إزاي العميل بيفكر اثناء اختيار الفريلانسر 1

إزاي العميل بيفكر اثناء اختيار الفريلانسر

الأسئلة اللي أي حد في بدايته كفريلانسر بيدور على إجابات ليها هي إزاي يوصل للعميل؟ وإزاي يختار العميل الصح؟ وإزاي يتعامل مع العميل؟، بس السؤال هنا هل سبق وفكرت إزاي العميل بيوصل للفريلانسر؟ وعلى أي أساس بيختار الفريلانسر؟ وإزاي بيتعامل معاه؟ لأنك غالباً مفكرتش في الموضوع دا قبل كدا فا استعد تاخد رحلة للجانب الآخر من دماغ العميل في المقال دا.

 غالباً الغالبية العظمي من اللي بيبدأوا حياتهم كفريلانسرز بيكونوا شايفين الموضوع من وجهة نظرهم هما واللي قد تكون مختلفة تماماً مع وجهة نظر وحتى احتياجات العميل وطبعاً دا بينتج عنه عدد أقل من العملاء وكتير من التجارب الغير ناجحة.

 زي ما عرفت في المقال اللي فات أصعب أنواع العملاء وكيفية التعامل مع كل نوع منهم، في المقال دا هشرح بالتفصيل إزاي العميل بيفكر أثناء اختياره للفريلانسر وعلى أي أساس بياخد القرار دا.

 المقال ظاهرياً هيكون من وجهة نظر العميل، فا أنت دورك كفريلانسر هو إنك تقيس الكلام دا على نفسك علشان تطبقه بالشكل اللي يتناسب مع طريقة تفكير العميل، والكلام دا كله مبني على تجارب عملية كتير هتشوفها في المقال الجاي إن شاء الله لأني بعيداً عن كوني فريلانسر انا كمان كلاينت لكتير من الفريلانسرز.

 ومن وقت للتاني الكلاينتس بيطلبوا مني أساعدهم في إنهم يلاقوا فريلانسرز في مجالات تانية مختلفة (Recruitment) فا دا جزء أساسي من شغلي لفترة طويلة، دا توضيح بسيط في المقدمة عشان تكون فاهم طبيعة الكلام اللي جاي فا أستعد للمهم.

السؤال الأهم، إزاي الكلاينت بيختار الفريلانسر؟

نبدأ بالسيناريو الأكبر وهو إنك قررت تبدأ حياتك على أحد مواقع الفريلانسينج المختلفة واللي تقدر تعرف عنها أكتر في مقال إزاي تبدأ حياتك كفريلانسر، ولكن إتفاجئت بأن فيه آلاف الفريلانسرز في نفس مجال شغلك بمختلف الخبرات والمستويات، ابتديت تخاف لأن كدا فرصة اختيارك بقت قليلة جداً، وبالتالي تفكيرك بقي منصب على إنك تدور على أول عميل بس اللي ممكن متكونش واخد بالك منه هو إن العميل بيدور على أي فريلانسر!؟

عشان تعرف العميل بيختار إزاي دا بيخلينا نقسم المجالات لنوعين:

  1. مجالات بيتم الاختيار فيها على أساس الـ Portfolio

في أنواع من الشغل الكلاينت فيها بيكون بيدور على ستايل معين، زي التصميم عموماً والرسم والموشن جرافيك والـ Voice Over أو حتى الترجمة -أحياناً- وخلافه، غالباً المجالات دي العميل فيها بيكون بيدور على ستايل شغل معين وبالتالي المجالات دي بتعتمد بشكل أساسي على الـ Portfolio واللي تقدر تعرف أكتر عن كيفية عمله بطريقة تجذب العميل من مقال الشغل الأول ولا الـ Portfolio.

بمعني إنه بيدور على ستايل معين في الرسم والتصميم مثلاً فا بيدور لحد ما بيلاقي الحد اللي بيعمل الشكل اللي موجود في دماغه فعلاً والمجالات دي بتكون أسهل في الوصول للفريلانسرز من وجهة نظر العميل بكل تأكيد.

  1. مجالات بيتم الاختيار فيها على أساس الخبرة.

النوع دا هو النوع الأصعب بالنسبة للعملاء فيما يتعلق باختيار الفريلانسر، خصوصاً لو كان في مجال البرمجة والتطوير والاستشارات وصيانة المواقع وما شابه، لأنك في معظم الأحيان صعب تشوف طريقة الشغل أو النتيجة النهائية منه من قبل تنفيذه، والمجالات دي المنافسة فيها بتكون أصعب وأكثر ضراوة من سابقتها.

وبشكل أساسي بتعتمد على مهارات التواصل لأن مشكلة العميل ممكن تكون مختلفة تماماً عن أي مشكلة تانية فا أنت محتاج تحللها وتفهم المشكلة بشكل أكبر ومدي قدرتك على حلها قبل حتى البدئ فيها، وكتير من الوقت بيكون فيها كتير من التنازلات خصوصاً في البدايات.

  1. مجالات بتعتمد على النتيجة

في مجالات كدا بين الأتنين بتعتمد على النتيجة النهائية من الشغل زي مثلاً الـ Website optimizations أو SEO Ranking وممكن حتى الـ Digital Marketing يكون الاتفاق قائم على نتيجة معينة، ودي هتكلم عنها فيما بعد.

الخلاصة

نقدر نختزل الكلام دا بأن المجالات الفنية عموماً أسهل في الاختيار من قَبَل العميل من المجالات التقنية الأكثر تعقيداً واللي غالباً العميل مش بيكون عارف أكتر من الهدف النهائي اللي عايز يحققه أو المشكلة اللي بيحاول يحلها.

إيه الاستفادة من الكلام دا؟

 الاستفادة باختصار شديد إنك لو كنت فريلانسر بتشتغل في مجال إبداعي فا أول نقطة غالباً العميل بيدور عليها في بروفايلك هو شغلك السابق لأن على أساسه بيقيم إذا كان دا فعلاً اللي محتاجة أو لأ أو هل انت فعلاً الشخص اللي هتقدر تنفذ اللي عايز ينفذه أو يدور أكتر، فا اهتمامك بالـ Portfolio الخاص بيك هي أول نقطة تهتم بيها وهتلاقي في المقال اللي فوق كل النصايح اللي هتساعدك في كدا.

اما لو كنت بتشتغل في مجال تقني أو بيعتمد بشكل أساسي على احتياج ومشكلة العميل بشكل مخصص زي تطوير المواقع مثلاً فا هنا الموضوع بيكون أكثر تعقيداً بالنسبة للعميل في البحث، وكلما زاد تعقيد الـ Task كلما زاد قلق العميل كذلك وزادت معاه صعوبة اتخاذه لقرار اختيار فريلانسر معين.

بعيداً عن العوامل الرئيسية زي البادجت أو الوقت المتاحين للتاسك أو تناسبهم مع الفريلانسرز، لأن دي عوامل رئيسية في أياً كان المجال، العميل غالباً ما بيعرض البريف أو المشكلة علي أكبر من الفريلانسرز في المجال دا وبيختار بشكل أساسي على تواصلهم معاه ودي حقيقية للأسف كتير من الفريلانسرز مش بيدركوا مدي أهميتها.

وهنا لما بقول إن العميل بيعرض البريف علي أكبر عدد ممكن من الفريلانسرز دا معناه إنك لازم تتأكد إنك تكون واحد منهم في الأساس، بمعني إنه لازم جداً يكون بروفايلك (أو الـ Gig اللي بتقدمها) موضح تماماً إيه اللي بتقدمه من خدمات بشكل منفصل وواضح ومباشر ويفضل لو كان مخصص زي المثال دا

إزاي العميل بيفكر اثناء اختيار الفريلانسر 3

دا واحد من الناس اللي بحب اتعامل معاها شخصياً، هتلاحظ إن كل الخدمات اللي بيقدمها رغم تقاربها إلا إنها موجودة في Gigs منفصلة تماماً ومخصصة تماماً للنوع دا من الشغل، طبعاً نفس الكلام لو كنت بترسم مثلاً بأكتر من ستايل يفضل جداً لو تخلي كل نوع رسم في Gig منفصلة دا هيساعد العميل أنه يوصلك أسرع وياخد قرار اختيارك بشكل أفضل.

طبعاً مهم جداً إنك تفصل دا عن خبراتك الشخصية، بلاحظ إن كتير من الفريلانسرز بيتكلموا بنسبة 80% عن خبراتهم ومهاراتهم وبنسبة أقل من 20% عن الخدمات اللي بيقدموها بشكل منفصل ومختصر ودقيق.

ودي حاجة مفيش عميل بيحب يشوفها لأن ببساطة العميل بيبحث عن حل مشكلته مش عدد سنين خبرتك ولا إيه اللي اتعلمته من لغات برمجة في حياتك مثلاً! فا كل دا بالنسباله مش بيأثر على قرار اختيارك بنسبة أكتر من 2% على أقصي تقدير.

إيه اللي تعمله ومتعملوش وانت بتكتب الـ Gig Description؟

 الموضوع يبان معقد فا عملت بحث سريع عن Optimize WordPress Website Speed ودول نتيجتين مختلفين تماماً كأمثلة على إيه الصح والغلط في الـ Gig Description

إزاي العميل بيفكر اثناء اختيار الفريلانسر 4

مثال علي Gig Description عبقري!

حقيقي انا فرحت جداً لما شوفت المثال دا، الـ Gig دي كتبها شخص متمرس جداً في الـ Copywriting بشكل رائع، تعالوا نحللها ونشوف ليه هي ناجحة:

  1. أول سطر في وصف الخدمة بيتكلم بشكل مختصر ودقيق جداً عن الخدمة دي مقدمة لمين تحديداً وبشكل متخصص جداً.
  2. تاني حاجة اتكلم عنها هي إيه اللي هتستفاده من الخدمة دي أو إزاي هي هتعود عليك بالنفع ودا في الـ Copywriting إسمه (WIIFM (What in it for me وحاجة عبقرية منه إنه يستخدمها بالشكل دا، لأن دايماً العميل بيدور على الإفادة اللي هتعود عليه من الخدمة مش الخدمة نفسها ?
  3. ظاهرياً هو هنا بيقولك أنه أحسن من المنافسين بإنه وضحلك إزاي هما بيشتغلوا لكن اللي هتفهمه فعلا من جملة زي دي هو إنه حد خبير في مجاله وبيشتغل صح من غير ما حتى يقولها بشكل مباشر، آخر سطر دا حاجة في منتهي العبقرية وهو إنه أستخدم عامل الـ Scarcity (الترويع) في إقناعك إنك تطلب خدمته لأن الخدمات الرخيصة غالباً ممكن تبوظ موقعك في النهاية.من الناحية السيكولوجية عامل الإخافة أو الترويع من أهم العوامل اللي بيتم استخدامها في توجيه قراراتنا عموماً وفي التسويق خصوصاً بس دا مش موضوعنا حالياً.
  4. رابع حاجة هي إنه اتكلم عن خبرته، وطبعاً لما أتكلم عن خبرته متكلمش عن نفسه إطلاقاً بل بالعكس كل اللي اتكلم عنه هو الجزء المتعلق بيك أنت كعميل محتمل وكمان بيوضح أنه فعلاً خبرته كبيرة وأشتغل على مواقع أكثر تعقيداً.
  5. طرحه للمشكلة دي علي الرغم من إنها قليلة جداً (شخصياً كنت بدور علي حل ليها) بيضيف نقطة إضافية لمدي خبرته وأنه مر بتجارب كتير قبل كدا وإنه فاهم تماماً هو بيعمل إيه.
  6. سبب إضافي أكثر عبقرية عن ليه تطلب خدمته متعلق بالأرقام وبيقدملك Facts واضحة ومباشرة عن ليه تطلب خدمته لأنها هتساهم في زيادة مبيعاتك، ودي الخدمة الحقيقة اللي هو بيقدمها زيادة سرعة الموقع دي مجرد وسيلة لتحقيق زيادة في المبيعات أو الترافيك مثلاً، أنت مش بتبيع زيادة السرعة أنت بتبيع النتيجة النهائية واللي هي زيادة المبيعات وطبعاً استغلاله لكدا كان عبقري.
  7. إضافة (CTA (Call to Action هنا هو بيحفز العميل المحتمل أنه ياخد قرار الشراء عن طريق جملة بسيطة تحفزه يطلب الخدمة.

 

إزاي العميل بيفكر اثناء اختيار الفريلانسر 5

 

المثال دا قد يكون درس في الـ Copywriting أكتر ما هو مثال عن إزاي تكتب Gig description بأفضل شكل ممكن، أهم حاجة تلاحظها هي ترتيب العناصر وإزاي هي كلها متمحورة حول العميل نفسه وكلامه عن نفسه كان لا يتعدى 2% منها كلها، وعلى الرغم من إن الخدمة اللي بيقدمها سعرها بيبدأ من 195 وبيوصل لـ 550$ (واللي يعتبر غالي جداً في النوع دا من الشغل) إلا إنه نجح في تحقيق 434 تقييم كلهم 5 stars وبقي Top Rated ودا بيأكد تماماً على كلامه.

إزاي العميل بيفكر اثناء اختيار الفريلانسر 6

مثال علي Gig Description سيئ

بعد بحث سريع أقدر أقولك إن دا مثال جيد علي كتابة وصف خدمة سيئ للغاية، ليه؟

  1. زي ما وضحت في المثال السابق أول سطر في وصف خدمتك هو أهم سطر لأنه هو اللي بيحدد هل العميل هيكمل قراءة باقي الوصف أو هيخرج، ببساطة العميل لما بيشوف في أول سطر إنك بتتكلم عن نفسك وخبرتك غالباً أول حاجة بيعملها هي إنه بيقفل الصفحة بكل بساطة وبدون تفكير، نسبة إنه يكمل قراءة بتقل بنسبة 80%.زي إنك حالياً بتقرأ المقال دا عشان أول فقرة فيه وضحت مشكلة أنت بتواجهها وكنت مهتم تعرف حلها ولو كنت قولتلك مثلاً، أنا علي خبرة 6 سنين في الفريلانسينج بالتأكيد مكنتش هتكمل قراءة المقال لأن ببساطة دي معلومة أنت مش مهتم تعرفها، أعتقد المثال دا وضح كفاية اللي اقصده.
  2. كجزء صغير من كلامه عن خبرته اتكلم عن إيه الخدمة اللي بيقدمها ولكن بشكل مبهم تماماً وبدائي في إنه هيساعد في زيادة سرعة موقعك، هو هنا بيعرض عليك الخدمة اللي هو بيقدمها مش الإفادة اللي هتعود عليك منها ودي حاجة بدائية جداً وغير مقنعة إطلاقاً.
  3. سبب غير مبرر ومتحور حول الذات لليه انت كعميل محتاج تتعامل معاه ويبدو أنه حشو وزيادة لا داعي ليها إطلاقاً وغالباً متاخدة من مقدمة Gig تانية.
  4. لاحظ أنه حتى في الخدمات اللي هيقدمها قال “We Will” لحد الآن متكلمش عن العميل إطلاقاً كل كلامه عن نفسه واللي بيقدمه وإزاي هو بيقدمه وكمان كلامه عن الخدمة سطحي وانا كعميل محتمل مفهمتش الكلام دا هيفيدني بإيه فا طبعاً نسبة اقتناعي واختياري ليه حالياً بقت بالسالب (على افتراض إني كملت قراءة).
  5. بعد 5 فقرات قرر أخيراً يخاطب المشكلة الحقيقة اللي العميل بيواجهها واللي سببها بطيء الموقع ولكن للأسف مقدمش حتى حل مبدأي ليها أو سبب أقوي في الـ Scarcityمثلاً، ولكن ربط الحل بطلب الخدمة اللي بيقدمها، على كلٍ تخيل لو كانت الفقرة دي في البداية مدي زيادة اهتمامك بكلامه كان هيكون إزاي.
  6. وهنا سبب إضافي لليه أنت محتاج تختاره ولكن متعلق تماماً بيه هو شخصياً وأنه عنده خبرة سنتين وبيشتغل ضمن فريق وحاجات العميل مش مهتم أساساً يعرفها لأنها مش هتفرق معاه في حاجة كل المهم هو حل المشكلة.
  7. في الأخير CTA تقليدية هتشوفها في جميع أنحاء Fiverr وغيره من المواقع.

دا مثال علي Gig Description سيئ للغاية ودا بالظبط اللي المفروض متعملوش وأنت بتكتب وصف خدمتك، على الرغم من إن أسعاره هي أقل أسعار ممكنة في النوع دا من الخدمات 5-20$ إلا إنه مش محقق أي مبيعات ومتوقعش إن الـ Gig دي هتحقق أي مبيعات الحقيقة.

بكدا أكون وضحت جزء كبير عن إزاي العميل بيختار الفريلانسر مش العكس، حتى الآن انا اتكلمت عن الموضوع بشكل نظري حفاظاً على حجم المقال وكم المعلومات فيه.

 المقال الجاي هيكون دراسة تجربة عملية مثيرة عن كل الكلام المذكور في المقال دا عن تاسك معقدة تكلفتها 900$ وكل مراحلها بداية من البحث عن الفريلانسر حتى آخر مرحلة من تسليم التاسك وكل التفاصيل الصغيرة مع وجهة نظري الشخصية فيها، فا استعدوا لتجربة مثيرة هتكتسبوا فيها كم كبير من الخبرة والتفاصيل.

المقال دا جزء من سلسلة مقالات هتساعدك تخوض تجربة العمل كفريلانسر وتكتسب الخبرة النهائية منها من غير ما تبذل أي مجهود وهتلاقوا كل المقالات السابقة والقادمة من السلسلة دي في هاشتاج ‫#‏دليلك_الشامل_لأفضل_تجربة_فريلانسينج.

 

لو جربت تفكر بدماغ العميل، تفتكر إيه السبب الأكبر اللي بيتم إختيارك كفريلانسر عشانه؟ 

, ,

ما هو تقييمك لهذا المقال؟

إزاي العميل بيفكر اثناء اختيار الفريلانسر الأسئلة اللي أي حد في بدايته كفريلانسر بيدور على إجابات ليها هي إزاي يوصل للعميل؟ وإزاي يختار العميل الصح؟ وإزاي يتعامل مع العميل؟، بس السؤال هنا هل سبق وفكرت إزاي العميل بيوصل للفريلانسر؟ وعلى أي أساس بيختار الفريلانسر؟ وإزاي بيتعامل معاه؟ لأنك غالباً مفكرتش في الموضوع دا قبل كدا فا استعد تاخد رحلة للجانب الآخر...
5 1 5 5
0 / 5 التقييمات 5

هل وجدت هذا المقال مفيدًا؟

إزاي العميل بيفكر اثناء اختيار الفريلانسر الأسئلة اللي أي حد في بدايته كفريلانسر بيدور على إجابات ليها هي إزاي يوصل للعميل؟ وإزاي يختار العميل الصح؟ وإزاي يتعامل مع العميل؟، بس السؤال هنا هل سبق وفكرت إزاي العميل بيوصل للفريلانسر؟ وعلى أي أساس بيختار الفريلانسر؟ وإزاي بيتعامل معاه؟ لأنك غالباً مفكرتش في الموضوع دا قبل كدا فا استعد تاخد رحلة للجانب الآخر...
4.64 1 5 11
هل أفادك المقال؟ شارك الفائدة ❤

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Fill out this field
Fill out this field
الرجاء إدخال عنوان بريد إلكتروني صالح.
You need to agree with the terms to proceed

مقالات مشابهة

القائمة
14 مشاركة
مشاركة عبر
نسخ الرابط

إبلاغ عن خطأ إملائي

سيتم إرسال النص التالي إلى المحررين لدينا: