Analysis واللي بتحدد فيها:

    1. 1- نقاط قوتك. Strengths

    2. 2- نقاط ضعفك. Weaknesses

    3. 3- الفرص المتاحة ليك. Opportunities

    4. 4- التهديدات اللي ممكن تواجهك (وموضع المقال ككل واحد منها) Threats

الكلام دا ممكن ميكونش مفيد في الوقت الحالي أو أنت شايفه كدا، بس في الحقيقة هو مهم وهتحتاجه فيما بعد فا مفيش داعي لإهماله أنا شخصياً بعمله من وقت للتاني، لو عاوز تعرف إزاي تقدر تعرف بالتفصيل في مقال إزاي تخرج من سجن وضعك الحالي.

إزاي تتغلب على مشكلة نقص العملاء 4

2- الفئة المستهدفة أو العملاء المحتملين

الكلام اللي فات دا كله بقي إسمه Situational Analysis وبعد ما حددناه الوقتي نقدر بنبتدي نوجه تركيزنا بشكل أكبر للفئة المستهدفة أو العملاء المحتملين، ودول قبل أي حاجة علشان تقدر تقول على حد إنه عميل محتمل لازم يتوفر فيه شرطين أساسيين:

  1. 1- أنه مهتم فعلاً بالخدمة/المنتج اللي بتقدمه.

  2. 2- عنده القدرة الشرائية إنه يطلبه.

أعرف السوق كويس قبل ما تاخد أي خطوة.

بعد ما عرفت تحدد العملاء المحتملين اللي تنطبق عليهم الشروط دي عن طريق سواء خبرتك السوقية لو كان ليك سابق خبرة Market Knowledge أو دراستك للسوق والمنافسين بشكل عام Market Research & Competitors Analysis

هنا بقي بتبدأ تستكشفهم بشكل أعمق، لأ أعمق بجد! بتحاول تعرف إيه احتياجاتهم؟ اهتماماتهم؟ طريقة كلامهم؟ أماكن تواجدهم؟ بيحبوا إيه؟ بيفكروا إزاي؟ وإزاي تقدر توصلهم؟ والأهم إزاي تتواصل معاهم بأفضل طريقة؟ Your TOV

الأسئلة دي جزء بسيط من الأسئلة اللي المفروض تحدد إجابتها مسبقاً لأن من غيرها أنت هتضيع وقت ومجهود كبير في محاولة البيع للأشخاص الغلط أو حتى البيع بالطريقة الغلط للأشخاص الصح والأتنين نتيجتهم إنك مش هتبيع أصلاً! أعتقد الفكرة واضحة.

نسيت هالة!!!

نسيت أنت طبعاً هالة وأنت بتقرأ كل دا، هالة اللي فتحت الستور فوق وأنت مقولتلهاش حتى مبروك! هالة بعد ما فتحت الستور بتاعها فضلت موجودة فيه وبتهتم جداً بتطوير الخدمات والمنتجات اللي بتقدمها في الستور وشكله وبقت قوية جداً في اللي بتعمله على المستوي العملي، لحد ما جت في يوم ولاحظت أنه على الرغم من إن المدرسة بتاعتها جميلة، نظيفة، متطورة ومنتجة إلا إنه مش بيجي أي طلاب جداد.

في الحقيقة هنا هالة وقعت في مشكلتين مش مشكلة واحدة، خّلونا الأول نحددهم عشان نحللهم بالتفصيل ونعرف أفضل حلول ليهم:

  1. 1- الأولي إنها اعتمدت بس على مصدر دخل واحد.

  2. 2- التانية إنها أهملت أهمية الجانب التسويقي لشغلها واعتمدت بس على الطلاب اللي عرفوا يوصلولها.

1- الاعتماد على مصدر واحد

بالنسبة لأول مشكلة مفيش أي داعي نتطرق ليها لأن لينا في قصة محمود وإزاي خسر 8000$ و3 سنين شغل بسبب إنه كان بيعتمد على موقع واحد بس وهو Upwork خير تجربة ومثال في تجنب الخطأ دا.

إزاي تتغلب على مشكلة نقص العملاء 5

2- أهمية التسويق

أما بالنسبة لتانى مشكلة بيجي أهمية دور التسويق واللي اتكلمت عنه في معظم المقال، هالة هنا كان اعتمادها على الطلاب اللي بيجولها عن طريق الستور (الموقع) اللي بتمارس فيه شغلها.

اللي ممكن متكونش واخدة بالها منه هو إن دا بس مجرد 1-5% علي أقصي تقدير من المهتمين فعلاً باللي هي بتقدمه وعندهم القدرة الشرائية، أو بصيغة أوضح من الناس اللي فعلاً محتاجين Need الخدمة اللي بتقدمها بس فعلياً ميعرفوش عنها حاجة أو حتى أزاي يوصلولها!

معلومة متقدمة

التسويق مش بس بيتوقف على الـ Need في حاجات أكثر تعمقاً زي ?How deep is their need والجانب الأكثر تعقيداً وهو إنهم ممكن ميكونوش عارفين أصلاً أنهم محتاجين دا فا دورك إنك تخلق عندهم الحاجة ليه وبعدها تقدمه، طبعاً دي حاجات متقدمة شوية ومش لازم تعرفها الوقتي، هتعرف انا ليه بذكرها في الآخر متستعجلش.

يعني بصورة أكثر وضوحاً هالة دورها مش بيقتصر بس على تقديم الخدمة ولكن على البحث المستمر والوصول للي محتاجين الخدمة دي فضلاً عن الاعتماد على إنهم هما اللي هيوصلولها لأن دا أصعب كتير وأكيد هيسبب مشكلة الجزر في وقت ما، ممكن مش شرط توصلهم بس تكون على الأقل موجودة قريب من أماكن تواجدهم.

هل من المنطقي إنك تفتح محل لبيع أدوات التزلج على الجليد في دولة صحراوية؟

بالتأكيد لأ!

وهل من المنطقي إنك تبيع أجهزة Apple في أقصي دول أفريقيا الجنوبية؟

أنت أكيد مجنون لو عملت كدا، الناس دي بالتأكيد مش مهتمة وبالتأكيد معندهاش القدرة الشرائية والأكثر غرابة إن المنتج دا مساعدش في حل مشكلة ملحّة عندهم فا بالتالي دا غلط تماماً.

وزي ما بنقول في المثل المصري أو كما غنتها شريفة فاضل ومن بعدها منير

متروحش تبيع الميه في حارة السقايين

أعتقد بعد كل دا بقي واضح جداً أهمية تعلم واكتساب مهارات البيع والتسويق (هما حاجتين منفصلين تماماً بالمناسبة) بعد ما تعرف الخطوات اللي فوق وتنفذها هنا بقي يجي الدور إني أقولك

إزاي تتغلب على مشكلة نقص العملاء 6

7 نصايح تسويقية هتغير حياتك كفريلانسر:

  1. 1- أول وأهم نصيحة أقدر اقدمهالك وحقيقي كنت أتمنى أعرفها في بداية شغلي هي إنك دايماً أحتفظ بـ 10% على الأقل من دخلك وأستغله في التسويق، مهما كان المبلغ صغير بس دي عادة هتأمنك بشكل رهيب وكمان هتضاعف دخلك لو عرفت تستغلها صح.

  2. 2- بداية التسويق ليك هتكون من الـ Portfolio الخاص بيك، عشان كدا أنصحك تقرأ مقال الـ Portfolio الأول ولا الشغل  وفيه هتلاقي كل اللي محتاج تعرفه، وميقلش أهمية عنه آراء العملاء اللي بتتعامل معاهم، أطلب دايماً من عملائك تقييمهم لتجربة التعامل معاك وكتابة رأي Testimonial عنك وضيفهم لموقعك أو المكان اللي بتعرض فيه شغلك.
  3. 3- اهتمامك بتوفير خدمات مجانية للعميل زي الاستشارات وتقديم قيمة مضافة في خدماتك المدفوعة بيزود نسبة ترشيحك من العميل دا بنسبة مش أقل من 50% ودا اللي بيسمى بـ Word of Mouth، فا متخليش علاقتك بعملائك مقتصرة بس على الخدمات اللي بيدفعوا مقابلها.

    من الحاجات اللي شخصياً بقدمها إني بساعد العملاء بتوعي في البيزنيس بتاعهم بشكل كلي -بحكم خبرتي في دا- ومنهم اللي بيتواصل معايا بشكل يومي لمناقشة تطور البيزنيس الخاص بيه وبكون سعيد بمساعدته بعيداً عن أي حاجة، ودا تأثيره بيكون رهيب علي المدي البعيد عن تجربة.

  4. 4- للمرة التانية بكرر أهمية إنك تنوع أماكن تواجدك ومتعتمدش على مصدر واحد بس في الشغل، وأستغل كل الوسائل المتاحة لأنها ممكن تكون مكان تواجد عميل محتمل وأنت مش واخد بالك (أنت متعرفش الخير فين) والأهم تستغلها صح.

    من أكتر الأخطاء الشائعة اللي بشوفها وبتضايقني بشكل شخصي إني بشوف من وقت للتاني فريلانسرز بيسخروا ويتريقوا على العملاء وبينشروا تجارب سيئة مروا بيها مع عملاء وخلافه، مش هقول دا صح أو غلط بس ممكن تجرب تشوف التايملاين بتاعك من وجهة نظر عميل محتمل ليك، وانا متأكد إنك مش هتحب تتعامل مع نفسك.

    أستغل تواجدك علي السوشيال ميديا مثلاً في تقديم نصائح للعملاء المهتمين باللي بتقدمه ونشر أعمالك و Case Studies عنها والأهم تكوين صورة إيجابية عنك في نظرهم كل دا بيندرج تحت الـInbound Marketing، لو شايف إن دا مش مهم اسمحلى أقولك إن 80% من العملاء اللي سبق واتعاملت معاهم بيشوفوا كل حرف بكتبه علي التايملاين الخاص بيا وبيهتموا جداً بدا وبيكونوا صورة عني من خلاله, ودا بيقودنا للنصيحة الخامسة.

  5. 5- أهتم بالأرقام والإحصائيات وأعمل Analysis بشكل دوري، للأسف النقطة دي كتير مش بيعملوها لأنهم ببساطة ميعرفوش حاجة عنها، على الرغم من إن دي الحاجة اللي هتساعدك تفهم طبيعة عملائك وعملائك المحتملين بشكل أوضح وأفضل.

    على سبيل المثال لو قدرت تعرف من عملائك الحاليين إزاي هما وصلولك؟ ممكن تكتشف إن 90% منهم مثلاً كان عن طريق الـ Portfolio الخاص بيك، أو عن طريق توصية من شخص بذاته، أو مشاركتك في مكان ما أو حتى عمل سابق عملته. معرفتك لمعلومة قد تبان بسيطة زي دي هتفرق معاك بنسبة 150% لأنك كدا عرفت الـ Customer lifetime value) CLV) بتاعك وبالتالي عرفت تستثمر أكتر فين.

    يعني لو اكتشفت إن 70% من عملائك عرفوك عن طريق حسابك على موقع Behance مثلاً و10% منهم عرفوك عن طريق حسابك على Facebook و20% عرفوك عن طريق توصيات من عملاء سابقين أو حاليين، أنت كدا عرفت إيه أنسب مكان تزود مجهودك فيه للتسويق لنفسك بشكل أفضل لأنه هيحقق أكبر عائد، أعتقد الفكرة وصلتك.

  6. 6- فكر في الموضوع بمبدأ باريتو 80/20، إنك تستثمر في شغلك وخبرتك بنسبة 80% وتسوق لنفسك وتهتم بالـ Personal Branding الخاص بيك بنسبة 20% بس مش هيكون بنفس الفاعلية في حالة العكس، والأفضل تخليها 50% 50% أو حتى 60% 40% المهم أنك تعرف إنه من غير تسويق محدش هيعرف بوجودك من الأساس والمثال اللي فوق خير دليل.

    متبقاش موجه تركيزك كله على شغلك ومهارتك ومهمل أهمية الجانب التسويقي دا ببساطة غلط! لو انت شغال في شركة فا غالباً دا بيكون دور قسم خاص في الشركة أنهم يقوموا بالمهمة دي، لكن أنت فريلانسر أنت شركتك الخاصة، أنت المدير والمسوق والمحاسب والمحلل وحتى اللي بتتولي الجانب التنفيذي!

    الفريلانسينج مش بالسهولة اللي متخيلها، لما تعمل الـ SWOT Analysis فوق راجع الأدوار دي كويس وشوف إيهما نقطة ضعف بالنسبالك وأستقطع وقت أكبر في تعلمه وتطوير نفسك فيه، وهتشكرني فيما بعد.

    أو ممكن لو شايف إن دا هيعوقك أو مش حابب تعمله، دور علي مسوق شاطر وأعرض عليه إمكانية التسويق ليك ولشغلك بشكل أكثر كفاءة وأدفع مقابل دا بسخاء لأنه هيعود عليك بنفع أكبر.

  7. 7- دي بعتبرها النصيحة الأهم وهي إنك تنتظر المقال اللي جاي لأنه هيكون فيه دليلك الشامل لاختيار العميل الصح وإزاي تتعامل مع العملاء الصعبين، ودا بالتأكيد فيه حاجات مهمة لازم تعرفها عن طبيعة العملاء نفسهم وأنسب الطرق للتعامل مع كل نوع لأنه هيساعدك جداً في تحديد العميل الأنسب ليك واللي بدوره هيقلل المشاكل اللي هتواجهك بعد كدا بنسبة 90%.

    لأنه ببساطة ممكن وأنت بتحاول تتغلب علي مشكلة نقص العملاء تقع في مشكلة أكبر وهي إنك تتعامل مع أي عميل بيعرض عليك شغل وأنت مش مدرك عوامل مهمة ممكن تكون سبب في تجربة سلبية ليك لذلك وجب التنبيه.

لو كنت وصلت لحد هنا فا اسمحلى أشكرك على وقتك وأتمني إن المقال يكون أستحق وقتك، لحد هنا الجانب النظري خلص، أستعد بقي للجانب التنفيذي.

الجانب التنفيذي

في الحقيقة بداية من إجابتي لسؤال هالة، وانا كنت مشغول في التفكير في إزاي أقدر أكتب مقال بيحل المشكلة والمشكلة المترتبة عليها من غير ما يتحول لكتاب! فا ابتكرت طريقة سميتها Breadcrumbs (سميتها كدا لأني معرفش هل دي حاجة موجودة فعلاً أو لأ)

على مدار المقال أكيد لاحظت وجود مصطلحات إنجليزية كتير مميزة باللون الأزرق، دا مقصود تماماً ودي كانت عبارة عن Breadcrumbs فيها أهم الخطوات أو المسار التعليمي اللي هتحتاجه علشان تتعلم Marketing بشكل أفضل وبترتيب صح ودا لسببين:


الأول 
إني لو كنت شرحت كل حاجة منها المقال كان هيتحول لكتاب ومش هيكفي شرحها.

والتاني إنه المتعة الحقيقة مش في الحصول على المعلومة بقدر ما هي في رحلة الحصول عليها، انا متأكد إنك لما تدور على كل مصطلح من المصطلحات دي وتبدأ تتبعه وتفهم أكتر عنه هتلاحظ إنك استفدت 10 أضعاف أكتر من إني كنت أتكلم عنه وكمان هيقودك لتعلم مصطلحات وجوانب أكتر مقدرتش أتكلم عنها في المقال لسبب أو لآخر، ودا هيخليك تقدر بشكل أفضل وتنفذها أسرع.

مهمتك الحالية إنك تبحث أكتر عن المصطلحات دي وتعرف أكتر عنها عن طريق الأسئلة دي:

ليه أنت محتاج تعرفها؟ وإزاي تستفيد منها في شغلك؟ وإيه هي في الأساس؟ 

ولو حاسس إنك محتاج تعرف أكتر عن أي منها وأكتر لأني للأسف مقدرتش أضيف أكتر حفاظاً على وقتك في المقال تقدر تسألني في أي وقت وهكون سعيد بمساعدك، ولو حاسس أن سؤالك ممكن يكون مفيد لغيرك أتمنى تشاركه في التعليقات وأتمني أقدر أساعدك بشكل أفضل.

وفي النهاية كنت حابب أنوه إني عرفت كل دا وأكتر لأني كنت محظوظ بإني أشتغل في مجال التسويق في شركة عظيمة وهي Oxygen، اللي أقصد أقوله إنك متحسش بالإحباط لو لقيت إنك محتاج تعرف حاجات كتير في المجال دا أو حتى تقلل من أهميته، صدقني انا أحياناً كتير بهتم بتطوير نفسي فيه أكتر من شغلي كمصمم ودا بيعود عليا بنفع أكبر وأنصحك بالمثل.

حابب أختم المقال بتدريب عقلي جميل وهو إنكم تقترحوا حلول تانية مختلفة لمشكلة هالة من وجهة نظركم أو تجاربكم الشخصية؟

وتقدروا طبعاً تشاركوا مشاكلكم الخاصة وتجاربكم وممكن نتكلم عنها بالتفصيل في مقال جديد ❤

إزاي تتغلب علي مشكلة نقص العملاء

, , , ,

ما هو تقييمك لهذا المقال؟

إزاي تتغلب على مشكلة نقص العملاء واحدة من مشاكل الفريلانسينج الأكثر شيوعاً هي مشكلة المد والجزر، إنك في بعض الأوقات بيكون عندك عملاء كتير جداً وفي أوقات تانية بيكون العملاء الحاليين قليلين جداً، إزاي تتعامل مع المشكلة دي؟ دا اللي هنعرفه في قصة هالة واللي هتكلم عنها في المقال دا. بالأمس القريب وصلني سؤال جميل من هالة، مدرسة لغات من الجزائر،...
5 1 5 2
0 / 5 التقييمات 5

Your page rank:

هل وجدت هذا المقال مفيدًا؟

إزاي تتغلب على مشكلة نقص العملاء واحدة من مشاكل الفريلانسينج الأكثر شيوعاً هي مشكلة المد والجزر، إنك في بعض الأوقات بيكون عندك عملاء كتير جداً وفي أوقات تانية بيكون العملاء الحاليين قليلين جداً، إزاي تتعامل مع المشكلة دي؟ دا اللي هنعرفه في قصة هالة واللي هتكلم عنها في المقال دا. بالأمس القريب وصلني سؤال جميل من هالة، مدرسة لغات من الجزائر،...
5 1 5 7
هل أفادك المقال؟ شارك الفائدة ❤

6 تعليقات. أضف تعليق

  • عثمان جواليل
    ديسمبر 9, 2018 5:40 م

    مشكور جدا اخي علي على المقال الاكثر من رائع المليئ بالمعلومات القمية ..

    كما ذكرت اخي التسويق مهم جدا فيما يتعلق بي بيع اي خدمة او منتج .. فالتسويق الجيد يضمن لك سيرورة نشاطك الخدماتي او التجاري على المدى البعيد و تحقيق اهدافك والكثير من الاشياء ..

    مكشور اخي مرة اخرى هذا اول مقال لي على مدونتك و راح اقرأ كل مقالاتك حرف حرف ..

    رد
    • كل الشكر ليك أخي عثمان علي كلامك ورأيك الجميل، في الحقيقة أنت كفيت ووفيت فعلاً فيما يتعلق بالتسويق وأهميته.

      مفيش داعي للشكر لأن دا واجبي والهدف الأساسي من إنشاء المدونة، وسعيد أنه اول مقال ليك وإن شاء الله الباقي هيكون أكثر نفعاً وإفادة بإذن الله.

      رد
  • ذكي شاهين
    يناير 17, 2020 10:12 ص

    شكرا جزيلا على الكنز المعرفي الجميل ده
    أنا زعلان إني مش متابعك من زمان
    لكن فرحان أني بأقرأ مقالاتك
    جزاك الله خير

    رد
  • أشكرك أستاذ على كل المعلومات المفيدة.
    حلمي هو أن أحصل على مشاريع من دول أجنبية كدول أوروبا، كيف أحصل على هكذا مشاريع دون اللجوء لمواقع العمل الحر. هل أضع إعلانات على فيسبوك، أم هل أنشر محتوى باللغة الانجليزية على انستغرام. أريد جوابا

    رد
    • لا داعي للشكرلا يا ياسين فهذا واجبي،

      حلمك مشروع للغاية يا ياسين، ولكن للأسف لا يمكنني القول بأن تحقيقه سيكون سهل، في البداية يجب أن تعرف الثقافة وكيف تقوم بالتعامل معهم وفق ثقافتهم، أثناء ذلك ستعرف أين من المفترض عليك التواجد فهذا يتوقف على الخدمات التي تقدمها، فإذا كنت تقوم بتقديم خدمات لأصحاب الأعمال سيكون من الجيد أن تتواجد على لينكدإن وبناء جمهورك هناك عن طريق نشر محتوى يجذب إنتباههم ويفيدهم ويعرض نقاط قوتك كذلك.

      رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: